Jiji Jesu Tọn—Lehe Podọ Nuhewutu Wẹ

“GBEDE PỌ́N!” Susu mẹhe mayin Klistiani lẹ tọn wẹ na dọ ehe eyin yé se otàn jiji Jesu tọn. Yé lẹndọ e ma sọgbe hẹ lẹnunnuyọnẹn nado yise dọ yọnnu alọji de sọgan mọhò bo jivi matin kọndopọ zanhẹmẹ tọn tintindo hẹ sunnu de. Etẹwẹ hiẹ lẹn?

To 1984, The Times Londres tọn zín wekanhlanmẹ de jẹgbonu he dọhodo whẹho ehe ji dọmọ: “E ma sọgbe hẹ lẹnpọn dagbe nado yí lẹnunnuyọnẹn zan taidi kunnudenu de nado jẹagọdo azọ́njiawu lẹ. Mẹhe yise dọ azọ́njiawu lẹ ma sọgan jọ gọna mẹhe yise dọ yé sọgan jọ lẹpo wẹ yí nude se.” Mẹplọntọ lẹnunnuyọnẹn tọn 14 to wehọmẹ alavọ Grande-Bretagne tọn mẹ wẹ doalọ wekanhlanmẹ lọ mẹ. Yé dọmọ: “Mí yí homẹhunhun do kẹalọyi vijiji yọnnu alọji lọ tọn, azọ́njiawu owe Wẹndagbe tọn lẹ, po fọnsọnku Klisti tọn po taidi nujijọ whenuho tọn lẹ.”

Ṣogan, owhẹ̀ mẹde tọn sọgan whẹ́n nado tindo ayihaawe to tintan whenu he e se otàn jiji Jesu tọn gbọn yọnnu alọji de dali. E paṣa onọ̀ Jesu tọn he tin to alọji lọ lọsu to whenuena angẹli Jiwheyẹwhe tọn dọna ẹn dọ: “Doayi e go, hiẹ na mọhò to ohò towe mẹ, bo nasọ ji visunnu de bosọ ylọ oyín etọn Jesu.” Malia kanse dọmọ: “Nawẹ ehe na yin, whenuena yẹn ma yọ́n sunnu gbede?” Angẹli lọ wá basi zẹẹmẹ dọ Jiwheyẹwhe na wà azọ́njiawu ehe gbọn gbigbọ wiwe Etọn gblamẹ, bo yidogọ dọ: “Ohó de sọn Jiwheyẹwhe dè ma na gbọ̀vọ́ huhlọn tọn gba.” (Luku 1:31, 34-37) Po jide po, Omẹ lọ heyin dowatọ nuyiwa dabla vijiji tọn sọgan sọ hẹn ohò po jiji Jesu tọn po yọnbasi gbọn yọnnu alọji de dali ga. Eyin Jiwheyẹwhe dá wẹkẹ mítọn po osẹ́n he to titoji jọwamọ tọn etọn lẹ po, e sọgan sọ yí azìn vijiji tọn de zan sọn adọ̀ Malia tọn mẹ nado basi Visunnu pipé gbẹtọvi tọn de.

Nuhewutu E Yin Dandannu

Josẹfu budisi Jiwheyẹwhe tọ́ ko dopà alọwle tọn na Malia whẹpo e do mọhò. To odlọ de mẹ, angẹli Jiwheyẹwhe tọn dọ whẹwhinwhẹ́n jiawu he wutu asi-mọdo-aliji Josẹfu tọn he tin to alọji do mọhò tọn na ẹn. Angẹli lọ dọna ẹn dọ: “A dibu nado plan Malia asi towe blo, na enẹ he to ohò etọn mẹ, [gbigbọ wiwe] si wẹ e sọn. E nasọ ji visunnu de, Jesu wẹ hiẹ na ylọ oyín etọn, na ewọ wẹ na whlẹn omẹ etọn lẹ gán sọn ylando yetọn lẹ mẹ.” (Matiu 1:20, 21) To Heblugbe mẹ, Jesu zẹẹmẹdo “Jehovah Tọn Wẹ Whlẹngán.” E flin mí nuhudo lọ na whlẹngán sọn ylando po okú po si gọna nuhe Jehovah Jiwheyẹwhe ko wà nado hẹn whlẹngán enẹ yọnbasi gbọn Jesu gblamẹ.

Na sunnu tintan, Adam, ko waylando wutu, ovivi etọn lẹpo yin jiji taidi mapenọ, po ayilinlẹn de po nado gbà osẹ́n Jiwheyẹwhe tọn lẹ. (Lomunu lẹ 5:12) Nawẹ ovivi Adam tọn lẹ na yin whinwhlẹn sọn ylando si bo jẹ pipé kọ̀n gbọn? Ogbẹ̀ gbẹtọvi pipé devo, he sọzẹn to nuhọakuẹ-yinyin mẹ hẹ Adam tọn, dona yin súsú nado hẹn ojlẹnu whẹdida dodo tọn lẹ sọgbe. Nuhe zọ́n niyẹn bọ Jiwheyẹwhe dike Jesu ni yin jiji taidi gbẹtọ pipé de to azọ́njiawu-liho, podọ enẹwutu wẹ Jesu na dotẹnmẹ kẹntọ etọn lẹ nado hù i. (Johanu 10:17, 18; 1 Timoti 2:5, 6) To fọnsọnku po olọn mẹ yìyì Jesu tọn po godo, e sọgan dọ po jintli po dọmọ: ‘Yẹn lẹzun oṣiọ; doayi e go, yẹn sọ tin to ogbẹ̀ kakadoi, yẹn sọ tindo họnhungan okú po Hadẹs [yọdo paa gbẹtọvi tọn] po tọn.’—Osọhia 1:18.

Họnhungan yẹhiadonu okú po Hadẹs po tọn ehe wẹ Jesu yí do hùn aliho lọ dote na gbẹtọvi ylandonọ lẹ nado gọ̀ nuhe Adam ko hẹnbu lọ mọyi. Jesu basi zẹẹmẹ dọmọ: “Yẹn wẹ fọnsọnku po ogbẹ̀ po; mẹhe yí mi se, eyin e kú, e nasọ tin to ogbẹ̀: mẹhe sọ tin to ogbẹ̀, bosọ yí mi se, ma na kú gbede.” (Johanu 11:25, 26) Opagbe jiawu nankọ die! Etomọṣo, whẹwhinwhẹ́n titengbe hugan devo tin na jiji Jesu tọn.

Whẹwhinwhẹ́n Titengbe Hugan Lọ

Jesu ma bẹ gbẹzan etọn jẹeji to vidọ̀ Malia tọn mẹ gba. “Yẹn jẹte sọn olọn,” wẹ e dọ hezeheze. (Johanu 6:38) Jesu ko nọgbẹ̀ to agblò gbigbọ tọn mẹ hẹ Otọ́ olọn mẹ tọn etọn sọn bẹjẹeji nudida tọn. Na nugbo tọn Biblu ylọ ẹ dọ “omẹ tintan to nudida Jiwheyẹwhe tọn lẹ mẹ.” (Osọhia 3:14) Sọn olọn mẹ, Jesu mọ atẹṣiṣi angẹli ylankan de tọn he klọ gbẹtọvi tintan lẹ nado jẹagọdo gandudu Jiwheyẹwhe tọn. Ehe na Jesu whẹwhinwhẹ́n titengbe hugan lọ na jijlo nado yin jiji taidi Visunnu Jiwheyẹwhe tọn heyin gbẹtọ pipé de. Whẹwhinwhẹ́n tẹwẹ?

Yèdọ nado dohia dọ Otọ́ olọn mẹ tọn etọn tindo jlọjẹ lọ nado dugán do wẹkẹ lọ ji. Gbọn yinyin nugbonọ sọn jiji etọn kakajẹ okú etọn whenu to aigba ji dali, Jesu dohia dọ emi tindo ojlo nado litaina aliho he mẹ Jehovah nọ dugán do nudida Etọn lẹ ji te. Whẹpo e do yin hùhù gbọn kẹntọ Jiwheyẹwhe tọn lẹ dali, Jesu dọ whẹwhinwhẹ́n he wutu e jlo nado ze ogbẹ̀ etọn jo taidi avọ́sinsan de. E dọ dọ na aihọn nido yọnẹn dọ e yiwanna Otọ́ wutu wẹ. (Johanu 14:31) Eyin gbẹtọvi awe tintan lẹ, Adam po Evi po, ko wleawuna owanyi mọnkọtọn wẹ, yé sọgan ko gbọṣi nugbonọ-yinyin mẹ to whlepọn yetọn he tlẹ bọawu hugan glọ.—Gẹnẹsisi 2:15-17.

Nugbonọ-yinyin Jesu tọn sọ do angẹli ylankan lọ, Satani hia di lalonọ. Satani ko hẹn Jiwheyẹwhe po gbẹtọ po gble gbọn didọ to angẹli lẹ nukọn to olọn mẹ dọ: “Ehe gbẹtọ tindo lẹpo wẹ e na jo na ogbẹ̀ etọn” dali. (Job 2:1, 4) Satani gbọn nuṣiwa dali sọalọakọ́n dọ gbẹtọvi lẹpo na vẹtolina Jiwheyẹwhe eyin ogbẹ̀ yetọn tin to owù mẹ.

Whẹho ehelẹ diọavunnukunsọ dodowiwa po jlọjẹ gandudu Jiwheyẹwhe tọn po. Nado didẹ yé, Jesu jlo nado yin jiji taidi gbẹtọ bo do nugbonọ-yinyin etọn hia kakajẹ okú.

Enẹwutu, whẹwhinwhẹ́n tangan he wutu Jesu yin jiji to aigba ji, dile ewọ lọsu dọ do, wẹ na e “nido dekunnu hlan nugbo lọ.” (Johanu 18:37) E wà enẹ gbọn didohia to hogbe po nuyiwa po mẹ dali dọ gandudu Jiwheyẹwhe tọn yin dodo mlẹnmlẹn podọ taliliaina ẹn nọ hẹn ayajẹ dẹn-to-aimẹ wá. Jesu sọ basi zẹẹmẹ dọ emi wá aihọn mẹ nado ze ogbẹ̀ gbẹtọvi tọn emitọn jo taidi “ofligọ na mẹsusu,” bo hùn aliho dote na gbẹtọvi ylandonọ lẹ nado jẹ pipé kọ̀n bo mọ ogbẹ̀ madopodo yí. (Malku 10:45) Gbẹtọvi lẹ tindo nuhudo kandai jiji Jesu tọn tọn nado sọgan mọnukunnujẹ whẹho titengbe ehelẹ mẹ. Humọ, nujijọ he lẹdo jiji Jesu tọn lẹ bẹ nuplọnmẹ titengbe devo lẹ hẹn, dile hosọ he bọdego na dohia do.

[Yẹdide to weda 4]

Nawẹ ovivi Adam tọn lẹ sọgan yin whinwhlẹn sọn ylando mẹ gbọn?