Wehọmẹ Giliadi Tọn—Owhe 60 Azọ́nplọnmẹ Mẹdehlan Tọn — WESẸDOTẸN INTẸNẸT JI TỌN Watchtower Tọn

Wehọmẹ Giliadi Tọn—Owhe 60 Azọ́nplọnmẹ Mẹdehlan Tọn

“NA MÍ plọn Biblu sisosiso wutu, mí dọnsẹpọ Jehovah bosọ plọn nususu gando titobasinanu etọn go. Ehe hẹn mí pegan na azọ́ndenamẹ tògodo tọn.” Lehe mẹhe mọ gbedewema yí to klasi tintan mẹ de basi zẹẹmẹ nupinplọn he mẹ e tindo mahẹ te to Wehọmẹ Biblu Pinplọn Watchtower Giliadi tọn mẹ do niyẹn. Sọn owhe 60 die gbọ́n he e ko yin didoai, Wehọmẹ Giliadi tọn ko do mẹdehlan lẹ hlan. To 8 mars 2003, gbedewema yíyí klasi 114tọ tọn wá aimẹ to Nọtẹn Wepinplọn Watchtower tọn to Patterson, New York. Gbẹtọ 6 404 he pli to plitẹnhọ lọ po nọtẹn devo lẹ po mẹ dotoaina tito-to-whinnu, he bẹ hodidọ lẹ, hokansemẹ lẹ, gọna hodọdopọ de hẹn po sọwhiwhe po.

Theodore Jaracz, heyin dopo to Hagbẹ Anademẹtọ lọ mẹ, wẹ yin azinponọ. Hodidọ bẹjẹeji tọn etọn dọ̀n ayidonugo wá gbẹtọ he wá sọn ofi voovo he pli dopọ lẹ ji, he bẹ mẹhe wá sọn Asia, Caraïbe, Europe, gọna Ṣẹnṣẹn po Hùwaji Amelika tọn po hẹn. To zize hodidọ etọn sinai do 2 Timoti 4:5 ji mẹ, Mẹmẹsunnu Jaracz zinnudo azọ́n tangan mẹdehlan heyin azọ́nplọn to Giliadi de tọn ji—enẹ wẹ nado “to azọ́n yẹwhehodọtọ tọn wà pé.” Mẹdehlan lẹ nọ dekunnuna nugbo lọ gbọn Biblu pinplọn gbẹtọ lẹ dali.

Wehọmẹvi lẹ Mọ Anademẹ Godo Tọn Yí

John Larson, heyin dopo to Wedegbẹ́ Alahọ États-Unis tọn mẹ, bẹ hodidọ gli debọdo-dego tọn de jẹeji, bo dọho do hosọ yise-hẹnlodo tọn lọ ji heyin “Eyin Jiwheyẹwhe Tin Na Mí, Mẹnu Wẹ Tin Agọ̀ Do Mí Go?” (Lomunu lẹ 8:31) E basi zẹẹmẹ dodonu Biblu tọn he wehọmẹvi lọ lẹ tindo nado dejido huhlọn Jehovah tọn go mlẹnmlẹn nado gọalọna yé nado duto aliglọnnamẹnu depope he yé sọgan pehẹ to azọ́ndenamẹ yetọn lẹ mẹ ji. To Lomunu lẹ 8:38, 39 yiyizan mẹ, Mẹmẹsunnu Larson na tuli wehọmẹvi lọ lẹ dọ: “Mì nọte bo lẹnnupọndo huhlọn he Jiwheyẹwhe to yiyizan do ota mìtọn mẹ ji, bosọ flin dọ nudepope ma sọgan hẹn haṣinṣan he Jehovah tindo hẹ mì gble.”

Hodọtọ he bọdego wẹ Guy Pierce, heyin dopo to Hagbẹ Anademẹtọ mẹ. Hosọ he e de lọ wẹ “Mì Hẹn Nukun Mìtọn lẹ Yin Ayajẹnọ!” (Luku 10:23) E basi zẹẹmẹ dọ ayajẹ nujọnu tọn nọ bẹ yinyọ́n Jehovah po nukunnumimọjẹ lẹndai tẹgbẹ̀ tọn etọn po mẹ hẹn gọna mimọ hẹndi dọdai Biblu tọn lẹ tọn. Fidepope he yé yì, wehọmẹvi lọ lẹ sọgan hẹn ayajẹ nujọnu tọn go gbọn nukun yetọn lẹ hinhẹn yin ayajẹnọ dali. Mẹmẹsunnu Pierce na tuli gbedewema-yitọ lọ lẹ nado nọ lẹnnupọn sisosiso do dagbewà Jehovah tọn ji bo ze ayiha po ahun yetọn po do ojlo Etọn wiwà ji gligli. (Psalm 77:12) Gbọn pọndohlan nujikudo tọn tintindo dali, gbedewema-yitọ lọ lẹ sọgan duto nuhahun depope he yé sọgan dukosọ hẹ ji.

Enẹgodo klasi lọ mọ hodidọ tulinamẹ e zun whedenu tọn yí sọn nuplọnmẹtọ awe he ko plọnnu yé egbesọegbesọ lẹ dè. “Be Gigo Dín Wẹ Mì te Ya?” wẹ kanbiọ he Lawrence Bowen kanse to hosọ hodidọ etọn tọn mẹ. Suhugan gbẹtọ lẹ tọn nọ lẹndọ gigo tindo kọndopọ hẹ pipà, gbégbò, po yẹyi mẹdetiti tọn po. Ṣigba, psalm-kàntọ Asafi wá mọnukunnujẹ gigo nujọnu tọn mẹ—yèdọ haṣinṣan họakuẹ yẹyinọ de tintindo hẹ Jehovah. (Psalm 73:24, 25) Gbedewema-yitọ lẹ yin tulina nado hẹn haṣinṣan pẹkipẹki de go hẹ Jehovah gbọn Biblu pinplọn sisosiso zọnmii dali. Angẹli lẹ “jlo nado doun” zẹẹmẹ gigọ́ lẹ mẹ pọ́n gando hẹndi lẹndai Jehovah tọn lẹ tọn go gbọn Klisti gblamẹ. (1 Pita 1:12) Yé jlo na plọn nususu gando Otọ́ yetọn go nado sọgan do gigo etọn hia. Enẹgodo hodọtọ lọ na tuli wehọmẹvi lọ lẹ nado pagigona Jehovah to azọ́ndenamẹ mẹdehlan tọn yetọn mẹ gbọn alọgigọna mẹdevo lẹ nado mọ adọkun họakuẹ hugan lọ dali.

Wallace Liverance, heyin kandai-hẹntọ wehọmẹ lọ tọn dotana hodidọ bẹjẹeji debọdo-dego tọn lẹ po hosọ lọ po heyin “To Nuyọnẹn Jiwheyẹwhe tọn Dọ to Nudabla Mẹ.” (1 Kọlintinu lẹ 2:7) Etẹwẹ yin nuyọnẹn Jiwheyẹwhe tọn ehe he go apọsteli Paulu dọho gando to sinsẹ̀nzọn mẹdehlan tọn etọn whenu? Nuyizan nuyọnẹn po huhlọnnọ Jehovah tọn po nado hẹn jijọho po pọninọ po wá lẹdo aihọn pé wẹ e yin. Jesu wẹ yin ahọ́nkan nuyọnẹn ehe tọn. Kakati nado nọ dọyẹwheho nunọwhinnusẹ́n Klistiani tọn lẹ yiyizan nado didẹ nuhahun gbẹtọvi lẹ tọn tọn, Paulu gọalọna gbẹtọ lẹ nado mọ lehe Jiwheyẹwhe na de kọdetọn ylankan ylando Adam tọn lẹ tọn sẹ do. (Efesunu lẹ 3:8, 9) Hodọtọ lọ dotuhomẹna todoaitọ etọn lẹ dọmọ: “Mì yí lẹblanulọkẹyi sinsẹ̀nzọn tọn mìtọn zan taidi Paulu, mẹhe mọ azọ́ndenamẹ mẹdehlan tọn etọn taidi dotẹnmẹ hundote de nado gọalọna gbẹtọ lẹ nado mọ lehe Jehovah na hẹn lẹndai etọn lẹ di do.”

Bọdo ehe go, Mark Noumair, heyin nuplọnmẹtọ Giliadi tọn devo, deanana hodọdopọ zohunhunnọ de hẹ wehọmẹvi klasi lọ tọn susu. Hosọ lọ “Ohó Jiwheyẹwhe Tọn Pinplọn Nọ De Lizọnyizọnwatọ Zohunhunnọ lẹ Tọ́n” zinnudo hodidọ Paulu tọn to Lomunu 10:10 mẹ ji. Klasi lọ dọ numimọ kunnudegbe tọn susu he yé ko duvivi etọn to whenuena yé tin to wehọ lọ mẹ. Numimọ yetọn lẹ dohia dọ eyin mí plọn Ohó Jiwheyẹwhe tọn bo lẹnayihamẹpọn deji, onú jiawu he gando Jehovah Jiwheyẹwhe po Ahọluduta etọn po go lẹ na gọ́ ahun mítọn mẹ bọ mí nasọ nọ dọ yé na mẹdevo lẹ. To osun atọ́n he yé do nọ̀ Nọtẹn Wepinplọn Watchtower tọn mẹ lẹ whenu, wehọmẹvi lọ lẹ bẹ hugan plọnmẹ Biblu 30 jẹeji hẹ jlodotọ lẹ to aigba-denamẹ he nọ yin azọ́nwadeji gbọzangbọzan agun he to yakẹ lẹ tọn ji.

Numimọnọ lẹ Na Ayinamẹ

To wehọmẹ lọ whenu, wehọmẹvi lọ lẹ mọaleyi sọn gbẹdido hẹ hagbẹ whẹndo Bẹtẹli États-Unis tọn mẹ. Hagbẹ whẹndo lọ tọn awe Robert Ciranko po Robert P. Johnson po kanhose devizọnwatọ Jehovah tọn nugbonọ ojlẹ dindẹn tọn delẹ, he bẹ nugopọntọ tomẹyitọ he to azọ́nplọnmẹ vonọtaun mọyi to Nọtẹn Wepinplọn Watchtower tọn mẹ to alọnu din lẹ hẹn. Mẹhe yin hokanse lẹpo wẹ ko mọ gbedewema yí sọn Giliadi bo ko sọ yin mẹdehlan lẹ to ojlẹ de mẹ wayi. Wehọmẹvi lọ lẹ po whẹndo yetọn lẹ po gọna họntọn lẹ yin tulina taun nado se hodidọ nuyọnẹn tọn lẹ sọn sunnu gbigbọnọ numimọnọ ehelẹ dè.

Ayinamẹ yetọn delẹ die: “Mì nọ hẹn alọnu ján dile e sọgan yọnbasi do to lizọnyizọn lọ mẹ podọ to agun mẹ.” “Mì ma nọ yí nukun nujọnu hugan tọn do pọ́n mìde blo. Mì nọ ze ayidonugo do lẹndai mìtọn ji taidi mẹdehlan de, bosọ yí fie mì to sinsẹ̀nzọnwa te do basi owhé mìtọn.” Hodidọ tulinamẹ tọn devo lẹ do lehe azọ́nplọnmẹ Giliadi tọn nọ hẹn lizọnyizọnwatọ de pegan na azọ́n dagbe lẹ do hia, mahopọnna fie e yin azọ́ndena yì. Delẹ die: “Mí plọn nado kọngbedopọ bo wazọ́n dopọ.” “Wehọmẹ lọ gọalọna mí nado kẹalọyi aṣa yọyọ lẹ.” “Mí yin pinplọn nado nọ yí Owe-wiwe zan sọn pọndohlan he gbọnvo de mẹ.”

John E. Barr, heyin Hagbẹ Anademẹtọ de na ojlẹ dindẹn wẹ dọ hodidọ titengbe tito-to-whinnu lọ tọn. Hosọ he sinai do Owe-wiwe ji etọn wẹ “Ogbè Yetọn Tọ́n Yì Aigba Lẹpo Ji.” (Lomunu lẹ 10:18) E kan kanbiọ lọ se dọ, Be omẹ Jiwheyẹwhe tọn lẹ ko penugo nado hẹn azọ́n sinsinyẹn ehe di to egbehe ya? Gbau! Yigodo jẹ 1881, hihiatọ linlinnamẹwe Atọ̀họ̀-Nuhihọ́ Lọ Tọn lẹ yin kinkanse dọ: “Be mì to yẹwheho lọ dọ ya?” Enẹgodo hodọtọ lọ flin oylọ titengbe heyin bibasi to 1922 to plidopọ Cedar Point, Ohio, États-Unis tọn ji mẹplidopọ lẹpo dọ: “Mì lá Ahọlu lọ po Ahọluduta etọn po!” To nukọnmẹ, zohunhun devizọnwatọ nugbonọ Jiwheyẹwhe tọn lẹ tọn whàn yé nado lá nugbo jiawu Ahọluduta lọ tọn lẹ hlan akọta lẹpo. Gbọn owe zinjẹgbonu lẹ po hogbe nùmẹ tọn lẹ po gblamẹ, wẹndagbe lọ ko jẹ opodo aigba tọn—popolẹpo hlan gigo po pipà Jehovah tọn po. To tadona he whànmẹ de mẹ, Mẹmẹsunnu Barr na tuli gbedewema-yitọ lẹ nado lẹnnupọndo dona yetọn lẹ ji, dọmọ: “Egbesọegbesọ, eyin mì to dẹ̀ho hlan Jehovah to azọ́ndenamẹ mìtọn mẹ, mì nọ dopẹna ẹn po ahun lẹpo po na adà he mì to yiyiwa to hẹndi hodidọ lọ tọn mẹ heyin, ‘Ogbè yetọn tọ́n yì aigba lẹpo ji.’ ”

To hodidọ ehe godo, nudọdomẹ lẹ yin hihia, bọ azinponọ lọ má gbedewema na gbedewema-yitọ dopodopo. Enẹgodo, to numọtolanmẹ ayajẹ po awubla tọn lẹ po mẹ na wehọmẹ yiwanna lọ jijodo wutu, afọzedaitọ klasi lọ tọn hia gbemima ahundoponọ heyin didohlan Hagbẹ Anademẹtọ po whẹndo Bẹtẹli tọn lọ po, bo do nujikudo gbedewema-yitọ lọ lẹ tọn hia nado to Jehovah pà “sọn ojlẹ he mẹ kakadoidoi.”—Psalm 115:18.

Mí to dẹ̀ho dọ gbedewema-yitọ ehelẹ ni diọada sọgbe hẹ owhé yọyọ yetọn bosọ yidogọna nukọnyiyi azọ́n yẹwhehodidọ lọ tọn lẹdo aihọn pé, kẹdẹdile mẹhe ko yì jẹnukọnna yé lẹ ko wà do na owhe 60 delẹ.

[Apotin to weda 23]

SỌHA NULINLẸN KLASI TỌN

Sọha otò he mẹ yé wá sọn tọn: 12

Sọha otò he mẹ yé yin didohlan tọn: 16

Sọha wehọmẹvi lẹ tọn: 48

Madozẹnzẹn owhe mẹhodido tọn: 34,4

Madozẹnzẹn owhe to nugbo mẹ tọn: 17,6

Madozẹnzẹn owhe lizọnyizọn whenu-gigọ́ tọn: 13,5

[Yẹdide to weda 24]

Gbedewema-Yíyí Klasi 114tọ Wehọmẹ Biblu Pinplọn Watchtower Giliadi Tọn

To yinkọ he to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọnwhé yì adusiwhé to hukan dopodopo ji.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.