Yé Yidogọna Ayajẹ Yetọn—Be Hiẹ Sọgan Wà Nudopolọ Ya?

MARC, mẹmẹsunnu Canada tọn de, nọ wazọ́n to azọ́nwhé de he nọ wleawuna maṣinu gigẹdẹ he nọ yin yiyizan to zomọ he nọ yì sunmẹ lẹ mẹ. E nọ wà azọ́n whenu-gli tọn bosọ nọ wadevizọn taidi gbehosọnalitọ whepoponu tọn. To gbèdopo, azọ́ngán Marc tọn ze dotẹnmẹ hundote nukọnyiyi tọn de donukọnna ẹn—enẹ wẹ azọ́ntẹn whenu-gigọ́ tọn de he akuẹ etọn yinukunkẹ taun. Etẹwẹ Marc wà?

Amy, mẹmẹyọnnu Philippines tọn de, nọ wadevizọn taidi gbehosọnalitọ whepoponu tọn dile e to ohọ̀ godo tọn lẹ mẹ to wehọmẹ. To gbedewema etọn yíyí godo, agbasazọ́n whenu-gigọ́ tọn de yin zizedonukọnna ẹn he na biọ whenu susu to e si ṣigba ehe akuẹ etọn tli taun. Nudide tẹwẹ Amy basi?

Marc po Amy po ma basi nudide dopolọ lẹ gba, podọ kọdetọn nudide yetọn lẹ tọn dohia dọ ayinamẹ he yin nina Klistiani Kọlinti hohowhenu tọn lẹ gọ́ na nuyọnẹn. Apọsteli Paulu wlan dọmọ: ‘Mì gbọ mẹhe to aihọn lọ zan lẹ ni taidi mẹhe ma to zinzan ẹn to gigọ́ mẹ.’—1 Kọl. 7:29-31.

Zan Aihọn lọ, Ṣigba E Ma Yin to Gigọ́ Mẹ

Whẹpo mí nido yọ́n nuhe jọ do Marc po Amy po go, mì gbọ mí ni gbadopọnna zẹẹmẹ hogbe lọ “aihọn” tọn (kavi, kọsmọs to Glẹkigbe mẹ) he Paulu yizan to owe he e kàn hlan Kọlintinu lẹ mẹ. To wefọ Biblu tọn enẹ mẹ, hogbe lọ kọsmọs dlẹnalọdo aihọn he mẹ mí to gbẹnọ te—yèdọ ogbẹ́ gbẹtọvi tọn blebu—podọ e bẹ yanwle paa gbẹzan egbesọegbesọ tọn lẹ hẹn, taidi adọ́tẹn, núdùdù po avọ̀ po dindin.a Nado sọgan mọ dandannu gbẹ̀mẹ tọn enẹlẹ, suhugan mítọn dona tindo agbasazọ́n de. Na nugbo tọn, mí to dandannu glọ nado zan aihọn lọ nado sọgan hẹn azọngban Owe-wiwe tọn mítọn he yin nado penukundo mídelẹ po whẹndo mítọn po go di. (1 Tim. 5:8) Etomọṣo, mí sọ yọnẹn to ojlẹ dopolọ mẹ dọ “aihọn . . . to jujujei.” (1 Joh. 2:17) Enẹwutu, mí nọ zan aihọn lọ jẹ obá he mẹ e yin dandan jẹ, ṣigba e ma yin ‘to gigọ́ mẹ.’—1 Kọl. 7:31.

Na yé yin whinwhàn gbọn ayinamẹ Biblu tọn enẹ dali ma nado zan aihọn lọ zẹ̀ obá he mẹ e yin dandan jẹ go wutu, mẹmẹsunnu po mẹmẹyọnnu susu po ko vọ́ nulẹnpọndo ninọmẹ yetọn lẹ ji, bo de whenu he yé nọ yizan na agbasazọ́n pò, bosọ hẹn gbẹzan yetọn bọawu. To mọwiwà mẹ, yé wá doayi e go dọ yé yidogọna ayajẹ yetọn na yé tindo whenu susu dogọ nado yizan hẹ whẹndo yetọn podọ to sinsẹ̀nzọn Jehovah tọn mẹ. Humọ, gbẹzan he bọawu zinzan hẹn yé nado nọ ganjẹ Jehovah go hugan lehe yé nọ ganjẹ aihọn lọ go do. Be hiẹ sọgan wà nudopolọ bo hẹn gbẹzan towe bọawu nado nọgodona Ahọluduta Jiwheyẹwhe tọn ya?—Mat. 6:19-24, 33.

“Mí Dọnsẹpọ Jehovah Hugan Gbede Pọ́n”

Marc, he yin nùdego to bẹjẹeji, hodo ayinamẹ Biblu tọn lọ ma nado zan aihọn lọ to gigọ́ mẹ. E gbẹ́ ogántẹn he yin zizedonukọnna ẹn nado mọ akuẹ susu yí lọ dai. To azán vude godo, nado diọlinlẹnna Marc nado kẹalọyi ogántẹn yọyọ lọ, azọ́ngán etọn ze azọ́nkuẹ he tlẹ sọ sù hugan tintan tọn donukọnna ẹn. Marc dọmọ: “E kàn yise biọ, ṣigba n’sọ vọ́ gbẹ́.” E basi zẹẹmẹ nuhewutu e do gbẹ́ tọn dọmọ: “Yẹn po asi ṣie Paula po jlo na yí gbẹzan mítọn zan nado sẹ̀n Jehovah to gigọ́ mẹ dile e sọgan yọnbasi do. Enẹwutu, mí magbe nado hẹn gbẹzan mítọn bọawu. Mí biọ nuyọnẹn Jehovah to odẹ̀ mẹ nado sọgan jẹ yanwle mítọn kọ̀n, podọ mí de azán tangan de he gbè mí na ze mídelẹ jo nado jẹ whenu susu dogọ yizan ji to sinsẹ̀nzọn Jehovah tọn mẹ.”

Paula dọmọ: “Azán atọ̀n wẹ n’do nọ wazọ́n to osẹ dopo mẹ taidi wekantọ to dotowhé de podọ sunmẹ-kuẹ ṣie ma ylan. N’sọ nọ wadevizọn taidi gbehosọnalitọ whepoponu tọn. Ṣigba, taidi Marc, yẹnlọsu jlo na ze dee jo nado sẹ̀n Jehovah to fidepope he nuhudo wẹnlatọ Ahọluduta lọ tọn sù hugan te. Ṣogan, whenuena n’ze wekanhlanmẹ azọ́n jijodo tọn ṣie jo na ogán ṣie, e dọna mi dọ n’pegan na azọ́ntẹn wekantọ daho tọn he dotẹnmẹ etọn ṣẹṣẹ hùndonuvo. Azọ́ntẹn daho he mẹ wekantọ de sọgan dù akuẹ te hugan to dotowhé lọ niyẹn, ṣigba n’tẹdo nudide ṣie go nado jo azọ́n lọ do. To whenuena n’dọ whẹwhinwhẹ́n he wutu n’ma kẹalọyi ogántẹn lọ na ogán ṣie, e pà mi na yise ṣie.”

Ojlẹ vude to enẹgodo, Marc po Paula po mọ azọ́ndenamẹ yí taidi gbehosọnalitọ titengbe to agun pẹvi de mẹ to lẹdo Canada tọn he to olá de mẹ. Etẹ mẹ wẹ tẹnsisẹ yetọn dekọtọn do? Marc dọmọ: “To agbasazọ́n he pekuẹ taun he n’ko wà na diblayi odaa gbẹzan ṣie tọn jijodo godo, n’nọ hanú gando sọgodo go, ṣigba Jehovah dona lizọnyizọn mítọn. Mí mọ ayajẹ mayọnjlẹ he nọ wá sọn alọgigọna mẹdevo lẹ nado sẹ̀n Jiwheyẹwhe mẹ. Sinsẹ̀nzọn whenu-gigọ́ tọn sọ wà dagbe na alọwle mítọn. Hodọdopọ mítọn lẹ nọ sinai do nuhe yin nujọnu hugan lẹ ji—yèdọ whẹho gbigbọmẹ tọn lẹ. Mí dọnsẹpọ Jehovah hugan gbede pọ́n.” (Owalọ 20:35) Paula yidogọ dọmọ: “Eyin a jo agbasazọ́n towe po vivomẹninọ owhé towe gbè tọn po do, a dona ganjẹ Jehovah go mlẹnmlẹn. Mí wàmọ, podọ Jehovah dona mí. Mẹmẹsunnu po mẹmẹyọnnu vivẹ he tin to agun mítọn yọyọ lọ mẹ lẹ po hẹn mí tindo numọtolanmẹ lọ dọ yé yiwanna mí bosọ tindo nuhudo mítọn. Todin, n’nọ yí huhlọn he n’nọ zan na agbasazọ́n ṣie dai do gọalọna gbẹtọ lẹ to gbigbọ-liho. Ayajẹ ṣie gọfla dile n’to dee yizan to azọ́ndenamẹ ehe mẹ.”

‘N’Vò to Akuẹzinzan-Liho, Ṣigba N’Ma Do Ayajẹ’

Amy, he yin nùdego to bẹjẹeji, basi nudide devo. E kẹalọyi agbasazọ́n whenu-gigọ́ tọn he yin zizedonukọnna ẹn nado mọ akuẹ susu yí lọ. Amy dọmọ: “To owhe tintan mẹ, n’gbẹ́ yin zohunhunnọ to lizọnyizọn lọ mẹ ṣigba n’wá mọdọ nuhe to otẹn tintan mẹ to gbẹzan ṣie mẹ jẹ didiọ ji vudevude bọ nukọnyiyi to agbasazọ́n mẹ wá yitẹn to sinsẹ̀nzọn Jehovah tọn si. Dotẹnmẹ nukọnyiyi tọn he dọnmẹdogo lẹ yin zizedonukọnna mi bọ n’jẹ kanván ji nado jẹ ogántẹn daho hugan mẹ. Dile azọngban ṣie lẹ to susu to agbasazọ́n ṣie mẹ, whenu he n’nọ yizan to lizọnyizọn lọ mẹ jẹ didepo ji. To godo mẹ, n’masọ nọ dọyẹwheho paali ba.”

To whenuena Amy flin ojlẹ enẹ hlan godo, e dọmọ: “N’vò to akuẹzinzan-liho. N’nọ to tòmẹ yì poun, bọ gbẹtọ lẹ sọ nọ na mi sisi taun na ogántẹn he mẹ n’te wutu. Ṣogan, n’ma do ayajẹ. Mahopọnna dọ n’do akuẹ ganji, nuhahun ṣie lẹ sù. N’nọ kanse dee dọ etẹwẹ to jijọ taun. To godo mẹ, n’wá doayi e go dọ n’ko dibla ‘buali sọn yise mẹ’ dile n’to afọdona yanwle aihọn ehe tọn lẹ. Taidi kọdetọn de, n’jiya ‘homẹgble’ kavi awufiẹsa susu tọn pẹpẹ dile Ohó Jiwheyẹwhe tọn dọ do.”—1 Tim. 6:10.

Etẹwẹ Amy wà? E dọmọ: “N’biọ alọgọ mẹho agun tọn lẹ tọn nado gọ̀ jẹgangan to gbigbọ-liho bọ n’jẹ opli lẹ yì ji. To gbèdopo, whenuena mí to hànji, dasin wayi do mi. N’flin ayajẹ he n’tindo to owhe atọ́n he n’yizan taidi gbehosọnalitọ to azọ́n jibẹwawhé tọn lọ mẹ, dile n’ma tlẹ do nude to whenẹnu. N’yọnẹn dọ n’dona doalọtena whenu hinhẹngú to akuẹ godo bo ze Ahọluduta lọ do otẹn tintan mẹ. N’kẹalọyi otẹn he yìdo de to azọ́nmẹ, ehe zẹẹmẹdo dọ yè dona de odaa pò sọn sunmẹ-kuẹ ṣie mẹ, podọ n’gọ̀ jẹ mahẹ tindo ji to azọ́n yẹwhehodidọ tọn mẹ.” Amy dọ po ayajẹ po dọmọ: “Na owhe vude todin, n’ko mọ ayajẹ he nọ wá sọn sinsẹ̀nzọn gbehosọnalitọ tọn mẹ. N’tindo numọtolanmẹ pekọ tọn de todin he n’ma ko tindo pọ́n gbede to whenuena n’to suhugan whenu ṣie tọn yizan nado wazọ́n na aihọn.”

Be hiẹ sọgan basi diọdo delẹ bo hẹn gbẹzan towe bọawu ya? Eyin a yí whenu he diọdo ehelẹ na pò dai na we zan nado nọgodona Ahọluduta lọ, hiẹ lọsu na yidogọna ayajẹ towe.—Howh. 10:22.

[Nudọnamẹ odò tọn]

[Blurb on page 19]

Be hiẹ sọgan basi diọdo delẹ bo hẹn gbẹzan towe bọawu ya?

[Apotin/Yẹdide to weda 19]

“N’Ko to Vivi Etọn Dù Hoho!”

David, Klistiani mẹho agun tọn de to États-Unis, jlo na kọnawudopọ hẹ asi etọn po ovi etọn lẹ po to sinsẹ̀nzọn whenu-gigọ́ tọn mẹ. E penugo bo basi tito nado nọ wà azọ́n whenu-gli tọn to azọ́n etọn mẹ bosọ biọ sinsẹ̀nzọn gbehosọnalitọ whepoponu tọn mẹ. Be diọdo ehe yidogọna ayajẹ etọn ya? To osun vude godo, David kanwehlan họntọn etọn dopo dọmọ: “Nudevo de ma nọ hẹn pekọwa sọ mahẹ gigọ́ tintindo to sinsẹ̀nzọn Jehovah tọn mẹ po whẹndo mẹtọn po. Nado dọ hójọhó, linlẹn ṣie dai wẹ yindọ e na yí whenu whẹpo sinsẹ̀nzọn gbehosọnalitọ tọn nado má mi, ṣigba n’ko to vivi etọn dù hoho! Awuvivinu daho wẹ.”

[Yẹdide to weda 18]

Marc po Paula po to lizọnyizọn lọ mẹ