Sinsẹ̀n Nugbo Nọ Kọ̀n Gbẹtọ lẹ Dopọ

DILE etlẹ yindọ sinsẹ̀n nọ klan gbẹtọvi lẹ to paa mẹ, sinsẹ̀n-bibasi hlan Jiwheyẹwhe nugbo dopo lọ tindo huhlọn nado kọ̀n gbẹtọ lẹ dopọ. To whenuena Islaeli yin akọta dide Jiwheyẹwhe tọn, Kosi ahundoponọ susu dọnsẹpọ sinsẹ̀n-bibasi nugbo. Di apajlẹ, Luti gbẹ́ yẹwhe akọta etọn Moabi tọn lẹ dai bo dọna Naomi dọmọ: “Omẹ towe lẹ wẹ na yin omẹ ṣie lẹ, Jiwheyẹwhe towe Jiwheyẹwhe ṣie.” (Luti 1:16) To owhe kanweko tintan W.M., Kosi susu ko lẹzun sinsẹ̀n-basitọ Jiwheyẹwhe nugbo lọ tọn. (Owalọ lẹ 13:48; 17:4) To godo mẹ, whenuena apọsteli Jesu tọn lẹ jẹ wẹndagbe lọ hẹn yì fidindẹn lẹ ji, ahundoponọ devo lẹ kọnawudopọ to sinsẹ̀n-bibasi hlan Jiwheyẹwhe nugbo lọ mẹ. “Mì lẹ́ sọn boṣiọ kọ̀n do Jiwheyẹwhe dè . . . nado nọ sẹ̀n Jiwheyẹwhe gbẹ̀nọ nugbonọ,” wẹ apọsteli Paulu wlan. (1 Tẹsalonikanu lẹ 1:9) Be sinsẹ̀n bibasi hlan Jiwheyẹwhe nugbo lọ tindo huhlọn mẹkọndopọ tọn mọnkọtọn to egbehe ya?

Homọdọdonugotọ lẹ dọnnu dọ e ma sọgbe nado dọho gando “sinsẹ̀n-basitọ nugbo lẹ” kavi “Jiwheyẹwhe nugbo” go. Yé sọgan tindo numọtolanmẹ to aliho mọnkọtọn mẹ, na yé ma yọ́n aliho depope he mẹ nugbo sọgan yin pinplọn te tọn wutu. Ṣigba nugbo-dintọ lẹ sọn akọ̀ susu mẹ ko yọnẹn dọ sinsẹ̀n-bibasi mayin whẹho ojlo mẹdetiti tọn de poun gba. Omẹ dopo kẹdẹ he jẹna sinsẹ̀n-bibasi mítọn wẹ Didatọ onú lẹpo tọn​​—yèdọ Jehovah Jiwheyẹwhe. (Osọhia 4:11) Ewọ wẹ yin Jiwheyẹwhe nugbo, bọ e sọ tindo jlọjẹ nado magbe lehe yè dona sẹ̀n ẹn do tọn.

Nado gọalọna mí nado tunwun nubiọtomẹsi etọn lẹ, Jehovah ko dọho hẹ mí gbọn Ohó etọn, Biblu gblamẹ. Dibla yindọ mẹhe tin to aigba ji to egbehe lẹpo wẹ tindo Biblu blebu kavi apadewhe etọn. Humọ, Visunnu Jiwheyẹwhe tọn domọ: ‘Eyin mìwlẹ nọte to ohó ṣie mẹ, mì na yọ́n nugbo.’ (Johanu 8:​31, 32) Enẹwutu, nugbo lọ sọgan yin yinyọnẹn. Podọ ahunjijlọnọ livi susu sọn sinsẹ̀n voovo lẹ mẹ yí adọgbigbo do to alọkẹyi nugbo ehe bosọ to yinyin kinkọndopọ to sinsẹ̀n-bibasi nugbo mẹ.​​—Matiu 28:​19, 20; Osọhia 7:​9, 10.

Pọninọ Lẹdo Aihọn Pé to Ojlẹ Mítọn Mẹ!

Dọdai ayidego owe Zẹfania tọn dọho gando pọninọ gbẹtọ lẹ tọn sọn akọ̀ voovo lẹ mẹ go. E dọmọ: “Whenẹnu wẹ yẹn [Jehovah Jiwheyẹwhe] na lẹ́ nùflo wiwe de hlan gbẹtọ lẹ, na yé mẹpo nido nọ dawhá ylọ oyín OKLUNỌ tọn, nado nọ sẹ̀n ẹn po abọ́ dopo po.” (Zẹfania 3:9) Yẹdenanu whanpẹnọ nankọtọn die ehe yin na mẹhe diọ yede bo to Jiwheyẹwhe sẹ̀n to kọndopọ mẹ lẹ!

Whetẹnu wẹ ehe na jọ? Zẹfania 3:8 dọmọ: “Mì nọtepọn mi wẹ OKLUNỌ dọ, kakajẹ azán he gbè yẹn fọ́n tite jẹ amánà lọ kọ̀n: na whẹdida ṣie wẹ nado ṣinyan akọta lẹ, na yẹn nido pli ahọludu lẹ dopọ, nado kọ̀n homẹgble ṣie do yé ji, yèdọ adi zogbe ṣie lẹpo; na aigba lẹpo wẹ yè na yí miyọ́n awuwhàn ṣie tọn vasudo.” Mọwẹ, to ojlẹ he mẹ Jehovah to akọta lẹ ṣinyan pli, e dike homẹmiọnnọ aigba tọn lẹ ni tindo ogbè wiwe ṣeke lọ whẹpo e do hẹn adi zogbe etọn wá yé ji. Ojlẹ lọ die, na akọta lẹpo bibẹpli na awhàn azán daho Jiwheyẹwhe Ganhunupotọ tọn to Amagẹdọni mẹ ko to yìyì to alọnu todin.​​—Osọhia 16:​14, 16.

Jehovah na ogbè wiwe ṣeke de omẹ etọn lẹ nado sọgan kọ̀n yé dopọ. Ogbè yọyọ ehe bẹ nukunnumọjẹnumẹ he sọgbe nugbo Biblu tọn gando Jiwheyẹwhe po lẹndai etọn lẹ po go hẹn. Ogbè wiwe ṣeke lọ dido bẹ yise tintindo to nugbo lọ mẹ, pinplọn ẹn mẹdevo lẹ, podọ gbẹninọ to kọndopọ hẹ osẹ́n po nunọwhinnusẹ́n Jiwheyẹwhe tọn lẹ po hẹn. E nọ biọ gbigbẹ́ tonudidọ he nọ hẹn kinklan wá dai gọna walọyizan ṣejannabi tọn lẹpo didesẹ sọn ahun mẹ, taidi akọ̀ ṣinṣinyan po owanyi akọta mẹtọn tọn po he aihọn ehe yin yinyọnẹn na. (Johanu 17:14; Owalọ lẹ 10:​34, 35) Ahunjijlọnọ lẹpo he yiwanna nugbo sọgan plọn ogbè ehe. Lẹnnupọndo lehe omẹ atọ́n heyin hodọdeji to hosọ he wayi mẹ​​—he ko yin hagbẹ sinsẹ̀n voovo lẹ tọn dai​​—wá yin kinkọndopọ to sinsẹ̀n-bibasi hlan Jiwheyẹwhe nugbo dopo lọ, yèdọ Jehovah mẹ do todin ji.

Yé Yin Kinkọndopọ to Sinsẹ̀n-Bibasi Nugbo Mẹ

To whenuena Fidelia, heyin hagbẹ zohunhunnọ Katoliki Lomu tọn, họ̀ Biblu na viyọnnu etọn nado yizan to wehọmẹ, e biọ to yẹwhenọ etọn si nado basi zẹẹmẹ nuhe ko jọ do ovi etọn atọ́n he kú lẹ go na ẹn sọn e mẹ. “Flumẹjijẹ nankọtọn die!” wẹ e dọ. Enẹwutu to whenuena Kunnudetọ Jehovah tọn lẹ basi dlapọn na ẹn, e kàn kanbiọ dopolọ se yé. To whenuena e hia nugbo lọ gando ninọmẹ he mẹ oṣiọ lẹ tin te sọn Biblu etọn titi mẹ, e wá doayi lehe ṣọṣi lọ ko klọ ẹ do go. E plọn dọ oṣiọ lẹ ma yọ́n nudepope enẹwutu ma to yaji to Limbo mẹ kavi to fidevo depope gba. (Psalm 146:4; Yẹwhehodọtọ 9:5) Fidelia bẹ boṣiọ sinsẹ̀n tọn etọn lẹpo dlan, doalọtena ṣọṣi lọ yìyì, bosọ jẹ Biblu plọn ji. (1 Johanu 5:21) Na owhe ao he wayi lẹ, e ko duvivi nugbo Owe-wiwe tọn pinplọn mẹdevo lẹ.

Tara he sọn Kathmandou sẹtẹn sọyi otò he mẹ tẹmpli Hindu tọn sọha vude tin te mẹ. Enẹwutu e dla ṣọṣi Méthodiste tọn de pọ́n na e jlo nado hẹn pekọ wá na nuhudo gbigbọmẹ tọn etọn lẹ wutu. Ṣigba e ma mọ gblọndo depope na kanbiọ etọn gando yajiji gbẹtọ tọn go. Enẹgodo Kunnudetọ Jehovah tọn lẹ dla ẹ pọ́n bo biọ nado plọn Biblu hẹ ẹ. Tara dọmọ: “Yẹn wá yọnẹn dọ Jiwheyẹwhe owanyinọ de ma sọgan ko hẹn yajiji he tin to aihọn mẹ lẹpo wá gba . . . Yẹn yin homẹhunnọ na nukundido aihọn jijọho tọn po kọndopọ tọn po he yẹn tindo.” (Osọhia 21:​3, 4) Tara bẹ boṣiọ Hindu tọn etọn lẹ dlan, doalọtena aṣa sinsẹ̀n otò etọn tọn lẹ hihodo, podọ taidi Kunnudetọ Jehovah tọn de, e nọ tindo ayajẹ nujọnu tọn to pekọ hinhẹnwa na nuhudo gbigbọmẹ tọn mẹdevo lẹ tọn mẹ.

Dọṣẹ-dọtọ de wẹ Panya Buddha-sẹ̀ntọ lọ yin to whenuena Kunnudetọ Jehovah tọn lẹ basi dlapọn na ẹn to tintan whenu to Bangkok, enẹwutu dọdai he tin to Biblu mẹ lẹ dọ̀n ẹn dogo. Panya dọmọ: “To whenuena yẹn plọn nuhewutu ninọmẹ egbehe tọn lẹ do gbọnvo na ehe Mẹdatọ lọ tindo linlẹn etọn to dowhenu po lehe ewọ ko basi tito nado vọ́ hẹngble he mẹhe jẹagọdo ewọ po nupojipetọ-yinyin etọn po lẹ hẹnwa jlado, e taidi dọ ohán de yin didesẹ sọn nukun ṣie lẹ mẹ nkọtọn. Owẹ̀n Biblu tọn lẹpo wẹ tin to kọndopọmẹ. Yẹn wá yiwanna Jehovah taidi omẹ de; ehe whàn mi nado wà nuhe yẹn yọnẹn dọ e sọgbe lẹ. Yẹn nọ tin to jejeji nado gọalọna mẹdevo lẹ nado mọ vogbingbọn he tin to nuyọnẹn gbẹtọ tọn po Jiwheyẹwhe tọn po mẹ. Nuyọnẹn nugbo ko diọ gbẹzan ṣie na taun tọn.”

To madẹnmẹ, Virgil jẹ ayihaawe sinsinyẹn tindo ji gando nuyise sinsẹ̀n etọn tọn lẹ go. Kakati nado nọ hodẹ̀ hlan Jiwheyẹwhe nado gọalọna mẹyuu lẹ podọ na nuhe e pọnhlan taidi ogbẹ́ akọ̀ ṣinṣinyan tọn he sọgan hẹn wangbẹna yovo lẹ wá lọ, e nọ hodẹ̀ bo nọ biọ nugbo lọ, nudepope he e yin, fidepope he e tin te. “To whenuena yẹn fọntite to wunkẹngbe to odẹ̀ vẹkuvẹku hihò hlan Jiwheyẹwhe godo, yẹn mọ linlinnamẹwe Atọ̀họ̀-Nuhihọ́ Lọ Tọn dopo to họmẹ. . . . E dona ko yin sisisẹ gbọn ohọ̀n glọ,” wẹ Virgil flin. To madẹnmẹ, e jẹ Biblu plọn hẹ Kunnudetọ Jehovah tọn lẹ ji vẹkuvẹku. E zindonukọn dọmọ: “Ojlẹ tintan to gbẹzan ṣie mẹ die, he yẹn tindo pekọ. . . . Hinhọ́n todido tọn jẹ wunhọ́n ji to ohò ṣie mẹ.” To madẹnmẹ Virgil kọnawudopọ hẹ mẹhe nọ ze todido nugbo dopo kẹdẹ lọ donukọnnamẹ dile e yin didọ to Ohó Jiwheyẹwhe tọn, Biblu mẹ do.

To whenuena Kunnudetọ de he nọ yin Gladys mọ dọ Charo he sọn Amerique Latine tindo nuhahun nado penukundo ovi pẹvi etọn lẹ go, e gọalọna ẹn nado nọ ze e yì ahimẹ ehe yinuwado Charo ji tlala. To madẹnmẹ, Charo kẹalọyi nuzedonukọnnamẹ he yin bibasi gbọn Gladys dali​—yèdọ plọnmẹ Biblu whégbè tọn vọnu de. To whenuena Charo plọn sọn Biblu etọn titi mẹ dọ e mayin gbẹtọ dagbe lẹpo wẹ jei olọn mẹ ṣigba dọ Jehovah na yí ogbẹ̀ madopodo dó dona gbẹtọ lẹ to aigba ji, e paṣa Charo tlala. (Psalm 37:​11, 29) Charo lọsu ko to mahẹ tindo to todido ehe mimá hẹ mẹdevo lẹ mẹ na owhe 15 he wayi lẹ.

Yí nukun homẹ tọn do pọ́n aigba blebu he gọ́ na gbẹtọ ahundoponọ he yin kinkọndopọ to sinsẹ̀n-bibasi hlan Jehovah, yèdọ Jiwheyẹwhe nugbo dopo kẹdẹ lọ mẹ lẹ! Ehe mayin hopàdọ de gba. Nuhe Jehovah ko dopagbe etọn wẹ e yin. Gbọn yẹwhegán etọn Zẹfania dali, Jiwheyẹwhe lá dọmọ: “Yẹn na jó gbẹtọ wamọnọ nukunbianọ lẹ de dai to gblagbla hiẹ tọn mẹ, yé bo nasọ nọ dotu to oyín OKLUNỌ tọn mẹ. . . . [Yé] ma na wà ylanwa, mọ sọ dọ lalo lẹ gba; mọ odẹ́ oklọnọ de ma na yin mimọ to onù yetọn mẹ gba: . . . mẹde ma na hẹn yé savò gba.” (Zẹfania 3:​12, 13) Eyin hiẹ yiwanna opagbe ehelẹ, kẹalọyi tudohomẹnamẹ Biblu tọn he dọmọ: “Mì dín OKLUNỌ, mì homẹmiọnnọ aigba lọ tọn lẹ, he ko basi whẹdida etọn; mì dín dodo, mì dín homẹmiọn: e sọgan yin mì na yin whiwhla to azán adi OKLUNỌ tọn tọn gbè.”—Zẹfania 2:3.