Oplọn Mẹdetiti Tọn He Nọ Hẹn Mì Pegan Nado Plọnmẹ
‘Nọ lẹnnupọndo onú helẹ ji, jo dewe hlan yé petepete; na nukọnyiyi towe nido diun jẹgbonu to omẹ popo dè. Payi dewe po mẹpinplọn towe po go.’—1 TIMOTI 4:15, 16.
1. Etẹwẹ yin nugbo lọ gando ojlẹ po oplọn mẹdetiti tọn po go?
“ONÚ dopodopo wẹ ojlẹ de tin na,” wẹ Biblu dọ to Yẹwhehodọtọ 3:1 mẹ. Enẹ yin nugbo na nuhe dù oplọn mẹdetiti tọn. E nọ sinyẹnawuna mẹsusu nado lẹnnupọndo gbigbọmẹnu lẹ ji eyin ojlẹ kavi nọtẹn lọ ma sọgbe. Di apajlẹ, mí ni dọ dọ a ko dù núdùdù whèjai tọn he pẹnzin to azọ́nzán he sinyẹn de godo, be a na tindo ojlo nado plọnnu, titengbe eyin a ko kànflẹmẹ do oján vẹnpẹn towe mẹ to televiziọn nukọn ya? Vlavo wẹ enẹ na yọnbasi. Enẹwutu, etẹwẹ yin pọngbọ lọ? E họnwun dọ mí dona de ojlẹ po nọtẹn he mẹ mí na nọ̀ plọnnu te po nado sọgan mọale gigọ́ yí sọn vivẹnudido mítọn lẹ mẹ.
2. Ojlẹ tẹwẹ nọ saba yọnhugan na oplọn mẹdetiti tọn?
2 Mẹsusu mọdọ afọnnu-fuu wẹ yọnhugan na yé nado plọnnu whenuena yé ma tindo ayihafẹsẹnamẹnu depope. Mẹdevo lẹ nọ yí gbọjẹwhenu whèmẹ tọn zan nado plọnnu vude. Doayi lehe ojlẹ na nuwiwa gbigbọmẹ tọn titengbe lẹ yin nùzindeji do to apajlẹ he bọdego lẹ mẹ go. Ahọlu Davidi Islaeli hohowhenu tọn wlan dọmọ: “Hẹn mi se dagbewanyi towe to afọnnu; na hiẹ go wẹ yẹn dotudo: hẹn mi yọ́n aliho he ji yẹn na zinzọnlin gbọn; na yẹn ze ayiha ṣie daga hlan we.” (Psalm 143:8) Yẹwhegán Isaia do nukunnumọjẹnumẹ mọnkọtọn hia to whenuena e dọmọ: “OKLUNỌ Jiwheyẹwhe ko yí odẹ́ nuyọnẹntọ tọn na mi, na yẹn nido yọ́n le yè nọ dọho do to ojlẹ mẹ hlan mẹhe nuṣikọna: e to finfọ́n to afọnnu-afọnnu, e hùn otó ṣie, nado se di nuyọnẹntọ tọn.” Nuagokun lọ wẹ yindọ mí dona plọnnu bo dọhodopọ hẹ Jehovah to whenuena ayiha mítọn vò, to whedepopenu to azán lọ gbè.—Isaia 50:4, 5; Psalm 5:3; 88:13.
3. Ninọmẹ tẹlẹ wẹ yọ́n na nupinplọn kọdetọn dagbe tọn?
3 Onú devo he na gọalọna mí nado plọnnu po kọdetọn dagbe po wẹ yindọ mí ma dona de nado sinai do oján vẹnpẹn mẹ. Mí ma sọgan nọ aṣeji to aliho enẹ mẹ gba. To whenuena mí to nuplọn, ayiha mítọn dona yin whinwhàn, podọ ninọmẹ awuvivo zẹjlẹgo tọn taidi nuhe nọ wà adà awetọ etọn. Nọtẹn he tin to abọẹ bo masọ tindo ayihafẹsẹnamẹnu lẹ nọ yọ́n na nupinplọn po ayihamẹlẹnpọn po. Tintẹnpọn nado plọnnu dile ladio kavi televiziọn tin to titá bọ ovi lẹ to ayidonugo towe biọ ma na hẹn kọdetọn dagbe lẹ wá gba. To whenuena Jesu jlo na lẹnayihamẹpọn, e yì nọtẹn he tin to abọẹ de. E sọ dọhodo nuhọakuẹ-yinyin nọtẹn nuglọ tọn de mimọ na dẹ̀hiho ji.—Matiu 6:6; 14:13; Malku 6:30-32.
Oplọn Mẹdetiti Tọn He Nọ Hẹn Mí Pegan Nado Na Gblọndo
4, 5. Aliho tẹlẹ mẹ wẹ alọnuwe Etẹwẹ Jiwheyẹwhe Biọ yin alọgọ yọn-na-yizan de te?
4 Oplọn mẹdetiti tọn nọ hẹn ale wá eyin mí yí owe sinai do Biblu ji voovo lẹ zan nado kùndò sisosiso dogọ biọ hogo de mẹ, titengbe to whenuena mí wàmọ nado na gblọndo kanbiọ ahundoponọ mẹde tọn. (1 Timoti 1:4; 2 Timoti 2:23) Nado bẹ nupinplọn jẹeji, mẹyọyọ susu to alọnuwe lọ Etẹwẹ Jiwheyẹwhe Biọ to Mí Si?,a he tin-to-aimẹ to ogbè 261 mẹ todin plọn. Alọnuwe he bọawu bo yì nuagokun lẹ ji tlọlọ bosọ yin zize sinai mlẹnmlẹn do Biblu ji de wẹ e yin. E nọ gọalọna mẹhe hia ẹ lẹ nado yawu mọnukunnujẹ nubiọtomẹsi Jiwheyẹwhe tọn lẹ na sinsẹ̀n-bibasi nugbo mẹ. Ṣigba, tẹnmẹ ma tin to e mẹ sọmọ nado basi zẹẹmẹ gigọ́ do hogo dopodopo ji gba. Eyin plọnmẹ Biblu towe fọ́n kanbiọ sinsinyẹn lẹ dote do hogo Biblu tọn he ji mì to hodọdo de ji, nawẹ a na mọ nudọnamẹ Biblu tọn devo lẹ he na gọalọna we nado na gblọndo kanbiọ enẹlẹ tọn gbọn?
5 Na mẹhe tindo Watchtower Library to CD-ROM ji to ogbè yetọn mẹ lẹ, e bọawu nado mọ asisa nudọnamẹ tọn voovo lẹ to ọdinatẹẹ ji. Ṣigba etẹwẹ dogbọn mẹhe ma tindo ọdinatẹẹ lẹ dali? Mì gbọ mí ni gbadopọnna hosọ awe heyin hodọdeji to alọnuwe Etẹwẹ Jiwheyẹwhe Biọ mẹ nado mọ lehe mí sọgan hẹn nukunnumọjẹnumẹ mítọn gbloada bosọ penugo nado na gblọndo po zẹẹmẹ gigọ́ lẹ po do—titengbe eyin mẹde fọ́n kanbiọ lẹ dote taidi Mẹnu wẹ Jiwheyẹwhe, podọ etẹwẹ Jesu tin taidi na taun tọn?—Eksọdusi 5:2; Luku 9:18-20; 1 Pita 3:15.
Mẹnu Wẹ Jiwheyẹwhe?
6, 7. (a) Kanbiọ tẹwẹ fọndote gando Jiwheyẹwhe go? (b) Nuṣiwa sinsinyẹn tẹwẹ sinsẹ̀ngán de basi to hodidọ de mẹ?
6 Nupinplọn 2tọ to alọnuwe Etẹwẹ Jiwheyẹwhe Biọ mẹ na gblọndo kanbiọ titengbe lọ tọn, Mẹnu wẹ Jiwheyẹwhe? Nuagokun tangan de wẹ ehe yin, na mẹde ma sọgan sẹ̀n Jiwheyẹwhe nugbo lọ eyin e ma yọ́n Ewọ kavi vlavo tindo ayihaawe do tintin Etọn go. (Lomunu lẹ 1:19, 20; Heblu lẹ 11:6) Ṣogan, gbẹtọ lẹ tindo linlẹn voovo susu gando mẹhe Jiwheyẹwhe yin go lẹdo aihọn pé. (1 Kọlintinu lẹ 8:4-6) Nuplọnmẹ sinsẹ̀n tọn lẹpo wẹ nọ dọ onú voovo gando mẹhe Jiwheyẹwhe yin go. To Mẹylọhodotọklisti tọn mẹ, suhugan sinsẹ̀n lẹ tọn nọ pọ́n Jiwheyẹwhe hlan taidi Atọ̀n-to-dopomẹ de. Sinsẹ̀ngán nukundeji États-Unis tọn de na hodidọ de he hosọ etọn yin “Be Hiẹ Yọ́n Jiwheyẹwhe Ya?” ṣigba ma tlẹ donù yinkọ Jiwheyẹwhe tọn go whladopo tata to hodidọ lọ mẹ, mahopọnna dọ e yihodọ sọn Owe-wiwe Heblu tọn mẹ pludopludo. Na nugbo tọn, lẹdogbedevomẹ Biblu tọn he yí “Oklunọ” he gbloada bo ma yin yinkọ mẹde tọn wẹ e yizan kakati nido yin dehe yí Jehovah kavi Yahweh zan.
7 Nuagokun titengbe tẹ go die sinsẹ̀ngán enẹ gbọ to whenuena e yihodọ sọn Jẹlemia 31:33, 34 mẹ dọmọ: “ ‘Yé masọ to na plọn omẹ dopodopo kọmẹnu etọn, podọ omẹ dopodopo nọvisunnu etọn ba, dọmọ, “Yọ́n Oklunọ” [Heblu, “Yọ́n Jehovah”], na yemẹpo wẹ na yọ́n mi, sọn mẹwhiwhè yetọn mẹ jẹ mẹkiklo yetọn mẹ,’ wẹ Oklunọ [Heblu, Jehovah] dọ.” Lẹdogbedevomẹ he e yizan ma yí yinkọ Jiwheyẹwhe tọn titi, yèdọ Jehovah zan gba.—Psalm 83:18.
8. Etẹwẹ do nujọnu-yinyin yinkọ Jiwheyẹwhe tọn yiyizan hia?
8 Psalm 8:9 [NW] do nuhewutu yinkọ Jehovah tọn yiyizan do yin nujọnu sọmọ hia dọmọ: “Oklunọ mítọn Jehovah E, na oyín towe klo tlala to aigba lẹpo ji dole!” Ṣogan, to Biblu Wiwe Lọ mẹ, dile e te to lẹdogbedevomẹ Biblu tọn devo lẹ mẹ do, mí hia dọmọ: “OKLUNỌ E, Oklunọ mítọn, na oyín towe gbọnvo to aihọn lẹpo mẹ dole!” Etomọṣo, dile e yin nùdego to hosọ he jẹnukọn mẹ do, mí sọgan mọ “oyọnẹn Jiwheyẹwhe tọn” eyin mí na dotẹnmẹ Ohó etọn nado tá hinhọ́n do mí ji. Ṣigba owe sinai do Biblu ji tẹwẹ na na gblọndo kanbiọ mítọn lẹ tọn po awubibọ po dogbọn nujọnu-yinyin yinkọ Jiwheyẹwhe tọn dali?—Howhinwhẹn lẹ 2:1-6.
9. (a) Owe tẹwẹ sọgan gọalọna mí nado basi zẹẹmẹ nuhewutu e yin nujọnu nado yí yinkọ Jiwheyẹwhe tọn zan tọn? (b) Nawẹ lẹdogbedevomẹtọ susu ko gboawupo nado do sisi hia na yinkọ Jiwheyẹwhe tọn gbọn?
9 Mí sọgan lẹhlan alọnuwe lọ Oyin sọn Olọn mẹ Wá lọ He Na Nọte Kakadoi, he ko yin lilẹdo ogbè 69 mẹ.b Adà he hosọ etọn yin “Oyín Jiwheyẹwhe Tọn—Zẹẹmẹ po Yiylọ Etọn Po” (weda 6-11) dohia hezeheze dọ Tetlaglamu Heblu tọn (sọn Glẹki mẹ, he zẹẹmẹdo “wekun ẹnẹ”) sọawuhia diblayi whla 7 000 to nukinkan dowhenu Heblu tọn lẹ mẹ. Ṣogan, sinsẹ̀ngán po lẹdogbedevomẹtọ sinsẹ̀n Ju lẹ tọn gọna Mẹylọhodotọklisti tọn lẹ po ko yí ojlo do de e sẹ sọn suhugan lẹdogbedevomẹ Biblu tọn yetọn lẹ mẹ.c Nawẹ yé sọgan sọalọakọ́n dọ yé yọ́n Jiwheyẹwhe bo tindo haṣinṣan kẹalọyi de hẹ ẹ gbọn eyin yé gbẹ́ nado yí yinkọ etọn do ylọ ẹ? Yinkọ nugbo etọn nọ hùn aliho lọ dote nado mọnukunnujẹ lẹndai etọn lẹ po mẹhe ewọ yin po mẹ. Humọ, nuhọakuẹ tẹwẹ apadewhe odẹ̀ apajlẹnọ Jesu tọn heyin “Otọ́ mítọn he tin to olọn mẹ, hihiọ wẹ oyín towe” tindo eyin yinkọ Jiwheyẹwhe tọn ma tlẹ nọ yin yiyizan?—Matiu 6:9; Johanu 5:43; 17:6.
Mẹnu Wẹ Jesu Klisti?
10. Aliho tẹlẹ mẹ wẹ mí sọgan mọ zẹẹmẹ gigọ́ gbẹzan po lizọnyizọn Jesu tọn po te?
10 Hosọ nupinplọn 3tọ tọn to alọnuwe Etẹwẹ Jiwheyẹwhe Biọ mẹ wẹ “Mẹnu Wẹ Jesu Klisti?” To hukan ṣidopo poun mẹ, e basi bladopọ kleun de gando Jesu, fie e wá sọn, podọ nuhewutu e wá aigba ji go. Ṣigba, eyin a jlo na mọ kandai gigọ́ gbẹzan etọn tọn, gbọnvona kandai Wẹndagbe lẹ tọn, owe he yọnhugan lọ wẹ Dawe Klohugan lọ He Nkọtọn Ma Nọgbẹ̀ Pọ́n, he tin to ogbè 111 mẹ.* Owe ehe ze kandai gigọ́ gbẹzan po nuplọnmẹ Klisti tọn lẹ po donukọnnamẹ to aliho debọdo-dego tọn mẹ, sinai do Wẹndagbe ẹnẹ lẹ ji. Weta 133 etọn lẹ dọhodo nujijọ gbẹzan po lizọnyizọn Jesu tọn lẹ po ji. Eyin a jlo aliho dogbapọnnanu tọn he gbọnvo, a sọgan pọ́n owe Étude perspicace mẹ, Bladopọ 2, to hosọ lọ “Jesu Klisti” glọ, podọ owe lọ Oyọnẹn He Nọ Planmẹ Sọyi Ogbẹ̀ Madopodo Mẹ, weta 4.
11. (a) Etẹwẹ hẹn Kunnudetọ Jehovah tọn lẹ gbọnvo to nuyise yetọn mẹ gando Jesu go? (b) Wefọ Biblu tọn tẹlẹ wẹ hùngona sinsẹ̀n-nuplọnmẹ Atọ̀n-to-dopomẹ tọn hezeheze, podọ owe tẹwẹ gọalọ to whẹho ehe mẹ?
11 To Mẹylọhodotọklisti tọn mẹ nudindọn lọ gando Jesu go sinai do vlavo eyin ewọ yin “Ovi Jiwheyẹwhe tọn” bosọ yin “Jiwheyẹwhe Ovi lọ” ji—to hogbe devo lẹ mẹ, nudindọn lọ yin do nuhe Catéchisme de l’Église catholique ylọdọ “nudabla tangan yise Klistiani tọn,” heyin Atọ̀n-to-dopomẹ ji. To vogbingbọnmẹ na sinsẹ̀n Mẹylọhodotọklisti tọn lẹ, Kunnudetọ Jehovah tọn lẹ yise dọ Jiwheyẹwhe wẹ dá Jesu ṣigba Jesu mayin Jiwheyẹwhe gba. Hodọdopọ dagbe de do hogo ehe ji yin mimọ to alọnuwe lọ Be Hiẹ Dona Yí Atọ̀n-to-Dopomẹ Sè Ya? mẹ, heyin lilẹdo ogbè 95 mẹ.d Delẹ to wefọ susu he e yizan nado hùngona sinsẹ̀n-nuplọnmẹ Atọ̀n-to-dopomẹ tọn lẹ wẹ: Malku 13:32 po 1 Kọlintinu lẹ 15:24, 28 po.
12. Kanbiọ devo tẹwẹ jẹna ayidonugo mítọn?
12 Nuhe mí dọ to aga gando Jiwheyẹwhe po Jesu Klisti po go lẹ yinuwa nado do aliho he mẹ mí sọgan basi oplọn mẹdetiti tọn te nado sọgan gọalọna mẹhe ma jẹakọhẹ nugbo Biblu tọn lẹ nado tindo oyọnẹn he pegan hia. (Johanu 17:3) Ṣigba etẹwẹ dogbọn mẹhe ko kọnawudopọ hẹ agun Klistiani tọn na owhe susu lẹ dali? Po oyọnẹn Biblu tọn susu he yé ko bẹpli po, be yé gbẹsọ dona na ayidonugo hlan oplọn mẹdetiti Ohó Jehovah tọn yetọn wẹ ya?
Etẹwutu ‘Mí Na Nọ Payi Míde Go’?
13. Pọndohlan agọ̀ tẹwẹ mẹdelẹ sọgan tindo gando oplọn mẹdetiti tọn go?
13 Mẹhe ko yin hagbẹ agun lọ tọn na owhe susu delẹ sọgan jai jẹ omọ̀ lọ mẹ nado nọ ganjẹ oyọnẹn Biblu tọn he yé tindo to owhe vude tintan he yé lẹzun Kunnudetọ Jehovah tọn lẹ go poun. E bọawu nado lẹnnupọn dọ: “Yẹn ma tindo nuhudo nado nọ plọnnu susu di mẹyọyọ lẹ ba. Etẹ, pọ́n whla nẹmu he yẹn ko hia Biblu po owe sinai do Biblu ji lẹ po to owhe lẹ gblamẹ.” Ehe na taidi didọmọ: “Yẹn ma tindo nuhudo nado dù núdùdù sọmọ ba, na pọ́n onú susu he yẹn ko dù wayi lẹ.” Mí yọnẹn dọ agbasa mítọn nọ biọ núdùdù dojo gbesisọ tọn, heyin awuwlena ganji, nado sọgan tin to gángán bo dohuhlọn. Nẹmunẹmu wẹ enẹ yin nugbo nado hẹn agbasalilo po huhlọn gbigbọmẹ tọn mítọn po go!—Heblu lẹ 5:12-14.
14. Naegbọn mí dona nọ payi míde go?
14 Enẹwutu, mímẹpo, vlavo mí ko to Biblu plọn na whenu dindẹn kavi lala, dona hodo ayinamẹ he Paulu na Timoti, he ko yin nugopọntọ he whèwhín de to whenẹnu dọmọ: “Payi dewe po mẹpinplọn towe po go; nọ nọte to yé mẹ; na ehe wiwà mẹ hiẹ na whlẹn dewe, po yé he to ohó towe se lẹ po.” (1 Timoti 4:15, 16) Etẹwutu mí dona hẹn ayinamẹ Paulu tọn do ayiha mẹ? Flindọ Paulu sọ zinnudeji dọ mí tindo avùn de nado hò sọta “bublu [nuyiwa wintinwintin] Lẹgba tọn” podọ ‘sọta gbigbọ ylankan he tin to olọn lẹ mẹ.’ Apọsteli Pita sọ na avase dọ Lẹgba to ‘dindin nado tlẹ́n mẹde dù,’ podọ ‘mẹde’ enẹ sọgan yin depope to mí mẹ. Numọtolanmẹ pekọ-mẹdetiti tọn tintindo mítọn sọgan yin dotẹnmẹ he e to dindin lọ lẹpo.—Efesunu lẹ 6:11, 12; 1 Pita 5:8.
15. Avùnhonu gbigbọmẹ tọn tẹwẹ mí tindo, podọ nawẹ mí sọgan penukundego gbọn?
15 Enẹwutu, avùnhonu tẹwẹ mí tindo? Apọsteli Paulu flin mí dọmọ: “Mì ze gbaja Jiwheyẹwhe tọn lẹpo blá dogo, na mì nido nọavunte to azán ylankan gbè, whenuena mì ko basi popo vọ̀, nado nọte.” (Efesunu lẹ 6:13) Kọdetọn dagbenọ-yinyin gbaja gbigbọmẹ tọn enẹ ma sinai do ninọmẹ dowhenu tọn etọn kẹdẹ ji gba ṣigba do nukunpenugo gbesisọ tọn ji ga. Enẹwutu, gbaja Jiwheyẹwhe tọn lẹpo enẹ dona bẹ oyọnẹn he sọgbe Ohó Jiwheyẹwhe tọn tọn hẹn. Ehe do nujọnu-yinyin lọ hia nado hẹn nukunnumọjẹnumẹ mítọn gando nugbo lọ go sọgbe hẹ ojlẹ dile Jehovah to dido e hia gbọn Ohó etọn po hagbẹ afanumẹ nugbonọ nuyọnẹntọ lọ po gblamẹ do. Biblu po owe sinai do Biblu ji lẹ po pinplọn to gbesisọmẹ yin nujọnu to nukunpipedo gbaja gbigbọmẹ tọn mítọn go mẹ.—Matiu 24:45-47; Efesunu lẹ 6:14, 15.
16. Etẹwẹ mí sọgan wà nado hẹn ẹn diun dọ “sagba yise tọn” mítọn tin to ninọmẹ dagbe mẹ?
16 Paulu zinnudo “sagba yise tọn” ji taidi adà tangan gbaja gbigbọmẹ tọn mítọn, ehe mí sọgan yizan nado diọadana bo ṣimiyọ́n ogá whẹsadokọnamẹ po nuplọnmẹ lalo Satani tọn lẹ po. (Efesunu lẹ 6:16) Enẹwutu dandannu wẹ e yin dọ mí ni nọ gbadopọnna lehe sagba yise mítọn tọn dohuhlọn sọ podọ afọdide he mí ze lẹ nado penukundego bo hẹn ẹn lodo. Di apajlẹ, a sọgan kanse dọ: ‘Nawẹ yẹn nọ wleawuna oplọn sẹmẹsẹmẹ Atọ̀họ̀-Nuhihọ́ Lọ Tọn gbọn? Be yẹn ko plọnnu ganji nado sọgan “jlahomẹdona to owanyi po azọ́n dagbe lẹ po mẹ” gbọn gblọndo heyin awuwlena ganji lẹ nina to opli whenu dali ya? Be yẹn nọ hùn Biblu bo nọ hia wefọ dide he mayin hoyidọ sọn e mẹ lẹ ya? Be yẹn nọ na tuli mẹdevo lẹ gbọn mahẹ zohunhunnọ tintindo to opli lẹ ji dali ya?’ Núdùdù gbigbọmẹ tọn mítọn sinyẹn, podọ mí dona li i ganji nado mọaleyi to gigọ́mẹ.—Heblu lẹ 5:14; 10:24.
17. (a) Adí ylankan tẹwẹ Satani to yiyizan nado tẹnpọn bo dekanpona gbigbọnọ-yinyin mítọn? (b) Amasin tẹwẹ na hù adí ylankan Satani tọn?
17 Satani yọ́n madogán agbasa mapenọ tọn mítọn lẹ podọ ayiha wintinwintin etọn lẹ dáblu. Dopo to aliho he mẹ e nọ hẹn nuyiwadomẹji ylankan etọn gbayipe te lẹ wẹ gbọn hinhẹn yẹdide fẹnnuwiwa tọn lẹ zun nuhe bọawu tlala nado mọ to televiziọn, Internet, po video po ji, podọ to owe zinjẹgbonu lẹ mẹ dali. Klistiani delẹ ko dike adí ylankan ehe ni biọ avùnhonu madogánnọ yetọn lẹ mẹ. Taidi kọdetọn de, yé ko hẹn lẹblanulọkẹyi lẹ bu to agun mẹ kavi tlẹ ko jiya kọdetọn he sinyẹn humọ lẹ tọn. (Efesunu lẹ 4:17-19) Amasin tẹwẹ na hù adí ylankan Satani tọn? Mí ma dona yí nukunpẹvi do pọ́n oplọn mẹdetiti tọn to gbesisọmẹ, opli Klistiani tọn mítọn lẹ, podọ gbaja Jiwheyẹwhe tọn lẹpo biblá dogo. Ehe lẹpo to pọmẹ nọ hẹn mí penugo nado yọ́n dagbe gbọnvona oylan bosọ gbẹwanna nuhe Jiwheyẹwhe gbẹwanna lẹ.—Psalm 97:10; Lomunu lẹ 12:9.
18. Nawẹ ‘ohí gbigbọ tọn’ sọgan gọalọna mí to avùn gbigbọmẹ tọn mítọn mẹ gbọn?
18 Eyin mí hẹn aṣa mítọn go nado nọ plọn Biblu to gbesisọmẹ, e mayin avùnhonu huhlọnnọ he nọ yin awuwlena gbọn oyọnẹn he pegan Ohó Jiwheyẹwhe tọn mítọn dali kẹdẹ wẹ mí na tindo gba. Mí nasọ penugo nado yiavunlọ po kọdetọn dagbe po gbọn ‘ohí gbigbọ tọn, heyin ohó Jiwheyẹwhe tọn’ yiyizan dali. Ohó Jiwheyẹwhe tọn “dá hú ohí nùawenọ, e nọ sọ́ omẹ, yèdọ nado klan ayiha po gbigbọ po do voovo, agómẹ húpétẹn tọn po ojó ohú mẹ tọn po, ewọ sọ wẹ linlẹn ayiha tọn po ojlo ayiha tọn po yọnẹntọ.” (Efesunu lẹ 6:17; Heblu lẹ 4:12) Eyin mí lẹzun azọ́nyọnẹntọ to “ohí” enẹ yiyizan mẹ, to whenẹnu eyin mí pannukọn whlepọn lẹ, mí ma na yin kiklọ gbọn nuhe sọgan taidi nuhe ma nọ gbleawunamẹ, kavi he tlẹ dọnmẹdogo de dali gba, ṣigba mí na hùngona ẹn bo do e hia taidi omọ̀ mẹhutọ mẹylankan lọ tọn. Oyọnẹn po nukunnumọjẹnumẹ Biblu tọn po he mí ko bẹpli na gọalọna mí nado gbẹ́ nuhe ylan bo wà dagbe. Enẹwutu mímẹpo dona kanse mídelẹ dọ: ‘Be ohí ṣie dá, kavi e pònù wẹ ya? Be e nọ sinyẹnawuna mi nado flin wefọ Biblu tọn he sọgan hẹn avunlọyiyi ṣie lodo lẹ wẹ ya?’ Mì gbọ mí ni hẹn aṣa dagbe mítọn go nado nọ basi oplọn mẹdetiti tọn bo gbọnmọ dali nọavunte sọta Lẹgba.—Efesunu lẹ 4:22-24.
19. Ale tẹlẹ wẹ mí sọgan mọyi eyin mí dovivẹnu nado nọ basi oplọn mẹdetiti tọn?
19 Paulu wlan dọmọ: “Owe-wiwe lẹpo gbingbọ́n sọn Jiwheyẹwhe mẹ yin alenọ ga na mẹpinplọn, na wọhẹmẹ, na anademẹ, na nuplọnmẹ he tin to dodo mẹ: na Jiwheyẹwhe gbẹtọ nido pegan, he yè hẹn sọgbe mlẹnmlẹn hlan azọ́n dagbe lẹpo.” Eyin mí hẹn nuhe Paulu dọna Timoti lẹ do ayiha mẹ, mí sọgan hẹn gbigbọnọ-yinyin mídetiti tọn lodo bosọ hẹn lizọnyizọn mítọn tindo kọdetọn dagbe dogọ. Mẹho agun tọn lẹ po devizọnwatọ lizọnyizọnwiwa tọn lẹ po sọgan yin ale daho na agun lọ, podọ mímẹpo sọgan gbọṣi dolilo mẹ to yise mẹ.—2 Timoti 3:16, 17; Matiu 7:24-27.
[Nudọnamẹ odò tọn]
a To paa mẹ, jlodotọ yọyọ he to alọnuwe Etẹwẹ Jiwheyẹwhe Biọ lọ plọn nasọ plọn owe Oyọnẹn He Nọ Planmẹ Yì Ogbẹ̀ Madopodo Mẹ. Owe awe lẹ yin zinzinjẹgbonu gbọn Kunnudetọ Jehovah tọn lẹ dali. Ayinamẹ heyin nina tofi lẹ na gọalọ nado de aliglọnnamẹnu nukọnyiyi gbigbọmẹ tọn lẹ sẹ.
b Yin zinzinjẹgbonu gbọn Kunnudetọ Jehovah tọn lẹ dali. Mẹhe tindo Étude perspicace des Écritures to ogbè yetọn mẹ lẹ sọgan pọ́n Bladopọ 2, to hosọ lọ “Jehovah” glọ. Na alọdlẹndonu to Gungbe mẹ, pọ́n weta 3 to Oyọnẹn He Nọ Planmẹ Sọyi Ogbẹ̀ Madopodo Mẹ.
c Lẹdogbedevomẹ voovo Espagne-gbè po Catalogne-gbè po tọn lẹ gbọnvo tlala to aliho he mẹ yé lilẹ́ Tetlaglamu Heblu tọn lọ do mẹ, na yé yí “Yavé,” “Yahveh,” “Jahvè,” po “Jehová” po zan wutu.
d Yin zinzinjẹgbonu gbọn Kunnudetọ Jehovah tọn lẹ dali.
Be Hiẹ Flin Ya?
• Ninọmẹ tẹlẹ wẹ nọ hẹn oplọn mẹdetiti tọn yin kọdetọn dagbenọ?
• Nuṣiwa tẹwẹ lẹdogbedevomẹtọ Biblu tọn susu basi gando yinkọ Jiwheyẹwhe tọn go?
• Wefọ Biblu tọn tẹlẹ wẹ a na yizan nado hùngona nuplọnmẹ Atọ̀n-to-dopomẹ tọn?
• Etẹwẹ mí dona wà nado whlá mídelẹ sọn bublu Satani tọn lẹ si, eyin mí tlẹ ko yin Klistiani nugbo lẹ na owhe susu?
[Yẹdide to weda 19]
Na oplọn mẹdetiti tọn kọdetọn dagbenọ, a dona mọ nọtẹn he sọgbe bo tin to abọẹ
[Yẹdide to weda 23]
Be “ohí” towe dá kavi e pònù?