Kanbiọ lẹ sọn Wehiatọ lẹ Dè
Naegbọn Davidi po Bati-ṣeba po ma yin hùhù na ayọdide yetọn wutu, bọ e wá yindọ viyẹyẹ yetọn lọ wẹ kú?
Osẹ́n Mose tọn dọmọ: “Eyin sunnusi de yin mimọ kinkọndopọ hẹ yọnnu wlealọna de hlan asu de, whenẹnu yé [omẹ] awe lẹ na kú, sunnu lọ he kọndopọ hẹ yọnnu lọ, po yọnnu lọ po: mọwẹ hiẹ na de oylan lọ sẹ̀ sọn Islaeli mẹ do.” (Deutelonomi 22:22) Eyin Jehovah Jiwheyẹwhe ko na dotẹnmẹ bọ whẹho Davidi po Bati-ṣeba po tọn yin nukunpedego gbọn gbẹtọvi whẹdatọ he tin to Osẹ́n lọ glọ lẹ dali wẹ, sunnu po yọnnu po he deayọ lọ lẹ na ko yin hùhù. To whenuena e yindọ gbẹtọvi whẹdatọ lọ lẹ ma sọgan yọ́n nuhe tin to ahun mẹ, nuyiwa ylanwatọ lọ lẹ tọn kẹdẹ ji wẹ whẹdida yetọn na sinai do. Ayọdide nọ biọ whẹdida okú tọn. Whẹdatọ Islaeli tọn lẹ ma yin dotẹnmẹna nado jona ylando enẹ gba.
To alọ devo mẹ, Jiwheyẹwhe nugbo lọ sọgan mọ nuhe tin to ahun mẹ lẹ, bo jona ylando lẹ eyin e mọ whẹwhinwhẹ́n depope nado wàmọ. Na Davidi he Jehovah ko basi alẹnu Ahọluduta tọn hẹ go wẹ whẹho lọ gando wutu, E basi dide nado yinuwa to aliho he gbọnvo mẹ bo didẹ whẹho lọ na ede. (2 Samuẹli 7:12-16) “Whẹdatọ aihọn lẹpo tọn” tindo jlọjẹ nado basi dide mọnkọtọn.—Gẹnẹsisi 18:25.
Etẹwẹ Jehovah mọ to whenuena e gbeje ahun Davidi tọn pọ́n? Nukinkan aga tọn Psalm 51tọ lọ tọn dọ dọ psalm ehe do numọtolanmẹ Davidi tọn lẹ hia “whenuena Natani yẹwhegán wá e dè, godo he e yìhọ do Bati-ṣeba.” Psalm 51:1-4 dọmọ: “Jiwheyẹwhe E, walẹblanuna mi, kẹdẹdi dagbewanyi towe: kẹdẹdi lẹblanu bibọ towe susu tọn, gbidi tasinyẹn ṣie sẹ̀. Klọ́ mi sọn ylanwiwa ṣie mẹ patapata; bosọ lẹ̀ mi wé sọn ylando ṣie mẹ. Na yẹn yigbe tasinyẹn ṣie tọn: whepoponu wẹ ylando ṣie sọ tin to nukọn ṣie. Hiẹ, hiẹ dopo kẹdẹ go wẹ yẹn waylan do, bosọ wà ylankan nẹ to nukọn towe.” Jehovah na ko pọ́n awubla sinsinyẹn he tin to ahun Davidi tọn mẹ ehe hlan taidi ohia lẹnvọjọ nujọnu tọn bo basi dide dọ ehe yin dodonu de nado do lẹblanu hia ylanwatọ lọ lẹ. Humọ, Davidi lọsu yin omẹ lẹblanunọ de, podọ lẹblanunọ lẹ nọ mọ lẹblanu yí sọn Jehovah dè. (1 Samuẹli 24:4-7; Matiu 5:7; Jakobu 2:13) Enẹwutu, to whenuena Davidi yigbe ylando etọn tọn, Natani dọna ẹn dọmọ: “OKLUNỌ ga ko sọ de ylando towe sẹ̀; hiẹ ma na kú gba.”—2 Samuẹli 12:13.
Davidi po Bati-ṣeba po ma na họ̀ngán sọn kọdetọn ylankan ylando yetọn tọn lẹpo mẹ gba. Natani dọna Davidi dọmọ: “Na gbọn owalọ towe dali hiẹ ko na hodọnu kẹntọ OKLUNỌ tọn lẹ nado zánnu wutu, ovi lọ ga he yè ji hlan we na kú dandan.” Mahopọnna dọ Davidi blanù bo nọ̀ aluẹmẹ na azán ṣinawe ovi yetọn lọ jẹazọ̀n bo kú.—2 Samuẹli 12:14-18.
E nọ vẹawuna mẹdelẹ nado mọnukunnujẹ nuhewutu viyẹyẹ lọ do kú mẹ, to whenuena e yindọ Deutelonomi 24:16 dọ dọ: “Ovi lẹ ma na yin hùhù na otọ́ lẹ gba.” Ṣigba mí dona flindọ eyin whẹho lọ ko yin nukunpedego gbọn gbẹtọvi whẹdatọ lẹ dali wẹ, mẹjitọ lọ lẹ po ovi he tin to adọ̀ mẹ lọ po wẹ na ko kú to pọmẹ. Podọ okú ovi lọ tọn sọgan ko gọalọna Davidi nado mọ obá he mẹ Jehovah gblehomẹ do ylando etọn hẹ Bati-ṣeba go jẹ to aliho he họnwun mẹ dogọ. Mí sọgan deji dọ Jehovah didẹ whẹho lọ to aliho dodo tọn mẹ, na “pipé wẹ aliho etọn.”—2 Samuẹli 22:31.
[Yẹdide to weda 31]
Davidi do lẹnvọjọ nujọnu tọn hia