Be Kadaninọ Nọ Glọnalina Owanyi Klistiani Tọn Wẹ Ya?

NADO yin Klistiani de bẹ onú susu hẹn hú Biblu hihia, dẹ̀hiho, po ohàn pipà tọn lẹ jiji to dimanche po poun. E bẹ onú delẹ wiwà na Jiwheyẹwhe podọ na gbẹtọ lẹ hẹn. Biblu dọmọ: “Mì dike mí yí onù tata do basi owanyi blo, kavi po odẹ́ po blo; adavo to wiwà po nugbo po mẹ.” (1 Johanu 3:18) Onú mẹdevo lẹ tọn nọ duahunmẹna Jesu taun, podọ Klistiani lẹ dona hodo apajlẹ etọn. Apọsteli Paulu dotuhomẹna yisenọ hatọ lẹ nado “nọ to susudeji to azọ́n Oklunọ tọn mẹ” to whepoponu. (1 Kọlintinu lẹ 15:58) Ṣigba etẹwẹ yin azọ́n Oklunọ tọn lọ? Be e bẹ tintẹnpọn nado diọ aliho nuyiwa gandudu tọn na dagbe wamọnọ kavi mẹhe yin kọgbidina lẹ tọn hẹn wẹ ya? Be nuhe Jesu wà niyẹn ya?

Dile etlẹ yindọ Jesu yin vivẹ nado dádo whẹho tonudidọ tọn lẹ mẹ kavi nado nọgodona yé, e gbẹ́ gbidigbidi nado wàmọ. E gbẹ́ nuzedonukọnnamẹ Satani tọn nado dugán do ahọluduta aihọn tọn lẹpo ji dai, e ma dike bo yin dindọ̀n biọ nudindọn de mẹ gando takuẹ lẹ súsú go gba, podọ e họ̀n to whenuena pipli de jlo na yí ì do doahọlu. (Matiu 4:8-10; 22:17-21; Johanu 6:15) Ṣigba kadaninọ etọn ma glọnalina ẹn nado wazọ́n na dagbe mẹdevo lẹ tọn gba.

Jesu ze ayidonugo do nuhe na hẹn dagbe tẹgbẹ tọn wá na mẹdevo lẹ ji. Kọgbọ ojlẹ gli tọn de wẹ núdùdù he e na gbẹtọ fọtọ́n donu atọ́n lẹ po azọ̀n he e hẹngbọ na gbẹtọ lẹ po hẹnwa na omẹ vude, ṣigba nuplọnmẹ etọn hẹn dona mavọmavọ lẹ yọnbasi na gbẹtọvi lẹpo. Jesu wá yin yinyọnẹn, e mayin di mẹhe nọ hẹn kọgbọ agbasa tọn wá gba, ṣigba taidi “Mẹplọntọ.” (Matiu 26:18; Malku 5:35; Johanu 11:28) E dọmọ: “Hlan opodo he wẹ yè ko do ji mi, podọ hlan opodo he wẹ yẹn do wá aihọn mẹ, na yẹn nido dekunnu hlan nugbo lọ.”—Johanu 18:37.

Godoninọna Nuhe Pọnte Hugan Tonudidọ

Nugbo he Jesu plọnmẹ ma yin oyọnẹn tonudidọ tọn. Kakatimọ, nugbo Ahọluduta he ewọ lọsu na yin Ahọlu etọn tọn wẹ. (Luku 4:43) Ahọluduta ehe yin gandudu olọn mẹ tọn de, podọ e na yitẹn to gandudu gbẹtọ tọn lẹpo si bo nasọ hẹn jijọho tẹgbẹ tọn wá na gbẹtọvi lẹ. (Isaia 9:6, 7; 11:9; Daniẹli 2:44) Enẹwutu, ehe wẹ yin todido nugbo dopo akàn gbẹtọvi tọn. Be e ma yin dohia owanyi tọn wẹ e yin nado lá todido dejidego sọgodo tọn enẹ hú nado na tuli gbẹtọ lẹ nado dejido gbẹtọ lẹ go na sọgodo dagbe de ya? Biblu dọmọ: “Mì dotudo ahọvi lẹ go blo, kavi do ovi gbẹtọ tọn go, mẹhe mẹ whlẹngán depope ma tin te. Gbọfufu etọn tọ́n yì, ewọ sọ gọ̀ do okọ́ etọn dè; to azán nẹ gbè gee linlẹn etọn lẹ sudo. Donanọ wẹ ewọ he tindo Jiwheyẹwhe Jakobu tọn na alọgọ etọn, [todido] mẹhe tọn tin to OKLUNỌ Jiwheyẹwhe etọn mẹ.” (Psalm 146:3-5) Enẹwutu kakati nado do devi etọn lẹ hlan nado lá lehe gandudu lẹ na yin titobasina to aliho dagbe hugan mẹ do, Jesu plọn yé nado dọyẹwheho “wẹndagbe ahọludu tọn.”—Matiu 10:6, 7; 24:14.

Enẹwutu, ehe wẹ yin “azọ́n Oklunọ tọn” he Klistiani yẹwhehodọtọ lẹ yin gbedena nado nọ wà. Na e yin bibiọ to mẹhe na nọ̀ Ahọluduta Jiwheyẹwhe tọn glọ lẹ si nado yiwanna ode awetọ wutu, Ahọluduta lọ na de ohẹ́n sẹ po kọdetọn dagbe po gbọn nutindo gbẹtọvi tọn lẹ mimá to aliho dodo tọn mẹ dali. (Psalm 72:8, 12, 13) Wẹndagbe de wẹ ehe yin podọ e jẹ dọ ni yin lilá.

To egbehe, Kunnudetọ Jehovah tọn lẹ yin titobasina na “azọ́n Oklunọ tọn” ehe to aigba 235 lẹ ji. To gbesisọmẹ hẹ gbedide Jesu tọn, yé nọ na sisi gandudu lẹpo. (Matiu 22:21) Ṣigba yé sọ nọ setonuna nuhe e dọna hodotọ etọn lẹ dọmọ: “Mì ma yin aihọn tọn . . . , ṣigba yẹn ko de mì sọn aihọn mẹ.”—Johanu 15:19.

Mẹdelẹ he nọ nọgodona tonudidọ dai lẹ ko diọ to Biblu pinplọn po sọwhiwhe po godo. Tonudọtọ Italie tọn de he yin hagbẹ Ogbẹ́ Katoliki tọn de, yèdọ ogbẹ́ he sinsẹ̀n nọ deanana de, dọmọ: “Yẹn biọ tonudidọ mẹ, na yẹn lẹndọ gbẹtọ dona tindo mahẹ zohunhun tọn to tonudidọ po nuwiwa nukọnyiyi otò tọn po mẹ wutu.” To ede didesẹ taidi ogán tòdaho lọ tọn nado sọgan dọyẹwheho Ahọluduta Jiwheyẹwhe tọn taidi dopo to Kunnudetọ Jehovah tọn lẹ mẹ godo, e basi zẹẹmẹ nuhewutu vivẹnudido mẹhe tlẹ yin ahunjijlọnọ to tonudidọ mẹ lẹ tọn nọ gboawupo tọn. “Aihọn lọ tin to ninọmẹ ehe mẹ, e ma yindọ na mẹdagbe lẹ ma ko tẹnpọn nado jlá ninọmẹ onú lẹ tọn do wutu wẹ gba, ṣigba kakatimọ, na vivẹnudido ahunjijlọnọ vude lọ lẹ tọn nọ yin hinhẹngble gbọn kanyinylan omẹ susu tọn dali wutu.”

Kadaninọ na tonudidọ nado sọgan lá todido nugbo dopo akàn gbẹtọvi lẹ tọn ma nọ glọnalina Klistiani nugbo lẹ nado gọalọna mẹdevo lẹ to aliho he yọn-na-yizan lẹ mẹ gba. Mẹhe yé gọalọna nado lẹzun mẹjidugando Ahọluduta Jiwheyẹwhe tọn lẹ nọ plọn nado diọ walọ ylankan yetọn lẹ, nado na sisi aṣẹpipa lẹ, nado hẹn gbẹzan whẹndo yetọn tọn pọnte, podọ nado tindo pọndohlan jlẹkaji tọn gando agbasanu lẹ go. Dehe tlẹ sọ yin nujọnu hugan wẹ yindọ, Kunnudetọ Jehovah tọn lẹ nọ gọalọna gbẹtọ lẹ nado duvivi haṣinṣan pẹkipẹki de tọn hẹ Jiwheyẹwhe.

Mẹhe nọ dọyẹwheho Ahọluduta Jiwheyẹwhe tọn tọn lẹ nọ hẹn ale wá na lẹdo he mẹ yé nọ nọ̀. Ṣigba humọ, yé nọ deanana gbẹtọ lẹ nado ze jidide yetọn do gandudu nujọnu tọn de mẹ he na hẹn jijọho tẹgbẹ tọn wá na mẹhe yiwanna Jiwheyẹwhe lẹpo. Enẹwutu, na kadaninọ Klistiani ehelẹ tọn wutu, yé nọ voawu nado namẹ alọgọ he nọ dẹn-to-aimẹ bo yọn-na-yizan hugan to egbehe.

[Apotin/Yẹdide to weda 7]

E Jo Tonudidọ Do Nado Lá Ahọluduta Jiwheyẹwhe Tọn

Taidi dẹpẹvu de, Átila plọn sinsẹ̀n-nuplọnmẹ mẹdekannujẹ tọn sọn yẹwhenọ kándo yetọn tọn lẹ dè to Belém, Brésil. E nọ vivi na ẹn nado sè dọ gbẹtọ lẹ na wá yin hinhẹn jẹ mẹdekannu sọn kọgbidinamẹ glọ bọ e kọnawudopọ hẹ ogbẹ́ gufinfọn tọn de, fie e plọn nado nọ basi tito na gufinfọn lẹ po amàhiho lẹ po te.

Ṣigba Átila sọ yiwanna nupinplọn ovi he tin to ogbẹ́ lọ mẹ lẹ, gbọn owe he yin nina ẹn lọ yiyizan dali, enẹwẹ Didotóayi Hlan Mẹplọntọ Daho Lọ.a Owe lọ dọhodo walọdagbe po tonusisena aṣẹpipa lẹ po ji. Ehe zọ́n bọ e paṣa Átila nuhewutu mẹhe nọ nọgodona sinsẹ̀n-nuplọnmẹ mẹdekannujẹ tọn lẹ ma nọ hodo nujinọtedo yiaga walọdagbe tọn he Jesu plọnmẹ lẹ podọ nuhewutu mẹdelẹ nọ wọn mẹhe yin kọgbidina lẹ to whenuena yé jẹ gandu ji. E tọ́nsọn ogbẹ́ lọ mẹ. To godo mẹ, Kunnudetọ Jehovah tọn lẹ dla ẹ pọ́n bo dọhona ẹn dogbọn Ahọluduta Jiwheyẹwhe tọn dali. To madẹnmẹ, e jẹ Biblu plọn ji bo plọnnu dogbọn pọngbọ nugbo dopo lọ na gbẹtọvi heyin kọgbidina lẹ dali.

To ojlẹ enẹ gblamẹ, Átila yì opli Katoliki tọn de he hosọ etọn yin yise po tonudidọ po. “Ehelẹ yin onú dopolọ he tindo adà awe,” wẹ nuplọnmẹtọ lọ basi zẹẹmẹ dọ. Enẹgodo e sọ yì opli de to Plitẹnhọ Ahọluduta tọn mẹ. Vogbingbọn nankọ die! Na nugbo tọn, mẹdepope ma to azọ̀-nù, to ahànnu, kavi yí hogbe he kudiho lẹ zan. E basi dide nado kọnawudopọ hẹ yé to azọ́n yẹwhehodidọ tọn mẹ, podọ to madẹnmẹ e yin bibaptizi. Todin, e sọgan mọ nuhewutu sinsẹ̀n-nuplọnmẹ mẹdekannujẹ tọn ma yin pọngbọ nujọnu tọn na nuhahun wamọnọ lẹ tọn.

[Nudọnamẹ Odò Tọn]

[Yẹdide to weda 6]

Kadaninọ lizọnyizọnwatọ Klistiani lẹ tọn ma nọ glọnalina yé nado gọalọna mẹdevo lẹ gba