Be Nude Tin He Sọgan Kọ̀n Gbẹtọ lẹ Dopọ Ya?

MAHOPỌNNA sinsẹ̀n he mẹ hiẹ tin te, e yọnbasi dọ hiẹ ni yigbe dọ diblayin sinsẹ̀n lẹpo mẹ wẹ mẹhe yiwanna nugbo lẹ tin te. Gbẹtọ he yiwanna nugbo gọna mẹhe jlo nado dín in mọ lẹ sọgan yin mimọ to Hindu, Katoliki, Ju, po sinsẹ̀nnọ devo lẹ po ṣẹnṣẹn. Ṣogan, e taidi dọ sinsẹ̀n ko klan gbẹtọ lẹ. Mẹdelẹ tlẹ nọ yí sinsẹ̀n zan nado wà danú. Be e sọgan yọnbasi na ahundoponọ he yiwanna nuhe sọgbe po nugbo po he tin to sinsẹ̀n lẹpo mẹ lẹ nado yin kinkọndopọ ya? Be yé sọgan yin kinkọndopọ na lẹndai dopolọ ya?

Lehe e hẹnmẹ jẹflumẹ do sọ nado mọ dọ sinsẹ̀n wẹ to kinklan hẹnwa hugan to gbẹtọvi lẹ ṣẹnṣẹn! Lẹnnupọndo delẹ to nudindọn ehelẹ mẹ ji. Hindu lẹ hoavùn hẹ Buddha lẹ to Sri Lanka. Plọtẹstant, Katoliki, po Ju lẹ po ko sọ̀n ohun dai to nudindọn voovo mẹ. Mẹylọhodotọklisti hoavùn hẹ Malenu lẹ to Bosnie, Tchétchénie, Indonesie, po Kosovo po. Podọ to mars 2000, avùnhiho azán awe tọn de he gando sinsẹ̀n go hẹn okú wá na tovi Nigeria tọn 300. Na nugbo tọn, wangbẹnamẹ sinsẹ̀n tọn ko yidogọna kanyinylan nudindọn ehelẹ tọn.

Ahundoponọ lẹ nọ saba yin tuklado na nujijọ ylankan he nọ yin bibasi do sinsẹ̀n tamẹ lẹ. Di dohia, e ko dobuna ṣọṣi-yitọ susu nado mọdọ sinsẹ̀ngán he ko zanhẹ ovivu lẹ nọ yin alọkẹyi to ṣọṣi delẹ mẹ. Sinsẹ̀nnọ devo lẹ ko yin winyando tlala na kinklan he tin to mẹhe ylọ yede dọ hagbẹ klandovo Klistiani tọn lẹ ṣẹnṣẹn do whẹho yizan vijinu dopolọ tọn na zanhẹmẹ po hòdide po ji. E họnwun dọ, sinsẹ̀n ma ko kọ̀n gbẹtọvi lẹ dopọ gba. Etomọṣo, wanyina nugbo tọ nujọnu tọn lẹ tin to sinsẹ̀n susu mẹ, dile numimọ he bọdego lẹ dohia do.

Yé Tindo Ojlo Vẹkuvẹku na Nugbo

Fidelia yin sinsẹ̀n-basitọ ahundoponọ de to Ṣọṣi Katoliki San Francisco tọn mẹ to La Paz, Bolivie. E nọ ṣinyọ́n nukunmẹ ai to boṣiọ Malia tọn nukọn bosọ nọ bẹ vẹla dagbe he go e pé nado họ̀ lẹpo do boṣiọ Jesu he yè whè donúgo tọn nukọn. To osẹ dopodopo mẹ, e nọ bẹ núdùdù susugege na yẹwhenọ nado má na wamọnọ lẹ. Ṣigba, atọ́n to ovi Fidelia tọn lẹ mẹ yawu kú bo ma yin bibaptizi. To whenuena yẹwhenọ dọna ẹn dọ yé to yaji to zinvlu Limbo tọn mẹ, e paṣa Fidelia dọ, ‘Eyin Jiwheyẹwhe yin wanyinọ bosọ jọmẹ, nawẹ enẹ na jọ gbọn?’

Tara, heyin doto de, yin nukunpedego whẹ́n taidi Hindu de to Kathmandou, Népal. Na e hodo aṣa he tọgbo etọn lẹ ko nọ basina whenu dindẹn wutu, e nọ sẹ̀n yẹwhe etọn lẹ to tẹmpli Hindu tọn lẹ mẹ bosọ tindo boṣiọ lẹ to owhé etọn gbè. Ṣigba Tara yin hinhẹn jẹflumẹ na kanbiọ taidi ehelẹ: Naegbọn yajiji do sù sọmọ? Naegbọn gbẹtọ do nọ kú? E ma mọ gblọndo he na ẹn pekọ depope to sinsẹ̀n etọn mẹ.

To alọ devo mẹ, Panya, whẹ́n taidi Buddha-sẹ̀ntọ de to owhé he tin to otọ̀ tó de gbè to Bangkok, Thaïlande. E yin pinplọn dọ yajiji nọ wá sọn ylando heyin wiwà to gbẹzan he wayi lẹ mẹ podọ mẹdekannujẹ sọn e mẹ nọ wá to whenuena mẹde klan ede do olá na ojlo lẹpo. Taidi Buddha-sẹ̀ntọ ahundoponọ devo lẹ, e yin pinplọn nado tindo osi sisosiso na nuyọnẹn yẹwhenọ pamẹnọtọ he nọ dó tewu-kokló-jonọ he nọ wá whégbè to afọnnu lẹ nado biọnu lẹ. E nọ lẹnayihamẹpọn bosọ nọ ṣinyan boṣiọ Buddha tọn lẹ pli na e yise dọ yé nọ namẹ hihọ́. To whenuena owùnú sinsinyẹn de jọ do e go he hẹn ẹn kusẹ́ sọn alinkàn jẹdò, Panya yì opá Buddha tọn susu mẹ, bo tindo nujikudo nado yin azọ̀nhẹngbọna to azọ́njiawu-liho. E ma mọ pọngbọ kavi nukunnumọjẹnumẹ gbigbọmẹ tọn depope yí. Kakatimọ, ewọ yin hunhundonuvo hlan afinyọnnuwiwa bọ e sọ jẹ mahẹ tindo to e mẹ ji.

Virgil yin jiji to États-Unis bọ e sọ kọnawudopọ hẹ Pipli Mẹyuu Malenu lẹ tọn to wehọmẹ daho. E nọ yí zohunhun do má owe yetọn, he dohia dọ yovo lẹ wẹ yin Lẹgba. Yé lẹndọ enẹwẹ zọ́n bọ yovo lẹ do nọ wà danú susu sọta mẹyuu lẹ. Dile etlẹ yin ahundoponọ to sinsẹ̀n etọn mẹ, Virgil yin tuklado gbọn kanbiọ lẹ taidi ehelẹ dali: Nawẹ yovo lẹpo na yin mẹylankan do? Podọ naegbọn suhugan yẹwhehodidọ lọ lẹ tọn do nọ gando akuẹ go?

Dile etlẹ yindọ Charo whẹ́n to Hùwaji Amelika tọn fie sinsẹ̀n Katoliki tọn hẹnai te tlala, ewọ yin Plọtẹstan ahundoponọ de. Homẹ etọn hùn na e mayin apadewhe mẹhe nọ sẹ̀n boṣiọ he lẹdo pé lẹ tọn wutu. Charo nọ duvivi ṣọṣi yìyì to dimanche lẹpo tọn na sinsẹ̀n-bibasi zohunhunnọ lọ tọn wutu, to fie e nọ dawhá dọ “Hallelujah!” te bosọ nọ kọnawudopọ to ohàn sinsẹ̀n tọn jiji gọna wedudu he nọ bọdego mẹ te. Charo yise po ahundopo po dọ emi ko yin whinwhlẹngán bo ko yin vivọji. E nọ na madao akuẹ etọn lẹ tọn ṣọṣi lọ, podọ whenuena yẹwhehodọtọ nukundeji televiziọn mẹ tọn etọn biọ nunina lẹ, e do akuẹ hlan ẹn na ovi Aflika tọn lẹ. Ṣigba to whenuena e kanse sinsẹ̀ngán etọn nuhewutu Jiwheyẹwhe owanyinọ do nọ sayana alindọn lẹ to zòmẹ, e doayi e go dọ e ma tindo gblọndo he họnwun de gba. To godo mẹ, e sọ doayi e go dọ nunina etọn lẹ ma nọ yin yiyizan nado gọalọna ovi lẹ to Aflika.

Dile etlẹ yindọ lẹdo voovo mẹ wẹ yé wá sọn, omẹ atọ́n ehelẹ tindo onú dopo to kọndopọ mẹ. Yé yiwanna nugbo bo yí ahundopo do dín gblọndo nugbo tọn lẹ na kanbiọ yetọn lẹ. Ṣigba be yé sọgan yin kinkọndopọ to sinsẹ̀n-bibasi nugbo mẹ nugbonugbo ya? Hosọ he bọdego na na gblọndo na kanbiọ lọ.

[Yẹdide to weda 4]

Be e yọnbasi na gbẹtọ he wá sọn akọ̀ voovo mẹ lẹ nado yin kinkọndopọ nugbonugbo ya?

[Asisa Yẹdide Tọn to weda 1]

G.P.O., Jerusalem