Hodo Apajlẹ Mẹplọntọ Daho lọ Tọn
“Enẹwutu mì yì, bo hẹn akọta lẹpo zun nuplọntọ . . . mì ni sọ nọ plọn yé nado nọ doayi onú lẹpo go, nudepope he yẹn degbena mì.”—MATIU 28:19, 20.
1, 2. (a) To linlẹn de mẹ, nawẹ mímẹpo yin mẹplọntọ lẹ gbọn? (b) Gando mẹpinplọn go, azọngban vonọtaun tẹwẹ Klistiani nugbo lẹ tindo?
BE MẸPLỌNTỌ de wẹ a yin ya? Mímẹpo wẹ yinmọ to linlẹn de mẹ. Whedepopenu he a doali hia mẹhe to alibu de, dọ lehe nude dona yin wiwà do na azọ́nwatọgbẹ́ de, kavi dọna ovivu de lehe e na sin afọpa-kàn etọn do, mẹplọn wẹ a te. Alọgigọna mẹdevo lẹ to aliho mọnkọtọn lẹ mẹ nọ hẹn pekọwa jẹ obá de mẹ, e mayin mọwẹ ya?
2 Gando mẹpinplọn go, Klistiani nugbo lẹ tindo azọngban vonọtaun de. Mí yin gbedena nado “hẹn akọta lẹpo zun nuplọntọ . . . , [bo] nọ plọn yé.” (Matiu 28:19, 20) Mí nọ plọnmẹ to agun Klistiani tọn mẹ ga to whedelẹnu. Sunnu he pegan lẹ nọ yin dide nado yinuwa taidi ‘lẹngbọhọtọ po mẹplọntọ lẹ po,’ po pọndohlan agun lọ jijlọdote tọn po. (Efesunu lẹ 4:11-13) To nuwiwa egbesọegbesọ Klistiani tọn yetọn lẹ mẹ, yọnnu he whèwhín lẹ dona yin “mẹplọntọ onú dagbe lẹ tọn” hlan yọnnu jọja lẹ. (Titu 2:3-5) Mímẹpo wẹ yin tudohomẹna nado nọ na tuli yisenọ hatọ lẹ, podọ mí sọgan setonuna tudohomẹnamẹ enẹ gbọn Biblu yíyí do jlọ mẹdevo lẹ dote dali. (1 Tẹsalonikanu lẹ 5:11) Lẹblanulọkẹyi nankọ die nado yin mẹplọntọ Ohó Jiwheyẹwhe tọn tọn de bo má nuhọakuẹ gbigbọmẹ tọn he sọgan tindo ale dẹn-to-aimẹ lẹ hẹ mẹdevo lẹ!
3. Nawẹ mí sọgan hẹn mẹpinplọn mítọn tindo kọdetọn dagbe deji gbọn?
3 Nalete, nawẹ mí sọgan hẹn mẹpinplọn mítọn tindo kọdetọn dagbe deji gbọn? Titengbe gbọn hihodo apajlẹ Jesu, Mẹplọntọ Daho lọ tọn dali wẹ. ‘Ṣigba nawẹ mí sọgan hodo apajlẹ Jesu tọn gbọn?’ wẹ mẹdelẹ sọgan kanse. ‘Omẹ pipé de wẹ ewọ yin.’ Nugbo wẹ dọ, mí ma sọgan yin mẹplọntọ pipé lẹ gba. Etomọṣo, mahopọnna nugopipe mítọn lẹ, mí sọgan wà nuhe go mí pé lẹpo nado hodo apajlẹ lehe Jesu plọnmẹ do tọn. Mì gbọ mí ni dọhodo lehe mí sọgan yí aliho mẹpinplọn tọn etọn ẹnẹ zan do ji—awubibọ, kanbiọ kọdetọn dagbenọ lẹ, hoyijlẹdohogo kannukannu tọn, po oló he sọgbe lẹ po.
Mẹpinplọn Mítọn Hinhẹn Bọawu
4, 5. (a) Naegbọn hinhẹn mẹpinplọn mítọn bọawu do yin adà tangan nugbo Biblu tọn? (b) Nado plọnmẹ po awubibọ po, naegbọn e yin nujọnu dọ mí ni payi hogbe he mí to yiyizan lẹ go?
4 Nugbo tangan Ohó Jiwheyẹwhe tọn lẹ tọn ma gẹdẹ gba. Jesu dọ to odẹ̀ mẹ dọ: “Yẹn dopẹna we, Otọ́ E, . . . na hiẹ sọ onú helẹ whlá do nuyọnẹntọ lẹ, podọ do [wesetọ] lẹ, bo do yé hia na ovivu lẹ.” (Matiu 11:25) Jehovah ko do lẹndai etọn lẹ hia mẹhe tindo ahun nugbo po whiwhẹ po tọn lẹ. (1 Kọlintinu lẹ 1:26-28) Enẹwutu, adà tangan nugbo Biblu tọn dopo wẹ yindọ e bọawu.
5 To whenuena a to anadena plọnmẹ Biblu whégbè tọn de kavi to gọyìpọn basina jlodotọ de, nawẹ a sọgan plọn ẹn po awubibọ po do? Etẹwẹ mí plọn sọn Mẹplọntọ Daho lọ dè? Nado biọ ahun todoaitọ etọn lẹ tọn mẹ, he susu yetọn “gbọ̀agba nupinplọn tọn, bosọ yin gbẹtọ wunvinọ” lẹ, Jesu yí hogbe he họnwun he mẹ yé sọgan mọnukunnujẹ lẹ zan. (Owalọ lẹ 4:13) To whelọnu lo, nado plọnmẹ po awubibọ po, e nọ biọ dọ mí ni payi hogbe he mí to yiyizan lẹ go. Mí ma dona yí hogbe gbóogbó lẹ zan dandan nado sọgan hẹn nugbo Ohó Jiwheyẹwhe tọn duto mẹdevo lẹ ji gba. ‘Hogbe gbóogbó’ mọnkọtọn lẹ sọgan dobunamẹ, titengbe mẹhe wepinplọn kavi nugopipe yetọn tindo dogbó lẹ. (1 Kọlintinu lẹ 2:1, 2) Apajlẹ Jesu tọn dohia dọ hogbe he bọawu bo yin dide po sọwhiwhe po lẹ sọgan dọ nugbo lọ po huhlọn tlala po.
6. Nawẹ mí sọgan dapana nudọnamẹ susugege yíyí do gbahundona Biblu plọntọ de gbọn?
6 Nado plọnmẹ po awubibọ po, mí sọ dona payi ma nado yí nudọnamẹ susugege do gbahundona Biblu plọntọ de. Jesu hò dogbó devi etọn lẹ tọn pọ́n. (Johanu 16:12) Mílọsu dona hò dogbó nuplọntọ lọ tọn lẹ pọ́n ga. Di apajlẹ, to anadidena oplọn de to owe Oyọnẹn He Nọ Planmẹ Sọyi Ogbẹ̀ Madopodo Mẹ whenu, mí ma dona basi zẹẹmẹ onú lẹpo tọn dandan gba.a Mọjanwẹ e mayin dandan dọ mí ni họ̀nwezun gbọn nudọnamẹ lọ ji, taidi dọ nudọnamẹ sọha de ji gbingbọn wẹ yin nujọnu hugan lọ nkọtọn. Kakatimọ, nuyọnẹnnu wẹ e na yin nado magbe do nukọnyiyi oplọn lọ tọn ji sọgbe hẹ nuhudo po nugopipe nuplọntọ lọ tọn lẹ po. Yanwle mítọn wẹ yin nado gọalọna nuplọntọ lọ nado lẹzun devi Klisti tọn po sinsẹ̀n-basitọ Jehovah tọn de po. Mí dona yí ojlẹ he pé zan nado gọalọna nuplọntọ he tindo ojlo de nado mọnukunnujẹ nuhe e to pinplọn mẹ hezeheze. Gbọnmọ dali, nugbo lọ sọgan biọ ahun etọn mẹ bo whàn ẹn nado yinuwa.—Lomunu lẹ 12:2.
7. Ayinamẹ tẹlẹ wẹ sọgan gọalọna mí nado plọnmẹ po awubibọ po to whenue mí to hodidọ lẹ dọ to agun mẹ?
7 To whenuena mí to hodidọ lẹ dọ to agun mẹ, titengbe eyin mẹyọyọ lẹ wá, nawẹ mí sọgan dọ nuhe “bọawu yinyọnẹn” lẹ gbọn? (1 Kọlintinu lẹ 14:9) Ayinamẹ atọ̀n die he sọgan gọalọ. Tintan, basi zẹẹmẹ hogbe he yé ma jẹakọhẹ he a jlo na yizan lẹ tọn. Nukunnumimọjẹ Ohó Jiwheyẹwhe tọn mẹ mítọn ko hẹn mí yọ́n hogbe tangan delẹ. Eyin mí yí hogbe taidi “afanumẹ nugbonọ, nuyọnẹntọ,” “lẹngbọ devo,” po “Babilọni Daho” po zan, mí dona yí hogbe he bọawu lẹ do basi zẹẹmẹ yetọn nado hẹn yé họnwun. Awetọ, dapana ohó susu didọ. Hodidọ plẹlẹ, hóglelilẹ, sọgan hẹn mẹplidopọ lẹ buali. Hodidọ he họnwun nọ wá sọn hogbe kavi hodidọ he mayin dandan lẹ didesẹ mẹ. Atọ̀ntọ, ma tẹnpọn nado dọhodo nususu ji blo. Dodinnanu mítọn sọgan de zẹẹmẹ gigọ́ dagbe susu tọ́n. Ṣigba e na yọ́n hugan nado wleawuna nudọnamẹ lọ do nuagokun tangan vude lẹ ji, bo yí nudọnamẹ he nọgodona nuagokun enẹlẹ bo sọgan yin hodọdeji hezeheze to ojlẹ dide lọ gblamẹ lẹ kẹdẹ zan.
Kanbiọ lẹ Yiyizan po Kọdetọn Dagbe Po
8, 9. Nawẹ mí sọgan de kanbiọ he sọgbe hẹ ojlo whétọ de tọn gbọn? Na apajlẹ lẹ.
8 Flindọ Jesu yọnazọ́n ẹn taun to kanbiọ lẹ yiyizan mẹ nado hẹn devi etọn lẹ dọ nuhe tin to ayiha yetọn lẹ mẹ podọ to nulẹnpọn yetọn finfọndote po azọ́npinplọn ẹn po mẹ. Gbọn kanbiọ lẹ gblamẹ, Jesu biọ ahun yetọn mẹ bo whàn yé. (Matiu 16:13, 15; Johanu 11:26) Taidi Jesu, nawẹ mí sọgan yí kanbiọ lẹ zan po kọdetọn dagbe po gbọn?
9 To yẹwhehodidọ sọn whédegbè-jẹ-whédegbè mẹ, mí sọgan yí kanbiọ lẹ zan nado fọ́n ojlo dote, bo hùn aliho dote nado dọho gando Ahọluduta Jiwheyẹwhe tọn go. Nawẹ mí sọgan de kanbiọ he sọgbe hẹ ojlo whétọ lọ tọn lẹ gbọn? Yin ayidonugotọ. To whenuena a to dindọnsẹpọ ohọ̀ de, pọ́n lẹdo etọn mẹ. Be aihundanu lẹ tin to lẹdo lọ mẹ, he dohia dọ ovi lẹ tin to owhé lọ gbè ya? Eyin mọwẹ, mí sọgan kanse dọ, ‘Be nuhe ninọmẹ aihọn lọ tọn na yin to whenuena ovi towe lẹ na whẹ́n ko paṣa we pọ́n ya?’ (Psalm 37:10, 11) Be ogàn susu wẹ yin didó ohọ̀n nukọn tọn lọ, kavi be nuyizan hihọ́ tọn de tin to e ji wẹ ya? Mí sọgan kanse dọ: ‘Be hiẹ lẹndọ ojlẹ lọ na wá to whenuena yẹn po hiẹ po sọgan tindo hihọ́ to owhé mítọn gbè podọ to aliho ji ya?’ (Mika 4:3, 4) Ayinamẹ susu sọgan yin mimọ to alọnuwe pẹvi Lehe Yè Sọgan Bẹjẹeji bo Zindonukọn to Hodọdopọ Biblu Tọn lẹ mẹ Do mẹ.b
10. Nawẹ mí sọgan yí kanbiọ lẹ zan nado ‘dọ̀n’ linlẹn po numọtolanmẹ he tin to ahun Biblu plọntọ de tọn mẹ lẹ po tọ́n gbọn, ṣigba etẹwẹ mí dona hẹn do ayiha mẹ?
10 Nawẹ mí sọgan yí kanbiọ lẹ zan po kọdetọn dagbe po to whenue mí to anadena plọnmẹ Biblu lẹ gbọn? Na mí mayin Jesu wutu, mí ma sọgan yọ́n nuhe tin to ahun lẹ mẹ gba. Ṣigba, kanbiọ zìnzìn tọn he gọ́ na nuyọnẹn lẹ sọgan gọalọna mí nado ‘dọ̀n’ linlẹn po numọtolanmẹ he tin to ahun nuplọntọ lọ tọn mẹ lẹ po tọ́n. (Howhinwhẹn lẹ 20:5) Di apajlẹ, mí ni dọ dọ mí to weta lọ “Nuhewutu Gbẹzan Jijọ-di-Jiwheyẹwhe Tọn de Zinzan Do Nọ Hẹn Ayajẹ Wá” plọn to owe Oyọnẹn mẹ. E dọhodo lehe Jiwheyẹwhe nọ pọ́n nugbomadọ, galilọ, po whẹho devo lẹ po hlan do ji. Nuplọntọ lọ sọgan na gblọndo kanbiọ heyin zinzinjẹgbonu lẹ tọn ganji, ṣigba be e kẹalọyi nuhe e to pinplọn lọ ya? Mí sọgan kanse dọ: ‘Be pọndohlan Jehovah tọn do whẹho mọnkọtọn lẹ ji sọgbe hẹ lẹnpọn dagbe to nukun towe mẹ ya?’ ‘Nawẹ a sọgan yí nunọwhinnusẹ́n Biblu tọn ehelẹ zan to gbẹzan towe mẹ gbọn?’ Ṣigba, flin nado na sisi nuplọntọ lọ bo doyẹyigona ẹn. Mí ma na jlo nado kàn kanbiọ he na dowinyan kavi de Biblu plọntọ mítọn pò lẹ se gba.—Howhinwhẹn lẹ 12:18.
11. Aliho tẹlẹ mẹ wẹ togunmẹhodọtọ lẹ sọgan yí kanbiọ lẹ zan po kọdetọn dagbe po te?
11 Mẹhe nọ dọ togunmẹho lẹ lọsu sọgan yí kanbiọ lẹ zan po kọdetọn dagbe po. Kanbiọ mẹhẹnlẹnnupọn tọn lẹ—enẹwẹ kanbiọ he mí ma nọ donukun dọ todoaitọ mítọn lẹ ni na gblọndo na daga lẹ—sọgan gọalọna mẹplidopọ de nado lẹnnupọn. Jesu yí kanbiọ mọnkọtọn lẹ zan to whedelẹnu. (Matiu 11:7-9) Dogọ, to homẹbibiọ godo, hodọtọ de sọgan yí kanbiọ lẹ zan nado dọ nuagokun tangan he na yin hodọdeji lẹ. E sọgan dọ: “To hodidọ mítọn mẹ to egbehe, mí na gbadopọnna gblọndo kanbiọ ehelẹ tọn . . . ” Enẹgodo, to tadona mẹ, e sọgan yí kanbiọ enẹlẹ do basi bladopọ nuagokun tangan lẹ tọn.
12. Na apajlẹ de nado do lehe mẹho agun tọn lẹ sọgan yí kanbiọ lẹ zan nado gọalọna hatọ yisenọ de nado mọ homẹmimiọn yí sọn Ohó Jiwheyẹwhe tọn mẹ do.
12 To dlapọn lẹngbọhọtọ tọn yetọn whenu, mẹho agun tọn lẹ sọgan yí kanbiọ lẹ zan nado gọalọna ‘mẹhe jẹflumẹ’ de nado mọ homẹmimiọn yí sọn Ohó Jehovah tọn mẹ. (1 Tẹsalonikanu lẹ 5:14) Di apajlẹ, nado gọalọna mẹhe tindo numọtolanmẹ flumẹjijẹ tọn de, mẹho de sọgan dọ̀n ayidonugo wá Psalm 34:18 ji. E dọmọ: “OKLUNỌ sẹpọ yé he yin ayiha gbigbànọ de tọn lẹ, bosọ whlẹn yé he yin ayiha finfinọnnọ lẹ gán.” Nado hẹn ẹn diun dọ mẹhe jẹflumẹ lọ mọ lehe wefọ ehe gando ewọ go do tlọlọ, mẹho lọ sọgan kanse dọ: ‘Mẹnu lẹ wẹ Jehovah sẹpọ? Be a nọ tindo numọtolanmẹ ‘ayiha gbigbà’ po ‘ayiha finfinọn tọn’ po to whedelẹnu wẹ? Dile Biblu dọ do, eyin Jehovah sẹpọ omẹ mọnkọtọn lẹ, be enẹ ma zẹẹmẹdo dọ e sẹpọ hiẹ lọsu ya?’ Mẹhẹndeji awuvẹmẹ tọn mọnkọtọn sọgan hẹn gbigbọ mẹhe ko gbọjọ de tọn gọwá ogbẹ̀.—Isaia 57:15.
Hoyijlẹdohogo Kannukannu Tọn
13, 14. (a) Nawẹ mí sọgan yihojlẹdohogo hẹ mẹhe dọ dọ emi ma yise to Jiwheyẹwhe he emi ma sọgan mọ de mẹ gbọn? (b) Etẹwutu mí ma dona donukun dọ mẹlẹpo wẹ na yin dududeji?
13 To lizọnyizọn mítọn mẹ, mí nọ jlo na biọ ahun lẹ mẹ po hoyijlẹdohogo he sọgbe bo dutomẹji lẹ po. (Owalọ lẹ 19:8; 28:23, 24) Be enẹ zẹẹmẹdo dọ mí dona plọn nado nọ yí hoyijlẹdohogo gigẹdẹ lẹ zan nado duto mẹdevo lẹ ji gando nugbo Ohó Jiwheyẹwhe tọn go wẹ ya? Paali. Hoyijlẹdohogo he dutomẹji ma dona gẹdẹ dandan gba. Hodidọ kannukannu tọn heyin zizedonukọnnamẹ to aliho he bọawu de mẹ lẹ nọ saba tindo kọdetọn dagbe taun. Pọ́n apajlẹ dopo.
14 Nawẹ mí sọgan yigbe do to whenuena mẹde dọ dọ emi ma yise to Jiwheyẹwhe he emi ma sọgan mọ de mẹ? Mí sọgan yihojlẹdohogo do osẹ́n jọwamọ nuyiwa po kọdetọn etọn tọn po ji. To whenuena mí mọ kọdetọn de, mí nọ kẹalọyi dọ nuyiwa de wẹ dona ko hẹn ẹn wá. Mí sọgan dọ: ‘Eyin a to danfafa de ji bo wá mọ owhé whanpẹnọ de he núdùdù gọ́ (kọdetọn lọ), hiẹ na kẹalọyi to afọdopolọji dọ mẹde (nuyiwa lọ) wẹ gbá ohọ̀ enẹ bo bẹ́ onú lẹ do agbànhọ etọn mẹ. Mọdopolọ ga, to whenuena mí mọ lehe aihọn lọ yin awuwlena do gọna núdùdù susugege he tin to “agbànhọ” aigba ji tọn mẹ (kọdetọn lọ), be e ma sọgbe hẹ lẹnpọn dagbe nado kẹalọyi dọ Mẹde (nuyiwa lọ) wẹ basi i ya?’ Hogbe he bọawu Biblu tọn lẹ basi zẹẹmẹ etọn ganji dọmọ: “Na mẹde dali wẹ yè gbọn do dó ohọ̀ lẹ dopodopo; ṣigba mẹhe dó onú popo wẹ Jiwheyẹwhe.” (Heblu lẹ 3:4) Ṣigba, mahopọnna lehe hoyijlẹdohogo mítọn sọgan sọgbe do sọ, e ma na duto mẹlẹpo ji gba. Biblu flin mí dọ mẹhe tindo ‘ninọmẹ dagbe ayiha mẹ tọn lẹ’ kẹdẹ wẹ na yise.—Owalọ lẹ 13:48; 2 Tẹsalonikanu lẹ 3:2.
15. Hoyijlẹdohogo tẹwẹ mí sọgan yizan nado zinnudo jẹhẹnu po aliho Jehovah tọn lẹ po ji, podọ apajlẹ awe tẹlẹ wẹ do lehe mí sọgan yí hoyijlẹdohogo mọnkọtọn zan gbọn hia?
15 To mẹpinplọn mítọn mẹ, vlavo to lizọnyizọn kunnudegbe tọn mẹ kavi to agun mẹ, mí sọgan yí hoyijlẹdohogo kannukannu tọn do zinnudo jẹhẹnu po aliho Jehovah tọn lẹ po ji. Aliho hoyijlẹdohogo ‘nẹmunẹmu wẹ’ tọn he Jesu yizan to whedelẹnu nọ tindo kọdetọn dagbe taun. (Luku 11:13; 12:24) Sinai do vogbingbọn ji, hoyijlẹdohogo wunmẹ ehe sọgan yinuwadomẹji sisosiso. Nado dohia dọ sinsẹ̀n-nuplọnmẹ olọnzomẹ tọn yin lalo, mí sọgan dọ: ‘Otọ́ owanyinọ depope ma na sayana ovi etọn gbọn alọ ovi lọ tọn zizedo miyọ́n mẹ dali gba. Nẹmunẹmu wẹ linlẹn olọnzomẹ tọn na hiọawu na Otọ́ owanyinọ olọn mẹ tọn mítọn sọ!’ (Jẹlemia 7:31) Nado plọnmẹ dọ Jehovah nọ penukundo devizọnwatọ etọn lẹ dopodopo go, mí sọgan dọ: ‘Eyin Jehovah yọ́n sunwhlẹvu liva susu lẹ dopodopo gbọn yinkọ dali, nẹmunẹmu wẹ e dona penukundo gbẹtọvi he yiwanna ẹn bo yin hihọ̀ po ohùn họakuẹ Visunnu etọn tọn po lẹ go!’ (Isaia 40:26; Owalọ lẹ 20:28) Hoyijlẹdohogo huhlọnnọ mọnkọtọn sọgan gọalọna mí nado biọ ahun mẹdevo lẹ tọn mẹ.
Oló He Sọgbe Lẹ
16. Etẹwutu oló lẹ yin nujọnu to mẹpinplọn mẹ?
16 Oló kọdetọn dagbenọ lẹ yin dadonu he sọgan hẹn mẹpinplọn mítọn vivi taun hlan mẹdevo lẹ. Etẹwutu oló lẹ yin nujọnu to mẹpinplọn mẹ? Mẹplọntọ dopo dọmọ: “Nugopipe nado lẹnnupọn matin yẹdenanu depope yin dopo to nuwadotana he sinyẹn hugan gbẹtọvi tọn lẹ mẹ.” Oló lẹ nọ zín yẹdide he tindo zẹẹmẹ lẹ do ayiha mítọn mẹ, bo nọ gọalọna mí nado mọnukunnujẹ linlẹn yọyọ lẹ mẹ to gigọ́mẹ. Jesu yin omẹ vonọtaun de to oló lẹ yiyizan mẹ. (Malku 4:33, 34) Mì gbọ mí ni gbadopọnna lehe mí sọgan yí aliho mẹpinplọn tọn ehe zan do.
17. Onú ẹnẹ tẹlẹ wẹ nọ hẹn oló de yin kọdetọn dagbenọ?
17 Etẹwẹ nọ hẹn oló de tindo kọdetọn dagbe? Tintan, e dona sọgbe hẹ mẹplidopọ mítọn, bo gando ninọmẹ he todoaitọ mítọn lẹ jẹakọhẹ ganji lẹ go. Mí flin dọ Jesu de susu oló etọn lẹ tọn sọn gbẹzan egbesọ hosetọ etọn lẹ tọn mẹ. Awetọ, oló de dona sọgbe hẹ nuagokun he to yinyin didọ lọ ganji. Eyin nuyijlẹdonugo lọ ma sọgbe hẹ nuagokun lọ, oló lọ sọgan fẹayiha todoaitọ mítọn lẹ tọn sẹ poun wẹ. Atọ̀ntọ, oló de ma dona bẹ zẹẹmẹ he mayin dandan tọn lẹ hẹn hugan gba. Flindọ Jesu wleawuna zẹẹmẹ dandan tọn lẹ ṣigba jo dehe mayin dandan lẹ do. Ẹnẹtọ, to whenuena mí yí oló de zan, mí dona hẹn ẹn diun dọ yọn-na-yizan etọn họnwun. Yin e mayin mọ, mẹdelẹ sọgan gọ̀n ma yọ́n lehe yé na yí nuagokun lọ zan do.
18. Nawẹ mí sọgan mọ oló he sọgbe lẹ gbọn?
18 Nawẹ mí sọgan mọ oló he sọgbe lẹ gbọn? Mí ma dona lẹnnupọndo otàn he dite, bo gẹdẹ lẹ ji dandan gba. Oló he whègli lẹ sọgan tindo kọdetọn dagbe taun. Tẹnpọn nado lẹnnupọndo apajlẹ nuagokun he to yinyin hodọdeji lọ tọn lẹ ji poun. Di dohia, mí ni dọ dọ mí to hodọdo jonamẹ Jiwheyẹwhe tọn ji, bọ mí jlo na basi dohia nuagokun he Owalọ lẹ 3:19 dọ tọn, to fie e dọ te dọ Jehovah “súnsún,” ylando mítọn lẹ sẹ. Hogbe nunọnutẹnmẹ tọn he họnwun de wẹ enẹ lọsu yin na ede, ṣigba apajlẹ taun tẹwẹ mí sọgan yí do basi dohia nuagokun lọ tọn—taidi gọmu kavi tekan de? Mí sọgan dọ: ‘To whenuena Jehovah jo ylando mítọn lẹ na mí, e nọ taidi dọ e yí tekan de (kavi gọmu de) bo súnsún yé sẹ wẹ nkọtọn. E na sinyẹn dọ yè ni ma mọnukunnujẹ nuhe oló he bọawu mọnkọtọn de to didọ mẹ.
19, 20. (a) Fie wẹ mí sọgan mọ oló dagbe lẹ te? (b) Apajlẹ oló kọdetọn dagbenọ tẹlẹ tọn wẹ ko yin zinzinjẹgbonu to owe mítọn lẹ mẹ? (Pọ́n apotin mẹ ga.)
19 Fie wẹ a sọgan mọ oló he sọgbe, he bẹ apajlẹ jọnwun gbẹzan tọn hẹn lẹ te? Dín yé pọ́n to gbẹzan dewetiti tọn mẹ kavi to gbẹzan po numimọ voovo yisenọ hatọ lẹ tọn lẹ po mẹ. Oló lẹ sọgan yin dide sọn asisa susu devo mẹ, he bẹ nutogbẹ̀ po dehe ma tindo gbigbọ lẹ po, nuyizan whégbè tọn lẹ, kavi nujijọ alọnu tọn heyin yinyọnẹn ganji to lẹdo lọ mẹ lẹ hẹn. Aliho tangan dopo nado mọ oló dagbe lẹ wẹ nado tin to aṣeji, bo nọ yí ‘sọwhiwhe do doayi’ nujijọ egbesọ tọn he lẹdo mí lẹ go. (Owalọ lẹ 17:22, 23) Owe alọdlẹndonu tọn dopo do hodidọ gbangba tọn ji dọmọ: “Hodọtọ he nọ doayi gbẹzan gbẹtọvi tọn po azọ́n voovo etọn lẹ po go, bo nọ dọho hẹ gbẹtọ wunmẹ lẹpo, pọ́n onú lẹ kitokito bo nọ kàn kanbiọ lẹ se kaka e do nọ mọnukunnujẹ yé mẹ lẹ, na bẹ oló susu pli he na gọalọna ẹn taun to whenue e na tindo nuhudo yetọn.”
20 Asisa họakuẹ oló kọdetọn dagbenọ lẹ tọn devo sọ tin—Atọ̀họ̀-Nuhihọ́ Lọ Tọn, Réveillez-vous!, po owe heyin awuwlena gbọn Kunnudetọ Jehovah tọn lẹ dali devo lẹ po. A sọgan plọn nususu sọn ayidido lehe owe ehelẹ yí oló lẹ zan do mẹ.c Di apajlẹ, lẹnnupọndo oló heyin yiyizan to hukan 11 weta 17tọ owe Oyọnẹn tọn mẹ ji. E yí gbẹtọ-yinyin voovo he tin to agun lọ mẹ lẹ jlẹdo mọto voovo he tin to gbejizọnlin ji po hiẹ po to ali ji. Etẹwẹ hẹn ẹn yin kọdetọn dagbenọ? Doayi e go dọ e yin zize sinai do ninọmẹ egbesọ tọn lẹ ji, e sẹpọ nuagokun he to yinyin didọ lọ taun, bọ yọn-na-yizan etọn sọ họnwun. Mí sọgan yí oló heyin zinzinjẹgbonu lẹ zan to mẹpinplọn mítọn mẹ, vlavo bo diọadana yé sọgbe hẹ nuhudo Biblu plọntọ lọ tọn kavi diọadana yé nado yizan to hodidọ de mẹ.
21. Ale tẹlẹ wẹ nọ wá sọn yinyin Ohó Jiwheyẹwhe tọn plọnmẹtọ kọdetọn dagbenọ de mẹ?
21 Ale mẹplọntọ dagbe de yinyin tọn sù taun. To whenue mí to mẹplọn, mí to nude má hẹ mẹdevo lẹ; mí nọ yí nutindo mítọn delẹ zan nado gọalọna yé. Nunamẹ mọnkọtọn nọ hẹn ayajẹ wá, na Biblu dọmọ: ‘Nado namẹ tindo ayajẹ hú nado mọyi.’ (Owalọ lẹ 20:35) Na Ohó Jiwheyẹwhe tọn plọnmẹtọ lẹ, ayajẹ enẹ wẹ ayajẹ yinyọnẹn dọ mí to onú dagbe he na họakuẹ kakadoi de plọnmẹ tọn—enẹwẹ nugbo lọ gando Jehovah go. Mí sọgan sọ tindo pekọ he nọ wá sọn yinyọnẹn mẹ dọ mí to apajlẹ Jesu Klisti, Mẹplọntọ Daho lọ tọn hodo.
[Nudọnamẹ odò tọn]
a Yin zinzinjẹgbonu gbọn Kunnudetọ Jehovah tọn lẹ dali.
b Pọ́n adà lọ “Homẹbibiọ lẹ na Yizan to Lizọnyizọn Kunnudegbe Tọn Mẹ,” to weda 2-7.—Yin zinzinjẹgbonu gbọn Kunnudetọ Jehovah tọn lẹ dali.
c Nado mọ apajlẹ lẹ, pọ́n Index des publications de la Société Watch Tower 1986-2000, to “Exemples” [Apajlẹ lẹ] glọ.—Heyin zinzinjẹgbonu to ogbè sọha delẹ mẹ gbọn Kunnudetọ Jehovah tọn lẹ dali.
Be Hiẹ Flin Ya?
• Nawẹ mí sọgan plọnmẹ po awubibọ po to whenue mí to anadena plọnmẹ Biblu whégbè tọn de podọ to whenuena mí to hodidọ de dọ to agun mẹ gbọn?
• Nawẹ mí sọgan yí kanbiọ lẹ zan po kọdetọn dagbe po do to whenue mí to kunnude sọn whédegbè-jẹ-whédegbè?
• Nawẹ mí sọgan yí hoyijlẹdohogo kannukannu tọn zan nado zinnudo jẹhẹnu po aliho Jehovah tọn lẹ po ji do?
• Fie wẹ mí sọgan mọ oló he sọgbe lẹ te?
[Apotin/Yẹdide to weda 23]
Be A Flin Oló Ehelẹ Ya?
Oló kọdetọn dagbenọ delẹ die. Etẹwutu a ma na pọ́n owe he mẹ yé sọawuhia te bo doayi lehe oló lọ gọalọ nado zinnudo nuagokun he ji yè to hodọdo lọ go?
• Taidi húnhotọ po hànjitọ lẹ po kavi sunnu awe he to agbàn de sọn agbanbẹhun mẹ lẹ, awuwiwlena alọwle kọdetọn dagbenọ de sinai do alọwlemẹ dagbe de dide ji tlala.—Atọ̀họ̀-Nuhihọ́ Lọ Tọn 15 mai 2001, weda 16.
• Numọtolanmẹ towe lẹ didọ tọ́n nọ taidi bọlu de yìnyìn nkọtọn. A sọgan yìn in dẹẹdẹ kavi a sọgan yìn in po huhlọn po bọ e na gbleawunamẹ.—Oyọnẹn He Nọ Planmẹ Sọyi Ogbẹ̀ Madopodo Mẹ, weda 144, hukan 13.
• Pinplọn nado do owanyi hia nọ taidi ogbè yọyọ de pinplọn.—Atọ̀họ̀-Nuhihọ́ Lọ Tọn 15 février 1999, weda 18, 22-3.
• Mí ni dọ dọ awutu sinsinyẹn de to yasana we bo nasọ hù we adavo a yin zizẹ. Etẹwẹ na yin numọtolanmẹ towe eyin akuẹ mẹzizẹ lọ tọn sù tlala hugan na we? Etẹwẹ lo eyin nutindo whẹndo towe po họntọn towe lẹ tọn po ma na pé nado suahọ lọ? Nado pannukọn ninọmẹ ogbẹ̀ zedo owù mẹ tọn mọnkọtọn na hẹnmẹ jẹflumẹ taun! Ehe do nuhe ko jọ do akọ̀ gbẹtọvi tọn go hia.—Atọ̀họ̀-Nuhihọ́ lọ Tọn 15 février 1999, weda 13.
• Aovi lẹ nọ yí afinyọnnuwiwa zan nado wà nuhe mọ̀donú nọ wà na gbeyantọ lẹ. E nọ dọ̀n kanlin lẹ do omọ̀ mẹ.—Oyọnẹn He Nọ Planmẹ Sọyi Ogbẹ̀ Madopodo Mẹ, weda 111.
• Lehe Jesu wá fli kúnkan Adam tọn lẹ gọ̀ do sọgan yin yiyijlẹdo dawe homẹdagbenọ de he suahọ azọ́nwhé de tọn (he ogán ylankan de ko dù) bo vọ́ azọ́nwhé lọ hùn, bo gbọnmọ dali hẹn ale wá na mẹyidoazọnmẹ susu go.—Atọ̀họ̀-Nuhihọ́ Lọ Tọn, 15 février 1999, weda 16.
• Lẹnnupọndo gbẹwhlẹngántọ delẹ ji to nugbajẹmẹji de tẹnmẹ. Dile etlẹ yindọ mẹdelẹ sọgan to gbẹtọ lẹ dín to lẹdo de mẹ fie luntọ́ntọ vude to yinyin mimọ te, yé ma nọ gbọjọ bo nọ joagọ na azọ́nwatọ hatọ yetọn lẹ to luntọ́ntọ susu mọ to fidevo wutu gba. Azọ́n mẹwhlẹngán tọn mítọn ma ko fó gba. To whemẹwhemẹ, fọtọ́n kanweko susu he jlo na lùn nukunbibia daho lọ tọ́n lẹ to yinyin mimọ.—Lizọnyizọn Ahọluduta Tọn Mítọn décembre 1998, weda 1.
[Yẹdide to weda 20]
Klistiani nugbo lẹ yin Ohó Jiwheyẹwhe tọn plọnmẹtọ lẹ
[Yẹdide to weda 21]
Mẹho lẹ sọgan yí kanbiọ lẹ zan nado gọalọna yisenọ hatọ lẹ nado mọ homẹmimiọn yí sọn Ohó Jiwheyẹwhe tọn mẹ