Mọaleyi sọn Nuplọnmẹ Dagbe Hugan He Tin lọ Mẹ!

BIBLU do Jehovah Jiwheyẹwhe hia taidi Didatọ nulẹpo tọn, kakajẹ gbẹtọvi lẹ lọsu ji. (Gẹnẹsisi 1:27; Osọhia 4:11) Taidi Nuplọnmẹtọ Daho lọ, e plọnnu asu po asi po tintan lọ, yèdọ Adam po Evi po, bo wleawuna yé nado nọgbẹ̀ to jipa whanpẹnọ lọ mẹ to Edẹni. Lẹndai etọn wẹ nado zindonukọn to nupinplọn yé podọ to nukunpipedo yé go kakadoi mẹ. (Gẹnẹsisi 1:28, 29; 2:15-17; Isaia 30:20, 21) Yí nukun homẹ tọn do pọ́n enẹ!

Ṣigba e blawu dọ asu po asi po tintan lọ hẹn nulẹpo gble. Tolivivẹ yetọn wẹ hẹn hẹngble walọyizan tọn po agbasamẹ tọn po wá gbẹtọvi lẹ ji. (Gẹnẹsisi 3:17-19; Lomunu lẹ 5:12) To alọdindlẹndo mẹhe nọgbẹ̀ to ojlẹ vude to didá gbẹtọvi tọn godo lẹ mẹ, Biblu dọmọ: “OKLUNỌ sọ mọ kanyinylan gbẹtọ tọn sù gbau to aigba mẹ, podọ ayilinlẹn ayiha etọn mẹ tọn lẹpo oylan dodo wẹ to whepoponu.”—Gẹnẹsisi 6:5.

Nudi owhe 4 500 ko wayi sọn whenue gbọ́n Jehovah ko wá tadona lọ kọ̀n dọ ayilinlẹn gbẹtọvi tọn lẹpo wẹ nado wà oylan to whepoponu, podọ ninọmẹ gbẹtọvi tọn ko sọ ylan deji todin hugan gbede pọ́n tọn. Winyan ma nọ hù mẹsusu nado dolalo, jẹajo, kavi wà danú do mẹdevo lẹ. Nuhahun lẹ to agayi deji egbesọegbesọ, to whenuena mẹtọnhopọn na gbẹtọ hatọ mẹtọn fọ́n bo to doyi. Be haṣinṣan gbẹtọvi lẹ tọn, etlẹ yin to hagbẹ whẹndo tọn lẹ ṣẹnṣẹn ma tin to bẹwlu nujọnu tọn de mẹ ya? Ṣigba e ma yin Jiwheyẹwhe wẹ yè na dowhẹ na ninọmẹ egbehe tọn lẹ gba, podọ nuhahun egbehe tọn lẹ nọ duahunmẹna ẹn. Jehovah nọ tindo ojlo to dagbemẹninọ gbẹtọvi lẹ tọn mẹ to whelẹponu, podọ e ko wleawufo nado plọn mẹhe nọ dín anademẹ etọn lẹ nado tindo gbẹzan ayajẹnọ. To nudi owhe 2 000 die wayi, e do Visunnu etọn Jesu Klisti hlan aigba ji bo do ojlo Etọn hia nado plọn mẹhe jlo dọ gbẹzan yetọn ni tindo kọdetọn dagbe lẹ. Jesu ze apajlẹ mẹpinplọn tọn pipé de dai na e ko yin pinplọn gbọn Nuplọnmẹtọ Daho lọ dali na owhe madosọha lẹ wutu.

Sinsẹ̀n Klistiani Nugbo Tọn—Asisa Mẹpinplọn Tọn De

Sinsẹ̀n Klistiani nugbo tọn, he yin aliho gbẹzan tọn de he sinai do owanyi ji yin didoai gbọn Jesu Klisti dali. To sinsẹ̀n ehe mẹ, linlẹn po walọ lẹpo po wẹ dona sọgbe hẹ ojlo Jiwheyẹwhe tọn nado hẹn gbégbò po pipá po wá na oyín Jiwheyẹwhe tọn. (Matiu 22:37-39; Heblu lẹ 10:7) Jehovah, Otọ́ Jesu tọn wẹ deanana nuplọnmẹ etọn lẹ gando aliho gbẹninọ tọn ehe go. To Johanu 8:29 mẹ, mí hia gando godonọnamẹ he Jesu mọyi sọn Jiwheyẹwhe dè go dọmọ: ‘Ewọ mẹhe do mi hlan tin dè e: Otọ́ lọ ma jo yẹn dopo do gba; na yẹn to onú heyin homẹhun hlan ẹn lẹ wà to whepoponu.’ Mọwẹ, Jesu tindo godonọnamẹ po anademẹ Otọ́ etọn tọn po to sinsẹ̀nzọn etọn pete whenu. Hodotọ dowhenu Jesu tọn lẹ ma gbọagba anademẹ tọn nado pehẹ awusinyẹnnamẹnu gbẹ̀mẹ tọn lẹ gba. Jehovah plọn yé gbọn Ovi etọn gblamẹ. Nuplọnmẹ po apajlẹ Jesu tọn lẹ po hihodo hẹn yé nado wleawuna jẹhẹnu dagbe lẹ. Ehe yin nudopolọ na devi etọn egbezangbe tọn lẹ.—Pọ́n apotin lọ “Nuyiwadomẹji Jesu po Nuplọnmẹ Etọn lẹ po Tọn,” to weda 6.

Adà ayidego sinsẹ̀n Klistiani nugbo tọn de wẹ yindọ e nọ plọnmẹ to aliho de mẹ he nọ yinuwado linlẹn po ahun gbẹtọ lẹ tọn po ji bo nọ whàn yé nado basi diọdo lẹ na yede titi. (Efesunu lẹ 4:23, 24) Nado na apajlẹ dopo poun, mì gbọ mí ni gbadopọnna nuhe Jesu plọnmẹ gando nugbonọ-yinyin hlan alọwlemẹ mẹtọn go. E dọmọ: “Mì ko sè dọ yè dọmọ, Hiẹ ma na deayọ: ṣigba yẹn dọ hlan mì, dọ, Eyin mẹdepope pọ́n yọnnusi de nado wà nugbigble hẹ ẹ, e ko deayọ hẹ ẹ to ayiha etọn mẹ dote.” (Matiu 5:27, 28) Gbọn hogbe ehelẹ dali, Jesu to didohia devi etọn lẹ dọ ahun dona yin hinhẹn do wiwe ji, podọ dọ linlẹn po ojlo he ma sọgbe lẹ po tintindo sọgan hẹn kọdetọn ylankan lẹ wá, eyin mẹlọ ma tlẹ ko joawuna yé. Be e ma yin nugbo wẹ dọ linlẹn he ma sọgbe lẹ tintindo sọgan dekọtọndo nuyiwa he Jiwheyẹwhe gbẹwanna lẹ po dehe nọ gbleawuna mẹdevo lẹ po mẹ ya?

Enẹwutu wẹ Biblu na ayinamẹ dọmọ: “Mì yin mẹkọndopọ hlan aihọn he blo; ṣigba mì ni yin mẹdiọadana gbọn hinhẹn jẹ yọyọ ayiha mìtọn tọn dali, na mì nido mọdona nuhe ojlo Jiwheyẹwhe tọn he yọ́n, alọkẹyi, bosọ sọgbe nẹ yin.” (Lomunu lẹ 12:2) ‘Be nuhe mẹde to pinplọn sọgan hẹn ayiha jẹ yọyọ kavi jla linlẹn etọn do nugbonugbo ya?’ wẹ hiẹ sọgan kanse. Linlẹn jijlado nọ biọ dọ mí ni ze ayiha mítọn do nudevo ji gbọn ayidonugo nina nunọwhinnusẹ́n po anademẹ he tin to Ohó Jiwheyẹwhe tọn mẹ lẹ po dali. Mí sọgan jẹ yanwle ehe kọ̀n eyin mí kẹalọyi nuplọnmẹ he Jiwheyẹwhe wleawuna to Ohó etọn mẹ.

Yin Whinwhàn Nado Diọ

“Ohó Jiwheyẹwhe tọn tin to ogbẹ̀, e dohuhlọn.” (Heblu lẹ 4:12) E gbẹ́ pò to nuyiwadomẹji huhlọnnọ de tindo do gbẹtọ lẹ ji, bo gbọnmọ dali dohia dọ e gbẹsọ yọn-na-yizan to egbehe. E sọgan whàn mẹde nado diọ gbẹzan etọn, kẹalọyi sinsẹ̀n Klistiani nugbo tọn, bo wleawuna jẹhẹnu dagbe lẹ. Apajlẹ he bọdego ehelẹ do nuhọakuẹ-yinyin nuplọnmẹ Biblu tọn hia.

Emilia he yin nùdego to hosọ he jẹnukọn lọ mẹ dọmọ: “Vivẹnu dee titi tọn kẹdẹ ma pé nado jla ninọmẹ lẹ do to whẹndo ṣie mẹ. N’wá mọnukunnujẹemẹ to whenuena yẹn jẹ Biblu plọn hẹ Kunnudetọ Jehovah tọn lẹ ji dọ todido gbẹsọ tin, bọ n’jẹ walọyizan ṣie diọ ji. Yẹn plọn nado nọ fahomẹ dogọ bo ma nọ joawuna homẹgble ba. To godo mẹ, asu ṣie kọnawudopọ hẹ mi to oplọn lọ mẹ. E ma bọawuna ẹn nado doalọtena ahànnunu, ṣigba e penugo bo wàmọ. Ehe gọalọ nado vọ́ alọwle mítọn bẹjẹeji to aliho dagbe mẹ. Mí ko lẹzun Klistiani ayajẹnọ lẹ todin bo to nunọwhinnusẹ́n dagbe Biblu tọn lẹ dó do ahun ovi mítọn lẹ tọn mẹ.”—Deutelonomi 6:7.

Nuplọnmẹ sinsẹ̀n Klistiani nugbo tọn sọgan tún mẹde dote sọn walọ gblezọn lẹ po gbẹzan mawé po si. Manuela mọ nugbo-yinyin ehe tọn. To whenuena e tindo owhe 13, e họ̀njẹgbé bo jẹ marijuana zan ji. To nukọnmẹ e wá jẹ amasin adínọ héroïne zan ji. E tindo kọndopọ zanhẹmẹ tọn hẹ sunnu lẹ po yọnnu lẹ po nado mọ adọtẹn po akuẹ po. To ojlẹ delẹ mẹ, ajò wẹ Manuel nọ jẹ nado dùnú. Dibla yindọ whelẹponu wẹ e nọ tin to nuyiwadomẹji amasin adínọ tọn glọ. Walọ danuwiwa tọn etọn zọ́n bọ e nọ yin zizedo ganpamẹ whẹwhẹ. E nọ̀ ganpamẹ na owhe ẹnẹ to ojlẹ de mẹ, podọ finẹ wẹ e biọ ogbẹ́ he nọ sà awhànfunnu lẹ to nuglọ de mẹ te. To alọwle etọn godo, aliho gbẹninọ Manuel tọn gbẹ́ hẹn nuhahun susu wá na ẹn. E dọmọ: “Mí wá mọ míde to koklopó hoho de mẹ. Yẹn gbẹsọ nọ flin whenuena asi ṣie nọ to nuda to adò bliki tọn de ji. Ninọmẹ mítọn sinyẹn sọmọ bọ hagbẹ whẹndo ṣie titi tọn lẹ dotuhomẹna asi ṣie nado gbẹ́ mi.”

Etẹwẹ diọ gbẹzan etọn? Manuel gblọn dọmọ: “Mẹyinyọnẹn ṣie de hẹn ohó Biblu tọn wá mí dè. Yẹn kẹalọyi dlapọn etọn nado dohia ẹ poun dọ Jiwheyẹwhe de ma tin he tindo ojlo to gbẹtọvi lẹ mẹ. N’lẹndọ gbẹzan ṣie titi sọgan dekunnu enẹ tọn. E paṣa mi nado mọdọ Kunnudetọ lọ tindo homẹfa bosọ jọmẹ, enẹwutu yẹn kẹalọyi oylọ etọn nado yì opli to Plitẹnhọ Ahọluduta tọn mẹ. Dile etlẹ yindọ delẹ to mẹhe tin to finẹ lẹ mẹ yọ́n mẹhe hunkọ yẹn yin, yé dọnudo mi to aliho họntọnjihẹmẹ tọn mẹ. Yé ma klan mi dovo. Ehe miọnhomẹna mi tlala. Yẹn yin whinwhàn sọmọ bọ n’basi dide nado họ̀nna amasin adínọ to aliho lẹpo mẹ bo dín azọ́n jọ azọ́n de. Osun ẹnẹ to whenuena n’bẹ plọnmẹ Biblu ṣie jẹeji godo, yẹn pegan nado tindo mahẹ to azọ́n yẹwhehodidọ tọn mẹ, podọ osun ẹnẹ to enẹgodo, yẹn yin bibaptizi taidi dopo to Kunnudetọ Jehovah tọn lẹ mẹ.”

Ale tẹwẹ sinsẹ̀n Klistiani nugbo tọn hẹnwa na Manuel po whẹndo etọn po? “Yin e ma yin nuplọnmẹ Biblu tọn he n’mọyi lẹ tọn wutu wẹ, yẹn na ko kú hoho. Aliho gbẹninọ tọn he Jesu plọnmẹ lọ wẹ kọ̀n whẹndo ṣie dopọ na mi. E gọalọna ovi ṣie awe lẹ ma nado tindo numimọ he yẹn tindo to jọja-whenu ṣie mẹ lẹ. Yẹn nọ doawagun bosọ nọ gọ́ na pẹdido hlan Jehovah na haṣinṣan dagbe he yẹn tindo hẹ asi ṣie todin. Delẹ to mẹhe yẹn ko yọnẹn dai lẹ mẹ ko pà mi bo dọna mi dọ yé lẹndọ aliho gbẹninọ tọn he hodo yẹn te todin lọ wẹ yin dehe yọnhugan.”

Gbọnvona wiwejininọ walọyizan tọn, gbẹninọ sọgbe hẹ aliho Klistiani tọn sọ nọ biọ wiwejininọ agbasa tọn ga. John, he nọ nọ̀ lẹdo hẹntọnọ lẹ tọn de mẹ to Afrique du Sud, wá mọnukunnujẹ ehe mẹ. E basi zẹẹmẹ dọmọ: “Viyọnnu mítọn ma nọ lawu na osẹ dopo to whedelẹnu, bọ depope mítọn ma nọ kiya na ehe.” Asi etọn yigbe dọ owhé yetọn ma nọ nọ̀ wiwe ji gba. Ṣigba nuplọnmẹ Klistiani tọn lẹ hẹn diọdo lẹ wá. John doalọtena gbẹdido etọn hẹ jaguda mọto-fìntọ lẹ bo jẹ ayidonugo na whẹndo etọn ji dogọ. “Mí mọnukunnujẹemẹ dọ taidi Klistiani lẹ, mí dona hẹn agbasa po avọ̀ mítọn lẹ po do wiwe ji. Yẹn yiwanna hogbe 1 Pita 1:16 mẹ tọn lẹ, ehe na mí tuli nado yin wiwe na Jehovah Jiwheyẹwhe yin wiwe wutu. Mí sọ nọ tẹnpọn todin nado nọ hẹn owhé wamọnọ tọn mítọn do wiweji.”

Hiẹ Sọgan Mọ Nuplọnmẹ Dagbe Hugan lọ Yí

Numimọ he taidi dehe yin nùdego to aga lẹ gbayipe taun. Gbẹtọ livi susu wẹ ko plọn nado nọ zan gbẹzan he pọnte de na nuplọnmẹ Biblu tọn he yé mọyi lọ wutu. Na yé yin nugbonọ po azọ́n sinsinyẹn watọ lẹ po wutu, yé nọ tindo nukundagbe azọ́nmẹyimẹdotọ yetọn lẹ tọn. Yé ko lẹzun kọmẹnu po họntọn dagbe lẹ po, bo nọ tindo ojlo to dagbemẹninọ gbẹtọ hatọ yetọn lẹ tọn mẹ. Yé ko magbe nado nọ dapana walọ gblezọn lẹ po ojlo agbasalan tọn lẹ po, enẹwutu yé nọ na ayidonugo he jẹ hlan dagbemẹninọ agbasa tọn, apọ̀nmẹ tọn podọ numọtolanmẹ tọn yetọn titi. Kakati nado to nutindo yetọn lẹ hẹngu nado hẹn pekọ wá na walọ gblezọn lẹ, yé nọ yí yé zan na dagbemẹninọ yetọn titi po whẹndo yetọn tọn po. (1 Kọlintinu lẹ 6:9-11; Kọlọsinu lẹ 3:18-23) Matin ayihaawe, kọdetọn he nọ wá sọn ayinamẹ he Jehovah na mí to Biblu mẹ lẹ hihodo mẹ nọ dohia dọ gbẹninọ sọgbe hẹ nunọwhinnusẹ́n sinsẹ̀n Klistiani nugbo tọn lẹ tọn wẹ yin aliho gbẹninọ tọn dagbe hugan lọ, he nọ namẹ nuplọnmẹ dagbe hugan he tin lọ. Biblu dọ gando mẹhe nọ nọgbẹ̀ sọgbe hẹ osẹ́n Jiwheyẹwhe tọn lẹ go dọmọ: “Nudepope e to wiwà na doale.”—Psalm 1:3.

Tudohomẹnamẹnu wẹ e yin nado yọnẹn dọ Jehovah Jiwheyẹwhe Nupojipetọ lọ tindo ojlo nado plọnnu mí. E dọ gando edetiti go dọmọ: “Yẹn wẹ OKLUNỌ Jiwheyẹwhe towe, he plọn we na ale, he plan we gbọn aliho he ji hiẹ na gbọ̀n.” (Isaia 48:17) Mọwẹ, Jehovah ko do aliho hia gbọn apajlẹ po nuplọnmẹ Ovi etọn Jesu Klisti tọn po gblamẹ. Nuplọnmẹ etọn lẹ tindo nuyiwadomẹji dagbe do gbẹzan susu mẹhe nọgbẹ̀ to ojlẹ he mẹ e nọ̀ aigba ji te lẹ tọn ji, podọ ehe sọ yin nudopolọ na susu mẹhe to gbẹnọ sọgbe hẹ nuplọnmẹ etọn to egbehe lẹ tọn. Naegbọn hiẹ ma na yí whenu zan nado plọn nususu dogọ do nuplọnmẹ ehelẹ ji? Kunnudetọ Jehovah tọn he tin to lẹdo towe mẹ lẹ na hùnhomẹ nado gọalọna we to nuplọnmẹ họakuẹ enẹ mimọyi mẹ.

[Nudọnamẹ odò tọn]

[Apotin/Yẹdide to weda 6]

Nuyiwadomẹji Jesu po Nuplọnmẹ Etọn lẹ po Tọn

Taidi ogán takuẹ-ṣinyantọ lẹ tọn, Zaṣe yí otẹn enẹ zan nado nọ sloalọna gbẹtọ paa lẹ bo nọ jẹajodo yé, bo gbọnmọ dali lẹzun adọkunnọ. Ṣigba e diọadana aliho gbẹninọ tọn etọn gbọn nuplọnmẹ Jesu tọn lẹ yíyí-do-yizan mẹ dali.—Luku 19:1-10.

Saulu Talsu tọn doalọtena homẹkẹndido Klistiani lẹ, bo diọzun Klistiani bo wá yin yinyọnẹn taidi apọsteli Paulu.—Owalọ lẹ 22:6-21; Filippinu lẹ 3:4-9.

Delẹ to Klistiani Kọlinti tọn lẹ mẹ yin ‘ogalọtọ lẹ, boṣiọ-sẹ̀ntọ lẹ, ayọdetọ lẹ, omẹ vijinu dopolọ tọn he nọ zanhẹ yedelẹ, ajotọ lẹ, nukunkẹnnọ lẹ, ahànnumunọ lẹ, mẹvlẹtọ lẹ, podọ alọslonamẹtọ lẹ’ dai. Ṣigba, to whenuena yé mọ nuplọnmẹ sinsẹ̀n Klistiani nugbo tọn yí, yé ‘yin kiklọwé, yin lilẹ̀ wé, bo yin whẹsuna to oyín Jesu Klisti Oklunọ yetọn tọn mẹ.’—1 Kọlintinu lẹ 6:9-11.

[Yẹdide to weda 7]

Biblu sọgan do lehe hiẹ na tindo kọdetọn dagbe gbọn hia we