Dejido Jehovah Jiwheyẹwhe Nujọnu Tọn Go
Be hiẹ ko pọ́n agahomẹ pọ́n gbede to zánmẹ to whenuena aslọ depope matin to aga bo mọ sunwhlẹvu fọtọ́n lẹ ya? Mẹnu wẹ hiẹ lẹndọ e dá yé?
TO YẸHIADONU liho, sunwhlẹvu lẹ dọho hlan Ahọlu Davidi Islaeli hohowhenu tọn to zánmẹ, he hẹn ẹn nado wlan dọmọ: “Olọn lẹ to gigo Jiwheyẹwhe tọn hodọ; agahomẹ sọ to alọnuzọn etọn lá.” (Psalm 19:1) Mọwẹ, Mẹdatọ lọ wẹ jẹ nado “yí gigo, yẹyi, po huhlọn po,” e mayin nudida lẹ gba.—Osọhia 4:11; Lomunu lẹ 1:25.
“Mẹhe dó onú popo wẹ Jiwheyẹwhe,” wẹ Biblu dọ. (Heblu lẹ 3:4) Na nugbo tọn, Jiwheyẹwhe nugbo lọ, ‘he yinkọ etọn yin Jehovah, wẹ Gigogán to wẹkẹ lẹpo ji.’ (Psalm 83:18) Podọ ewọ mayin oyẹ kavi odlọ tata de gba. Jesu Klisti dọ gando Otọ́ olọn mẹ tọn etọn, Jehovah go dọmọ: “Nugbo wẹ mẹhe do mi hlan.”—Johanu 7:28.
Jehovah Nọ Hẹn Lẹndai Etọn lẹ Di
Yinkọ taun Jiwheyẹwhe tọn, yèdọ Jehovah, sọawuhia diblayi whla 7 000 to Owe Wiwe Heblu tọn kẹdẹ mẹ. Yinkọ enẹ taun dlẹnalọdo nugbo lọ dọ ewọ yin omẹ nujọnu tọn. To paa mẹ, yinkọ Jiwheyẹwhe tọn zẹẹmẹdo “E Nọ Hẹn Nado Lẹzun.” Jehovah Jiwheyẹwhe gbọnmọ dali do ede hia taidi Hẹnditọ lẹndai etọn lẹ tọn. To whenuena Mose kanse Jiwheyẹwhe nuhe yinkọ etọn yin, Jehovah basi zẹẹmẹ etọn to aliho ehe mẹ dọ: ‘Yẹn na yin nuhe yẹn na yin.’ (Eksọdusi 3:14) Lẹdogbedevomẹ Rotherham tọn dọ tlọlọ dọ: “Yẹn Na Lẹzun nudepope he yẹn jlo.” Jehovah nọ lẹzun, kavi nọ de nado lẹzun, nudepope he nuhudo tin na nado hẹn lẹndai po opagbe dodonọ etọn lẹ po di. Enẹwutu, wẹ e tindo tẹnmẹ-yinkọ susugege, taidi Mẹdatọ, Otọ́, Oklunọ Nupojipetọ, Lẹngbọhọtọ, Jehovah awhànpa lẹ tọn, Sisètọ Odẹ̀ tọn, Whẹdatọ, Nuplọnmẹtọ Daho, Mẹfligọtọ.—Whẹdatọ 11:27; Psalm 23:1; 65:2; 73:28; 89:26; Isaia 8:13; 30:20; 40:28; 41:14.
Jiwheyẹwhe nugbo lọ kẹdẹ wẹ sọgan gbọn gbesisọ dali yin yiylọdọ Jehovah, na gbẹtọvi lẹ ma sọgan yin nujikudonọ dọ linlẹn yetọn lẹ na tindo kọdetọn dagbe gba. (Jakobu 4:13, 14) Jehovah kẹdẹ wẹ sọgan dọmọ: “Na le jikun po kẹnjikun po nọ sọn olọn mẹ wá, bo masọ nọ lẹgọ do finẹ, ṣigba bọ e nọ hẹn aigba yọ̀n, bosọ nọ hẹn onú wú jẹgbonu, bosọ nọ bligo, na e nido na nọkun jidotọ, podọ núdùdù na nudùtọ. Mọkẹdẹ wẹ ohó ṣie he tọ́n sọn onù ṣie na te: e ma na lẹgọ wá dè e agbá, ṣigba e na dotana onú he mẹ yẹn do e hlan te.”—Isaia 55:10, 11.
Jehovah nọ hẹn lẹndai etọn lẹ di mlẹnmlẹn sọmọ bọ nuhe tlẹ sọgan gọ̀n ma yin nujọnu na gbẹtọvi lẹ nọ yin nujọnu sọn pọndohlan ewọ tọn mẹ. Ojlẹ dindẹn to okú Ablaham, Isaki, po Jakobu po tọn godo, Jesu donu yé go bo dọmọ: “E [Jehovah] mayin Jiwheyẹwhe oṣiọ lẹ tọn gba, adavo mẹhe to ogbẹ̀ lẹ tọn: na gbẹtọ lẹpo wẹ tin to ogbẹ̀ hlan ẹn.” (Luku 20:37, 38) Tọgbo nugbonọ atọ̀n lọ lẹ ko kú, ṣigba lẹndai Jiwheyẹwhe tọn nado fọ́n yé yin nujikudo tọn sọmọ bọ e taidi dọ yé tin to ogbẹ̀ nkọtọn. Hinhẹn devizọnwatọ nugbonọ hohowhenu tọn ehelẹ gọwá ogbẹ̀ ma sinyẹnawu na Jehovah sọ didá sunnu tintan sọn kọ́gudu aigba tọn mẹ gba.—Gẹnẹsisi 2:7.
Apọsteli Paulu wleawuna apajlẹ devo gando lehe Jiwheyẹwhe nọ hẹn nuhe e lẹndai lẹ di do go. To Biblu mẹ, Ablaham yin yiylọdọ “otọ́ akọta susu tọn.” (Lomunu lẹ 4:16, 17) To whenuena Ablam ma tlẹ ko tindo ovi, Jehovah diọ yinkọ etọn zun Ablaham, he zẹẹmẹdo “Otọ́ Gbẹtọgun (Mẹsusu) tọn.” Jehovah hẹn yinkọ enẹ nado tindo hẹndi gbọn huhlọn vijiji Ablaham yọnhonọ po asi yọnhonọ etọn, Sala tọn po hinhẹngọwa dali.—Heblu lẹ 11:11, 12.
Na e yin nina huhlọn susu po aṣẹpipa po wutu, Jesu Klisti dọho nujijọ nujọnu tọn lẹ tọn sọn pọndohlan he yiaga hugan gbẹtọvi lẹ tọn mẹ. Dile etlẹ yindọ họntọn vivẹ́ etọn Lazalọsi ko kú, Jesu dọna devi etọn lẹ dọmọ: “Họntọn mítọn Lazalọsi mlọnai damlọn; ṣigba yẹn jei, na yẹn nido fọ́n ẹn sọn amlọn mẹ.” (Johanu 11:11) Etẹwutu Jesu dọho mẹhe ko kú tọn dọ amlọndọ wẹ e te poun?
To whenuena Jesu jẹ otò Lazalọsi tọn mẹ to Bẹtani, e yì yọdò lọ kọ̀n bo biọ dọ yè ni bli zannu he tin to onù etọn sẹ̀. To dẹ̀hiho po ogbè lele po godo, e degbè dọmọ: “Lazalọsi, jẹgbonu wá.” Po nukun nupọntọ lẹ tọn po to yọdò lọ ji, “ewọ he yin oṣiọ lọ sọ jẹgbonu wá, he yè yí avọ̀ oṣiọ tọn do blá alọ po afọ po na: bosọ yí ozùnkẹ̀n de do blá nukunmẹ na.” Jesu dọmọ: “Mì tùn in, bo gbọ e ni yì.” (Johanu 11:43, 44) Jesu fọ́n Lazalọsi sọnku—yèdọ hẹn dawe he ko kú na azán ẹnẹ gọwá ogbẹ̀! Klisti ma dolalo to whenuena e dọ dọ họntọn emitọn to amlọndọ. Sọn pọndohlan Jehovah po Jesu tọn po mẹ, Lazalọsi he ko kú taidi mẹhe to amlọndọ poun. Mọwẹ, nujijọ nujọnu tọn lẹ wẹ nọ duahunmẹna Jesu po Otọ́ olọn mẹ tọn etọn po.
Jehovah Sọgan Hẹn Todido Mítọn lẹ Di
Vogbingbọn nankọ die to yẹwhe mẹklọtọ lẹ po Jiwheyẹwhe nujọnu tọn lọ po ṣẹnṣẹn! Boṣiọ-sẹ̀ntọ lẹ gbọn nuṣiwa dali dọ dọ nuhe yé nọ basi sinsẹ̀n hlan lẹ tindo huhlọn he hugan gbẹtọvi tọn. Ṣigba, nuyiwa sinsẹ̀n-bibasi tọn ehe ma sọgan na nugopipe azọ́njiawu tọn lẹ boṣiọ ehelẹ gba. To alọ devo mẹ, Jehovah Jiwheyẹwhe sọgan gbọn gbesisọ dali dlẹnalọdo devizọnwatọ etọn he ko kú sọn ojlẹ dindẹn die wayi lẹ taidi dọ yé togbẹ̀ nkọtọn, na e penugo nado hẹn yé gọwá ogbẹ̀ whladopo dogọ wutu. “OKLUNỌ wẹ Jiwheyẹwhe to nugbo mẹ,” podọ e ma na klọ omẹ etọn lẹ pọ́n gbede.—Jẹlemia 10:10.
Lehe e nọ miọnhomẹnamẹ sọ nado yọnẹn dọ to ojlẹ sisọ Jehovah tọn mẹ, oṣiọ he tin to oflin etọn mẹ lẹ na yin finfọnsọnku—yèdọ yin hinhẹngọwa ogbẹ̀! (Owalọ lẹ 24:15) Mọwẹ, fọnsọnku bẹ gigọ̀ ninọmẹ gbẹzan mẹdopodopo tọn wá hẹn. Finflin ninọmẹ gbẹzan mẹhe ko kú lẹ tọn po finfọn yé sọnku po mayin nuhahun de na Mẹdatọ, he tindo nuyọnẹn po huhlọn madodogbo lọ po gba. (Job 12:13; Isaia 40:26) To whenuena e yindọ Jehovah sù to owanyi mẹ, e na yí nufinflin pipé etọn zan nado hẹn oṣiọ lẹ gọwá ogbẹ̀ do paladisi aigba ji tọn mẹ to gbẹtọ-yinyin he yé tindo whẹpo do kú mẹ.—1 Johanu 4:8.
Dile aihọn Satani tọn to sisẹpọ vivọnu, sọgodo họnwun taun na mẹhe dotudo Jiwheyẹwhe nugbo lọ go lẹ. (Howhinwhẹn lẹ 2:21, 22; Daniẹli 2:44; 1 Johanu 5:19) Psalm-kàntọ hẹn mí deji dọmọ: “Whenu pẹde, mẹylankan lẹ ma na tin ba: . . . ṣigba homẹmiọnnọ lẹ na dugu aigba tọn; yé na hẹn homẹhun yede to jijọho susu mẹ.” (Psalm 37:10, 11) Sẹ́nhẹngba po danuwiwa po na juwayi. Whẹdida dodo na gbayipe, bọ awusinyẹnnamẹnu akuẹzinzan tọn na busẹ. (Psalm 37:6; 72:12, 13; Isaia 65:21-23) Ohia kinklan ogbẹ́, sinmẹ agbasa tọn, akọ̀, po hẹnnu tọn po lẹpo na yin didesẹ. (Owalọ lẹ 10:34, 35) Awhàn po awhànfunnu lẹ po ma na tin ba. (Psalm 46:9) To ojlẹ lọ mẹ “finẹnu lẹ ma to na dọmọ, yẹn to azọ̀n jẹ.” (Isaia 33:24) Mẹlẹpo na duvivi agbasalilo pipé po homẹhunhun po tọn. (Osọhia 21:3, 4) Paladisi aigba ji tọn na wá to madẹnmẹ. Lẹndai Jehovah tọn wẹ e yin!
Mọwẹ, todido he sinai do Biblu ji lẹpo na yin hinhẹndi to madẹnmẹ. Naegbọn mí dona yin kiklọ gbọn nuhe yin hinhẹn zun yẹwhe to aihọn ehe mẹ lẹ dali to whenuena mí sọgan ze jidide mlẹnmlẹn mítọn do Jehovah mẹ? Ojlo etọn wẹ e yin dọ “yè ni whlẹn omẹ popo gán, podọ na yé ni wá oyọnẹn nugbo tọn kọ̀n.” (1 Timoti 2:3, 4) Kakati nado to whenu po nutindo mítọn lẹ po hẹngu do oyẹ̀ tata, he mayin nujọnu, titonu ehe tọn lẹ po yẹwhe etọn lẹ po ji, mì gbọ mí ni whẹ́n to oyọnẹn Jiwheyẹwhe nujọnu tọn mẹ bosọ yí ahun mítọn lẹpo do dotudo ewọ go.—Howhinwhẹn lẹ 3:1-6; Johanu 17:3.
[Yẹdide to weda 6]
Sọn pọndohlan Jehovah po Jesu po tọn mẹ, amlọndọ wẹ Lazalọsi te poun
[Yẹdide to weda 7]
Paladisi aigba ji tọn na wá to madẹnmẹ