Nuplọnmẹ Nankọ Wẹ Sọgan Hẹn Gbẹzan Towe Tindo Kọdetọn Dagbe?

BE E ko jọ pọ́n bọ nuhahun lẹ gbà ṣinyọ́n we sọmọ bọ e taidi na we dọ tọ̀sisa huhlọnnọ de wẹ to piplọ́ we jei nkọ ya? Yí nukun homẹ tọn do pọ́n lehe awufiẹsa towe na sù sọ eyin hiẹ ṣinuwa dile a to tintẹnpọn nado diahi hẹ dopo kavi humọ to nuhahun enẹlẹ mẹ! Mẹdepope ma yin jìjì po nugopipe lọ po nado nọ didẹ nuhahun lẹpo po kọdetọn dagbe po, bosọ nọ basi nudide he sọgbe lẹ to whepoponu gba. Fie nupinplọn nọ gọalọ te niyẹn. Fitẹ wẹ hiẹ sọgan mọ nuplọnmẹ he na gọalọna we nado nọ pehẹ nuhahun gbẹ̀mẹ tọn lẹ te?

Mẹsusu, yèdọ yọpọvu po mẹho po wẹ nọ pọ́n wehọmẹ-yìyì hlan taidi nuhe yin nujọnu tlala. Weyọnẹntọ delẹ tlẹ dọ dọ yé “yise mlẹnmlẹn dọ mẹde ma sọgan mọ azọ́n [dagbe] matin gbedewema wehọmẹ daho tọn de.” Ṣigba nuhudo gbẹtọvi tọn delẹ tin he nuwadotana agbasa tọn lẹ ma sọgan hẹn pekọ wá na. Di apajlẹ, be wepinplọn wehọmẹ daho tọn sọgan gọalọna we nado yin mẹjitọ, alọwlemẹ, kavi họntọn dagbe de wẹ ya? Na nugbo tọn, mẹhe nọ yin yẹyidogona na wésise yetọn wutu lẹ sọgan wleawuna jijọ ylankan delẹ, bo gboawupo nado tindo kọdetọn dagbe to gbẹzan whẹndo tọn yetọn mẹ, kavi tlẹ wá hù yede to godo mẹ.

Mẹdelẹ nọ lẹhlan sinsẹ̀n lẹ na anademẹ, nado mọ nuplọnmẹ, ṣigba yé nọ wá jẹflumẹ na yé ma nọ mọ alọgọ yọn-na-yizan lẹ nado pehẹ awusinyẹnnamẹnu gbẹ̀mẹ tọn lẹ gba. Di dohia, Emiliaa he nọ nọ̀ Mexique dọmọ: “Owhe 15 ko wayi todin he yẹn lẹndọ yẹn po asu ṣie po masọ sọgan nọpọ́ ba. Mí nọ to whẹgbè do to whelẹponu. Vivẹnudido ṣie lẹpo na ewọ nido doalọtena ahànnunu yin ovọ́. Gbọzangbọzan wẹ yẹn dona jo ovi flinflin mítọn lẹ do yede ṣo nado yì dín asu ṣie mọ. Yẹn jẹflumẹ pete to numọtolanmẹ-liho. Whlasusu wẹ n’yì ṣọṣi nado yì dín nuhe sọgan gọalọna mi nado mọ pọngbọ de na nuhahun ṣie. Dile etlẹ yindọ Biblu nọ yin yiyizan to whedelẹnu, yẹn ma sè ayinamẹ he gando ninọmẹ ṣie go tlọlọ de pọ́n gbede; mọjanwẹ mẹde masọ dọnsẹpọ mi nado dọ nuhe yẹn sọgan wà na mi do niyẹn. Aisinsin to ṣọṣi mẹ nado nọ to dọvọdọ odẹ̀ delẹ tọn basi ma hẹn pekọ wá na mi.” Mẹdelẹ sọgan jẹflumẹ eyin yé mọdọ nukọntọ sinsẹ̀n tọn yetọn lẹ ma to apajlẹ dagbe depope zedai to gbẹzan yetọn mẹ. Taidi kọdetọn de, mẹsusu ma nọ ganjẹ sinsẹ̀n go taidi fie yé sọgan mọ nuplọnmẹ he yé tindo nuhudo etọn nado tindo kọdetọn dagbe to gbẹ̀mẹ te ba.

Enẹwutu, hiẹ sọgan kanse dewe dọ, ‘Nuplọnmẹ nankọ wẹ yẹn sọgan doafọna nado tindo gbẹzan kọdetọn dagbenọ?’ Be Klistiani nugbo lẹ tindo gblọndo na kanbiọ titengbe ehe ya? Ehe wẹ na yin dogbapọnna to hosọ he bọdego mẹ.

[Nudọnamẹ odò tọn]