Kọgbọ sọn Huvẹ si Ko Tin to Yakẹ!
‘HUVẸ wunmẹ tẹ?’ wẹ a sọgan kanse. Huvẹ núdùdù gbigbọmẹ tọn wẹ! Yẹwhegán Heblu hohowhenu tọn de dọ dọdai huvẹ ehe tọn dọmọ: “Doayi e go, azán lẹ wá, wẹ Oklunọ JIWHEYẸWHE dọ, na yẹn na dó huvẹ de hlan aigba lọ mẹ, huvẹ akla tọn de ma gba, mọ nugbla osin tọn de ma gba, ṣigba sisè ohó OKLUNỌ tọn lẹ tọn.” (Amọsi 8:11) Nado gọalọ to huvẹ gbigbọmẹ tọn lọ didesẹ mẹ, hagbẹ 48 klasi 112tọ Wehọmẹ Biblu Pinplọn Watchtower Giliadi tọn, to Patterson, New York, na yì aigba voovo 19 ji, to ageklo po lopo ohù tọn 5 po ji.
Yé yin hinhẹn pegan nado yì azọndenamẹ yetọn mẹ, e mayin po olàn gọna núdùdù paa lẹ po gba, ṣigba po oyọnẹn, numimọ, gọna azọ́nplọnmẹ po. Yé ko tindo mahẹ to Biblu pinplọn sisosiso osun atọ́n tọn heyin awuwlena nado hẹn yise yetọn lodo na sinsẹ̀nzọn mẹdehlan tọn to aigba jonọ tọn lẹ ji mẹ. To 9 mars 2002, omẹ 5 554 he pli na tito-to-whinnu gbedewema-yíyí tọn lọ lẹ yí ayajẹ do dotoai.
Stephen Lett, heyin dopo to Hagbẹ Anademẹtọ Kunnudetọ Jehovah tọn lẹ tọn mẹ, hùn tito-to-whinnu lọ po zohunhun po. E dó kuavọ vonọtaun de na jonọ susu he wá sọn adà voovo aihọn lọ tọn mẹ lẹ. Enẹgodo e zindonukọn nado basi yọn-na-yizan hogbe Jesu tọn lẹ heyin, “Mì wẹ hinhọ́n aihọn tọn” na azọ́n mẹdehlan sọgodo tọn lẹ tọn. (Matiu 5:14) E basi zẹẹmẹ dọ: ‘Mì na ‘tá hinhọ́n’ do adà voovo azọ́njiawu Jehovah tọn lẹ ji to azọndenamẹ mìtọn lẹ mẹ, nado hẹn ahundoponọ lẹ penugo nado mọ whanpẹ Jehovah tọn po lẹndai etọn lẹ tọn po.’ Mẹmẹsunnu Lett na tuli mẹdehlan lọ lẹ nado nọ yí hinhọ́n Ohó Jiwheyẹwhe tọn do hùngona zinvlu sinsẹ̀n-nuplọnmẹ lalo tọn lẹ bo wleawu anademẹ tọn na mẹhe to nugbo dín lẹ.
Walọyizan He Sọgbe Yin Dandannu na Kọdetọn Dagbe Tintindo
To hodidọ bẹjẹeji tọn azinponọ lọ tọn lẹ godo, Baltasar Perla, heyin dopo to hagbẹ Wedegbẹ́ Alahọ États-Unis tọn lẹ mẹ, dọ hodidọ tintan to hodidọ debọdo-dego heyin awuwlena nado gọalọna mẹdehlan lọ lẹ nado yin kọdetọn dagbenọ mẹ. E dọhodo hosọ lọ ‘Yin Huhlọnnọ, Tudotọ bo Yinuwa’ ji. (1 Otannugbo lẹ 28:20) Ahọlu Sọlọmọni Islaeli hohowhenu tọn mọ azọndenamẹ sinsinyẹn de yí nado wà nude he e ma ko wà pọ́n—yèdọ nado gbá tẹmpli de to Jelusalẹm. Sọlọmọni yinuwa, podọ po godonọnamẹ Jehovah tọn po, tẹmpli lọ yin tadona. To nupinplọn lọ yiyizan na klasi lọ mẹ, Mẹmẹsunnu Perla dọmọ: ‘Mì ko mọ azọndenamẹ yọyọ de yí, heyin lilẹzun mẹdehlan de, podọ mì dona yin huhlọnnọ bo yin tudotọ.’ Nuplọntọ lọ lẹ yin homẹmiọnna taun to mẹhẹndeji lọ mẹ dọ Jehovah ma na jo yé dó kavi gbẹ́ yé dai dile e na dẹnsọ bọ yé na gbọṣi ewọ dè. Mẹmẹsunnu Perla whàn mẹplidopọ lẹ gbọn tadidona hodidọ etọn po ayidonugo mẹdetiti tọn lọ po dali dọ: ‘Mì sọgan tindo kọdetọn dagbe susu taidi mẹdehlan lẹ. Mẹdehlan lẹ wẹ hẹn nugbo lọ wá whẹndo ṣie po yẹn po dè!’
“Mì Nọ Pọnhlan Jehovah Dè na Kọdetọn Dagbe” wẹ yin hosọ hodidọ Samuel Herd, heyin dopo to Hagbẹ Anademẹtọ lọ mẹ tọn. Nuplọntọ lọ lẹ to yanwle ojlẹ gaa tọn de ji jẹ to azọ́n mẹdehlan tọn mẹ, podọ kọdetọn dagbe tintindo yetọn sinai taun do haṣinṣan yetọn hẹ Jehovah ji. Mẹmẹsunnu Herd na tuli yé dọ: ‘Mì ko bẹ oyọnẹn Biblu tọn susu pli gbọn nupinplọn mìtọn to Giliadi dali. Mì ko mọyi po ayajẹ po. Ṣigba, nado tindo kọdetọn dagbe nujọnu tọn todin, mì dona jẹ nuhe mì ko plọn lẹ má ji.’ (Owalọ lẹ 20:35) Mẹdehlan lọ lẹ na tindo dotẹnmẹ hundote susu nado wà ehe dile yé ‘kọ̀n yede jẹgbonu’ na mẹdevo lẹ.—Filippinu lẹ 2:17.
Ayinamẹ mẹjodo tọn tẹwẹ nuplọnmẹtọ lọ lẹ tindo na nuplọntọ lẹ? Mark Noumair ze hosọ etọn sinai do Luti 3:18 ji dọ, “Sinai Whii Kaka Hiẹ Nado Mọ Lehe Whẹho lọ Yì Do.” To apajlẹ Naomi po Luti po tọn yiyizan mẹ, hodọtọ lọ na tuli mẹhe to gbedewema yí lẹ nado tindo jidide mlẹnmlẹn to tito he titobasinanu aigba ji Jiwheyẹwhe tọn ko zedai lẹ mẹ bo litaina aṣẹpipa yẹwhehọluduta tọn. To ahun nuplọntọ lẹ tọn bibiọ mẹ, Mẹmẹsunnu Noumair dọmọ: ‘E sọgan jọ to whedelẹnu bọ mì ma na yọ́n nuhewutu nudide de he gando mì go yin bibasi kavi mì sọgan tindo numọtolanmẹ sinsinyẹn lẹ to whedelẹnu dọ nude dona ko yin wiwà to aliho he gbọnvo de mẹ. Etẹwẹ mì na wà? Be mì na fọ́n bo jẹ onú lẹ didẹ na mìde ji wẹ kavi be mì na “sinai whii,” bo dotudo anademẹ Jiwheyẹwhe tọn go, po jide po dọ ewọ na dike whẹho lọ ni tindo kọdetọn dagbe to ojlẹ sisọ mẹ ya?’ (Lomunu lẹ 8:28) Ayinamẹ lọ nado ‘ze ayidonugo do nukọnyiyi dagbenu Ahọluduta lọ tọn lẹ ji, bo zín nukun do nuhe titobasinanu Jehovah tọn to wiwà lẹ ji kakati do gbẹtọ-yinyin lẹ ji,’ na sọawuhia nado yin nuhọakuẹ na mẹdehlan sọgodo tọn lẹ to azọndenamẹ tògodo tọn yetọn lẹ mẹ.
Wallace Liverance, heyin mẹdehlan de dai ṣigba he to sinsẹ̀nzọnwà todin taidi nuplọnmẹtọ Giliadi tọn de, dọ hodidọ godo tọn to hodidọ debọdo-dego tintan lọ mẹ. Hosọ hodidọ etọn tọn wẹ “Mì Hẹn Yanwle lọ do Ahun mẹ, Mì Gbọṣi Sinsẹ̀nzọn Jiwheyẹwhe Tọn Mẹ.” E dohia dọ yẹwhegán Daniẹli tunwun sọn aijijẹ Babilọni tọn mimọ mẹ podọ sọn nuhe Jẹlemia ko dọ dọdai etọn mẹ dọ tundote Islaelivi lẹ tọn sọn kanlinmọgbenu ko sẹpọ. (Jẹlemia 25:11; Daniẹli 9:2) Daniẹli yọ́n todohukanji ojlẹ hihia Jehovah tọn, podọ enẹ gọalọna ẹn nado hẹn hẹndi lẹndai Jiwheyẹwhe tọn do ahun mẹ. To vogbingbọn mẹ, Islaelivi he nọgbẹ̀ to azán yẹwhegán Hagai tọn gbè lẹ dọmọ: ‘Ojlẹ lọ ma ko wá gba.’ (Hagai 1:2) Yé ma hẹn ojlẹ he mẹ yé to gbẹnọ te do ahun mẹ gba, kakatimọ yé ze ayidonugo do awuvivi po pekọ mẹdetiti tọn yetọn po ji, bo jo azọ́n he wutu yé yin tuntundote sọn Babilọni dó, heyin vivọgbá tẹmpli lọ tọn. Mẹmẹsunnu Liverance dotana dọmọ: “Enẹwutu mì hẹn yanwle mìtọn do ahun mẹ gbọn lẹndai Jehovah tọn hinhẹn do ayiha mẹ to whepoponu dali.”
Nuplọnmẹtọ Giliadi tọn Lawrence Bowen yinuwa taidi anademẹtọ adà he tindo hosọ lọ “Jehovah Nọ Dona Mẹhe Yí Ohó Gbẹ̀te lọ Zan Lẹ” tọn. (Heblu lẹ 4:12) Adà ehe dọhodo numimọ kunnudegbe klasi lọ tọn lẹ ji, bo zinnudo lehe Jehovah nọ dona mẹhe yí Biblu zan to kunnudide po mẹpinplọn po whenu lẹ do ji. Anademẹtọ lọ dohia dọ Jesu Klisti ze apajlẹ dagbe de dai na lizọnyizọnwatọ Jiwheyẹwhe tọn lẹpo. E dọmọ: ‘Jesu sọgan dọ po nugbonọ-yinyin po dọ nuhe emi plọnmẹ lẹ ma wá sọn emi dè gba, ṣigba Ohó Jiwheyẹwhe tọn wẹ emi dọ.’ Ahundoponọ lẹ yọ́n nugbo lọ bosọ kẹalọyi i. (Johanu 7:16, 17) Onú dopolọ yin nugbo to egbehe.
Azọ́nplọnmẹ Giliadi Tọn Nọ Hẹnmẹ Pegan na Azọ́n Dagbe Lẹpo
Bọdego, Richard Abrahamson po Patrick LaFranca po, heyin hagbẹ whenu dindẹn whẹndo Bẹtẹli tọn lẹ kanhose omẹ ṣidopo he ko mọ gbedewema yí sọn Giliadi wayi ṣigba he to sinsẹ̀nzọnwà to adà voovo sinsẹ̀nzọn whenu-gigọ́ vonọtaun tọn mẹ lẹ. Gbedewema-yitọ klasi 112tọ tọn lẹ yin tulina to sisè dọ to owhe susu godo, mahopọnna azọndenamẹ dintọn yetọn lẹ, omẹ ṣidopo enẹlẹ to azọnplọnmẹ he yé ko mọyi to Giliadi yizan zọnmii na nuhe dù Biblu pinplọn, azọ́n dodinnanu tọn lẹ, podọ to tintin to jijọho mẹ hẹ gbẹtọ lẹ.
Theodore Jaracz, heyin dopo to Hagbẹ Anademẹtọ lọ mẹ, dọ hodidọ titengbe tito-to-whinnu lọ tọn. Hosọ etọn wẹ “Nuhe Akọndidona Wangbẹnamẹ Satani Tọn Nọ Wadotana.” To osun atọ́n he wayi lẹ whenu, nuplọntọ lọ lẹ tin to lẹdo owanyinọ po yẹwhehọluduta tọn de po mẹ. Ṣigba, aihọn kẹntọ tọn de mẹ wẹ mí to gbẹnọ te, dile nupinplọn klasi mẹ tọn lẹ dohia do. Omẹ Jehovah tọn lẹ tin to mẹgbeyinyan glọ lẹdo aihọn pé. (Matiu 24:9) To kandai Biblu tọn voovo lẹ yiyizan mẹ, Mẹmẹsunnu Jaracz dohia dọ ‘mí yin yanwle tangan Lẹgba tọn.’ Mí dona hẹn haṣinṣan mítọn hẹ Jehovah sinyẹn deji bo lodo nado pehẹ whlepọn lẹ.’ (Job 1:8; Daniẹli 6:4; Johanu 15:20; Osọhia 12:12, 17) Mẹmẹsunnu Jaracz dotana dọ mahopọnna wangbẹnamẹ he to nukọnzindo sọta omẹ Jiwheyẹwhe tọn lẹ, ‘avùnhonu he na yin awuwlena sọta mí depope ma na tindo kọdetọn dagbe, wẹ Isaia 54:17 dọ. Jehovah na hẹn ẹn diun dọ mí yin whinwhlẹngán to ojlẹ po aliho etọn po mẹ.’
Matin ayihaawe, na ‘yé yin hinhẹn pegan mlẹnmlẹn’ wutu, gbedewema-yitọ klasi 112tọ Giliadi tọn lẹ na wà nususu to huvẹ gbigbọmẹ tọn didesẹ mẹ to aigba he ji yé na sẹ̀n te lẹ. (2 Timoti 3:16, 17) Mí to nukundo linlin lẹ gando lehe yé to owẹ̀n mẹhẹnlodo tọn lọ má hẹ mẹhe tin to aigba ehelẹ ji do go po jejejininọ po.
[Apotin to weda 23]
SỌHA NULINLẸN KLASI TỌN
Sọha otò he mẹ yé wá sọn: 6
Sọha otò he mẹ yè do yé hlan: 19
Sọha nuplọntọ lẹ tọn: 48
Madozẹnzẹn owhe mẹhodido tọn: 33,2
Madozẹnzẹn owhe to nugbo mẹ tọn: 15,7
Madozẹnzẹn owhe lizọnyizọn whenu-gigọ́ tọn: 12,2
[Yẹdide to weda 24]
Gbedewema-Yíyí Klasi 112tọ Wehọmẹ Biblu Pinplọn Watchtower Giliadi Tọn
To yinkọ he to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọnwhé yì adusiwhé to hukan dopodopo ji.
(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.