Be Gbẹtọ Sọgan Doalọtena Ohẹ́n Ya?
LIVI susu gbẹtọ lẹ tọn tin to aihọn mẹ he ma jiya ohẹ́n tọn pọ́n. Yé ma dọ́ huvẹ kavi mlọ́n avivọ sinsinyẹn nù pọ́n. Ṣogan, susu to yé mẹ nọ vẹawu wamọnọ lẹ bosọ nọ dovivẹnu susu nado gọalọna yé.
Ṣigba, mẹhe tòwhan, singigọ, akúdido, po nuhahun devo lẹ po to yasana lẹ pò to oyà ohẹ́n klókló tọn ji. Ninọmẹ ehelẹ nọ hẹn ayimajai daho wá na glesi hẹntọnọ Aflika tọn lẹ. Ohẹ́n ko hẹn mẹdelẹ gánnugánnu nado jo owhé yetọn lẹ do bo sẹtẹn yì tòdaho lẹ mẹ kavi yì otò devo mẹ nado nọgbẹ̀ taidi fibẹtado-dintọ lẹ. Gbetanu delẹ ko sẹtẹn yì tòdaho lẹ mẹ na yé lẹndọ ninọmẹ gbẹzan tọn na pọnte to dọ́n wutu.
Tòdaho he gọfla po gbẹtọ po lẹ nọ saba lẹzun aisintẹn ohẹ́n tọn. Tẹnmẹ ma nọ tin sọmọ, kavi tlẹ nọ hán pete na jinukun didó. E nọ vẹawu taun nado mọ azọ́n. Mẹsusu nọ lẹzun sẹ́nhẹngbatọ na yé ma tindo todido depope ba wutu. Tòhomẹ-nọtọ susu to avigbè dó na alọgọ, ṣigba gandudu gbẹtọvi tọn lẹ ma sọgan didẹ nuhahun ohẹ́n tọn he fọ́n bo to jijideji gba. Linlinwe Mẹdekannujẹ Londres tọn (Glẹnsigbe) dlẹnalọdo linlin Plidopọ Akọta lẹ tọn he yin didetọ́n to novembre 2003 dọmọ: “Huvẹtọnọ lẹ to susu deji to aihọn lọ mẹ.” E yidogọ dọ: “Lẹdo aihọn pé nudi gbẹtọ livi 842 wẹ ma nọ dùnú gọ́ho to egbehe—podọ sọha enẹ sọ to jijideji, na gbẹtọ livi 5 wẹ huvẹ nọ sayana dogọ to whemẹwhemẹ.”
To whedelẹnu, wekantẹn alahọ Kunnudetọ Jehovah tọn lẹ tọn he tin to Afrique du Sud nọ mọ wekanhlanmẹ lẹ yí sọn mẹhe ohẹ́n klókló to kọgbidina lẹ si. Di apajlẹ, dawe de sọn Bloemfontein wlanwe dọmọ: “Yẹn ma tindo azọ́n bo nọ jajo to tòdaho lọ mẹ whedepopenu he dotẹnmẹ etọn hundote. Eyin n’ma wàmọ, mí na ba núdùdù pò na azán susu—to yidogọmẹ na avivọ sinsinyẹn he nù mí na dọ́. Azọ́n depope ma tin. Mẹsusu wẹ to lèlèsà pé gbọ̀n tòhomẹ-liho lẹ ji nado dín azọ́n po nuhe yé na dù po. N’yọ́n mẹdevo lẹ he nọ dín núdùdù to ogbó-hẹnnu lẹ mẹ. Mẹdelẹ nọ hù yede. Mẹsusu ko jẹflumẹ bo masọ tindo todido depope taidi yẹn. E taidi dọ sọgodo dózin. Be Jiwheyẹwhe, he dá mí po nuhudo lọ po nado dùnú bo dó avọ̀, ma to ehe lẹpo mọ wẹ?”
Gblọndo pekọhẹnwanamẹ tọn lẹ tin na kanbiọ he to ahunmẹduna dawe ehe lẹ. Dile hosọ he bọdego na dohia do, gblọndo ehelẹ yin mimọ to Ohó Jiwheyẹwhe tọn, Biblu mẹ.