‘Yẹwheho lọ Didọ’ Nọ Hẹn Kọfanamẹ Wá — WESẸDOTẸN INTẸNẸT JI TỌN Watchtower Tọn

‘Mí Wá Dè E, . . . Yẹn Nasọ Fakọna Mí’

‘Yẹwheho lọ Didọ’ Nọ Hẹn Kọfanamẹ Wá

DAWE pipé de wẹ e yin he tin to azọ́ndenamẹ titengbe de ji. Aliho he mẹ e plọnmẹ te lẹ tindo kọdetọn dagbe sọmọ bọ “avò vò gbẹtọ lẹ do nuplọnmẹ etọn go.” (Matiu 7:28) Yẹwhehodọtọ he onú ma nọ ṣikọna de wẹ e sọ yin. Ojlẹ, huhlọn, po nutindo etọn lẹ po yin yiyizan na taun tọn na yẹwhehodidọ gando Ahọluduta Jiwheyẹwhe tọn go. Na nugbo tọn, Jesu Klisti zinzọnlin gbọ̀n otò he mẹ e yin jiji te blebu taidi yẹwhehodọtọ po mẹplọntọ he ma tindo awetọ po.—Matiu 9:35.

Azọ́ndenamẹ titengbe Jesu tọn wẹ yin nado dọyẹwheho “wẹndagbe ahọludu tọn” hlan mẹhe nọgbẹ̀ to ojlẹ etọn mẹ lẹ podọ nado plọnazọn devi etọn lẹ nado wazọ́n dopolọ lẹdo aihọn pé. (Matiu 4:23; 24:14; 28:19, 20) Be zínpinpẹn azọ́ndenamẹ yẹwhehodidọ lọ tọn po niyaniya-yinyin etọn po gọna gbigblo nuyiwa enẹ tọn na pẹnagbàn hodotọ mapenọ etọn he tindo dogbó to nuhe yé sọgan wà mẹ lẹ wẹ ya?

Paali wẹ! To whenuena e ko dọna devi etọn lẹ nado hodẹ̀ hlan “Oklunọ ojijẹ tọn,” yèdọ Jehovah Jiwheyẹwhe na azọ́nwatọ dogọ lẹ godo, Jesu do yé jẹgbonu yì nado plọn gbẹtọ lẹ. (Matiu 9:38; 10:1) Enẹgodo e na mẹhẹndeji etọn dọ azọngban hodotọ etọn yinyin tọn—gọna azọ́ndenamẹ yẹwhehodidọ tọn—na hẹn kọgbọ po awumiọnnamẹ nujọnu tọn po wá. Jesu dọmọ: ‘Mì wá dè e, . . . yẹn nasọ fakọna mì.’—Matiu 11:28.

Asisa Ayajẹ Tọn

Lehe oylọ basinamẹ enẹ yin awuvẹmẹ, owanyinọ, po homẹdagbe tọn po do sọ! E do ahunmẹdunamẹnu he Jesu tindo na hodotọ etọn lẹ hia. Devi etọn lẹ mọ kọfanamẹ to azọngban yetọn hinhẹndi mẹ heyin nado dọyẹwheho “wẹndagbe” Ahọluduta Jiwheyẹwhe tọn. E hẹn ayajẹ po pekọ nujọnu tọn po wá na yé.—Johanu 4:36.

Ojlẹ dindẹn jẹnukọnna aigba ji wiwá Jesu tọn, Owe-wiwe zinnudeji dọ ayajẹ dona yin adà sinsẹ̀nzọn wiwe hlan Jiwheyẹwhe tọn. Psalm-kàntọ lọ hẹn ehe họnwun to whenuena e jihàn dọmọ: “Mì jaya homẹvivi tọn hlan OKLUNỌ, mì aigba lẹpo. Mì yí homẹhun do sẹ̀n OKLUNỌ: mì wá nukọn etọn po [awhágbe ayajẹ tọn] po.” (Psalm 100:1, 2) To egbehe, gbẹtọ akọta lẹpo tọn wẹ to gigopana Jehovah, podọ hogbe pipà tọn yetọn lẹ taidi awhágbe awhànpa he gbawhàn de tọn. Mẹhe ze yede jo na Jiwheyẹwhe nugbonugbo lẹ nọ wá nukọn etọn ‘po awhágbe ayajẹ tọn de po.’ Podọ enẹ sọgbe, na nugbo tọn, na Jehovah yin ‘Jiwheyẹwhe ayajẹ tọn,’ he jlo dọ devizọnwatọ etọn lẹ ni mọ ayajẹ to klandowiwe yetọn hinhẹndi hlan emi mẹ.—1 Timoti 1:11.

Lizọnyizọnwatọ Heyin Kọfana Lẹ

Nawẹ e yọnbasi do dọ azọ́n sinsinyẹn wiwà to lizọnyizọn kunnudegbe tọn mẹ ma nọ hẹn nuṣikọna mí ṣigba nọ fakọna mí? Eyọn, azọ́n Jehovah tọn wiwà taidi núdùdù he nọ vọ́ huhlọn namẹ de na Jesu. E dọmọ: “Núdùdù ṣie wẹ nado wà ojlo mẹhe do mi hlan tọn podọ nado dotana azọ́n etọn.”—Johanu 4:34.

Mọdopolọ, Klistiani yẹwhehodọtọ zohunhunnọ egbehe tọn lẹ nọ mọ ayajẹ dile yé to ‘yẹwheho lọ dọ.’ (2 Timoti 4:2) Connie, heyin Klistiani yọnnu mẹhomẹ de he nọ yí hugan ganhiho 70 zan to osun dopo mẹ to azọ́n yẹwhehodidọ tọn mẹ dọmọ: “To mahẹ tintindo to lizọnyizọn lọ mẹ godo, yẹn nọ tindo numọtolanmẹ pekọ po linlẹn dagbemẹ-ninọ tọn po, yèdọ eyin onú tlẹ ṣikọna mi to whèjai.”

Etẹwẹ lo eyin owẹ̀n Ahọluduta lọ tọn mayin alọkẹyi ganji? Connie zindonukọn dọmọ: “Mahopọnna lehe yẹn yin alọkẹyi do, ojlẹ depope ma ko tin pọ́n gbede to whenuena e vẹ́ na mi dọ yẹn tindo mahẹ to lizọnyizọn lọ mẹ. Gbọnvona yinyọnẹn dọ yẹn to nuhe nọ hẹn homẹ Jehovah tọn hùn wà, yẹn nọ pọ́n ẹn taidi homẹhunnu nado dọho gando nugbo lọ go na dile yẹn to mọwà, todido jiawu he tin to Biblu mẹ nọ yin hinhẹn lodo dogọ to ahun ṣie mẹ.”

Mẹdevo lẹ mọdọ alọgigọna gbẹtọ lẹ nado tindo oyọnẹn he pegan Jiwheyẹwhe tọn nọ hẹn gbẹzan yetọn tindo zẹẹmẹ dogọ. Yọnnu jọja de he nọ yin Meloney, he nọ yí hugan ganhiho 50 zan to osun dopo mẹ to azọ́n yẹwhehodidọ tọn mẹ dọmọ: “Lizọnyizọn lọ nọ fakọna mi na e nọ na mi anademẹ bo nọ hẹn gbẹzan ṣie tindo lẹndai wutu. Nuhahun mẹdetiti tọn lẹ po kọgbidinamẹ egbesọegbesọ tọn lẹ po nọ busẹ to whenuena yẹn to mahẹ tindo to sinsẹ̀nzọn lọ mẹ.”

Millicent, heyin lizọnyizọnwatọ zohunhunnọ Kunnudetọ Jehovah tọn lẹ tọn devo dọmọ: “Lizọnyizọn lọ nọ hẹn azán dopodopo he yẹn yizan nado dọho na mẹdevo lẹ gando lẹndai Jiwheyẹwhe tọn na gbẹtọvi go podọ nado basi zẹẹmẹ lehe Paladisi na yin hinhẹngọwa aigba ji tọn họakuẹ. E nọ hẹn Jehovah yin omẹ nujọnu tọn hlan mi egbesọegbesọ bosọ nọ na mi jijọho po ayajẹ ahun mẹ tọn po jẹ obá de mẹ ehe yẹn ma sọgan mọ to aliho devo depope mẹ.”

Mẹhe Se lẹ Nọ Yin Kọfana

Lizọnyizọn Klistiani tọn nọ fakọna yẹwhehodọtọ Ahọluduta tọn lẹ na nugbo tọn, podọ e nọ miọnhomẹna mẹhe kẹalọyi owẹ̀n ogbẹ̀-namẹ tọn lọ lẹ. Dile etlẹ yindọ mẹplọntọ wehọmẹ tọn de sọn Portugal ko yin pinplọn gbọn yẹwhenọ lẹ dali, e mọdọ ṣọṣi emitọn ma to pekọ hẹnwa na nuhudo gbigbọmẹ tọn emitọn lẹ gba. Kanbiọ Biblu tọn etọn lẹ ma mọ gblọndo gba. Plọnmẹ Biblu gbesisọ tọn de he Kunnudetọ Jehovah tọn de basi hẹ ẹ hẹn nukunnumọjẹnumẹ Owe-wiwe tọn debọdo-dego wá na ẹn. Mẹplọntọ wehọmẹ tọn lọ jaya taun. “Yẹn nọ tin to jejeji na oplọn ṣie to mercredi lẹpo,” wẹ e dọ, “na kanbiọ ṣie lẹ nọ mọ gblọndo yí debọdo-dego po kunnudenu dutomẹji Biblu tọn po wutu.” To egbehe, yọnnu ehe yin devizọnwatọ klandowiwe Jehovah tọn de, podọ ewọ lọsu to nugbo Biblu tọn yí do fakọna mẹdevo lẹ.

To whelọnu lo, e họnwun dọ nujọnu-yinyin azọ́ndenamẹ yẹwhehodidọ tọn kavi kiklo aigba-denamẹ aihọn lọ tọn ma nọ gbidikọna Kunnudetọ Jehovah tọn lẹ gba. Mọjanwẹ ojlo matindo kavi nukundiọsọmẹ ma nọ hẹn yé gbọjọ do niyẹn. Yé ko yí yede zan vẹkuvẹku nado hẹn azọ́ndenamẹ yẹwhehodidọ Ahọluduta tọn yetọn di. Yé nọ má wẹndagbe lọ hẹ gbẹtọ lẹ to fidepope he yé sọgan yin mimọ te—to agbànbẹhun-glintẹn de to États-Unis (1), to agahun-jlẹtẹn Corée tọn de (2), to osó Andes tọn lẹ ji (3), kavi to nusatẹn Londres tọn de mẹ (4). Hodotọ egbezangbe Jesu tọn lẹ to ayajẹ yí do wazọ́n alemọyi tọn yetọn lẹdo aihọn pé. Podọ hlan hẹndi opagbe etọn tọn, e ko fakọna yé bo ko yí yé zan nado fakọna mẹsusu devo lẹ.—Osọhia 22:17.