Ayinamẹ Atọ̀n He Na Gọalọna We Nado Hẹn Mẹpinplọn Towe Pọnte
1. Naegbọn mí dona dovivẹnu nado hẹn mẹpinplọn mítọn pọnte dogọ?
1 Kunnudetọ lẹpo wẹ yin mẹplọntọ. Nuplọn mẹdevo lẹ wẹ mí te to whenue mí to dlapọn tintan basi, to gọyìpọn basina mẹhe do ojlo hia, kavi to anadena plọnmẹ Biblu de. Podọ onú vonọtaun de wẹ mí nọ plọnmẹ. Mí to hinhọ́n tá do “kandai wiwe lẹ” ji, ehe sọgan gọalọna gbẹtọ lẹ nado “yin nuyọnẹntọ na whlẹngán.” (2 Tim. 3:15) Lẹblanulọkẹyi daho nankọ die mí tindo! Ayinamẹ atọ̀n delẹ die he na gọalọna mí nado hẹn mẹpinplọn mítọn pọnte dogọ.
2. Nawẹ mí sọgan hẹn mẹpinplọn mítọn bọawu gbọn?
2 Nọ Hẹn Mẹpinplọn Towe Bọawu: Eyin mí mọnukunnujẹ nude mẹ ganji, mí nọ yawu wọn lehe nulọ sọgan doglẹ na mẹhe ma mọnukunnujẹemẹ de do. Enẹwutu, eyin hiẹ to anadena plọnmẹ Biblu de, ma nọ yí nudọnamẹ he ma yin dandan tọn lẹ dogọ mẹpinplọn towe blo. Kakatimọ, nọ zinnudo nuagokun lọ lẹ ji. E ma yin ohó susu didọ wẹ nọ zọ́n bọ mẹde nọ yin mẹplọntọ dagbe. (Howh. 10:19) Nuhe yọ́n hugan wẹ e yin dọ mí nọ hia wefọ tangan lẹ kẹdẹ. To wefọ de hihia godo, nọ zinnudo adà etọn he gando nuhe mì to pinplọn lọ go ji. Dile etlẹ yindọ Yẹwhehodidọ Osó ji tọn he yin kinkandai to Matiu weta 5 jẹ 7 mẹ bẹ nugbo sisosiso lẹ hẹn, Jesu plọnmẹ nugbo enẹlẹ to aliho he bọawu mẹ po hogbe vude poun po.
3. Etẹwẹ apajlẹ po yẹdide lẹ po nọ wà, podọ detẹ lẹ wẹ nọ yin dagbe hugan?
3 Nọ Yí Apajlẹ po Yẹdide lẹ po Zan: Apajlẹ po yẹdide lẹ po nọ gọalọnamẹ nado lẹnnupọn bo nọ fọ́n numọtolanmẹ mẹtọn dote bosọ nọ gọalọnamẹ nado flinnu. Ma lẹndọ otàn susu wẹ a dona pìn nado na apajlẹ dagbe blo. Jesu nọ saba yí apajlẹ he whègli bo ma gẹdẹ lẹ zan. (Mat. 7:3-5; 18:2-4) Yẹdide kleun-kleun he yin dide do wema ji lẹ sọgan sọ yọ́n-na-yizan taun. Awuwiwle dagbe sọgan gọalọna we nado mọ apajlẹ po yẹdide dagbe he a na yizan lẹ po.
4. Nawẹ mí sọgan yí kanbiọ lẹ zan po kọdetọn dagbe po gbọn?
4 Nọ Yí Kanbiọ lẹ Zan: Kanbiọ kinkanse na zọ́n bọ nuplọntọ towe na lẹnnupọn. Enẹwutu, nọ whesọ to whenue a kàn kanbiọ de sè. Eyin hiẹ lọsu yawu na gblọndo lọ, a ma na yọ́n lehe nuplọntọ towe mọnukunnujẹ nujidọhodo lọ mẹ do. Eyin gblọndo he e na ma sọgbe, kakati nado na gblọndo lọ, e na yọ́n hugan nado yí kanbiọ devo lẹ do gọalọna ẹn nado yọ́n gblọndo lọ. (Mat. 17:24-27) Na nugbo tọn, depope to mí mẹ ma yin mẹplọntọ pipé. Abajọ, Biblu dotuhomẹna mí nado nọ payi mẹpinplọn mítọn go to whepoponu. Mọwiwà na hẹn ale madopodo wá na mí podọ na mẹhe dotoaina mí lẹ.—1 Tim. 4:16.