WESẸDOTẸN INTẸNẸT JI TỌN Watchtower Tọn
WESẸDOTẸN INTẸNẸT JI TỌN
Watchtower Tọn
Gungbe
ẹ,ọ,ṣ
  • á
  • à
  • é
  • è
  • Ẹ
  • ẹ
  • ẹ́
  • ẹ̀
  • í
  • ì
  • ó
  • ò
  • Ọ
  • ọ
  • ọ́
  • ọ̀
  • Ṣ
  • ṣ
  • ú
  • ù
  • BIBLU
  • OWE LẸ
  • OPLI LẸ
  • w01 15/9 w. 15-20
  • Dona Jehovah Tọn Nọ Hẹn Mí Wàdọkun

Video de ma tin na adà ehe

Jaale, nuhahun de wá aimẹ gando video lọ go.

  • Dona Jehovah Tọn Nọ Hẹn Mí Wàdọkun
  • Atọ̀họ̀-Nuhihọ́ lọ Tọn He To Ahọluduta Jehovah Tọn Lá—2001
  • Hóvila Lẹ
  • Hosọ Mọnkọtọn
  • Ohó Jiwheyẹwhe Tọn —Nunina He Họakuẹ De
  • Yọ́n Pinpẹn Nunina Gbigbọ Wiwe Tọn
  • Owanyi Klistiani Tọn—Nunina de He Yè Na Wlebòna
  • ‘Nunina to Sunnu lẹ Mẹ’
  • Nunina Lizọnyizọn Kunnudegbe Tọn
  • Gbẹzan Ayajẹnọ Whẹndo Tọn —Nunina Dagbe De
  • Nunina Daho Hugan Lọ—Naegbọn E Do Họakuẹ Sọmọ?
    Atọ̀họ̀-Nuhihọ́ lọ Tọn He To Ahọluduta Jehovah Tọn Lá (Mẹlẹpo Tọn)—2017
  • Huhlọn Azọ́njiawu Tọn—Pipà Na Gbẹtọ Kavi Gigo Na Jiwheyẹwhe?
    Atọ̀họ̀-Nuhihọ́ lọ Tọn He To Ahọluduta Jehovah Tọn Lá—1998
  • ‘Ewọ Nasọ Dọnsẹpọ Mì’
    Atọ̀họ̀-Nuhihọ́ lọ Tọn He To Ahọluduta Jehovah Tọn Lá—2002
  • Ayajẹ He Zọnlinzinzin to Tenọgli mẹ Nọ Hẹnwa Lẹ
    Atọ̀họ̀-Nuhihọ́ lọ Tọn He To Ahọluduta Jehovah Tọn Lá—2006
Pọ́n Nudevo Lẹ
Atọ̀họ̀-Nuhihọ́ lọ Tọn He To Ahọluduta Jehovah Tọn Lá—2001
w01 15/9 w. 15-20

Dona Jehovah Tọn Nọ Hẹn Mí Wàdọkun

“Dona OKLUNỌ tọn, e nọ hẹnmẹ wàdọkun, e ma nọ yí awubla dogọ ẹ gba.”—HOWHINWHẸN LẸ 10:22.

1, 2. Naegbọn ayajẹ ma do tindo kọndopọ hẹ nutindo agbasa tọn lẹ?

AGBASANU lẹ dindin nọ deanana gbẹzan omẹ livi susu tọn to egbehe. Ṣigba be agbasanu lẹ nọ hẹn yé yin ayajẹnọ ya? “Yẹn ma sọgan flin ojlẹ de he mẹ gbẹtọ lẹ blawu taidi dintọn gando ninọmẹ yetọn go pọ́n gba,” wẹ The Australian Women’s Weekly dọ. E yidogọ dọmọ: “E ma sọgbe hẹ lẹnpọn gba. Mí yin didọna dọ ninọmẹ akuẹzinzan tọn to Australie yọ́n taun, dọ gbẹzan ma ko yọ́n sọmọ pọ́n gba. . . . Etomọṣo, pọndohlan agọ̀ sọ gbayipe to akọta lọ blebu mẹ. Sunnu po yọnnu lẹ po to mimọ dọ nude jẹdò to gbẹzan yetọn mẹ ṣigba yé ma penugo nado yọ́n onú lọ gba.” Lehe Owe-wiwe dọ nugbo do sọ to whenuena e dọ dọ ayajẹ kavi ogbẹ̀ ma nọ wá sọn nuhe mí tindo lẹ mẹ!—Yẹwhehodọtọ 5:10; Luku 12:15.

2 Biblu plọnmẹ dọ ayajẹ he klo hugan nọ wá sọn dona Jiwheyẹwhe tọn mẹ. Gando ehe go, Howhinwhẹn lẹ 10:22 dọmọ: “Dona OKLUNỌ tọn, e nọ hẹn omẹ wàdọkun, e ma nọ yí awubla dogọ ẹ gba.” Awubla nọ saba wá sọn adọkunnu agbasa tọn he yè yí nukunkẹn do bẹpli lẹ mẹ. Po gbesisọ po, apọsteli Paulu na avase dọmọ: “Mẹhe jlo na yin adọkunnọ lẹ jai jẹ whlepọn de mẹ, po omọ̀ de po, po onulu wantuntun susu he nọ gbleawunamẹ po, ehe nkọ nọ siọ omẹ do viva po dindọ̀n po mẹ. Na owanyi akuẹ tọn wẹ adọ̀ owalọ oylan lẹpo tọn de: ehe whenuena gbẹtọ yí nukunkẹn do to dindin pé, yé buali sọn yise mẹ, bosọ yí homẹgble susu do sọwhán yede.”—1 Timoti 6:9, 10.

3. Etẹwutu devizọnwatọ Jiwheyẹwhe tọn lẹ nọ jiya whlepọn tọn?

3 To adà awetọ mẹ, dona he ma tindo awubla lẹ nọ plá mẹhe “nọ tuntóai hlan ogbè OKLUNỌ tọn” lẹpo. (Deutelonomi 28:2) Ṣigba, mẹdelẹ sọgan kanse dọ, ‘Eyin awubla ma nọ gọna dona Jehovah tọn, naegbọn susu to devizọnwatọ Jiwheyẹwhe tọn lẹ mẹ do nọ jiya?’ Biblu dohia dọ Jiwheyẹwhe nọ na dotẹnmẹ whlepọn mítọn lẹ wẹ, ṣigba Satani, titonu ylankan etọn, po agbasa mapenọ mítọn po dè wẹ yé nọ wá sọn na taun tọn. (Gẹnẹsisi 6:5; Deutelonomi 32:4, 5; Johanu 15:19; Jakobu 1:14, 15) Jehovah dè wẹ “nunina dagbedagbe po nunina he sọgbe lẹpo po” nọ wá sọn. (Jakobu 1:17) Enẹwutu, dona etọn lẹ ma nọ hẹn awubla wá gba. Todin mì gbọ mí ni gbadopọnna nunina he sọgbe Jiwheyẹwhe tọn delẹ.

Ohó Jiwheyẹwhe Tọn —Nunina He Họakuẹ De

4. Dona po nunina họakuẹ tẹ po wẹ omẹ Jehovah tọn lẹ to vivi etọn dù “to ojlẹ opodo lọ tọn” ehe whenu?

4 Gando “ojlẹ opodo lọ tọn” go, dọdai Daniẹli tọn dọmọ: ‘oyọnẹn nugbo na lẹzun susugege.’ Ṣigba, ehe yin hinhẹn sọgbe gbọn hogbe lọ lẹ dali dọmọ: ‘Mẹylankan depope ma na mọnukunnujẹemẹ gba; ṣigba mẹhe tindo wuntuntun lẹ na mọnukunnujẹemẹ.’ (Daniẹli 12:4, 10) Lẹnnupọndo enẹ ji! Ohó Jiwheyẹwhe tọn—na taun tọn dọdai lẹ—yin didọ po oyọnẹn he wá sọn olọn mẹ de po bọ mẹylankan lẹ ma sọgan mọnukunnujẹemẹ ganji gba, ṣigba omẹ Jehovah tọn lẹ sọgan wàmọ. Visunnu Jiwheyẹwhe tọn hodẹ̀ dọmọ: “Yẹn dopẹna we, Otọ́ Oklunọ olọn po aihọn po tọn, na hiẹ ko yí onú helẹ whlá sọn nuyọnẹntọ lẹ, po zinzintọ lẹ po dè, bosọ do yé hia hlan ovivu lẹ.” (Luku 10:21) Dona nankọ die nado tindo nunina họakuẹ ehe heyin Ohó kinkàndai Jiwheyẹwhe tọn, yèdọ Biblu, podọ nado tin to mẹhe Jehovah ko na wuntuntun gbigbọmẹ tọn lẹ mẹ!—1 Kọlintinu lẹ 1:21, 27, 28; 2:14, 15.

5. Etẹwẹ nuyọnẹn yin, podọ nawẹ mí sọgan mọ ẹn yí gbọn?

5 Yin e mayin “nuyọnẹn he wá sọn aga” tọn wutu wẹ, mí ma na tindo wuntuntun gbigbọmẹ tọn depope gba. (Jakobu 3:17) Nuyọnẹn yin nugopipe nado yí oyọnẹn po wuntuntun po zan nado didẹ nuhahun lẹ, dapana kavi glọnalina owù lẹ, jẹ yanwle lẹ kọ̀n, kavi wleawuna ayinamẹ he whèwhín lẹ. Nawẹ mí nọ mọ nuyọnẹn Jiwheyẹwhe tọn yí gbọn? Howhinwhẹn lẹ 2:6 dọmọ: ‘Jehovah wẹ nọ namẹ nuyọnẹn; onù etọn mẹ wẹ oyọnẹn po wuntuntun po nọ wá sọn.’ Mọwẹ, Jehovah na na nuyọnẹn mí eyin mí nọ biọ ẹ to odẹ̀ mẹ gbọzangbọzan, dile e na ‘ahun nuyọnẹn po wuntuntun tọn de po’ Ahọlu Sọlọmọni do. (1 Ahọlu lẹ 3:11, 12; Jakobu 1:5-8) Nado tindo nuyọnẹn, mí sọ dona to tótunai na Jehovah zọnmii gbọn Ohó etọn pinplọn po yíyí do yizan mẹ to gbesisọmẹ po dali.

6. Naegbọn e yin nuyọnẹnnu nado yí osẹ́n po nunọwhinnusẹ́n Jiwheyẹwhe tọn lẹ po zan to gbẹzan mẹ?

6 Apajlẹ nuyọnẹn he yọnhugan Jiwheyẹwhe tọn lẹ yin mimọ to osẹ́n po nunọwhinnusẹ́n Biblu tọn lẹ po mẹ. Mí nọ mọaleyi sọn yé mẹ to aliho lẹpo mẹ—to agbasa-liho, apọ̀nmẹ, numọtolanmẹ liho, podọ gbigbọ-liho. Psalm-kàntọ gbọn gbesisọ dali jihàn dọmọ: “Osẹ́n OKLUNỌ tọn pé, e nọ hẹn awuya ayiha: aṣẹdai OKLUNỌ tọn wẹ nugbo: bo nọ diọ mayọndenọ zun nuyọnẹntọ. Ogbedai OKLUNỌ tọn lẹ jlọ, yé nọ hẹn ayiha jaya: wiwe wẹ gbedide OKLUNỌ tọn, e sọ nọ basi hinhọ́n nukun tọn. Osi OKLUNỌ tọn wé, e tin ai kaka; nugbo sọ wẹ whẹdida OKLUNỌ tọn, podọ dodo wẹ yé omẹ pó. Yè nọ jlo yé hú sika, mọwẹ, hú sika kinkọ̀n he yọ́n gbahugbahu.”—Psalm 19:7-10; 119:72.

7. Etẹ mẹ wẹ tolivivẹ na nujinọtedo dodonọ Jiwheyẹwhe tọn lẹ nọ dekọtọn do?

7 To alọ devo mẹ, mẹhe vẹtolina nujinọtedo dodonọ Jiwheyẹwhe tọn lẹ ma nọ mọ ayajẹ po mẹdekannujẹ he yé to dindin lọ po gba. E ya kavi e dẹn, yé nọ wá yọnẹn dọ Jiwheyẹwhe mayin mẹvivlẹ gba, na nuhe mẹde dó wẹ e na gbẹ̀n. (Galatianu lẹ 6:7) Gbẹtọ livi susu he vẹtolina nunọwhinnusẹ́n Jiwheyẹwhe tọn lẹ to kọdetọn ylankan lẹ gbẹ̀n taidi hòmimọ he yè ma jlo, azọ̀n ylankan lẹ, kavi nuyiwadomẹji mẹvasudo amasin adínọ tọn lẹ. Adavo yé lẹnvọjọ sọn aliho gbẹzan yetọn tọn mẹ, omọ́ yetọn na hẹn okú wá na yé podọ vlavo vasudo to alọ Jiwheyẹwhe tọn mẹ.—Matiu 7:13, 14.

8. Naegbọn mẹhe yiwanna Ohó Jiwheyẹwhe tọn lẹ do yin ayajẹnọ?

8 Ṣigba, dona họakuẹ lẹ na plá mẹhe yiwanna Ohó Jiwheyẹwhe tọn bo nọ yí i zan todin podọ to sọgodo lẹ. Yé nọ gbọn gbesisọ dali mọdọ osẹ́n Jiwheyẹwhe tọn ko hẹn yé jẹ mẹdekannu, dọ yé yin ayajẹnọ nugbonugbo, bosọ to tenọpọn ojlẹ lọ to whenuena yé na yin tuntundote sọn ylando po okú po si. (Lomunu lẹ 8:20, 21; Jakobu 1:25) Todido ehe na wá dandan na e sinai do nunina owanyinọ hugan Jiwheyẹwhe tọn na gbẹtọvi ji wutu—yèdọ avọ́sinsan ofligọ Visunnu dopo akàn etọn, Jesu Klisti tọn. (Matiu 20:28; Johanu 3:16; Lomunu lẹ 6:23) Nunina he yọnhugan ehe do lehe owanyi he Jiwheyẹwhe tindo na gbẹtọvi siso sọ hia bosọ dohia dọ dona mavọmavọ lẹ na wá mẹhe to tótunai na Jehovah zọnmii lẹ ji.—Lomunu lẹ 8:32.

Yọ́n Pinpẹn Nunina Gbigbọ Wiwe Tọn

9, 10. Nawẹ mí nọ mọaleyi sọn nunina Jehovah tọn heyin gbigbọ wiwe mẹ gbọn? Na apajlẹ dopo.

9 Gbigbọ wiwe yin nunina owanyinọ Jiwheyẹwhe tọn devo he mí sọ dona yọ́n pinpẹn etọn. To azán Pẹntikọsti 33 W.M. gbè, apọsteli Pita dotuhomẹna gbẹtọgun he pli to Jelusalẹm lẹ dọmọ: “Mì lẹnvọjọ, na yè nisọ baptizi dopodopo mìtọn to oyín Jesu Klisti tọn mẹ na desẹ ylando tọn, mìwlẹ nasọ mọ [nunina gbigbọ wiwe] tọn yí.” (Owalọ lẹ 2:38) To egbehe, Jehovah nọ na gbigbọ wiwe devizọnwatọ klandowiwe etọn he biọ ẹ bosọ jlo na wà ojlo etọn lẹ. (Luku 11:9-13) To ojlẹ hohowhenu tọn lẹ mẹ, huhlọn he klohugan to wẹkẹ mẹ ehe—yèdọ gbigbọ wiwe, kavi huhlọn-yido-wazọ́n Jiwheyẹwhe tọn—na huhlọn sunnu po yọnnu yisenọ lẹ po, gọna Klistiani fliflimẹ tọn lẹ. (Zekalia 4:6; Owalọ lẹ 4:31) E sọgan wà onú dopolọ na mí, yèdọ eyin mí tlẹ pannukọn aliglọnnamẹnu po awusinyẹnnamẹnu sẹhundaga lẹ po taidi omẹ Jehovah tọn lẹ.—Joẹli 2:28, 29.

10 Lẹnnupọndo apajlẹ Laurel, he jẹazọ̀n plibọ́ tọn bo dona yí zomọ he nọ gọalọnamẹ nado gbọ̀ tọn zan na owhe 37 ji.a Mahopọnna ninọmẹ sinsinyẹn zẹjlẹgo etọn lẹ, e sẹ̀n Jiwheyẹwhe po zohunhun po jẹ okú etọn whenu. To owhe lẹ gblamẹ, dona họakuẹ Jehovah tọn lẹ plá ẹ. Di dohia, e penugo nado gọalọna omẹ 17 nado wá tindo oyọnẹn he pegan nugbo Biblu tọn, dile etlẹ yindọ e nọ tin to zomọ lọ mẹ na ganhiho 24 to gbèdopo! Ninọmẹ etọn lẹ flin mí hogbe apọsteli Paulu tọn lẹ dọmọ: “Whenuena yẹn yin madogánnọ, whenẹnu wẹ yẹn yin huhlọnnọ.” (2 Kọlintinu lẹ 12:10) Mọwẹ, kọdetọn dagbe depope he mí tindo to yẹwhehodidọ wẹndagbe lọ tọn mẹ ma nọ wá sọn nugopipe po huhlọn mídetiti tọn po mẹ gba, ṣigba sọn alọgọ Jiwheyẹwhe tọn gbọn gbigbọ wiwe gblamẹ, he e nọ na mẹhe nọ to tótunai na ogbè etọn zọnmii lẹ.—Isaia 40:29-31.

11. Jẹhẹnu tẹlẹ wẹ gbigbọ Jiwheyẹwhe tọn nọ wleawuna do mẹhe ze “gbẹtọ yọyọ” lọ dó lẹ mẹ?

11 Eyin mí nọ yí tonusise do tuntóai na Jiwheyẹwhe, gbigbọ nọ wleawuna jẹhẹnu owanyi, ayajẹ, jijọho, linsinsinyẹn, homẹdagbe, dagbewà, yise, walọmimiọn, po mawazẹjlẹgo tọn po do mí mẹ. (Galatianu lẹ 5:22, 23) “Sinsẹ́n gbigbọ tọn” lẹ yin apadewhe “gbẹtọ yọyọ” he Klistiani lẹ nọ yí do diọtẹn na jijọ kanlinjọmẹ tọn depope he yé sọgan nọ dohia dai lẹ. (Efesunu lẹ 4:20-24; Isaia 11:6-9) Dehe họakuẹ hugan to sinsẹ́n gbigbọ tọn lẹ mẹ wẹ owanyi, heyin “pọninọ gbesisọ tọn.”—Kọlọsinu lẹ 3:14.

Owanyi Klistiani Tọn—Nunina de He Yè Na Wlebòna

12. Nawẹ Tabita po Klistiani owhe kanweko tintan whenu tọn devo lẹ po do owanyi hia gbọn?

12 Owanyi Klistiani tọn yin nunina donanọ devo sọn Jehovah dè—yèdọ nude he mí nọ gbọn jlọjẹ dali wlebòna. E nọ yin anadena gbọn nunọwhinnusẹ́n dali, ṣigba e siso sọmọ bọ e nọ kọ̀n yisenọ lẹ dopọ pẹkipẹki hugan lehe kanṣiṣa agbasalan tọn lẹ sọgan wà do. (Johanu 15:12, 13; 1 Pita 1:22) Di apajlẹ, lẹnnupọndo Tabita ji, heyin yọnnu dagbe Klistiani owhe kanweko tintan whenu tọn de. “[E] sù to azọ́n dagbe mẹ, podọ to azọ́n nunamẹ tọn” mẹ, titengbe do ota asuṣiọsi he tin to agun lọ mẹ lẹ tọn mẹ. (Owalọ lẹ 9:36) Yọnnu ehelẹ sọgan ko tindo hẹnnumẹ agbasalan tọn lẹ, ṣigba Tabita jlo nado wà nuhe go e pé lẹpo nado gọalọ bosọ na tuli yé. (1 Johanu 3:18) Apajlẹ dagbe nankọ die Tabita zedai! Owanyi tintindo na mẹmẹsunnu lẹ whàn Pliskila po Akuila po nado ‘ze ogbẹ̀ yetọn lẹ do owù mẹ’ na Paulu tọn wutu. Owanyi sọ whàn Epafla, Luku, Onesifọlu, po mẹdevo lẹ po nado gọalọna apọsteli lọ to whenuena e tin to gànpamẹ to Lomu. (Lomunu lẹ 16:3, 4; 2 Timoti 1:16; 4:11; Filemọni 23, 24) Mọwẹ, Klistiani mọnkọtọn lẹ ‘tindo owanyi to yede ṣẹnṣẹn,’ yèdọ nunina donanọ Jiwheyẹwhe tọn de he nọ do yé hia taidi devi nugbo Jesu tọn lẹ.—Johanu 13:34, 35.

13. Nawẹ mí sọgan dohia gbọn dọ mí yọ́n pinpẹn mẹmẹsunnu-yinyin Klistiani tọn mítọn sisosiso?

13 Be hiẹ nọ wlebòna owanyi he nọ yin didohia to agun Klistiani tọn mẹ ya? Be hiẹ yọ́n pinpẹn mẹmẹsunnu-yinyin lẹdo aihọn pé gbigbọmẹ tọn ya? Ehelẹ lọsu yin nunina donanọ he họakuẹ lẹ he wá sọn aga. Nawẹ mí sọgan dohia dọ mí yọ́n pinpẹn yetọn gbọn? Gbọn sinsẹ̀nzọn wiwe ṣeke bibasi hlan Jiwheyẹwhe, mahẹ tintindo to opli Klistiani tọn lẹ mẹ, podọ to owanyi po sinsẹ́n gbigbọ Jiwheyẹwhe tọn devo lẹ didohia po dali wẹ.—Filippinu lẹ 1:9; Heblu lẹ 10:24, 25.

‘Nunina to Sunnu lẹ Mẹ’

14. Etẹwẹ yin bibiọ to Klistiani de si eyin e na wadevizọn taidi mẹho kavi devizọnwatọ lizọnyizọnwiwa tọn?

14 Yanwle dagbe de wẹ e yin na Klistiani sunnu he tindo ojlo nado wadevizọn na sinsẹ̀n-basitọ hatọ yetọn lẹ taidi mẹho kavi devizọnwatọ lizọnyizọnwiwa tọn lẹ. (1 Timoti 3:1, 8) Mẹmẹsunnu de dona yin gbẹtọ gbigbọnọ, he yọ́n Owe-wiwe ganji bosọ yin zohunhunnọ to lizọnyizọn kunnudegbe tọn mẹ, nado pegan na lẹblanulọkẹyi ehelẹ. (Owalọ lẹ 18:24; 1 Timoti 4:15; 2 Timoti 4:5) E dona do whiwhẹ, jlẹkajininọ, po homẹfa po hia, na saklanọ, goyitọ, po ṣejannabinọ lẹ po ma nọ mọ dona Jiwheyẹwhe tọn lẹ yí wutu. (Howhinwhẹn lẹ 11:2; Heblu lẹ 6:15; 3 Johanu 9, 10) Eyin e ko wlealọ, e dona yin tatọ́ he yiwanna whẹndo etọn, he pé whédo etọn blebu ji ganji de. (1 Timoti 3:4, 5, 12) E na mọ dona Jehovah tọn lẹ yí, na e nọ yí nukun nujọnu tọn do pọ́n adọkun gbigbọmẹ tọn lẹ wutu.—Matiu 6:19-21.

15, 16. Mẹnu lẹ wẹ sọawuhia nado yin ‘nunina to sunnu lẹ mẹ’? Na apajlẹ lẹ.

15 To whenuena mẹhe to devizọnwa to agun mẹ taidi mẹho lẹ yí yede zan taidi wẹndagbe-jlatọ, lẹngbọhọtọ, po mẹplọntọ lẹ po, yé nọ na mí whẹwhinwhẹ́n dagbe lẹ nado yọ́n nuhọakuẹ yetọn sisosiso taidi ‘nunina to sunnu lẹ mẹ.’ (Efesunu lẹ 4:8, 11) Mẹhe mọaleyi sọn devizọnwiwa owanyinọ yetọn mẹ lẹ sọgan nọ ma do pinpẹn-nutọn-yinyọnẹn hia to whepoponu, ṣigba Jehovah nọ mọ nuhe mẹho nugbonọ lẹ to wiwà lẹpo. E ma na wọnji owanyi he yé dohia hlan oyín etọn gbọn devizọnwiwa hlan omẹ etọn lẹ dali go gba.—1 Timoti 5:17; Heblu lẹ 6:10.

16 Lẹnnupọndo whẹho mẹho azọ́n sinsinyẹnwatọ de tọn ji, he dla viyọnnu Klistiani de pọ́n he yè jlo na zẹ̀ apọ̀n na. Họntọn whẹndo lọ tọn de wlan dọmọ: “E jọmẹ taun, gọalọnamẹ taun, bosọ hò mẹtọn pọ́n taun. E biọgbè nado hodẹ̀ hlan Jehovah hẹ mí. Dile mí to dẹ̀ho, otọ́ lọ [he mayin Kunnudetọ Jehovah tọn] to avivi, dasin sọ to kùnkùn sọn nukun mẹhe to abò dotowhé tọn lọ mẹ lẹpo tọn mẹ. Lehe odẹ̀ mẹho enẹ tọn do mẹtọnhopọn hia sọ, podọ lehe e yin dohia owanyi tọn sọn Jehovah dè nado do e hlan to ojlẹ he sọgbe enẹ mẹ do sọ!” Kunnudetọ he to azọ̀njẹ devo dọ gando mẹho he dla ẹ pọ́n lẹ go dọmọ: “To whenuena yé wá akanma ṣie kọ̀n to dotowhé lọ, yẹn yọnẹn dọ yẹn sọgan doakọnna nudepope he sọgan jọ sọn ojlẹ enẹ mẹ yì. Yẹn tindo huhlọn bosọ tin to jijọho mẹ.” Be mẹde sọgan họ̀ mẹtọnhopọn owanyinọ mọnkọtọn ya? Paali! Nunina de wẹ e yin, he Jiwheyẹwhe hẹn tin-to-aimẹ gbọn agun Klistiani tọn gblamẹ.—Isaia 32:1, 2.

Nunina Lizọnyizọn Kunnudegbe Tọn

17, 18. (a) Nunina sinsẹ̀nzọnwiwa tọn tẹwẹ Jehovah hẹn tin-to-aimẹ na omẹ etọn lẹpo? (b) Alọgọ tẹwẹ Jiwheyẹwhe wleawuna na mí nido sọgan hẹn lizọnyizọn mítọn di?

17 Yẹyi he klohugan he gbẹtọvi de na mọyi wẹ sinsẹ̀nzọnwiwa hlan Jehovah, Ganhunupotọ lọ. (Isaia 43:10; 2 Kọlintinu lẹ 4:7; 1 Pita 2:9) Etomọṣo, lẹblanulọkẹyi mahẹ tintindo to lizọnyizọn gbangba tọn mẹ tọn tin na mẹlẹpo—jọja po mẹhomẹ po, sunnu po yọnnu po—he tindo ojlo nujọnu tọn nado sẹ̀n Jiwheyẹwhe lẹ. Be hiẹ to nunina họakuẹ ehe yizan ya? Mẹdelẹ sọgan dọ̀n yonu do godo na yé lẹndọ yé ma pegan wutu, ṣigba mí dona flindọ Jehovah nọ na gbigbọ wiwe mẹhe to sinsẹ̀n ẹn lẹ, podọ gbigbọ lọ nọ sú odò madogán depope he mí tindo tọn.—Jẹlemia 1:6-8; 20:11.

18 Jehovah ko ze azọ́n yẹwhehodidọ Ahọluduta tọn do alọmẹ na devi whiwhẹnọ etọn lẹ, e mayin do alọ goyitọ kavi mẹhe nọ ganjẹ nugopipe yedetiti tọn lẹ go tọn mẹ gba. (1 Kọlintinu lẹ 1:20, 26-29) Whiwhẹnọ he tin to jlẹkaji lẹ nọ yọ́n dogbó yetọn lẹ bo nọ ganjẹ alọgọ Jiwheyẹwhe tọn go dile yé to mahẹ tindo to lizọnyizọn kunnudegbe tọn mẹ. Yé sọ nọ yọ́n pinpẹn alọgọ gbigbọmẹ tọn he “họ̀nkọnsi nugbonọ, nuyọnẹntọ lọ” nọ wleawuna.—Luku 12:42-44; Howhinwhẹn lẹ 22:4.

Gbẹzan Ayajẹnọ Whẹndo Tọn —Nunina Dagbe De

19. Etẹlẹ wẹ nọ hẹn kọdetọn dagbe wá to ovi lẹ go pinpọn whẹ́n mẹ?

19 Alọwle po gbẹzan ayajẹnọ whẹndo tọn po yin nunina he nọ wá sọn Jiwheyẹwhe dè lẹ. (Luti 1:9; Efesunu lẹ 3:14, 15) Ovi lẹ lọsu yin ‘ogu họakuẹ lẹ sọn Jehovah dè,’ he nọ hẹn ayajẹ wá na mẹjitọ he zín jẹhẹnu he nọ hẹn homẹ Jiwheyẹwhe tọn hùn lẹ do ahun yetọn mẹ po kọdetọn dagbe po lẹ. (Psalm 127:3) Eyin mẹjitọ de wẹ hiẹ yin, to tótunai na ogbè Jehovah tọn zọnmii gbọn Ohó Jiwheyẹwhe tọn yíyí do plọn ovi towe lẹ dali. Mẹhe wàmọ lẹ na mọ godonọnamẹ po dona susugege Jehovah tọn lẹ po yí dandan.—Howhinwhẹn lẹ 3:5, 6; 22:6; Efesunu lẹ 6:1-4.

20. Etẹwẹ sọgan gọalọna mẹjitọ he ovi yetọn gbẹkọ sinsẹ̀n-bibasi nugbo go lẹ?

20 Mahopọnna vivẹnudido ahundoponọ mẹjitọ he dibusi Jiwheyẹwhe lẹ tọn, ovi yetọn delẹ sọgan dè nado gbẹ́ sinsẹ̀n-bibasi nugbo dai to whenuena yé whẹ́n. (Gẹnẹsisi 26:34, 35) Ehe sọgan hẹn awubla wá na mẹjitọ lọ lẹ. (Howhinwhẹn lẹ 17:21, 25) Ṣigba kakati nado hẹn todido lẹpo bu, finflin oló visunnu duvanọ tọn he Jesu dọ sọgan yin alọgọnamẹnu de na yé. Dile ovi enẹ tlẹ tọ́nsọn whégbè bo hodo aliho tasinsinyẹn tọn de sọ, e lẹkọwa owhé otọ́ etọn tọn gbè to godo mẹ, bọ otọ́ lọ sọ yí ayajẹ po owanyi po do kẹalọyi i. (Luku 15:11-32) Mahopọnna nudepope he sọgan jọ, Klistiani nugbonọ heyin mẹjitọ lẹ sọgan yin hinhẹn deji dọ yé tindo nukunnumọjẹnumẹ, mẹtọnhopọn owanyinọ, po godonọnamẹ magbọvọ Jehovah tọn po.—Psalm 145:14.

21. Mẹnu wẹ mí dona nọ tuntóai na, podọ etẹwutu?

21 Enẹwutu, mì gbọ dopodopo mítọn ni yọ́n nuhe yin nujọnu to gbẹzan mítọn mẹ nugbonugbo. Be mí to zohunhun yí do doafọna agbasanu susugege, he na hẹn awubla wá na míwlẹ po whẹndo mítọn lẹ po wẹ? Kavi be mí to afọdona ‘nunina dagbedagbe po nunina he sọgbe lẹ po’ he nọ wá sọn ‘Otọ́ hinhọ́n olọn mẹ tọn lẹ’ dè ya? (Jakobu 1:17) Satani, heyin ‘otọ́ lalo tọn,’ jlo dọ mí ni jẹtukla na agbasanu lẹ bosọ hẹn ayajẹ po ogbẹ̀ po bu. (Johanu 8:44; Luku 12:15) Ṣigba, Jehovah tindo ojlo dagbe hugan mítọn lẹ to ahun mẹ. (Isaia 48:17, 18) Enẹwutu, mì gbọ mí ni to tótunai na Otọ́ owanyinọ olọn mẹ tọn mítọn zọnmii bosọ ‘tindo homẹhunhun susugege’ to ewọ mẹ. (Psalm 37:4) Eyin mí doafọna nuyiwa mọnkọtọn, nunina họakuẹ po dona susugege Jehovah tọn po na hẹn mí wàdọkun—bo ma na yí awubla depope dogọ.

[Nudọnamẹ Odò Tọn]

a Pọ́n Réveillez-vous!, 22 janvier 1993, weda 18-21.

Be Hiẹ Flin Ya?

• Fie wẹ yè sọgan mọ ayajẹ he klohugan lọ te?

• Etẹwẹ yin delẹ to nunina he Jehovah na omẹ etọn lẹ mẹ?

• Naegbọn lizọnyizọn kunnudegbe tọn do yin nunina de?

• Etẹwẹ mẹjitọ lẹ sọgan wà nado mọ dona Jiwheyẹwhe tọn yí dile yé to ovi yetọn lẹ go pọ́n whẹ́n?

[Yẹdide to weda 16]

Be hiẹ nọ do pinpẹn-nutọn-yinyọnẹn hia na nunina Jiwheyẹwhe tọn heyin Ohó kinkàndai etọn ya?

[Yẹdide to weda 17]

Mahopọnna ninọmẹ sinsinyẹn zẹjlẹgo lẹ, Laurel Nisbet sẹ̀n Jiwheyẹwhe po zohunhun po.

[Yẹdide to weda 18]

Taidi Tabita, Klistiani egbezangbe tọn lẹ yin yinyọnẹn ganji na nuyiwa owanyinọ yetọn lẹ

[Yẹdide to weda 19]

Mẹho Klistiani lẹ nọ do mẹtọnhopọn owanyinọ hia yisenọ hatọ lẹ

    Gun Publications | (1976-2025)
    Ṣí Adà Towe
    Hùn Adà Towe
    • Gungbe
    • Dohlan
    • Nujlomẹ Lẹ
    • Copyright © 2025 Watch Tower Bible and Tract Society of Pennsylvania
    • Osẹ́n Nọtẹn lọ Tọn Lẹ
    • Osẹ́n Nudọnamẹ Mẹdetiti Tọn
    • De Osẹ́n Nudọnamẹ Tọn Lẹ
    • JW.ORG
    • Hùn Adà Towe
    Dohlan