Nuplọnmẹ lẹ Sọn Kandai Jiji Jesu Tọn Mẹ
NUHE jọ to whenuena Jesu yin jiji lẹ nọ fọnjlodotena gbẹtọ livi susu. Ehe nọ yin mimọ to nujijọ po wadohia susugege jiji Jesu tọn he nọ yin vivọbasi lẹdo aihọn pé to ojlẹ Noẹli tọn whenu lẹ po mẹ. Dile yé tlẹ dọnmẹdogo sọ, nuhe jọ to whenuena Jesu yin jiji lẹ mayin kinkàndai to Biblu mẹ nado hẹn gbẹtọ lẹ deayidai gba. Kakatimọ, yé yin apadewhe Owe-wiwe lẹpo tọn he Jiwheyẹwhe gbọdo na mẹpinplọn podọ na anademẹ.—2 Timoti 3:16.
Eyin Jiwheyẹwhe ko jlo dọ Klistiani lẹ ni nọ basi hùnwhẹ jijizan Jesu tọn tọn wẹ, Biblu na ko dọ azán lọ pẹpẹ na mí. Be e wàmọ ya? To nùdidego dọ Jesu yin jiji to ojlẹ de mẹ he lẹngbọhọtọ lẹ tin to gbonu to zánmẹ bo to lẹngbọ yetọn lẹ họ́ godo, Biblu yọnẹntọ owhe kanweko 19tọ tọn Albert Barnes wá tadona kọ̀n dọmọ: “Ehe hẹn ẹn họnwun dọ Whlẹngantọ mítọn yin jiji jẹnukọnna 25 décembre . . . Gbẹ̀mẹ nọ fá to ojlẹ enẹ mẹ, titengbe to lẹdo yiaga podọ osónọ he sẹpọ Bẹtlẹhẹm lẹ mẹ. Jiwheyẹwhe ma dọ jijizan [Jesu tọn] gba. . . . Podọ e ma tlẹ yin nujọnu nado yọ́n azán lọ; eyin e ko yin nujọnu wẹ, Jiwheyẹwhe na ko basi kandai etọn.”
To vogbingbọn mẹ, Wẹndagbe kàntọ ẹnẹ lẹ dọ azán he ji Jesu kú te na mí hezeheze. E jọ to azán Juwayi tọn gbè, ehe nọ yin dùdù to azán 14tọ osun Nisan Ju lẹ tọn, to amakikọ-whenu. Humọ, Jesu degbena hodotọ etọn lẹ tlọlọ nado nọ basi hùnwhẹ azán enẹ tọn to oflin etọn mẹ. (Luku 22:19) Gbedide lọ nado nọ basi hùnwhẹ jijizan Jesu tọn, kavi mẹdevo depope tọn ma tin to Biblu mẹ gba. E blawu dọ, nudindọn lẹ do jijizan Jesu tọn ji sọgan hẹn nujijọ ayidego hugan tọn he wá aimẹ to nudi ojlẹ enẹ mẹ lẹ dózin.
Jiwheyẹwhe De Mẹjitọ Etọn lẹ
To whẹndo fọtọ́n susu he tin to Islaeli lẹ mẹ, mẹjitọ nankọtọn lẹ wẹ Jiwheyẹwhe de nado pọ́n Ovi etọn go whẹ́n? Be E pọ́n onú lẹ taidi yindidi po adọkun po hlan nado yin nujọnu wẹ ya? Lala. Kakatimọ, Jehovah doayi jẹhẹnu gbigbọmẹ tọn mẹjitọ lọ lẹ tọn go. Gbadopọnna ohàn pipà tọn he Malia ji, heyin kinkàndai to Luku 1:46-55 mẹ, ehe e ji to whenuena e yin didọna dọ e na tindo lẹblanulọkẹyi lọ nado lẹzun onọ̀ Mẹssia tọn godo. To apadewhe, e dọmọ: “Ayiha ṣie jlayinna Oklunọ . . . na e ko hùn nukun pọ́n [ninọmẹ he yìdo] afanumẹ yọnnu etọn tọn.” E gbọn whiwhẹ dali pọ́n ede hlan taidi mẹhe to ‘ninọmẹ he yìdo’ mẹ, yèdọ afanumẹ yọnnu Jehovah tọn. Dehe yin titengbe hugan, hogbe whanpẹnọ pipà tọn he tin to ohàn Malia tọn mẹ lẹ dohia dọ ewọ yin gbẹtọ gbigbọnọ de he yọ́n Owe-wiwe ganji. Dile e tlẹ yin kúnkan ylandonọ Adam tọn do, ewọ wẹ pegan hugan nado yin dide taidi onọ̀ Ovi Jiwheyẹwhe tọn tọn to aigba ji.
Etẹwẹ dogbọn asu Malia tọn, he lẹzun otọ́ mẹgopọntọ Jesu tọn dali? Josẹfu yin dawe de he yọ́n azọ́n whlẹpipa tọn ganji. Na ojlo tintindo etọn nado yí alọ etọn lẹ do wazọ́n sinsinyẹn wutu, e penugo nado penukundo whẹndo de go he wá bẹ visunnu atọ́n podọ e whè gbau viyọnnu awe hẹn. (Matiu 13:55, 56) Josẹfu mayin adọkunnọ gba. To whenuena ojlẹ sọ na Malia nado do visunnu plọnji etọn hia to tẹmpli Jiwheyẹwhe tọn mẹ, e na ko vẹ́ na Josẹfu dọ ewọ ma sọgan mọ lẹngbọvu he e na yí do sanvọ́ lọ. Kakatimọ, yé dona yí dotẹnmẹ heyin jijodona wamọnọ lẹ zan. Osẹ́n Jiwheyẹwhe tọn dọ gando onọ̀ he ṣẹṣẹ ji visunnu de go dọmọ: “Eyin huhlọn etọn ma pé na lẹngbọvu dopo gba, whenẹnu ewọ na yí owhlé awe, kavi awhannẹvu awe; dopo lọ na avọ́nunina mimẹ̀ de, podọ awetọ lọ na avọ́nunina ylando de tọn: yẹwhenọ lọ bo na basi ovẹsè na ẹn, ewọ bo nasọ yin wiwe.”—Levitiku 12:8; Luku 2:22-24.
Biblu dọ dọ Josẹfu yin “dodonọ.” (Matiu 1:19) Di apajlẹ, e ma zán hẹ asi etọn he tin to alọji kakajẹ whenue Jesu yin jiji godo. Ehe glọnalina nukunnumamọjẹnumẹ depope tintindo na nuhe dù mẹhe yin Otọ́ jọnun Jesu tọn. Na alọwlemẹ yọyọ lẹ nado dapana kọndopọ zanhẹmẹ tọn dile yé to abò dopolọ mẹ nọ̀ ma na ko bọawu gba, ṣigba e dohia dọ yé omẹ awe lẹ yọ́n pinpẹn lẹblanulọkẹyi he yé tindo nado pọ́n Ovi Jiwheyẹwhe tọn go whẹ́n tọn.—Matiu 1:24, 25.
Taidi Malia, Josẹfu yin gbẹtọ gbigbọnọ de. E nọ jo azọ́n etọn do to owhe lẹpo mẹ bo nọ basi gbejizọnlin azán atọ̀n tọn sọn Nazalẹti yì Jelusalẹm hẹ whẹndo etọn nado yì hùnwhẹ whemẹwhemẹ Juwayi tọn tẹnmẹ. (Luku 2:41) Humọ, Josẹfu na ko plọn Jesu nado nọ tindo mahẹ to sinsẹ̀n-bibasi sẹmẹsẹmẹ tọn mẹ to sinagọgu lẹdo lọ tọn mẹ, to fie Ohó Jiwheyẹwhe tọn nọ yin hihia bo nọ yin zẹẹmẹ basina te. (Luku 2:51; 4:16) Enẹwutu, ayihaawe depope matin dọ Jiwheyẹwhe de onọ̀ aigba ji tọn po otọ́ mẹgopọntọ tọn he sọgbe lọ po na Visunnu etọn.
Dona Daho de na Lẹngbọhọtọ Tata Lẹ
Mahopọnna dọ e sinyẹnawuna asi etọn, he ohò etọn ko whẹ́n pete todin, Josẹfu zìn gbejizọnlin yì tòdaho tọgbo etọn lẹ tọn mẹ nado ze yinkọ dai, sọgbe hẹ gbedide Sesali tọn. To whenuena yé jẹ Bẹtlẹhẹm, yé ma sọgan mọ adọtẹn to tòdaho he ko gọfla lọ mẹ. Gbọnmọ dali ninọmẹ onú lẹ tọn hẹn yé po huhlọn po nado nọ̀ kanlinpa de mẹ, fie Jesu yin jiji te bosọ yin titẹ́ do nudùtẹn kanlin lẹ tọn mẹ. Nado hẹn yise yetọn lodo, Jehovah hẹn mẹjitọ wamọnọ lọ lẹ tindo nujikudo dọ nujijọ vijiji tọn ehe yin ojlo Jiwheyẹwhe tọn nugbonugbo. Be e do mẹho nukundeji lẹ hlan sọn Bẹtlẹhẹm nado hẹn nujikudo yetọn lodo wẹ ya? Lala. Kakatimọ, Jehovah Jiwheyẹwhe de whẹho lọ hia hlan lẹngbọhọtọ azọ́n sinsinyẹnwatọ lẹ he yí ozán lọ zan to gbonu bo to kanlinpa yetọn lẹ họ́.
Angẹli Jiwheyẹwhe tọn sọawuhia yé bo dọna yé nado yì Bẹtlẹhẹm, fie yé na mọ Mẹssia he ṣẹṣẹ yin jiji lọ te ‘to nudùtẹn kanlin lẹ tọn de mẹ.’ Be e paṣa lẹngbọhọtọ ehelẹ nado se dọ Mẹssia he ṣẹṣẹ yin jiji lọ tin to kanlinpa de mẹ wẹ? Paali! To afọdopolọji, yé jo kanlin yetọn lẹ do bo pànta Bẹtlẹhẹm. Whenuena yé mọ Jesu, yé dọ nuhe angẹli Jiwheyẹwhe tọn ko dọna yé lẹ na Josẹfu po Malia po. Matin ayihaawe, ehe hẹn yise asu po asi po lọ tọn lodo dọ onú lẹ to jijọ sọgbe hẹ lẹndai Jiwheyẹwhe tọn. “Lẹngbọhọtọ lẹ sọ lẹgọ, bo to gigopana Jiwheyẹwhe, bosọ to pipà ẹ na nuhe yé ko se bosọ mọ lẹ.” (Luku 2:8-20) Mọwẹ, to whẹho lẹ didehia hlan lẹngbọhọtọ budisi Jiwheyẹwhe tọ́ lẹ mẹ, Jehovah ko basi nudide dagbe hugan lọ.
Sọn nujijọ ehelẹ mẹ, mí mọ gbẹtọ he nkọ mí dona yin nado duvivi nukundagbe Jehovah tọn tọn. Mí ma dona nọ dín yindidi kavi adọkun. Kakatimọ, taidi Josẹfu, Malia, po lẹngbọhọtọ lọ lẹ po, mí dona nọ setonuna Jiwheyẹwhe bo do owanyi he mí tindo na ẹn hia gbọn gbigbọmẹnu lẹ zizedo nukọnna agbasanu lẹ dali. Na nugbo tọn, nuplọnmẹ dagbe lẹ tin he mí sọgan plọn gbọn ayihamẹlinlẹnpọn do kandai nujijọ he wá aimẹ to whenuena Jesu yin jiji te lẹ ji dali.
[Yẹdide to weda 7]
Etẹwẹ awhànnẹ awe he Malia yí do sanvọ́ dohia?
[Yẹdide to weda 7]
Jiwheyẹwhe de nado do jiji Jesu tọn hia lẹngbọhọtọ tata lẹ