Kanbiọ lẹ sọn Wehiatọ lẹ Dè

Eyin Klistiani de nọ se ogbè lẹ ṣigba bo ma mọ mẹde, be enẹ zẹẹmẹdo dọ aovi wẹ lẹ to tukla do e ya?

Lala. Dile linlin lẹ tlẹ ko dohia dọ aovi lẹ nọ do yede hia to aliho enẹ mẹ, susu mẹhe nọ se ogbè lẹ kavi tindo numimọ ninọmẹ dabla, tukladomẹ tọn lẹ tọn ko wá yọnẹn to dodinnanu godo dọ nuhahun agbasalilo tọn wẹ yé tindo.

Etlẹ yin to owhe kanweko tintan mẹ, e yin yinyọnẹn hezeheze dọ tukladomẹ aovi tọn po nuhahun agbasalilo tọn lẹ po nọ hẹn ninọmẹ dopolọ lẹ wá. To Matiu 17:14-18, mí hia gando dẹpẹ de he Jesu hẹnazọ̀ngbọna go. Aovi de wẹ to yasana dẹpẹ lọ dile etlẹ yindọ ohia adingbe sinsinyẹn tọn lẹ wẹ e dohia. Ṣigba, to ojlẹ he jẹnukọn de mẹ to whenuena gbẹtọgun he to yaji lẹ yin hinhẹnwa Jesu dè na azọ̀nhẹngbọ, ‘mẹdelẹ he aovi to yasana po adingbenọ lẹ po’ tin to yé mẹ. (Matiu 4:24) E họnwun dọ, e mayin adingbenọ lẹpo wẹ nọ yin yasana gbọn aovi dali gba. Nuhahun agbasalilo tọn wẹ yé tindo.

Linlin lẹ dohia dọ alẹ̀nọ delẹ, yèdọ manọna de he amasin dotowhé tọn nọ pọ́n gbọ̀, nọ se ogbè kavi tindo numimọ ohia he dabla lẹ tọn to whedelẹnu.a Ninọmẹ agbasalilo tọn devo lẹ sọ sọgan hẹn bẹwlu apọ̀nmẹ tọn wá he mẹdelẹ sọgan gbọn nuṣiwa dali lẹndọ nuwiwa aovi lẹ tọn wẹ. Enẹwutu, dile etlẹ yindọ mẹhe na linlin dọ emi nọ se ogbè kavi he nọ tindo numọtolanmẹ tukladomẹ tọn devo lẹ sọgan ze ayiha etọn do tukladomẹ aovi lẹ tọn ji, e dona yin tulina nado dindona vlavo eyin nuhahun agbasalilo tọn wẹ e tindo.

[Nudọnamẹ Odò Tọn]