Kanbiọ lẹ sọn Wehiatọ lẹ Dè

Be hodidọ lọ “e sọgan yin” he tin to Zẹfania 2:3 mẹ dohia dọ devizọnwatọ Jiwheyẹwhe tọn lẹ ma sọgan tindo nujikudo dọ yé na mọ ogbẹ̀ madopodo yí wẹ ya?

Wefọ lọ hia dọmọ: “Mì dín OKLUNỌ, mì homẹmiọnnọ aigba lọ tọn lẹ, he ko basi whẹdida etọn; mì dín dodo, mì dín homẹmiọn: e sọgan yin mì na yin whiwhla to azán adi OKLUNỌ tọn tọn gbè.” Naegbọn wefọ ehe dọ dọ “e sọgan yin”?

Nado mọnukunnujẹ aliho he mẹ Jehovah na yinuwa hẹ nugbonọ etọn lẹ te to Amagẹdọni mẹ, alọgọnamẹnu wẹ e yin nado flin nuhe Biblu plọnmẹ gando nuhe Jiwheyẹwhe na wà na mẹhe kú jẹnukọnna ojlẹ whẹdida tọn enẹ lẹ go. Delẹ to yé mẹ na yin finfọnsọnku taidi nudida gbigbọnọ lẹ he tindo ogbẹ̀ jọmaku to olọn mẹ, bọ mẹdevo lẹ na yin finfọnsọnku to aigba ji po todido lọ po nado nọgbẹ̀ kakadoi to Paladisi mẹ. (Johanu 5:28, 29; 1 Kọlintinu lẹ 15:53, 54) Eyin Jehovah flin nugbonọ etọn he kú jẹnukọnna Amagẹdọni lẹ bo dona yé, ayihaawe ma tin dọ ewọ nasọ yinuwa to aliho dopolọ mẹ hẹ devizọnwatọ etọn he to gbẹnọ to azán homẹgble etọn tọn gbè lẹ.

Hogbe gbọdo apọsteli Pita tọn lẹ sọ yin tulinamẹ tọn. E wlan dọmọ: “[Jiwheyẹwhe] whlẹn Noa po omẹ ṣinawe po, yẹwhehodọtọ dodo tọn, whenuena e túntún osin kọ̀n do aihọn mẹylankan lẹ tọn ji; bosọ diọ tòdaho Sọdọmi po Gọmọla po tọn lẹ zun afín, whenuena e yí gbakija do gblewhẹdo yé, . . . bosọ whlẹn Lọti dodonọ . . . [Jehovah] sọ yọ́n le e na whlẹn ayihawiwenọ lẹ do sọn whlepọn mẹ, bosọ yí mawadodonọ lẹ whlá hlan whẹdazangbe nado doyana.” (2 Pita 2:5-9) Dile etlẹ yindọ Jehovah hẹn vasudo wá mẹylankan lẹ ji to hohowhenu, e basi hihọ́na Noa po Lọti po he sẹ̀n ẹn po nugbonọ-yinyin po. Jehovah nasọ whlẹn ayihawiwenọ kavi mẹhe ze yede jo na ẹn lẹ sọn vasudo he ja mẹylankan lẹ ji to Amagẹdọni mẹ. “Gbẹtọ susugege” he bẹ dodonọ lẹ hẹn na luntọ́n.—Osọhia 7:9, 14.

Enẹwutu, e taidi dọ, hodidọ lọ “e sọgan yin” ma yin yiyizan to Zẹfania 2:3 mẹ nado do ayihaawe hia gando nugopipe Jiwheyẹwhe tọn nado whlẹn mẹhe tindo nukundagbe etọn lẹ go gba. Kakatimọ, eyin mẹde jẹ dodo po homẹmiọn po dín ji, e nọ lẹzun nuhe yọnbasi dọ omẹ mọnkọtọn ni yin whiwhla to azán homẹgble Jehovah tọn gbè. Whlẹngán mẹdopodopo tọn na sinai do vivẹnudido etọn nado to homẹmiọn po dodo po dín zọnmii ji.—Zẹfania 2:3.

[Yẹdide to weda 31]

‘Jehovah yọ́n le e na whlẹn ayihawiwenọ lẹ do sọn whlepọn mẹ’