Kanbiọ lẹ sọn Wehiatọ lẹ Dè

To Heblu lẹ 2:14 [NW], naegbọn Satani yin yiylọdọ “mẹhe sọgan hẹn okú wá”?

Do glido, nuhe dọ Paulu te wẹ yindọ Satani, na ede kavi gbọn nuyizan etọn lẹ dali, sọgan hẹn okú gbẹtọvi lẹ tọn wá. To kọndopọmẹ hẹ enẹ, Jesu ylọ Satani dọ “hlọnhutọ de . . . sọn whẹwhẹwhenu.”—Johanu 8:44.

Nukunnumọjẹnumẹ agọ̀ sọgan tin do Heblu lẹ 2:14 ji na aliho he mẹ lẹdogbedevomẹ basitọ delẹ lilẹ́ ẹ do wutu, to didọ dọ Satani tindo “huhlọn okú tọn” kavi “huhlọn do okú ji.” (Biblu Wiwe Lọ; La Bible de Jérusalem; New International Version) Zẹẹmẹ mọnkọtọn sọgan dohia dọ Satani tindo nugopipe mlẹnmlẹn nado hù mẹdepope he jlo e. Ṣigba, whẹho lọ mayin mọ paali. Eyin whẹho lọ yinmọ wẹ, vlavo e na ko sukúndona Jehovah sẹ̀ntọ he tin to aigba ji lẹpo sọn whenu dindẹn die wayi.—Gẹnẹsisi 3:15.

Hogbe Glẹki tọn heyin lilẹdo “huhlọn do okú ji” to lẹdogbedevomẹ delẹ mẹ podọ “mẹhe sọgan hẹn okú wá” to Traduction du monde nouveau mẹ wẹ “kraʹtos tou tha·naʹtou.” Tou tha·naʹtou yin wunmẹ hogbe lọ tọn de he zẹẹmẹdo “okú.” Na taun tọn Kraʹtos zẹẹmẹdo “huhlọn, hlọnhlọn.” Sọgbe hẹ Theological Dictionary of the New Testament, e do “awusọhia po nujọnu-yinyin huhlọn kavi hlọnhlọn po tọn hia e mayin yizan etọn gba.” Enẹwutu, to Heblu lẹ 2:14 mẹ, Paulu ma to didọ dọ Satani tindo huhlọn mlẹnmlẹn do okú ji gba. Kakatimọ, e to alọdlẹndo nugopipe kavi yọnbasi Satani tọn nado hẹn okú wá.

Nawẹ Satani nọ “hẹn okú wá” gbọn? To owe Job tọn mẹ, mí hia nujijọ de he sọgan gbọnvo to aliho de mẹ. Kandai lọ dọ dọ Satani yí jẹhọn daho de zan nado ‘hẹn okú wá’ na ovi Job tọn lẹ. Ṣigba, doayi e go dọ Satani sọgan wà ehe kiki to gbeyiyi Jiwheyẹwhe tọn glọ, ehe yin nina na whẹho titengbe de to yinyin dide basina wutu. (Job 1:12, 18, 19) Na nugbo tọn, Satani ma penugo nado hù Job lọsu. Ogbè enẹ tọn mayin nina ẹn gba. (Job 2:6) Ehe dohia dọ dile etlẹ yindọ Satani ko penugo to ojlẹ delẹ mẹ nado hẹn okú wá na gbẹtọvi nugbonọ lẹ, mí ma dona dibu dọ e sọgan hù mí to whedepopenu he e jlo gba.

Satani ko sọ hẹn okú wá gbọn nuyizan gbẹtọvi tọn lẹ yiyizan dali. Gbọnmọ dali, Klistiani susu ko kú na yise yetọn, delẹ yin hùhù gbọn gbẹtọgun adìnọ lẹ dali kavi yin hùhù do okà ji to gbedide ahọluzọnwatọ kavi whẹdatọ he gblezọn lẹ tọn glọ.—Osọhia 2:13.

Humọ, Satani ko hẹn okú wá to whedelẹnu gbọn madogán gbẹtọvi tọn lẹ yiyizan dali. Yigodo jẹ azán Islaeli tọn lẹ gbè, yẹwhegán Balaami na ayinamẹ Moabinu lẹ nado klọ Islaelivi lẹ “nado wà sẹ́nmẹjẹnú do OKLUNỌ lọ go.” (Osọha lẹ 31:16) Enẹ dekọtọn do okú Islaelivi he hugan 23 000 lẹ tọn mẹ. (Osọha lẹ 25:9; 1 Kọlintinu lẹ 10:8) Mọdopolọ to egbehe, mẹdelẹ ko joawuna “bublu” Satani tọn lẹ bo ko yin kiklọ biọ fẹnnuwiwa zanhẹmẹ tọn kavi nuyiwa ylankan devo lẹ mẹ. (Efesunu lẹ 6:11) Nugbo wẹ dọ omẹ ehelẹ ma nọ hẹn ogbẹ̀ yetọn lẹ bu to afọdopolọji. Ṣigba owù lọ tin to finẹ dọ yé sọgan hẹn ogbẹ̀ madopodo bu, podọ to aliho enẹ mẹ, Satani hẹn okú yetọn wá.

Eyin mí tlẹ yọnẹn dọ Satani penugo nado gbleawuna mí, mí ma dona dibuna ẹn zẹjlẹgo gba. To whenuena Paulu dọ dọ Satani sọgan hẹn okú wá, e sọ dọ dọ Klisti kú na e “nido hù [Satani] sudo . . . bo whlẹn yé he gbọn osi okú tọn mẹ tin to gbẹwhenu yetọn lẹpo mẹ jẹ mẹglọnọ mẹ.” (Heblu lẹ 2:14, 15) Mọwẹ, Jesu sú ofligọ lọ bo gbọnmọ dali hẹn gbẹtọvi yisenọ lẹ jẹ mẹdekannu sọn kanlinmọgbenu ylando po okú po tọn si.—2 Timoti 1:10.

Na nugbo tọn, nujọnu wẹ e yin nado lẹnnupọn dọ Satani sọgan hẹn okú wá, ṣigba mí deji dọ Jehovah sọgan jla hẹngble depope he Satani po nuyizan etọn lẹ po hẹnwa do. Jehovah hẹn mí deji dọ Jesu heyin finfọnsọnku lọ na “gbà azọ́n Lẹgba tọn sudo.” (1 Johanu 3:8) To huhlọn Jehovah tọn mẹ, Jesu na fọ́n oṣiọ lẹ sọnku bo na gbọnmọ dali gbawhàn okú lọsu tọn. (Johanu 5:28, 29) To nukọnmẹ, Jesu na de dogbó huhlọn Satani tọn lẹ hia hezeheze gbọn zize e do odò mapote mẹ dali. Satani na yin vivasudo mlẹnmlẹn to godo mẹ.—Osọhia 20:1-10.