Yé to Yede Zejo sọn Ojlo mẹ Wá
“GBẸTỌ towe lẹ na yin ojlonọ.” (Psalm 110:3) Hogbe enẹlẹ tindo zẹẹmẹ vonọtaun na wehọmẹvi 46 klasi 118tọ Wehọmẹ Biblu Pinplọn Watchtower Giliadi tọn lẹ. Nawẹ yé wleawuna yedelẹ nado yì wehọmẹ ehe, he nọ plọnazọ́n mẹdehlan sọgodo tọn lẹ nado penukundo nuhudo gbigbọmẹ tọn gbẹtọ lẹ tọn go to tògodo gbọn? Mike po Stacie po, he yin wehọmẹvi klasi 118tọ lọ tọn lẹ, basi zẹẹmẹ dọmọ: “Nudide mítọn nado zan gbẹzan he bọawu gọalọna mí nado de ayihafẹsẹnamẹnu lẹ pò bo ze gbigbọnu lẹ do otẹn tintan mẹ. Mí magbe ma nado dike kọdetọn dagbe he mí tindo to ajọwiwa mẹ ni yíta to yanwle gbigbọmẹ tọn lẹ si.” Taidi Mike po Stacie po, wehọmẹvi klasi ehe tọn he pò lẹ ga ze yede jo sọn ojlo mẹ wá bo wleawufo todin nado sẹ̀n taidi lilatọ Ahọluduta tọn lẹ to ageklo voovo ẹnẹ ji.
To samedi 12 mars 2005, gbẹtọ 6 843 yí homẹhunhun daho do dotoaina tito-to-whinnu gbedewema-yíyí tọn lọ. Theodore Jaracz, he yin dopo to Hagbẹ Anademẹtọ Kunnudetọ Jehovah tọn lẹ tọn mẹ, wẹ yin azinponọ tito-to-whinnu lọ tọn. To kuavọ zohunhun tọn didó na jonọ he wá sọn otò voovo 28 mẹ lẹ godo, e zinnudo nuhọakuẹ-yinyin nuplọnmẹ Biblu tọn ji. Hodọtọ lọ yihodọ sọn William Lyon Phelps, he yin mẹplọntọ daho to Amelika si dọmọ: “Mẹdepope he tindo oyọnẹn Biblu tọn to gigọ́mẹ wẹ sọgan yin yiylọdọ wesetọ nugbonugbo.” Depope he nuplọnmẹ aihọn tọn sọgan yọn-na-yizan sọ, nuplọnmẹ Biblu tọn wẹ yiaga hugan. E nọ gọalọna gbẹtọ lẹ nado yọ́n Jiwheyẹwhe, ehe nọ planmẹ yì ogbẹ̀ madopodo mẹ. (Johanu 17:3) Mẹmẹsunnu Jaracz dọnudo gbedewema-yitọ lọ lẹ na ojlo yetọn nado tindo mahẹ susu dogọ to tito Biblu pinplọnmẹ lẹdo aihọn pé tọn he nọ yin bibasi to agun Kunnudetọ Jehovah tọn lẹ tọn he lán to 98 000 ji lẹ mẹ lẹdo aihọn pé.
Tulinamẹ He Wá do Ganmẹ Na Gbedewema-Yitọ Lẹ
To hodidọ bẹjẹeji azinponọ lọ tọn lẹ godo, William Samuelson dọhodo hosọ lọ ji “Lehe Hiẹ Sọgan Tin Taidi Atin Whanpẹnọ Olivieli Tọn de to Ohọ̀ Jiwheyẹwhe Tọn mẹ Gbọn,” he sinai do Psalm 52:8 ji. E zinnudeji dọ atin olivieli tọn nọ yin yiyizan to yẹhiadonu-liho to Biblu mẹ taidi ohia sinsẹ́n susu didetọ́n, whanpẹ po yẹyi po tọn. (Jẹlemia 11:16) Hodọtọ lọ yí wehọmẹvi lọ lẹ jlẹdo atin olivieli tọn lẹ go bo dọmọ: “Jehovah na nọ pọ́n mì hlan taidi mẹhe tindo whanpẹ po yẹyi po dile mì to azọ́n yẹwhehodidọ Ahọluduta tọn mìtọn hẹndi po nugbonọ-yinyin po to azọ́ndenamẹ mẹdehlan tọn mìtọn lẹ mẹ.” Kẹdẹdile atin olivieli tọn nọ tindo nuhudo adọ̀ he vùn ganji lẹ tọn nado lùn ojlẹ akúdido tọn tọ́n do, wehọmẹvi lọ lẹ dona hẹn adọ̀ gbigbọmẹ tọn yetọn lẹ lodo nado sọgan doakọnna ojlo matindo, nukundiọsọmẹ, kavi whlepọn devo lẹ he yé sọgan pehẹ to sinsẹ̀nzọn tògodo tọn yetọn mẹ.—Matiu 13:21; Kọlọsinu lẹ 2:6, 7.
John E. Barr, dopo to Hagbẹ Anademẹtọ atọ̀n he tindo mahẹ to tito-to-whinnu lọ mẹ lẹ mẹ, dọhodo hosọ lọ “Mì Wẹ Ojẹ̀ Aigba Tọn” ji. (Matiu 5:13) E zinnudeji dọ kẹdẹdile ojẹ̀ nọ zọ́n bọ núdùdù ma nọ gble to paa mẹ do, mọwẹ yẹwhehodidọ mẹdehlan lọ lẹ tọn dogbọn Ahọluduta Jiwheyẹwhe tọn dali na tindo nuyiwadomẹji gbẹwhlẹngán tọn do mẹhe dotoai lẹ ji do niyẹn, bo na basi hihọ́na yé ma nado gblezọn to walọyizan-liho podọ to gbigbọ-liho. Enẹgodo, po kọnugbè he taidi otọ́ de tọn po, Mẹmẹsunnu Barr na tuli gbedewema-yitọ lọ lẹ nado “nọ nọ̀ jijọho” mẹ hẹ mẹdevo lẹ. (Malku 9:50) “Mì wleawuna sinsẹ́n gbigbọ tọn, bo nọ hẹn diun to whepoponu dọ walọ po hodidọ mìtọn po gọ́ na homẹdagbe po mẹtọnhopọn po,” wẹ hodọtọ lọ dotuhomẹnamẹ dọ.
“Gbọṣi Bato mẹ to Ohù Ṣẹnṣẹn” wẹ yin hosọ he ji Wallace Liverance, he yin dopo to mẹplọntọ Wehọmẹ Giliadi tọn lẹ mẹ, zinnudo. Kẹdẹdile bato he to yìyì gbọ̀n ohù ṣẹnṣẹn de sọgan hodo aliho he sọgbe do, mọwẹ nukunnumimọjẹ “onú sisosiso Jiwheyẹwhe tọn lẹ” mẹ—enẹ wẹ nugbo lẹ gando lẹndai Jiwheyẹwhe tọn po lehe e na yin hinhẹndi gbọn po go—sọgan gọalọna mẹde nado yinukọn to gbigbọ-liho do niyẹn. (1 Kọlintinu lẹ 2:10) Gbigbọṣi ohù gbigbọmẹ tọn lọ tó poun gbọn pekọ tintindo to “nuhe yin jọgbe [kavi onú dodonu tọn] ohó Jiwheyẹwhe tọn he dabla tọn” mẹ dali nọ glọnalina nukọnyiyi mítọn bo tlẹ sọgan hẹn ‘húnsiọmẹ gando yise mítọn go’ wá. (Heblu lẹ 5:12, 13; 1 Timoti 1:19) “Mì gbọ ‘adọkun, nuyọnẹn, po zinzin Jiwheyẹwhe tọn he siso po’ ni hẹn mì dote to azọ́ndenamẹ mẹdehlan tọn mìtọn lẹ mẹ,” wẹ Mẹmẹsunnu Liverance dọ to tadona mẹ.—Lomunu lẹ 11:33.
Mark Noumair, mẹplọntọ Giliadi tọn devo, gbadopọnna hosọ lọ “Be Hiẹ Na Nọgbẹ̀ Sọgbe hẹ Ogú Towe Ya?” Na nuhe hugan owhe 60, Wehọmẹ Biblu Pinplọn Watchtower Giliadi tọn ko yin jide-dego bosọ tindo yinkọ dagbe na ‘okiti kunnudide dagbe tọn’ he gbedewema-yitọ wehọmẹ lọ tọn lẹ nọ na wutu. (Gẹnẹsisi 31:48) Ogú Giliadi tọn ehe ko yin zizedo alọ mẹ na wehọmẹvi klasi 118tọ lọ tọn lẹ. Mẹmẹsunnu Noumair na tuli wehọmẹvi lọ lẹ nado hodo apajlẹ Tekoinu he nọgbẹ̀ to ojlẹ Nẹhemia tọn mẹ lẹ tọn bo nọ yí whiwhẹ do kọngbedopọ hẹ agun he mẹ yé tin te po mẹdehlan hatọ lẹ po. Yé yin tudohomẹna nado dapana walọ “mẹgboogbo” goyitọ he go Nẹhemia donù lẹ tọn bo nọ do ojlo hia nado wazọ́n po whiwhẹ po matin ayidonugo dindọn wá yede ji.—Nẹhemia 3:5.
Numimọ po Hokansemẹ He Gọ́ Na Oplọn lẹ Po
Hosọ adà he bọdego to tito-to-whinnu lọ mẹ tọn wẹ “Ohó Jiwheyẹwhe Tọn to Aihẹn.” (Owalọ lẹ 6:7) To anademẹ mẹplọntọ Giliadi tọn Lawrence Bowen tọn glọ, wehọmẹvi lọ lẹ vọ́ wadohia numimọ he yé tindo to lizọnyizọn kunnudegbe tọn mẹ to wehọmẹ lọ whenu lẹ tọn basi. Numimọ lọ lẹ dohia dọ wehọmẹvi lọ lẹ ko lá Ohó Jiwheyẹwhe tọn po zohunhun po podọ Jehovah ko dona vivẹnudido yetọn lẹ tlala.
Richard Ashe deanana hokansemẹ lẹ hẹ hagbẹ whẹndo Bẹtẹli tọn lẹ he wazọ́n to kọndopọmẹ hẹ wehọmẹ lọ. Hodidọ yetọn lẹ hẹnmẹ mọnukunnujẹemẹ dọ whẹndo Bẹtẹli tọn nọ wà nususu nado gọalọna wehọmẹvi Giliadi tọn lẹ nado mọaleyi sọn nupinplọn yetọn mẹ to gigọ́mẹ. Enẹgodo, Geoffrey Jackson dọho hẹ delẹ to mẹhe ko yí gbedewema Giliadi tọn wayi lẹ mẹ. Yé zinnudo dotẹnmẹ hundote susu he gbẹzan mẹdehlan tọn nọ namẹ nado hẹn pipà po gbégbò po wá na Jehovah lẹ ji. Dopo to yé mẹ dọmọ: “Taidi mẹdehlan de, gbẹtọ lẹ nọ doayi nuhe wà a te lẹpo go. Yé nọ dotoai, yé nọ doayi mẹgo, podọ yé nọ flinnu.” Enẹwutu, wehọmẹvi lọ lẹ yin tulina nado yọ́n nujọnu-yinyin apajlẹ dagbe zizedai to ojlẹ lẹpo mẹ tọn. Matin ayihaawe, ayinamẹ dagbe ehe na yin nuhọakuẹ taun to azán he ja lẹ mẹ.
Stephen Lett, he yin dopo to Hagbẹ Anademẹtọ lọ mẹ, wẹ dọ hodidọ tadona tọn lọ, he hosọ etọn yin “Mì Zindonukọn Taidi ‘Osin Ogbẹ̀ Tọn’ Manamẹtọ Lẹ.” (Johanu 7:38) E basi zẹẹmẹ dọ to osun atọ́n he wayi lẹ gblamẹ, wehọmẹvi lọ lẹ mọ ale mayọnjlẹ lẹ yí gbọn osin susugege nùnù sọn nugbo Ohó Jiwheyẹwhe tọn mẹ dali. Ṣigba etẹwẹ mẹdehlan yọyọ lọ lẹ na yí nudọnamẹ he yé ko plọn lẹ do wà? Mẹmẹsunnu Lett na tuli gbedewema-yitọ lọ lẹ nado má osin gbigbọmẹ tọn ehelẹ matin ṣejannabi, na mẹdevo lẹ nido sọgan tindo “dotọ̀ osin tọn de to ohò [yetọn] mẹ, he na to sisà hlan jẹ ogbẹ̀ madopodo.” (Johanu 4:14) Hodọtọ lọ yidogọ dọmọ: “Mì ma wọnji gbede blo nado na Jehovah, ‘asisa osin ogbẹ̀ tọn’ lọ, gbégbò po gigo he e jẹna po. Mì nọ fahomẹ dile mì to nuplọn hẹ mẹhe ko tọnjẹgbonu sọn Babilọni Daho lọ he akúdido to yasana mẹ lẹ.” (Jẹlemia 2:13) To tadona mẹ, Mẹmẹsunnu Lett na tuli gbedewema-yitọ lọ lẹ nado yí zohunhun do hodo apajlẹ gbigbọ po asiyọyọ po tọn bo to lilá zọnmii dọmọ: “Wá. Podọ mẹhe nugblahu gbọ e ni wá. Ewọ he jlo, gbọ e ni yí osin ogbẹ̀ tọn lọ vọnu.”—Osọhia 22:17.
Mẹmẹsunnu Jaracz dotana tito-to-whinnu lọ gbọn nudọdomẹ he yin mimọyi sọn otò voovo mẹ lẹ lilá dali. Bọdo ehe go, hagbẹ klasi he to gbedewema yí lọ tọn dopo hia wekanhlanmẹ pẹdido tọn de.
Be hiẹ sọgan ze dewe jo nado sẹ̀n to fie nuhudo sù hugan te ya? Eyin mọwẹ, doafọna yanwle gbigbọmẹ tọn lẹ, dile gbedewema-yitọ ehelẹ ko wà do. Gbẹ̀n ayajẹ po pekọ po he nọ yin mimọyi to whenuena mẹde yí homẹhunhun do ze ede jo sọn ojlo mẹ wá to sinsẹ̀nzọn Jiwheyẹwhe tọn mẹ—vlavo taidi mẹdehlan de to tògodo kavi taidi lizọnyizọnwatọ de he ma dẹ̀n do whé.
[Yẹdide to weda 13]
SỌHA NULINLẸN KLASI TỌN
Sọha otò he mẹ yé wá sọn tọn: 8
Sọha otò he mẹ yé yin didohlan tọn: 19
Sọha wehọmẹvi lẹ tọn: 46
Madozẹnzẹn owhe mẹhodido tọn: 33,0
Madozẹnzẹn owhe to nugbo mẹ tọn: 16,5
Madozẹnzẹn owhe lizọnyizọn whenu-gigọ́ tọn: 12,9
[Yẹdide to weda 15]
Gbedewema-Yíyí Klasi 118tọ Wehọmẹ Biblu Pinplọn Watchtower Giliadi Tọn
To yinkọ he tin to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọnwhé yì adusiwhé to hukan dopodopo ji.
(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.