Be Mí Sọgan Dejido Mẹdepope Go Ya?

TO AIJIJẸ Adó Berlin tọn to 1989 godo, aṣli vivẹ́ susu wẹ yin dide jẹ gbangba. Di dohia, Lydiaa wá yọnẹn dọ to gandudu Socialiste tọn whenu to Whèzẹtẹn Allemagne tọn, Stasi lẹ, kavi ponọ he nọ họ́ otò lẹ, ko wleawuna kandai de gando nuwiwa etọn lẹ go. Dile etlẹ yindọ e paṣa Lydia nado sè dogbọn kandai enẹ dali, nuhe gbàhundona ẹn hugan wẹ nado sè dọ asu etọn lọsu titi wẹ na nudọnamẹ lọ lẹ hlan Stasi lẹ. Mẹhe go e dona ko dejido mlẹnmlẹn wẹ sọ dè aṣli etọn gbà.

Robert yin dawe yọnhonọ he ma yiwanna tukla de. E dejido doto etọn go bo nọ na ẹn “sisi daho po yẹyi po” wẹ linlinwe The Times Londres tọn dọ. E yin didọ dọ doto lọ tindo “jijọ homẹdagbe po awuvẹmẹ tọn po.” Ṣigba Robert kú to ajiji mẹ. Be ahun-zọ̀n kavi nujẹmẹji wẹ hù i ya? Lala. Aṣẹpatọ lẹ wá tadona kọ̀n dọ doto lọ dla Robert pọ́n to owhé etọn gbè, podọ to mayọnẹn mẹ na Robert po whẹndo etọn po, doto lọ dó oyẹ́n he nọ hùmẹ na ẹn. E họnwun dọ mẹhe go Robert dejido mlẹnmlẹn de wẹ hù i.

Lydia po Robert po jiya mẹhẹnjẹflumẹ sinsinyẹn tọn, ehe dekọtọn do nugbajẹmẹji mẹ na yé. To ninọmẹ devo lẹ mẹ, kọdetọn lọ lẹ ma nọ sinyẹn sọmọ gba. Etomọṣo, yinyin hinhẹn jẹflumẹ gbọn mẹhe go mí dejido de dali ma yin onú yọyọ de gba. Linlin de he yin zinzinjẹgbonu gbọn pipli dodinnanu tọn daho Allemagne tọn Allensbacher Jahrbuch der Demoskopie 1998-2002 dali, dohia to dodinnanu dopo mẹ dọ nudi 86 to kanweko ji mẹhe yin hokanse lẹ tọn wẹ ko yin hinhẹn jẹflumẹ pọ́n gbọn mẹhe go yé dejido taun de dali. Vlavo e ko jọ do hiẹ lọsu go pọ́n. Enẹwutu, e ma dona paṣa mí dọ linlinwe Suisse tọn Neue Zürcher Zeitung na linlin to 2002 dọ “to yovotò Whèyihọ-waji tọn he tindo azọ́nwhé susu lẹ mẹ, haṣinṣan jidedo ode awetọ go tọn ko to doyi sọn owhe susu die.”

E Nọ Yin Awuwlena Vudevude, bo Nọ Yin Hinhẹngble po Awuyiya Po

Etẹwẹ jidedomẹgo yin? Wezẹhomẹ dopo dọ dọ, nado dejido mẹdevo lẹ go zẹẹmẹdo nado yise dọ yé yin nugbodọtọ po ahundoponọ po podọ yé ma sọgan wà nudepope sọn ojlo mẹ he na hẹnawugblena we. Jidedomẹgo nọ yin awuwlena vudevude ṣigba e sọgan yin hinhẹngble to nukunwhiwhe dopo mẹ. To whenuena e yindọ mẹsusu ko mọdọ jidedomẹgo yetọn ko yin ṣiṣizan, be nupaṣamẹ de wẹ e yin dọ gbẹtọ lẹ nọ whleawu nado dejido mẹdevo lẹ go ya? Dile dodinnanu de heyin zinzinjẹgbonu to Allemagne to 2002 dọ do, “jọja he tindo jidide nujọnu tọn to mẹdevo lẹ mẹ ma pé 1 to 3 ji gba.”

Mí sọgan kanse míde dọ: ‘Be mí sọgan dejido mẹdepope go nugbonugbo ya? Be nuyọnẹnnu wẹ e yin nado dejido mẹde go to whenuena e yindọ mí sọgan yin hinhẹn jẹflumẹ ya?’

[Nudọnamẹ Odò Tọn]

[Nudọnamẹ tangan lẹ to weda 3]

Dodinnanu dopo dohia dọ nudi 86 to kanweko ji mẹhe yin hokanse lẹ tọn wẹ ko yin hinhẹn jẹflumẹ pọ́n gbọn mẹhe go yé dejido taun de dali