Pọndohlan Voovo lẹ Gando Azọ́n Go — WESẸDOTẸN INTẸNẸT JI TỌN Watchtower Tọn

Pọndohlan Voovo lẹ Gando Azọ́n Go

“Azọ́nwiwa—Azọ́nwiwa! Homẹhunnu daho wẹ e nọ yin nado yọnẹn dọ azọ́n gbẹ́ pò nado wà.”—Wekantọ, Katherine Mansfield (1888-1923).

BE HIẸ kọngbedopọ hẹ pọndohlan he sọawuhia tofi gando azọ́nwiwa go ya? Nukun tẹwẹ hiẹ lọsu titi nọ yí do pọ́n azọ́nwiwa? Be hiẹ nọ lẹndọ onú sinsinyẹn he vẹawu nado doakọnna na ojlẹ dindẹn whẹpo gbọjẹ-whenu sẹfifo tọn lẹ nido wá wẹ e yin ya? Kavi, be owanyi he a tindo na azọ́n towe ko sinyẹn sọmọ bọ a ko dibla lẹzun afanumẹ etọn wẹ ya?

Suhugan gbẹtọ lẹ tọn wẹ nọ yí adà daho hugan azán yetọn lẹ tọn zan nado wazọ́n. Fie mí nọ nọ̀ po lehe mí nọ nọgbẹ̀ gbọn po sọgan sinai do azọ́n wunmẹ he mí nọ wà ji. Sọn jọja whenu jẹ gbọjẹ gaa whenu, mẹsusu nọ mọdọ azọ́n wẹ yin yanwle dopo gee lọ he nọ deanana gbẹzan yetọn hugan. Delẹ to mí mẹ nọ mọ pekọ daho to azọ́n mítọn mẹ. Mẹdevo lẹ nọ yọ́n nujọnu-yinyin azọ́n tọn gbọn akuẹ kavi yindidi he yè sọgan mọ sọn e mẹ dali, to whenuena mẹdevo lẹ nọ pọ́n azọ́n taidi nude nado hẹn alọnu ján poun kavi nuhe tlẹ nọ gú whenu namẹ.

Mẹdelẹ tin he nọ wazọ́n nado sọgan kánsiọ to whenuena mẹdelẹ ko lẹzun afanumẹ azọ́n tọn to gbẹ̀mẹ; mẹdevo lẹ nọ kú to azọ́n kọ̀n kavi na azọ́n wutu. Di dohia, sọgbe hẹ linlin Plidopọ Akọta lẹ tọn agọe tọn de, azọ́n nọ hẹn awufiẹsa po okú po wá “hú awhàn kavi amasin adínọ po ahàn sinsinyẹn ṣiṣizan po dopọ.” To zẹẹmẹ bibasi do ehe ji whenu, linlinwe Londres tọn The Guardian na linlin dọmọ: “Hugan gbẹtọ livi donu awe wẹ asidan kavi awutu he gando azọ́n go lẹ nọ hù to whemẹwhemẹ . . . Afínfín, osin adínọ lẹ, awhá, po yozò po [to] azọ̀n agbasa wiwọ̀ tọn, ahunzọ̀n po nujẹmẹji po hẹnwa.” Adà he hiọawu awe devo to ninọmẹ azọ́nwiwa tọn egbezangbe tọn lẹ mẹ wẹ aṣa lọ nado hẹn yọpọvu lẹ wà azọ́n he hugan yé lẹ podọ hinhẹn gbẹtọ lẹ gánnu-gánnu nado wà azọ́n sinsinyẹn lẹ.

Humọ, nuyiwadomẹji de tin he walọyizan gbẹtọ tọn plọntọ Steven Berglas ylọ dọ “nuṣikọ sinsinyẹn.” E dọhodo azọ́nwatọ vivẹnunọ lọ ji he ko jẹ ogántẹn he yiaga hugan to agbasazọ́n etọn mẹ kiki nado wá tindo numọtolanmẹ “obu sinsinyẹn, ayimajai, flumẹjijẹ kavi apọṣimẹ tọn na e mọdọ ewọ ko yin wiwle do omọ̀ agbasazọ́n tọn, kavi aliho azọ́nwiwa tọn de mẹ, he mẹ e ma sọgan tọ́nsọn kavi mọ pekọ apọ̀nmẹ tọn te wutu.”

Azọ́n Sinsinyẹn Wiwà po Azọ́nwiwa Mapote Po

To aihọn de mẹ fie mẹsusu nọ wazọ́n na ganhiho susu te, onú dagbe wẹ e yin nado yọ́n vogbingbọn he tin to azọ́n sinsinyẹn-watọ lẹ po azọ́n mapote-watọ lẹ po ṣẹnṣẹn. Azọ́n mapote-watọ susu nọ pọ́n azọ́nwatẹn taidi bẹtẹn de to aihọn owùnọ he gọ́ na kosọ ylankan de mẹ; azọ́n sinsinyẹn-watọ lẹ nọ pọ́n azọ́nwiwa taidi dandannu de he nọ namẹ pekọ to whedelẹnu. Azọ́n mapote-watọ lẹ nọ na dotẹnmẹ azọ́n nado yitẹn to adà gbẹzan tọn he pò lẹpo si; azọ́n sinsinyẹn-watọ lẹ nọ yọ́n whenue yé dona doalọte, bo diọada to apọ̀nmẹ, podọ di apajlẹ bo tin to hùnwhẹ oflin alọwle tọn yetọn tẹnmẹ kakati nado tin to azọ́n mẹ. Azọ́n mapote-watọ lẹ nọ mọ pekọ to azọ́nwiwa zẹjlẹgo mẹ bọ apàpà nọ sọ́ yé to e kọ̀n; azọ́n sinsinyẹn-watọ lẹ ma nọ wàmọ.

Aihọn egbehe tọn hẹn vogbingbọn he tin to aliho azọ́nwiwa tọn awe lọ lẹ ṣẹnṣẹn dózin na e nọ hẹn azọ́nwiwa zẹjlẹgo sọawuhia taidi onú dagbe wutu. Internet po alokan apòmẹ tọn lẹ po sọgan zọ́n bọ dogbó he tin to azọ́nwatẹn po whégbè po ṣẹnṣẹn ma na họnwun ganji ba. To whenuena e yindọ fidepope sọgan lẹzun azọ́nwatẹn bọ ogàn depope mẹ sọgan lẹzun azọ́n-ganmẹ, mẹdelẹ na dibla hù yedelẹ do apò na azọ́n wutu.

Nawẹ mẹdelẹ nọ yinuwa hlan walọyizan he ma sọgbe enẹ gbọn? Nuplọnmẹtọ lẹdo tọn lẹ ko doayi e go dọ mẹhe nọ wazọ́n zẹjlẹgo bo tin to ayimajai sinsinyẹn mẹ lẹ nọ tẹnpọn nado hẹn gbigbọnọ-yinyin biọ azọ́nwatẹn bo nọ ṣaka agbasazọ́n dopọ hẹ sinsẹ̀n. Linlinwe San Francisco Examiner na linlin dọ “gbigbọnọ-yinyin ṣiṣakadopọ hẹ agbasazọ́n ko lẹzun aṣa he gbayipe de.”

Gando Silicon Valley go, heyin ahọnkan azọ́n nuyọnẹn wintinwintin he to zoji lẹ tọn de to États-Unis, linlin agọe tọn de dọmọ: “To whenuena azọ́ngán lẹ to didoayi e go dọ húnglintẹn lẹ to jijẹvọ na azọ́nwatọ lẹ to yinyin yinyan wutu, suhugan húnglintẹn lẹ tọn wẹ nọ gọ́ to oplọn Biblu whèjai tọn lẹ tẹnmẹ.” Mahopọnna zẹẹmẹ depope he enẹ sọgan tindo, mẹsusu lẹdo aihọn pé wẹ ko mọdọ Biblu nọ yinuwado pọndohlan yetọn gando azọ́n go ji to aliho dagbe mẹ, bọ ehe nọ hẹn yé tindo pọndohlan jlẹkaji tọn to gbẹ̀mẹ.

Nawẹ Biblu sọgan gọalọna mí nado tindo pọndohlan jlẹkaji tọn gando azọ́n go gbọn? Be nunọwhinnusẹ́n Owe-wiwe tọn depope tin he sọgan gọalọna mí nado pehẹ avùnnukundiọsọmẹnu he nọ sọawuhia to agbasazọ́n mẹ to egbehe lẹ po kọdetọn dagbe po ya? Hosọ he bọdego na dọhodo kanbiọ ehelẹ ji.