Jehovah Na Hẹn Whẹdida Ṣẹ Do Mẹylankan lẹ Ji
‘Wleawu nado yì pé Jiwheyẹwhe towe.’—AMỌSI 4:12.
1, 2. Naegbọn mí sọgan deji dọ Jiwheyẹwhe na hẹn kanyinylan wá opodo?
BE JEHOVAH na hẹn kanyinylan po yajiji po wá opodo to aigba ehe ji to gbèdopo ya? Kanbiọ enẹ sọgbe taun to bẹjẹeji owhe kanweko 21tọ ehe tọn. E taidi dọ fidepope he mí lẹhlan to aihọn lọ mẹ, mí nọ mọ danú he gbẹtọ lẹ to wiwà do hatọ yetọn lẹ go. Lehe mí to jejeji nado mọ aihọn de he na vò sọn danuwiwa, nukunbianamẹ, po nugbomadọ po si do sọ!
2 Homẹhunnu wẹ e yin dọ mí sọgan tindo jidide mlẹnmlẹn dọ Jehovah na hẹn kanyinylan wá opodo. Jẹhẹnu Jiwheyẹwhe tọn lẹ dohia hezeheze dọ ewọ na yinuwa sọta mẹylankan lẹ. Jehovah yin dodonọ podọ nugbonọ. Ohó etọn dọna mí to Psalm 33:5 mẹ dọ: “E yiwanna nugbo po whẹdida [dodo] po.” Psalm devo dọmọ: “Mẹdepope he yiwanna danuwiwa wẹ alindọn [Jehovah tọn] gbẹwanna.” (Psalm 11:5, NW) Na jide tọn, Jehovah, Jiwheyẹwhe ganhunupotọ he yiwanna dodowiwa po whẹdida dodo po, ma na jo dotẹnmẹ do na nuhe e gbẹwanna kakadoi gba.
3. Etẹwẹ na yin nùzindeji to dogbigbapọnna dọdai Amọsi tọn yinukọn dogọ mẹ?
3 Whẹwhinwhẹ́n devo tin he wutu mí sọgan deji dọ Jehovah na sukúndona kanyinylan. Kandai nuyiwa etọn he ko wayi lẹ tọn na mí nujikudo ehe. Owe Amọsi tọn bẹ apajlẹ ojlofọndotenamẹ tọn lẹ hẹn gando aliho he mẹ Jehovah nọ yinuwa hẹ mẹylankan lẹ te go. Dogbigbapọnna dọdai Amọsi tọn yinukọn dogọ na zinnudo onú voovo atọ̀n ji gando whẹdida Jiwheyẹwhe tọn go. Tintan, e nọ yin nuhe yè jẹna to whepoponu. Awetọ, mẹylankan lẹ ma sọgan họ̀ngán sọn e mẹ. Podọ atọ̀ntọ, e ma nọ gando mẹlẹpo go gba, na Jehovah nọ hẹn whẹdida ṣẹ do mẹylankan lẹ ji ṣigba bo nọ do lẹblanu hia mẹhe lẹnvọjọ lẹ po ahun dagbenọ lẹ po.—Lomunu lẹ 9:17-26.
Whẹdida Jiwheyẹwhe Tọn Nọ Yin Nuhe Yè Jẹna to Whepoponu
4. Fie wẹ Jehovah do Amọsi hlan, podọ etẹwutu?
4 To azán Amọsi tọn lẹ gbè, Islaelivi lẹ ko má do ahọluduta awe ji. Dopo yin ahọluduta whẹndo awe Juda tọn he to hùwaji. Awetọ wẹ ahọluduta whẹndo ao Islaeli tọn he to agewaji. Jehovah deazọ́nna Amọsi nado wadevizọn taidi yẹwhegán, bo do e hlan sọn otò etọn titi Juda mẹ yì Islaeli. To finẹ Jiwheyẹwhe yí Amọsi zan nado lá whẹdida sọn olọn mẹ wá.
5. Akọta tẹlẹ wẹ Amọsi dọ dọdai sọta jẹnukọn, podọ naegbọn yé jẹna whẹdida whẹgbledomẹ Jiwheyẹwhe tọn?
5 Amọsi ma bẹ azọ́n etọn jẹeji gbọn whẹdida Jehovah tọn lilá sọta ahọluduta agewaji Islaeli tọn dali gba. Kakatimọ, e bẹjẹeji gbọn whẹdida whẹgbledomẹ Jiwheyẹwhe tọn lilá sọta akọta ṣidopo he to yakẹ lẹ dali. Akọta ehelẹ wẹ Silia, Filistia, Tile, Edomi, Ammọni po Moabi po. Ṣigba be yé jẹna whẹdida whẹgbledomẹ Jiwheyẹwhe tọn nugbonugbo ya? Gbau! Whẹwhinwhẹ́n dopo wẹ yindọ, yé gbẹwanna omẹ Jehovah tọn lẹ jẹ otẹn godo tọn mẹ.
6. Naegbọn Jehovah do hẹn nugbajẹmẹji ja Silia, Filistia, po Tile po ji?
6 Di apajlẹ, Jehovah gblewhẹdo Silia na e “dekúnna Giliadi wutu.” (Amọsi 1:3) Silianu lẹ hò aigba Giliadi tọn yí sọn e si—yèdọ lẹdo Islaeli tọn de he tin to whèzẹtẹn Otọ̀ Jọdani tọn—bo hẹn awugble wá omẹ Jiwheyẹwhe tọn he nọ nọ̀ finẹ lẹ ji badabada. Etẹwẹ dogbọn Filistia po Tile po dali? Filistininu lẹ hùwhẹ na yé bẹ Islaelivi lẹ yì mẹmẹglọ, kavi kanlinmọgbenu, bo sà yé na Edominu lẹ, podọ Islaelivi delẹ tin to alọ Tilenu he nọ wà kanlinmọ-jọ́ lẹ tọn mẹ. (Amọsi 1:6, 9) Etẹ nkọ—yé sà omẹ Jiwheyẹwhe tọn lẹ do kanlinmọgbenu! Abajọ Jehovah do hẹn nugbajẹmẹji ja Silia, Filistia, po Tile po ji.
7. Etẹwẹ Edomi, Ammọni, po Moabi po tindo to kọndopọmẹ hẹ Islaeli, ṣigba nawẹ yé yinuwa hẹ Islaelivi lẹ gbọn?
7 Edomi, Ammọni, po Moabi po tindo nude to kọndopọmẹ hẹ Islaeli podọ hẹ ode awetọ. Akọta atọ̀n ehe lẹpo wẹ yin hẹnnumẹ Islaelivi lẹ tọn. Edominu lẹ yin kúnkan Ablaham tọn gbọn nọvisunnu ahoho Jakobu tọn, Esau gblamẹ. Enẹwutu, e sọgbe nado ylọ yé dọ nọvisunnu Islaeli tọn lẹ. Ammọninu lẹ po Moabinu lẹ po yin kúnkan Lọti heyin tavẹ-ylọvi Ablaham tọn. Ṣigba, be Edomi, Ammọni po Moabi po yinuwa hẹ Islaelivi hẹnnumẹ yetọn lẹ taidi nọvi-nọvi lẹ ya? Paali! Edomi gbọn lẹblanu matindo dali ze ohí do “nọvisunnu etọn” ji, podọ Ammọninu lẹ yinuwa hẹ Islaelivi heyin kanlinmọ lẹ po kanyinylan po. (Amọsi 1:11, 13) Dile etlẹ yindọ Amọsi ma donù Moabinu lẹ go tlọlọ dọ yé sayana omẹ Jiwheyẹwhe tọn lẹ, whenuho dohia dọ Moabinu lẹ ko jẹagọdo Islaeli na owhe susu. Yasanamẹ he na wá akọta hẹnnumẹ atọ̀n ehelẹ ji na sinyẹn taun. Jehovah na hẹn vasudo mlẹnmlẹn wá yé ji.
Mẹylankan lẹ Ma Sọgan Họ̀ngán sọn Whẹdida Jiwheyẹwhe Tọn Mẹ
8. Naegbọn akọta ṣidopo he sẹpọ Islaeli lẹ ma sọgan họ̀ngán sọn whẹdida Jiwheyẹwhe tọn mẹ?
8 E họnwun dọ akọta ṣidopo heyin alọdlẹndo jẹnukọn to dọdai Amọsi tọn mẹ lẹ jẹna whẹdida whẹgbledomẹ Jiwheyẹwhe tọn. Humọ, aliho depope matin he mẹ yé sọgan họ̀ngán te. Bẹsọn Amọsi weta 1, wefọ 3, kakajẹ weta 2, wefọ 1, whla ṣidopo wẹ Jehovah dọ dọ: “Yẹn ma na lẹ́ oyà etọn yì gba,” kavi “Yẹn ma na bẹ ohó ṣie dù gba.” To kọndopọmẹ hẹ ohó etọn, e ma lẹ́ whẹdida etọn yì sọn akọta enẹlẹ ji gba. Kandai whenuho tọn dohia dọ dopodopo yetọn wẹ jiya nugbajẹmẹji tọn to godo mẹ. Etẹ nkọ, e whè gbau ẹnẹ to yé mẹ—Filistia, Moabi, Ammọni po Edomi po—wẹ wá busẹ sọn aimẹ mlẹnmlẹn!
9. Etẹwẹ tòmẹnu Juda tọn lẹ jẹna, podọ etẹwutu?
9 To enẹgodo, dọdai Amọsi tọn ze ayidonugo do akọta ṣinawetọ de ji—yèdọ otò etọn titi heyin Juda. E sọgan ko paṣa mẹhe to todoaina Amọsi to ahọluduta agewaji Islaeli tọn mẹ lẹ nado sè dọ ewọ to nulila whẹdida tọn basi sọta ahọluduta Juda tọn. Naegbọn tòmẹnu Juda tọn lẹ do jẹna whẹdida whẹgbledomẹ tọn? “Na yé ko gbẹ́ osẹ́n OKLUNỌ tọn dai wutu,” wẹ Amọsi 2:4 dọ. Jehovah ma yí nukunpẹvi do pọ́n nuyiwa kọgbigbẹ́ Osẹ́n etọn go sọn ojlo mẹ wá tọn mọnkọtọn gba. Sọgbe hẹ Amọsi 2:5, e dọ dọdai dọmọ: “Yẹn na do miyọ́n de hlan Juda ji, e bo nasọ dù họ̀nmẹ Jelusalẹm tọn lẹ sudo.”
10. Naegbọn Juda ma sọgan họ̀ngán sọn nugbajẹmẹji mẹ?
10 Juda mawadodonọ lọ ma sọgan họ̀ngán sọn nugbajẹmẹji he to unklẹn lọ mẹ. Jehovah dọ whla ṣinawetọ dọmọ: “Yẹn ma na lẹ́ oyà etọn yì gba.” (Amọsi 2:4) Dọdai yasanamẹ tọn lọ mọ hẹndi do Juda ji to owhe 607 J.W.M. to whenuena e yin hinhẹn jẹvọ́ gbọn Babilọninu lẹ dali. Whladopo dogọ, mí mọdọ mẹylankan lẹ ma sọgan họ̀ngán sọn whẹdida Jiwheyẹwhe tọn mẹ gba.
11-13. Akọta tẹwẹ Amọsi dọ dọdai sọta titengbe, podọ nuyiwa kọgbidinamẹ tọn nankọtọn lẹ wẹ tin to finẹ?
11 Yẹwhegán Amọsi ko ṣẹṣẹ lá whẹdida Jehovah tọn sọta akọta ṣinawe. Ṣigba, eyin mẹde lẹndọ e ko dotana dọdai didọ etọn, be nuṣiwa pete wẹ enẹ yin. Amọsi gbẹsọ tindo nususu nado dọ! Azọ́ndenamẹ tangan etọn wẹ nado lá owẹ̀n whẹdida winyandomẹ tọn sọta ahọluduta agewaji Islaeli tọn. Na nugbo tọn, Islaeli jẹna whẹdida whẹgbledomẹ tọn sọn olọn mẹ wá na akọta lọ ko gblezọn mlẹnmlẹn to walọyizan-liho podọ to gbigbọ-liho.
12 Dọdai Amọsi tọn hùngona nuyiwa kọgbidinamẹ tọn he ko gbayipe to ahọluduta Islaeli tọn mẹ. Gando ehe go, Amọsi 2:6, 7 dọmọ: “Le wẹ OKLUNỌ dọ: Na osẹ́nmẹjẹ Islaeli tọn atọ̀n, mọwẹ, na ẹnẹ, yẹn ma na lẹ́ oyà etọn yì gba; na yé ko sà dodonọ na fataka wutu, podọ agbátọnọ na afọpa afọ awe lẹ tọn de: he to nùkẹ̀ do kọ́gudu aigba tọn to ota wamọnọ lẹ tọn ji, bo lẹ́ aliho homẹmiọnnọ lẹ tọn do apadopo.”
13 Dodonọ lẹ nọ yin sisà “na fataka wutu,” vlavo ehe zẹẹmẹdo dọ whẹdatọ lẹ nọ kẹalọyi fataka taidi alọgodokuẹ bo nọ sayana homẹvọnọ lẹ. Mẹhe yè duahọ do lẹ nọ sà agbátọnọ lẹ do kanlinmọgbenu na akuẹ he sọgan họ̀ “afọpa afọ awe lẹ tọn,” vlavo na ahọ́ kleun de poun wutu. Kanylantọ lẹ to “nùkẹ̀” kavi to kanván nado zín “wamọnọ lẹ” do odò sọmọ bọ wamọnọ ehelẹ na ba kọ́gudu do ota yetọn titi ji taidi ohia ayimajai, aluẹmẹninọ, kavi winyandomẹ tọn. Nugbomadọ gbayipe sọmọ bọ “homẹmiọnnọ” lẹ ma tindo todido depope nado mọ whẹdida dodo yí.
14. Mẹnu lẹ wẹ to yinyin yasana to ahọluduta whẹndo ao Islaeli tọn mẹ?
14 Doayi mẹhe to yinyin yasana lẹ go. Dodonọ, agbátọnọ, wamọnọ, po homẹmiọnnọ he nọ nọ̀ aigba lọ ji lẹ po. Alẹnu Osẹ́n tọn he Jehovah basi hẹ Islaeli biọ dọ awuvẹmẹ ni yin didohia agbátọnọ lẹ po mẹhe tin to nuhudo mẹ lẹ po. Ṣigba, to ahọluduta whẹndo ao Islaeli tọn mẹ, ninọmẹ omẹ mọnkọtọn lẹ tọn ylan zẹjlẹgo.
‘Wleawu Nado Yì Pé Jiwheyẹwhe Towe’
15, 16. (a) Naegbọn avase yin nina Islaelivi lẹ dọ: ‘Wleawu nado yì pé Jiwheyẹwhe towe’? (b) Nawẹ Amọsi 9:1, 2 dohia dọ mẹylankan lẹ ma sọgan họ̀nna whẹdida hinhẹnṣẹ Jiwheyẹwhe tọn gbọn? (c) Etẹwẹ jọ do ahọluduta whẹndo ao Islaeli tọn go to owhe 740 J.W.M.?
15 To whenuena e yindọ fẹnnuwiwa po ylando devo lẹ po gbayipe to Islaeli, owhẹ̀ yẹwhegán Amọsi tọn whẹ́n nado na avase akọta atẹṣitọ lọ dọ: ‘Wleawu nado yì pé Jiwheyẹwhe towe.’ (Amọsi 4:12) Islaeli mawadodonọ lọ ma sọgan họ̀ngán sọn whẹdida hinhẹnṣẹ Jiwheyẹwhe tọn he to unklẹn lọ mẹ na Jehovah dọ whla ṣinatọ̀ntọ dọmọ: “Yẹn ma na lẹ́ oyà etọn yì gba.” (Amọsi 2:6) Jiwheyẹwhe dọ gando mẹylankan he sọgan tẹnpọn nado họ̀n whlá lẹ go dọ: “Ewọ he sí sọn yé mẹ ma na họnyi, podọ ewọ he họ̀ngán to yé mẹ, ma na yin whinwhlẹn gba. Yin yé tlẹ kùndò biọ kutomẹ mẹ, alọ ṣie na de yé sọn finẹ; podọ yin yé tlẹ ylanú jẹ olọn, yẹn na hẹn yé jẹte sọn finẹ wá.”—Amọsi 9:1, 2.
16 Mẹylankan lẹ ma sọgan họ̀nna whẹdida hinhẹnṣẹ Jehovah tọn eyin yé tlẹ “kùndò biọ kutomẹ,” ehe nọtena vivẹnudido yetọn nado họ̀n whlá do ofi yìdo aigba tọn lẹ. Mọdopolọ, eyin yé tlẹ “ylanú jẹ olọn,” yèdọ gbọn tintẹnpọn nado dín fibẹtado to osó he yiaga lẹ ji dali, yé ma sọgan họ̀ngán sọn whẹdida Jiwheyẹwhe tọn mẹ gba. Avase Jehovah tọn họnwun: Fidepope matin he mẹde sọgan họ̀n whlá do sọn nukọn etọn. Whẹdida dodo Jiwheyẹwhe tọn biọ dọ ahọluduta Islaeli tọn ni jiya ylanwiwa etọn tọn. Podọ ojlẹ enẹ wá na nugbo tọn. To owhe 740 J.W.M.—nudi owhe 60 to whenuena Amọsi basi kandai dọdai etọn tọn godo—ahọluduta Islaeli tọn jai jẹ alọ Assilianu lẹ tọn mẹ.
Whẹdida Jiwheyẹwhe Tọn Ma Nọ Gando Mẹlẹpo Go
17, 18. Etẹwẹ Amọsi weta 9 dohia gando lẹblanu Jiwheyẹwhe tọn go?
17 Dọdai Amọsi tọn ko gọalọna mí nado mọdọ whẹdida Jiwheyẹwhe tọn nọ wá mẹhe jẹna ẹn lẹ ji to whepoponu podọ mẹylankan lẹ ma sọgan họ̀ngán sọn e mẹ. Ṣigba owe Amọsi tọn sọ dohia dọ whẹdida Jehovah tọn ma nọ gando mẹlẹpo go. Jiwheyẹwhe sọgan dín mẹylankan lẹ mọ to fidepope he yé whlá do bo hẹn whẹdida ṣẹ do yé ji. E sọ sọgan dín mẹhe lẹnvọjọ bo yin dodonọ lẹ mọ ga—yèdọ mẹhe ewọ de nado do lẹblanu hia lẹ. Ehe yin nùzindeji to aliho jiawu de mẹ to weta godo tọn owe Amọsi tọn mẹ.
18 Sọgbe hẹ Amọsi weta 9, wefọ 8, Jehovah dọmọ: “Yẹn ma na và owhé Jakobu tọn sudo mlẹnmlẹn gba.” Dile e yin didohia to wefọ 13 jẹ 15 mẹ do, Jehovah dopagbe dọ emi na ‘bẹ omẹ emitọn he yì mẹmẹglọ lẹ pli.’ Lẹblanu na yin didohia yé bọ yé nasọ duvivi hihọ́ po dagbemẹninọ po tọn. “Aigbajlotọ lọ na plá ojiyatọ lọ,” wẹ Jehovah dopagbe dọ. Yí nukun homẹ tọn do pọ́n—jibẹwawhé lọ na sù sọmọ bọ popolẹpo ma na ko yin bibẹ wá whégbè whẹpo bọ ojlẹ aigba-jijlo nado dó jinukun devo tọn na wá!
19. Etẹwẹ jọ do pipotọ Islaeli po Juda po tọn go?
19 Mí sọgan dọ dọ whẹdida Jehovah tọn sọta mẹylankan lẹ to Juda po Islaeli po ma gando mẹlẹpo go na lẹblanu yin didohia mẹhe lẹnvọjọ lẹ po ahun dagbenọ lẹ po. To hẹndi dọdai hẹngọwa heyin kinkàndai to Amọsi weta 9 tọn mẹ, pipotọ he lẹnvọjọ sọn Islaeli po Juda po mẹ lẹkọ sọn kanlinmọgbenu Babilọni tọn to owhe 537 J.W.M. To kọlilẹwa aigba yiwanna yetọn ji godo, yé hẹn sinsẹ̀n-bibasi nugbo gọwá. Yé sọ vọ́ owhé yetọn lẹ gbá bo dó vẹngle po jipa lẹ po to blẹo mẹ.
Whẹdida Whẹgbledomẹ Jehovah Tọn Na Wá Dandan!
20. Jide tẹwẹ dogbigbapọnna owẹ̀n whẹdida tọn he Amọsi lá lẹ dona na mí?
20 Dogbigbapọnna owẹ̀n he Amọsi lá gando whẹdida Jiwheyẹwhe tọn go lẹ dona na mí jide dọ Jehovah na hẹn kanyinylan wá opodo to ojlẹ mítọn mẹ. Naegbọn mí sọgan yí ehe sè? Tintan, apajlẹ ehelẹ he do aliho he mẹ Jiwheyẹwhe yinuwa hẹ mẹylankan lẹ te to hohowhenu hia gọalọ nado yọ́n lehe e na yinuwa gbọn to ojlẹ mítọn mẹ. Awetọ, whẹdida hinhẹnṣẹ Jiwheyẹwhe tọn sọta ahọluduta atẹṣitọ Islaeli tọn dohia hezeheze dọ Jiwheyẹwhe na hẹn vasudo wá Mẹylọhodotọklisti ji, heyin adà “Babilọni Daho” lọ tọn he huwhẹ̀ hugan, yèdọ ahọluigba aihọn tọn heyin sinsẹ̀n lalo tọn.—Osọhia 18:2.
21. Naegbọn Mẹylọhodotọklisti jẹna whẹdida whẹgbledomẹ Jiwheyẹwhe tọn?
21 Ayihaawe matin dọ Mẹylọhodotọklisti jẹna whẹdida whẹgbledomẹ Jiwheyẹwhe tọn. Sinsẹ̀n-bibasi po walọyizan gblezọn etọn lẹ po ko jẹ gbangba klòlò. Na nugbo tọn, Mẹylọhodotọklisti—po pipotọ aihọn Satani tọn po—jẹna whẹdida Jehovah tọn. Podọ yé ma sọgan họ̀ngán sọn e mẹ, na to whenuena ojlẹ na sọ̀ nado hẹn whẹdida ṣẹ, hogbe Amọsi weta 9, wefọ 1 tọn lẹ na mọ hẹndi dọmọ: “Ewọ he sí sọn yé mẹ ma na họnyi, podọ ewọ he họ̀ngán to yé mẹ, ma na yin whinwhlẹn gba.” Mọwẹ, mahopọnna fie mẹylankan lẹ sọgan họ̀n whlá do, Jehovah na dín yé mọ.
22. Nuagokun tẹlẹ wẹ yin hinhẹn họnwun to 2 Tẹsalonikanu lẹ 1:6-8 mẹ gando whẹdida Jiwheyẹwhe tọn go?
22 Whẹdida Jiwheyẹwhe tọn nọ yin nuhe yè jẹna to whepoponu, mẹylankan lẹ ma sọgan họ̀ngán sọn e mẹ, podọ e ma nọ gando mẹlẹpo go. Mí sọgan mọ ehe to nuhe apọsteli Paulu dọ lẹ mẹ dọmọ: “Onú dodonọ de wẹ to Jiwheyẹwhe dè nado yí nukunbibia do yiahọsu to yé he to nukunbiana mì lẹ go; podọ hlan mì he yè bianukunna lẹ ni gbọjẹ to mí dè, to whenuena yè na do Jesu Oklunọ hia sọn olọn mẹ, po angẹli huhlọnnọ etọn lẹ po [to miyọ́n he to jiji mẹ], mẹhe to ahọsuyi to yé he ma yọ́n Jiwheyẹwhe lẹ go, podọ yé he ma setonuna wẹndagbe Jesu Klisti Oklunọ mítọn tọn lẹ.” (2 Tẹsalonikanu lẹ 1:6-8) “Onú dodonọ de wẹ to Jiwheyẹwhe dè” nado yiahọsu to mẹhe jẹna whẹdida whẹgbledomẹ tọn lẹ go na yé bianukunna mẹyiamisisadode etọn lẹ wutu. Mẹylankan lẹ ma sọgan họ̀ngán sọn whẹdida enẹ mẹ, na yé ma na luntọ́n ‘to whenuena yè na do Jesu hia sọn olọn mẹ, po angẹli huhlọnnọ etọn lẹ po to miyọ́n he to jiji mẹ.’ Whẹdida Jiwheyẹwhe tọn ma nasọ gando mẹlẹpo go na Jesu na yiahọsu “to yé he ma yọ́n Jiwheyẹwhe lẹ go, podọ yé he ma setonuna wẹndagbe . . . lẹ.” Humọ, whẹdida hinhẹnṣẹ Jiwheyẹwhe tọn na miọnhomẹna budisi Jiwheyẹwhe tọ́ he to oyà nukunbibia tọn ji lẹ.
Todido Na Dodonọ Lẹ
23. Todido po homẹmiọnnamẹ tẹ po wẹ sọgan yin mimọyi sọn owe Amọsi tọn mẹ?
23 Dọdai Amọsi tọn bẹ owẹ̀n jiawu homẹmiọnnamẹ po todido po tọn hẹn na ahun dagbenọ lẹ. Dile e yin didọdai to owe Amọsi tọn mẹ do, Jehovah ma và omẹ etọn lẹ sudo mlẹnmlẹn to hohowhenu gba. E ṣinyan mẹmẹglọ Islaeli po Juda po tọn lẹ pli to godo mẹ, bo hẹn yé gọwá aigba yetọn ji bosọ yí hihọ́ po dagbemẹninọ susugege po do dona yé. Zẹẹmẹ tẹwẹ ehe tindo na mí to egbehe? E hẹn mí deji dọ to whẹdida sọn olọn mẹ wá hinhẹnṣẹ whenu, Jehovah na dín mẹylankan lẹ mọ sọn fidepope he yé họ̀n whlá do bo na dín mẹhe ewọ de nado do lẹblanu hia lẹ mọ, mahopọnna fie yé sọgan tin te to aigba ehe ji.
24. Aliho tẹlẹ mẹ wẹ devizọnwatọ Jehovah tọn egbehe tọn lẹ ko yin didona te?
24 Dile mí to tenọpọn ojlẹ he mẹ whẹdida Jehovah tọn na yin hinhẹnṣẹ do mẹylankan lẹ ji, numimọ tẹwẹ mí tindo taidi devizọnwatọ nugbonọ etọn lẹ? Etẹ nkọ, Jehovah to didona mí po dagbemẹninọ gbigbọmẹ tọn susu po! Mí to vivi aliho sinsẹ̀n-bibasi tọn de dù he vò sọn lalo po tasọdona nugbo po si, ehe ko dekọtọn sọn nuplọnmẹ lalo Mẹylọhodotọklisti tọn lẹ mẹ. Jehovah ko sọ dona mí po núdùdù gbigbọmẹ tọn susugege po. Ṣigba, flindọ whẹpo dona susugege Jehovah tọn ehelẹ nado yin mítọn, azọngban daho de tin he mí dona hẹndi. Jiwheyẹwhe nọ donukun dọ mí ni na avase mẹdevo lẹ gando whẹdida he ja lọ go. Mí jlo nado wà nuhe go mí pé lẹpo nado dín ‘mẹhe tindo ahunjijlọ he jẹna ogbẹ̀ madopodo lẹ’ mọ. (Owalọ lẹ 13:48) Mọwẹ, mí jlo nado gọalọna mẹsusu dile e sọgan yọnbasi do nado mọaleyi sọn dagbemẹninọ gbigbọmẹ tọn he mílọsu to vivi etọn dù todin lọ mẹ. Podọ ojlo mítọn wẹ yindọ yé ni lùn whẹdida hinhẹnṣẹ Jiwheyẹwhe tọn do mẹylankan lẹ ji he to dindọnsẹpọ lọ tọ́n. E họnwun dọ, nado duvivi dona ehelẹ tọn, mí dona tindo ninọmẹ ahun mẹ tọn he sọgbe. Ehe lọsu yin nùzindeji to dọdai Amọsi tọn mẹ, dile mí na mọ do to hosọ he bọdego mẹ.
Nawẹ Hiẹ Na Na Gblọndo Gbọn?
• Nawẹ dọdai Amọsi tọn dohia dọ whẹdida whẹgbledomẹ Jehovah tọn nọ yin nuhe yè jẹna to whepoponu gbọn?
• Kunnudenu tẹwẹ Amọsi na nado dohia dọ mẹylankan lẹ ma sọgan họ̀ngán sọn whẹdida Jiwheyẹwhe tọn mẹ?
• Nawẹ owe Amọsi tọn dohia dọ whẹdida hinhẹnṣẹ Jiwheyẹwhe tọn ma nọ gando mẹlẹpo go gbọn?
[Yẹdide to weda 16, 17]
Ahọluduta Islaeli tọn ma họ̀ngán sọn whẹdida Jiwheyẹwhe tọn mẹ
[Yẹdide to weda 18]
To owhe 537 J.W.M., pipotọ Islaeli po Juda po tọn lẹkọ sọn kanlinmọgbenu Babilọni tọn