Mì Dín Jehovah, Mẹhe Nọ Gbeje Ahun lẹ Pọ́n
“Mì dín mi, mì bo na nọgbẹ̀.”—AMỌSI 5:4.
1, 2. Etẹwẹ e zẹẹmẹdo to whenuena Owe-wiwe dọ dọ Jehovah nọ ‘pọ́n ahun mẹ’?
JEHOVAH JIWHEYẸWHE dọna yẹwhegán Samuẹli dọmọ: “Gbẹtọ nọ to awusọhia gbonu go tọn dali pọ́n, ṣigba ayiha [kavi ahun] pọ́n wẹ OKLUNỌ te.” (1 Samuẹli 16:7) Nawẹ Jehovah nọ ‘pọ́n ahun mẹ’ gbọn?
2 To Owe-wiwe mẹ, ahun nọ saba yin yiyizan to yẹhiadonu-liho nado dlẹnalọdo nuhe mẹde yin to homẹ—yèdọ ojlo etọn lẹ, linlẹn etọn lẹ, numọtolanmẹ etọn lẹ po owanyi sisosiso etọn po. Enẹwutu to whenuena Biblu dọ dọ Jiwheyẹwhe nọ pọ́n ahun mẹ, nuhe dọ e te wẹ yindọ ewọ nọ mọnu zẹ̀ awusọhia gbonu tọn go bo nọ ze ayidonugo do nuhe mẹlọ yin to homẹ ji.
Jiwheyẹwhe Gbeje Islaeli Pọ́n
3, 4. Sọgbe hẹ Amọsi 6:4-6, ninọmẹ tẹlẹ wẹ tin to ahọluduta whẹndo ao Islaeli tọn mẹ?
3 To whenuena Mẹhe nọ gbeje ahun mẹ pọ́n lẹ́ ayidonugo etọn hlan ahọluduta whẹndo ao Islaeli tọn to azán Amọsi tọn lẹ gbè, etẹwẹ E mọ? Amọsi 6:4-6 dọho gando sunnu lẹ go “he mlọnai to adọ́zan ajinnakú-dú tọn lẹ ji, bosọ dlẹn yede to núzẹnmẹ yetọn lẹ ji.” Yé to “lẹngbọvu lẹ sọn kanlinpa mẹ dù, podọ oyìnvu lẹ sọn gblagbla apó lọ tọn mẹ.” Sunnu ehelẹ ko “dowé núzinzan hàngbe tọn lẹ na yede” bosọ to “nùnù to apánko ovẹn tọn lẹ mẹ.”
4 To tintan whenu, ehe sọgan sọawuhia taidi onú dagbe de. To owhé whanpẹnọ yetọn lẹ gbè, adọkunnọ lẹ nọ duvivi núdùdù po núnùnù dagbe hugan lẹ po tọn podọ hànjinu he to zoji lẹ wẹ nọ yin yiyizan to ayidedai yetọn lẹ whenu. Yé sọ tindo “adọ́zan ajinnakú-dú tọn lẹ.” Whenuho-kàntọ dòkuntọ lẹ ko mọ anazọ́n whanpẹnọ ajinnakú-dú tọn lẹ to Samalia, he yin tòdaho tatọ́-tònọ ahọluduta Islaeli tọn. (1 Ahọlu lẹ 10:22) E yọnbasi taun dọ suhugan ehelẹ tọn na ko yin yíyí do doaṣọ́na aisinnu lẹ po nuyizan họmẹ tọn devo lẹ po.
5. Naegbọn Jiwheyẹwhe gblehomẹ do Islaelivi azán Amọsi tọn gbè tọn lẹ go?
5 Be gbẹzan fẹẹmẹ-ninọ tọn zinzan, núdùdù dagbe dùdù, ovẹn dagbe nùnù, po todidoai na hàngbe vivi lẹ po Islaelivi lẹ tọn wẹ Jehovah Jiwheyẹwhe jẹagọdo ya? Paali! To popolẹpo mẹ, ewọ lọsu wẹ wleawu onú mọnkọtọn lẹ tọn susugege na gbẹtọ lẹ nido dugbẹ yetọn. (1 Timoti 6:17) Nuhe gblehomẹna Jehovah wẹ yin ojlo agọ̀ yetọn lẹ, ninọmẹ ylankan ahun yetọn tọn, walọyizan yetọn he ma do sisi hia Jiwheyẹwhe, gọna awugbopo yetọn nado yiwanna Islaelivi hatọ yetọn lẹ.
6. Ninọmẹ gbigbọmẹ tọn tẹ mẹ wẹ Islaeli tin te to ojlẹ Amọsi tọn mẹ?
6 Mẹhe ‘dlẹn yede to núzẹnmẹ yetọn lẹ ji, bo to lẹngbọvu lẹ sọn kanlinpa mẹ dù, to ovẹn nù, bosọ dowé núzinzan hàngbe tọn lẹ’ na jọsi to madẹnmẹ. Sunnu enẹlẹ yin kinkanse dọ: ‘Be mì to azán ylankan lọ sisẹ́ do aganu wẹ ya?’ Ninọmẹ he tin to Islaeli lẹ dona ko hẹn yé blawu tlala, ṣigba “yè ma hẹn yé sadi na nukunbiamẹ Josẹfu tọn gba.” (Amọsi 6:3-6) Mahopọnna ninọmẹ dagbe akọta lọ tọn to akuẹzinzan-liho, Jiwheyẹwhe mọdọ Josẹfu—kavi Islaeli—tin to nukunbibia mẹ to gbigbọ-liho. Etomọṣo, gbẹtọ lọ lẹ zindonukọn to nuwiwa yetọn egbesọegbesọ tọn lẹ mẹ ma kiya. Mẹsusu wẹ tindo walọyizan mọnkọtọn to egbehe. Yé sọgan yigbe dọ mí to gbẹnọ to ojlẹ awusinyẹn tọn lẹ mẹ, ṣigba na yé lọsu titi ma ko tindo numimọ ehe tọn wutu, yajiji mẹdevo lẹ tọn ma nọ duahunmẹna yé podọ yé ma nọ do ojlo depope hia to gbigbọnu lẹ mẹ.
Islaeli—Akọta Gblezọn De
7. Etẹwẹ na jọ eyin Islaelivi lẹ ma setonuna avase Jiwheyẹwhe tọn lẹ?
7 Mahopọnna awusọhia whanpẹnọ akọta lọ tọn, Amọsi hùngona walọ gblezọn etọn lẹ. Na yé gboawupo nado setonuna avase Jiwheyẹwhe tọn lẹ bo vọ́ pọndohlan yetọn jlado wutu, Jehovah na jo yé do alọ kẹntọ yetọn lẹ tọn mẹ. Assilianu lẹ na fọ́n yé plaun sọn adọ́zan ajinnakú-dú tọn whanpẹnọ yetọn lẹ ji bo na hẹn yé gánnugánnu yì kanlinmọgbenu. Yé ma nasọ nọ̀ fẹẹmẹ ba!
8. Nawẹ Islaeli biọ ninọmẹ ylankan mẹ to gbigbọ-liho gbọn?
8 Nawẹ Islaelivi lẹ wagbọn do biọ ninọmẹ mọnkọtọn mẹ? Ninọmẹ ehe bẹjẹeji to owhe 997 J.W.M., to whenuena Ahọlu Sọlọmọni yin tẹndiọna gbọn visunnu etọn Lehoboami dali bọ whẹndo Islaeli tọn ao klan sọn whẹndo Juda tọn po Bẹnjamini tọn po go. Ahọlu tintan he dugán do ahọluduta whẹndo ao Islaeli tọn ji wẹ yin Jeloboami I, “visunnu Nebati tọn.” (1 Ahọlu lẹ 11:26) Jeloboami diọlinlẹn na mẹjidugando etọn lẹ dọ e na sinyẹnawu na yé nado nọ zingbejizọnlin kaka yì Jelusalẹm whẹpo do basi sinsẹ̀n hlan Jehovah. Ṣigba nado dọhojọho, e ma yin dagbemẹninọ gbẹtọ lọ lẹ tọn wẹ to ahunmẹduna ẹn gba. Kakatimọ, ale edetiti tọn lẹ yanwle wẹ e te. (1 Ahọlu lẹ 12:26) Jeloboami to budi dọ eyin Islaelivi lẹ zindonukọn nado nọ yì tẹmpli mẹ to Jelusalẹm na hùnwhẹ whemẹwhemẹ tọn he nọ pagigona Jehovah lẹ, yé na wá ze yedelẹ pete jo na ahọluduta Juda tọn to godo mẹ. Nado sọgan glọnalina ehe, Jeloboami ze oyìnvu sika tọn awe dai, dopo to Dani podọ awetọ to Bẹtẹli. Gbọnmọ dali sinsẹ̀n-bibasi hlan oyìnvu wá lẹzun sinsẹ̀n ahọluduta Islaeli tọn.—2 Otannugbo lẹ 11:13-15.
9, 10. (a) Nuwiwa sinsẹ̀n tọn tẹlẹ wẹ Ahọlu Jeloboami I basi titona? (b) Nukun tẹwẹ Jiwheyẹwhe yí do pọ́n hùnwhẹ he yin bibasi to Islaeli to azán Ahọlu Jeloboami II tọn gbè lẹ?
9 Jeloboami dovivẹnu nado mọdọ sinsẹ̀n yọyọ lọ hẹnai. E basi tito na nuwiwa sinsẹ̀n tọn lẹ he taidi hùnwhẹ he nọ yin bibasi to Jelusalẹm lẹ nkọtọn. To 1 Ahọlu lẹ 12:32 mẹ, mí hia dọmọ: “Jeloboami sọ do hùnwhẹ de ai to osun ṣinatọ̀ntọ mẹ, to azán fọtọ̀n tọ osun lọ tọn ji, taidi hlan hùnwhẹ he tin to Juda mẹ nkọ, ewọ sọ nọ hẹji yì agbà lọ kọ̀n; mọwẹ e nọ wà do to Bẹtẹli mẹ.”
10 Jehovah ma nọ kẹalọyi hùnwhẹ sinsẹ̀n lalo tọn mọnkọtọn lẹ pọ́n gbede. Na jide tọn, e hẹn enẹ họnwun hezeheze gbọn Amọsi gblamẹ to nuhe hugan owhe kanweko godo to gandudu Jeloboami II tọn whenu, mẹhe duahọlu do ahọluduta whẹndo ao Islaeli tọn ji to nudi owhe 844 J.W.M. (Amọsi 1:1) Sọgbe hẹ Amọsi 5:21-24, Jiwheyẹwhe dọmọ: “Yẹn gbẹwanna, yẹn vlẹ hùnwhẹ mìtọn lẹ, podọ yẹn ma na whlẹ́n wánvivi de pọ́n to bẹpli ayidego mìtọn lẹ mẹ gba. Mọwẹ, yin mìwlẹ tlẹ na avọ́nunina mimẹ̀ lẹ mi po avọ́nunina mìtọn jinulili tọn lẹ po, yẹn ma na kẹalọyi yé gba: mọ yẹn ma nasọ hò avọ́nunina opẹ́ tọn sọn kanlin jonọ mìtọn lẹ tọn mẹ pọ́n gba. Hiẹ ni de hùnhlúngbè ohàn towe lẹ tọn sẹ̀ sọn dè e; na yẹn ma na sè nudidọ viọli towe lẹ tọn gba. Ṣigba gbọ whẹdida [dodo] ni bli jẹte di osin lẹ, podọ dodo di tọ̀sisa he sisà kakadoi de.”
Ninọmẹ He Sọzẹn Hẹ Azán Mítọn Gbè Tọn Lẹ
11, 12. Nawẹ sinsẹ̀n-bibasi Islaeli hohowhenu tọn sọzẹn hẹ Mẹylọhodotọklisti tọn gbọn?
11 E họnwun dọ, Jehovah gbeje ahun mẹhe to mahẹ tindo to hùnwhẹ Islaeli tọn mẹ lẹ tọn pọ́n bo vlẹ kavi jẹagọdo nuwiwa yetọn po avọ́nunina yetọn lẹ po. Mọdopolọ to egbehe, Jiwheyẹwhe jẹagọdo hùnwhẹ kosi tọn he mẹ Mẹylọhodotọklisti nọ tindo mahẹ te lẹ, taidi hùnwhẹ Noẹli po Paaki po tọn. Na sinsẹ̀n-basitọ Jehovah tọn lẹ, kanṣiṣa depope ma sọgan tin to dodo po mawadodo po ṣẹnṣẹn, podọ haṣinṣan depope matin to hinhọ́n po zinvlu po ṣẹnṣẹn.—2 Kọlintinu lẹ 6:14-16.
12 Aliho he mẹ Islaelivi oyìnvu sẹ̀ntọ lẹ basi sinsẹ̀n te sọ sọgbe hẹ nuhe nọ yin mimọ to Mẹylọhodotọklisti mẹ. Dile etlẹ yindọ mẹhe ylọ yede dọ Klistiani delẹ kẹalọyi nugbo Ohó Jiwheyẹwhe tọn, e ma yin owanyi nujọnu tọn tintindo na Jiwheyẹwhe wẹ nọ whàn Mẹylọhodotọklisti nado basi sinsẹ̀n gba. Eyin owanyi wẹ, e na ko tẹdo sinsẹ̀n-bibasi na Jehovah “to gbigbọ mẹ podọ to nugbo mẹ” go na sinsẹ̀n-bibasi mọnkọtọn wẹ nọ hẹn ẹn hùnhomẹ. (Johanu 4:24) Humọ, Mẹylọhodotọklisti ma nọ “gbọ whẹdida [dodo] ni bli jẹte di osin lẹ, podọ dodo di tọ̀sisa he sisà kakadoi de” gba. Kakatimọ, pludopludo wẹ e nọ yí nukunpẹvi do pọ́n nujinọtedo walọ dagbe tọn Jiwheyẹwhe tọn lẹ. E ko na dotẹnmẹ ogalilọ po ylando sinsinyẹn devo lẹ po. Dehe tlẹ sọ ylanhu wẹ yindọ e kẹalọyi alọwle mẹhe tindo vijinu dopolọ lẹ tọn!
“Yiwanna Dagbe”
13. Naegbọn mí dona yinuwa sọgbe hẹ nuhe yin didọ to Amọsi 5:15 mẹ?
13 Jehovah dọhlan mẹhe tindo ojlo nado sẹ̀n ẹn to aliho heyin alọkẹyi mẹ lẹpo dọmọ: “Mì gbẹwanna oylan, bo yiwanna dagbe.” (Amọsi 5:15) Owanyi po wangbẹna po yin numọtolanmẹ sinsinyẹn lẹ he nọ wá sọn ahun yẹhiadonu tọn mítọn mẹ. To whenuena e yindọ oklenọ wẹ ahun, mí dona wà nuhe go mí pé lẹpo nado yí ì whlá. (Howhinwhẹn lẹ 4:23; Jẹlemia 17:9) Eyin mí natẹn ojlo ylankan lẹ nado doadọ̀do to ahun mítọn mẹ, mí sọgan jẹ owanyi tindo na oylan ji bo na jẹ wangbẹna onú dagbe lẹ ji. Podọ eyin mí na pekọ ojlo mọnkọtọn lẹ gbọn awujijona ylando dali, zohunhun depope he mí sọgan dohia to sinsẹ̀nzọn Jiwheyẹwhe tọn mẹ ma sọgan hẹn nukundagbe etọn wá na mí. Enẹwutu, mì gbọ mí ni nọ biọ alọgọ Jiwheyẹwhe tọn to odẹ̀ mẹ nado “gbẹwanna oylan, bo yiwanna dagbe.”
14, 15. (a) To Islaeli, mẹnu lẹ wẹ tin to mẹhe to dagbe wà lẹ mẹ, ṣigba nawẹ delẹ to yé mẹ to yinyin nuyiwahẹ gbọn? (b) Nawẹ mí sọgan na tuli mẹhe to sinsẹ̀nzọn whenu-gigọ́ tọn mẹ to egbehe lẹ gbọn?
14 E mayin Islaelivi lẹpo wẹ to nuhe ylan to nukun Jehovah tọn mẹ wà gba. Di dohia, Hosea po Amọsi po “yiwanna dagbe” bo sẹ̀n Jiwheyẹwhe po nugbonọ-yinyin po taidi yẹwhegán. Mẹdevo lẹ dopagbe nado nọgbẹ̀ taidi Nazilinu. Dile e na dẹnsọ bọ yé gbẹpo to Nazilinu yin, yé nọ nọla mlẹnmlẹn na ovẹn yiyizan to aliho depope mẹ. (Osọha lẹ 6:1-4) Nukun tẹwẹ Islaelivi he pò lẹ yí do pọ́n gbigbọ mẹde-yido-sanvọ́ mẹhe to dagbe wà mọnkọtọn lẹ tọn? Gblọndo mẹhẹnjọsi tọn he yin nina kanbiọ enẹ do obá he mẹ akọta lọ ko gblezọn jẹ hia. Amọsi 2:12 dọmọ: “Mìwlẹ na ovẹn Nazilinu lẹ nado nọ nù; bosọ dosẹ́n na yẹwhegán lẹ, dọmọ, Mì dọ dọdai blo.”
15 To whenuena Islaelivi enẹlẹ mọ apajlẹ nugbonọ-yinyin Nazilinu lẹ po yẹwhegán lẹ po tọn, winyan dona ko hù yé, bọ yé na ko yin whinwhàn nado diọ walọ yetọn lẹ. Kakatimọ, yé gbọn owanyi matindo dali dín aliho lẹ nado hẹn nugbonọ lọ lẹ gbọjọ sọn gigopipana Jiwheyẹwhe mẹ. Mì gbọ mí ni ma dotuhomẹna gbehosọnalitọ, mẹdehlan, nugopọntọ tomẹyitọ, kavi hagbẹ whẹndo Bẹtẹli tọn lẹ nado doalọtena sinsẹ̀nzọn whenu-gigọ́ tọn yetọn nado sọgan lẹkọwa nuhe nọ yin yiylọdọ gbẹzan dagbe kọ̀n pọ́n gbede blo. Kakatimọ, mì dike mí ni nọ na tuli yé nado zindonukọn to azọ́n dagbe yetọn mẹ!
16. Naegbọn ninọmẹ Islaelivi lẹ tọn pọnte to azán Mose tọn gbè hugan lehe e te do to ojlẹ Amọsi tọn mẹ?
16 Dile etlẹ yindọ Islaelivi susu vò to agbasa-liho to azán Amọsi tọn lẹ gbè, yé “mayin adọkunnọ gbọn Jiwheyẹwhe dali.” (Luku 12:13-21) Mana kẹdẹ wẹ tọgbo yetọn lẹ dù to zungbo mẹ na owhe 40. Yé ma dù oyìn-lan dojó kavi mlọnai do adọ́zan ajinnakú-dú tọn lẹ ji gba. Etomọṣo, Mose gbọn gbesisọ dali dọna yé dọ: “OKLUNỌ lọ Jiwheyẹwhe towe ko dona we to azọ́n alọ towe tọn lọ lẹpo mẹ: . . . owhe kande helẹ mẹ OKLUNỌ lọ Jiwheyẹwhe towe ko tin po hiẹ po; hiẹ ma ko gbọagbá nude tọn gba.” (Deutelonomi 2:7) Mọwẹ, to zungbo mẹ Islaelivi lẹ nọ saba mọ nuhe yé tindo nuhudo etọn na taun tọn yí. Hú popolẹpo, yé duvivi owanyi, hihọ́-basinamẹ, po dona Jiwheyẹwhe tọn po!
17. Etẹwutu Jehovah do plan Islaelivi dowhenu tọn lẹ wá Aigba Pagbe tọn ji?
17 Jehovah flinnu mẹhe nọgbẹ̀ to ojlẹ Amọsi tọn mẹ lẹ dọ Emi hẹn tọgbo yetọn lẹ yì Aigba Pagbe tọn ji bo gọalọna yé nado de kẹntọ yetọn lẹpo sẹ̀. (Amọsi 2:9, 10) Ṣigba etẹwutu Jiwheyẹwhe do plan Islaelivi dowhenu tọn enẹlẹ sọn Egipti wá Aigba Pagbe tọn lọ ji? Be yé nido dugbẹ to fẹẹmẹ bo gbẹkọ Mẹdatọ yetọn go wutu wẹ ya? Lala! Kakatimọ, e wàmọ nado hẹn ẹn yọnbasi na yé nado sẹ̀n ewọ taidi akọta he tin to mẹdekannu bosọ wé to gbigbọ-liho. Ṣigba tòmẹnu ahọluduta whẹndo ao Islaeli tọn lẹ ma gbẹwanna oylan bo yiwanna dagbe. To vogbingbọnmẹ, boṣiọ pipà lẹ wẹ yé to gigopana, e mayin Jehovah gba. Winyandomẹnu nankọ die!
Jehovah Na Dla Ylanwa lẹ Pọ́n
18. Etẹwutu Jehovah do tún mí dote to gbigbọ-liho?
18 Jiwheyẹwhe ma na miyọnnukundo walọyizan winyandomẹ Islaelivi lẹ tọn gba. E hẹn pọndohlan etọn họnwun to whenuena e dọmọ: “Yẹn na dla ylanwa mìtọn lẹpo pọ́n to mì ji.” (Amọsi 3:2) Hogbe enẹlẹ dona hẹn mílọsu lẹ lẹnnupọn do whlẹngán mítọn sọn kanlinmọgbenu Egipti egbezangbe tọn, he yin titonu ylankan egbehe tọn mẹ ji. Jehovah ma tún mí dote to gbigbọ-liho na mí nido doafọna yanwle ṣejannabi tọn lẹ gba. Kakatimọ, e wàmọ na mí nido pagigona ẹn po ahundopo po taidi akọta he tin to mẹdekannu bo to mahẹ tindo to sinsẹ̀n-bibasi wiwe mẹ. Podọ mímẹpo wẹ na dogbè lehe mí to mẹdekannujẹ he Jiwheyẹwhe na mí yizan gbọn tọn.—Lomunu lẹ 14:12.
19. Sọgbe hẹ Amọsi 4:4, 5, etẹwẹ suhugan Islaelivi lẹ tọn yiwanna?
19 E blawu dọ suhugan tòmẹnu Islaeli tọn lẹ tọn gbẹ́ owẹ̀n huhlọnnọ Amọsi tọn dai. Yẹwhegán lọ hùngona ninọmẹ gblezọn gbigbọmẹ tọn yetọn to hogbe helẹ he yin kinkàndai to Amọsi 4:4, 5 mẹ dọmọ: “Mì wá jẹ Bẹtẹli, bo jẹsẹ́nmẹ; jẹ Gilgali, bo hẹn osẹ́nmẹjẹ jideji, . . . na ehe wẹ mìwlẹ jlo [kavi yiwanna] mì ovi Islaeli tọn emi.” Islaelivi lẹ ma wleawuna ojlo he sọgbe lẹ. Yé ma ko whlá ahun yetọn lẹ gba. Taidi kọdetọn de, suhugan yetọn yiwanna oylan bo gbẹwanna dagbe. Oyìnvu sẹ̀ntọ tasinyẹntọ enẹlẹ ma diọ jijọ. Jehovah na dla ylanwa yetọn lẹ pọ́n, podọ yé na kú to ylando yetọn lẹ mẹ!
20. Nawẹ mí sọgan doafọna nuyiwa he sọgbe hẹ Amọsi 5:4 gbọn?
20 E ma na ko bọawu na mẹdepope he nọgbẹ̀ to Islaeli to ojlẹ enẹlẹ mẹ nado yin nugbonọ hlan Jehovah. E ma nọ bọawu nado nọ zánwhlan mẹ do fẹ́ zánwhlan, dile Klistiani egbehe tọn lẹ, jọja po mẹho po, yọnẹn do ganji. Ṣogan, owanyi tintindo na Jiwheyẹwhe po ojlo nado hẹn homẹ etọn hùn po whàn Islaelivi delẹ nado basi sinsẹ̀n nugbo. Jehovah basi oylọ zohunhunnọ he yin kinkàndai to Amọsi 5:4 mẹ hlan yé dọmọ: “Mì dín mi, mì bo na nọgbẹ̀.” Mọdopolọ to egbehe, Jiwheyẹwhe nọ do lẹblanu hia mẹhe lẹnvọjọ bo dín in gbọn oyọnẹn he pegan Ohó etọn tọn tintindo po ojlo etọn wiwà po dali lẹ. E ma bọawu nado doafọna nuyiwa mọnkọtọn, ṣigba mọwiwà nọ planmẹ yì ogbẹ̀ madopodo mẹ.—Johanu 17:3.
Dagbemẹninọ Mahopọnna Huvẹ Gbigbọmẹ Tọn
21. Huvẹ nankọ wẹ to yasana mẹhe ma nọ basi sinsẹ̀n nugbo lẹ?
21 Etẹwẹ na jọ do mẹhe ma nọgodona sinsẹ̀n-bibasi nugbo lẹ go? Yé na jiya huvẹ he ylan hugan tọn—yèdọ huvẹ gbigbọmẹ tọn! “Azán lẹ wá,” wẹ Oklunọ Nupojipetọ Jehovah dọ, “na yẹn na do huvẹ de hlan aigba lọ mẹ, huvẹ akla tọn de ma gba, mọ nugbla osin tọn de ma gba, ṣigba sisè ohó OKLUNỌ tọn lẹ tọn.” (Amọsi 8:11) Mẹylọhodotọklisti to oyà huvẹ gbigbọmẹ tọn mọnkọtọn ji. Ṣigba ahundoponọ he tin to ṣẹnṣẹn etọn lẹ sọgan doayi dagbemẹninọ gbigbọmẹ tọn omẹ Jiwheyẹwhe tọn lẹ tọn go podọ yé to wiwọ̀ wá titobasinanu Jehovah tọn mẹ. Vogbingbọn he tin to ninọmẹ Mẹylọhodotọklisti tọn po Klistiani nugbo lẹ tọn po ṣẹnṣẹn yin didohia po gbesisọ po to hogbe Jehovah tọn lẹ mẹ dọmọ: “Doayi e go, devi ṣie lẹ na dùnú, ṣigba huvẹ na hù mìwlẹ: doayi e go, devi ṣie lẹ na nù, ṣigba nugbla na hù mìwlẹ: doayi e go, devi ṣie lẹ na jaya, ṣigba winyan na hù mìwlẹ.”—Isaia 65:13.
22. Naegbọn mí tindo whẹwhinwhẹ́n nado jaya?
22 Taidi devizọnwatọ Jehovah tọn lẹ, be dopodopo mítọn yọ́n pinpẹn awuwledainanu gbigbọmẹ tọn po dona he mí tindo lẹ po tọn ya? To whenuena mí to Biblu po owe Klistiani tọn lẹ po plọn, kavi yì opli, po plidopọ mítọn lẹ po, mí nọ jlo nugbonugbo nado jihàn homẹvivi tọn na ninọmẹ dagbe ahun mẹ tọn mítọn wutu. Mí nọ jaya na nukunnumọjẹnumẹ hezeheze Ohó Jiwheyẹwhe tọn he mí tindo, he bẹ dọdai Amọsi tọn he yin gbigbọdo gbọn Jiwheyẹwhe dali hẹn.
23. Vivi etẹ tọn wẹ mẹhe to gigopana Jiwheyẹwhe lẹ nọ dù?
23 Dọdai Amọsi tọn bẹ owẹ̀n todido tọn de hẹn na gbẹtọvi he yiwanna Jiwheyẹwhe bo jlo nado pagigona ẹn lẹpo. Mahopọnna ninọmẹ akuẹzinzan tọn mítọn dintọn kavi whlepọn he mí dona pehẹ to aihọn hunyanhunyan tọn ehe mẹ lẹ, mí mẹhe yiwanna Jiwheyẹwhe lẹ to vivi dona sọn olọn mẹ wá po núdùdù gbigbọmẹ tọn dagbe hugan po tọn dù. (Howhinwhẹn lẹ 10:22; Matiu 24:45-47) Eyin mọwẹ, be gigo lẹpo wẹ jẹna Jiwheyẹwhe, mẹhe na onú popo mí susugege na ale mítọn. Enẹwutu, mì gbọ mí ni magbe nado to gigopana ẹn po ahundopo po kakadoi. Lẹblanulọkẹyi ayajẹ tọn enẹ wẹ mí na tindo eyin mí dín Jehovah, Mẹhe nọ gbeje ahun lẹ pọ́n.
Nawẹ Hiẹ Na Na Gblọndo Gbọn?
• Ninọmẹ tẹlẹ wẹ tin to Islaeli to azán Amọsi tọn lẹ gbè?
• Nawẹ ninọmẹ ahọluduta whẹndo ao Islaeli tọn sọzẹn hẹ azán mítọn gbè tọn lẹ gbọn?
• Huvẹ heyin didọdai tẹwẹ tin todin, ṣigba mẹnu lẹ go wẹ e ma gando?
[Yẹdide to weda 21]
Islaelivi susu nọgbẹ̀ to adọkun mẹ ṣigba yé ma duvivi dagbemẹninọ gbigbọmẹ tọn
[Yẹdide to weda 23]
Na tuli devizọnwatọ whenu-gigọ́ tọn lẹ nado zindonukọn to azọ́n dagbe yetọn mẹ
[Yẹdide to weda 24, 25]
Huvẹ gbigbọmẹ tọn ma tin to omẹ ayajẹnọ Jehovah tọn lẹ ṣẹnṣẹn