Nunina He Nọ Hẹn Jiwheyẹwhe Hùnhomẹ Lẹ

OTÀN lọ blawu. Ahọsi Atalia ko hò gánzinpo Juda tọn yí gbọn oklọ po hlọnhuhu po dali. Na e gbọn nuṣiwa dali lẹndọ whédutọ jọwamọ tọn lẹpo ko yin hùhù wutu, e ze ede do ofìn ji taidi ahọsi. Yọnnu devo, ahọvi-yọnnu Jehoṣeba, he yiwanna Jehovah po Osẹ́n etọn po tlala, yí adọgbigbo do ze ahọvi de whlá, yèdọ viyẹyẹ lọ Joaṣi. Jehoṣeba po asu etọn, Yẹwhenọ Daho Jehọiada po, ze whédutọ lọ whlá do fihe yé nọ nọ̀ to tẹmpli mẹ na owhe ṣidopo.—2 Ahọlu lẹ 11:1-3.

To whenuena Joaṣi tindo owhe ṣinawe, Yẹwhenọ Daho Jehọiada ko wleawufo nado yinuwa sọgbe hẹ tito etọn nado de ahọsi he hò gánzinpo yí lọ sọn ofìn ji. E de visunnu lọ sọn nuglọ bo ṣinyọ́n jẹgbakun na ẹn taidi whédutọ jlọjẹnọ ahọluduta lọ tọn. Enẹgodo nuhọ́tọ ahọlu tọn lẹ dọ̀n Ahọsi ylankan Atalia tọnjẹgbonu sọn tẹmpli lọ mẹ bo hù i, bọ mẹlẹpo mọ kọgbọ po ayajẹ po. Gbọn nuyiwa yetọn lẹ dali, Jehọiada po Jehoṣeba po yí adà daho de wà to sinsẹ̀n-bibasi nugbo hinhẹngọwa otò Juda tọn mẹ. Ṣigba nuhe sọ yin nujọnu hugan wẹ yindọ yé gọalọ nado pò hukan gandudu Davidi tọn dai, he na zindonukọn kakajẹ Mẹssia lọ ji.—2 Ahọlu lẹ 11:4-21.

Ahọlu he ṣẹṣẹ yin zizedo ofìn ji lọ lọsu ze afọdide ayidego tọn de he hẹn homẹhun Jiwheyẹwhe. Ohọ̀ Jehovah tọn tindo nuhudo vọjlado tọn taun to ojlẹ enẹ mẹ. Ojlo zogbe Atalia tọn nado yin gandutọ dopo akàn Juda tọn zọ́n bọ tẹmpli lọ yin kọgbẹ́ e go bọ adọkunnu etọn lẹ sọ yin finfin. Enẹwutu Joaṣi magbe nado vọ́ tẹmpli lọ gbá bo jla ẹ do. Madọngban, e de gbedide de tọ́n nado pli akuẹ he nuhudo etọn tin lẹpo nado jla ohọ̀ Jehovah tọn do. E dọmọ: “Akuẹ onú hihiọ [kavi wiwe] lẹ tọn lẹpo he yè hẹn biọ ohọ̀ OKLUNỌ tọn mẹ wá, to akuẹ yè zinzan mẹ, akuẹ gbẹtọ lẹ tọn na mẹhe omẹ dopodopo yin didoahina, po akuẹ lẹpo po he e biọ ayiha omẹ dopodopo tọn mẹ nado hẹnwa biọ ohọ̀ OKLUNỌ tọn mẹ, gbọ yẹwhenọ lẹ ni bẹ ẹ hlan yé, omẹ dopodopo sọn mẹyinyọnẹn etọn si: yé nasọ vọ́ tintlẹ́n ohọ̀ tọn lẹ jlado, fidepope yè na mọ tintlẹ́n de te.”—2 Ahọlu lẹ 12:4, 5.

Gbẹtọ lẹ basi nunina sọn ojlo mẹ wá. Ṣigba, yẹwhenọ lẹ ma yí ahundopo do hẹn azọngban yetọn di nado jla tẹmpli lọ do gba. Enẹwutu, ahọlu lọ basi dide nado penukundo nulẹ go na ede bo degbè dọ nunina lẹpo ni nọ yin zizedo apotin vonọtaun de mẹ tlọlọ. E ze azọngban lọ do alọmẹ na Jehọiada, podọ kandai lọ dọmọ: “Jehọiada yẹwhenọ lọ yí [apotin] de, bo tọ́n nùvo de to nùsu etọn mẹ, bo ze e do agbà lọ kọ̀n, do adà adusi ji, dile omẹ de biọ ohọ̀ OKLUNỌ tọn mẹ ja: yẹwhenọ he to ohọ̀n họ́ lẹ nọ yí do finẹ mẹ akuẹ he yè hẹnwa biọ ohọ̀ OKLUNỌ tọn mẹ lẹpo. E sọ yinmọ, whenuena yé mọ dọ akuẹ yin gege to [apotin] lọ mẹ, wẹ wekantọ ahọlu tọn lọ po yẹwhenọ daho po hẹji wá, yé sọ bẹ daga do apò lẹ mẹ bo dọ akuẹ he yè mọ to ohọ̀ OKLUNỌ tọn mẹ lọ. Yé sọ yí akuẹ he yè jlẹ lọ do alọ yé he wà azọ́n lọ lẹ tọn mẹ, he tindo nugopinpọn ohọ̀ OKLUNỌ tọn tọn lọ: yé sọ yí ì do suahọ hlan atinpatọ lẹ po họgbátọ lẹ po, he [wà anazọ́n] to ohọ̀ OKLUNỌ tọn go lẹ, podọ hlan họ̀dotọ lẹ po pipatọ zannu tọn lẹ po, na hihọ̀ lidemẹ po zannu pipà po nado vọ́ tintlẹ́n ohọ̀ OKLUNỌ tọn tọn lẹ jlado, podọ na ehe yè bẹ dai na ohọ̀ lọ nado nọ vọ́ ẹ jlado.”—2 Ahọlu lẹ 12:9-12.

Omẹ lọ lẹ yinuwa po ahun lẹpo po. Ohọ̀ sinsẹ̀n-bibasi Jehovah tọn yin jijlado na sinsẹ̀n-bibasi etọn nido sọgan zindonukọn to aliho yẹyi tọn mẹ. Gbọnmọ dali, akuẹ he yin nina lọ lẹpo yin yiyizan dile e jẹ do. Ahọlu Joaṣi hẹn ẹn diun dọ e yì domọ!

To egbehe, adà yinukundomọ titobasinanu Jehovah tọn nọ yí sọwhiwhe do hẹn ẹn diun dọ akuẹ he yin nina lẹpo yin yiyizan ganji nado nọgodona nukọnyiyi sinsẹ̀n-bibasi Jehovah tọn, podọ Klistiani nugbo lẹ ko yinuwa dile Islaelivi enẹlẹ wà do to hohowhenu—yèdọ po ahun lẹpo po. Vlavo hiẹ tin to mẹhe basi nunina na nukọnyiyi Ahọluduta lọ tọn lẹ mẹ to owhe sinsẹ̀nzọn tọn he wayi mẹ. Mì gbọ mí ni pọ́n aliho he mẹ nunina towe ko yin yiyizan te delẹ.

ZINJẸGBONU

Lẹdo aihọn pé, owe he bọdego helẹ yin zinzinjẹgbonu nado yin pinplọn bo yin mimá:

• Owe: 47 490 247

• Alọnuwe apòmẹ tọn: 6 834 740

• Alọnuwe: 167 854 462

• Sunzanhiawe: 5 405 955

• Linlinnamẹwe: 1 179 266 348

• Alọnuwe pẹvi: 440 995 740

• Video: 3 168 611

Azọ́n wezinzin tọn nọ yin wiwà to Aflika, Agewaji, Ṣẹnṣẹn, po Hùwaji Amelika tọn po, Asie, Europe, podọ to lopo Pacifique tọn lẹ ji—otò 19 to lẹndopọ mẹ.

“Yẹn nọ yin Katelyn May. Owhe ṣinatọ̀n-mẹvi wẹ yẹn. N’tindo akuẹ dọla Amelika tọn 28 [nudi 15 000F CFA] bọ e na jlo mi dọ mì ni yí ì do suahọ maṣinu wezinzin tọn lẹ tọn. Mẹmẹyọnnu mìtọn pẹvi, Katelyn.”

“Mí basi opli whẹndo tọn de gando maṣinu wezinzin tọn yọyọ lọ lẹ go. Ovi mítọn lẹ, he tindo owhe 11 po 9 po, basi dide nado yí sọn akuẹ he yé ko jọ lẹ mẹ nado sọgan yí adà yetọn wà. Homẹ mítọn hùn nado do nunina yetọn po mílọsu tọn po hlan.”

HỌGBIGBÁ

Azọ́n họgbigbá tọn he yin wiwà nado nọgodona nuwiwa Kunnudetọ Jehovah tọn lẹ tọn delẹ die:

• Plitẹnhọ Ahọluduta tọn to otò wamọnọ lẹ mẹ: 2 180

• Plitẹnhọ Plidopọ tọn: 15

• Alahọ: 10

• Mẹdezejotọ tògodo tọn lẹ to sinsẹ̀nzọn whenu-gigọ́ tọn mẹ: 2 342

“Mí basi opli tintan to Plitẹnhọ Ahọluduta tọn mítọn yọyọ lọ mẹ to sẹfifo ehe. Homẹ mítọn hùn taun nado tindo nọtẹn dagbe de fie mí sọgan pà Otọ́ mítọn, Jehovah Jiwheyẹwhe te. Mí dopẹ́ na Jehovah po mìwlẹ po na ayidonugo he mì na nuhudo mítọn lẹ gbọn Plitẹnhọ Ahọluduta tọn susu gbigbá dali. Na nugbo tọn, Plitẹnhọ Ahọluduta tọn lọ hẹn lẹdo mítọn jẹaṣọ́ taun.”—Chili.

“Mẹmẹsunnu po mẹmẹyọnnu lẹ po yọ́n pinpẹn alọgọ he titobasinanu Jehovah tọn nọ wleawuna tọn tlala. Kakajẹ egbé, mí gbẹ́ nọ dọho dogbọn ojlẹ dagbe he mí yizan hẹ hagbẹ họgbátọ lẹ dali.”—Moldavie.

“Yẹn po asi ṣie po basi hùnwhẹ 35tọ oflin alọwle mítọn tọn to agọe. Dile mí to nulẹnpọndo nuhe mí na na ode awetọ ji, mí wá basi dide nado na nude hlan Jehovah po titobasinanu etọn po, na matin alọgọ yetọn, vlavo mí ma na ko tindo kọdetọn dagbe to alọwle mítọn mẹ. Mí na jlo dọ akuẹ he tin to wepò ehe mẹ ni yin yiyizan nado gbá Plitẹnhọ Ahọluduta tọn de to dopo to otò wamọnọ lẹ mẹ.”

“Yẹn mọ ogú de yí to agọe, podọ to whenuena e yindọ ‘nujlomẹ’ ṣie lẹ ma sù bọ ‘nuhudo’ ṣie lẹ lọsu ma sù paali, yẹn na jlo dọ akuẹ he tin to wepò ehe mẹ ni yin yiyizan nado gbá Plitẹnhọ Ahọluduta tọn lẹ, he yin nuhudo titengbe to otò susu mẹ.”

ALỌGỌ NUGBAJẸMẸJI WHENU TỌN

To azán godo tọn ehelẹ mẹ, nugbajẹmẹji lẹ nọ saba jọ to ajijimẹ. Susu Kunnudetọ Jehovah tọn lẹ tọn nọ basi nunina vonọtaun lẹ nado sọgan gọalọna mẹmẹsunnu yetọn he tin to lẹdo he mẹ nugbajẹmẹji jọ te lẹ. Taidi nuflinmẹ de, nunina alọgọ nugbajẹmẹji whenu tọn lẹ nọ yin nukunpedego taidi apadewhe azọ́n lẹdo aihọn pé lọ tọn. Fie Kunnudetọ Jehovah tọn lẹ ko gọalọna mẹhe jiya nugbajẹmẹji tọn te delẹ die:

• Aflika

• Asia

• Lẹdo Caraïbe tọn

• Lopo Pacifique tọn lẹ

“Yẹn po asu ṣie po jlo na dọnudo mì tlala na núzinzan he mì dohlan lẹ nado sọgan vọ́ nuhe jẹhọn ahizi lọ hẹngble lẹ jlado. Mí penugo nado basi họta yọyọ de na owhé mítọn. Mí dopẹ́ taun dọ mì yinuwa po awuyiya po sọmọ.”

“Yẹn nọ yin Connor bo tindo owhe 11. To whenuena n’mọ nuhe jọ to nugbajẹmẹji tsunami tọn whenu, n’jlo nado gọalọ. N’lẹndọ ehe na gọalọna mẹmẹsunnu po mẹmẹyọnnu ṣie lẹ po.”

DEVIZỌNWATỌ VONỌTAUN WHENU-GIGỌ́ TỌN LẸ

Klistiani susu nọ wà sinsẹ̀nzọn whenu-gigọ́ tọn to azọ́n wẹndagbe-jijlá tọn mẹ kavi to owhé Bẹtẹli tọn lẹ gbè. Mẹdezejotọ whenu-gigọ́ tọn delẹ nọ yin godonọna gbọn nunina sọn ojlo mẹ wá lẹ dali. Delẹ to yé mẹ wẹ:

• Mẹdehlan lẹ: 2 635

• Nugopọntọ tomẹyitọ lẹ: 5 325

• Hagbẹ Bẹtẹli tọn lẹ: 20 092

“Na yẹn ma sọgan yì wadevizọn to Bẹtẹli todin wutu [visunnu owhe atọ́n-mẹvi], n’jlo na do nunina ehe hlan po owanyi sisosiso po. Eyin n’whẹ́n mẹho, n’na yì Bẹtẹli nado wazọ́n sinsinyẹn.”

Nukọnyiyi Azọ́n Biblu Pinplọnmẹ Tọn

Jesu Klisti deazọ́nna hodotọ etọn lẹ nado “hẹn akọta lẹpo zun nuplọntọ.” (Matiu 28:19) To tonusisena ohó etọn lẹ mẹ, Kunnudetọ Jehovah tọn lẹ hẹn alọnu ján to owẹ̀n Biblu tọn lilá po mẹpinplọn po mẹ to otò 235 mẹ. Yé nọ zin owe sinai do Biblu ji lẹ jẹgbonu bo nọ má yé to ogbè 413 mẹ.

Na nugbo tọn, nunina họakuẹ hugan he Klistiani de sọgan na nado gọalọna mẹsusu dogọ nado plọnnu dogbọn Jiwheyẹwhe po lẹndai Etọn lẹ po dali wẹ whenu etọn. Kunnudetọ Jehovah tọn lẹ ko yí whenu po huhlọn yetọn po zan tlala nado gọalọna kọmẹnu yetọn lẹ. Yé ko sọ gbọn alọtútlú dali basi nunina akuẹ tọn lẹ, podọ nunina yetọn lẹpo ko gọalọ to aliho de kavi devo mẹ nado hẹn yinkọ po lẹndai Jehovah tọn lẹ po zun yinyọnẹn lẹdo aihọn pé. Na Jehovah ni zindonukọn nado nọ dona vivẹnudido ehelẹ nado gọalọna mẹdevo lẹ nado plọnnu dogọ dogbọn ewọ dali. (Howhinwhẹn lẹ 19:17) Ojlo tintindo nado gọalọ to aliho enẹ mẹ nọ hẹn Jehovah hùnhomẹ!—Heblu lẹ 13:15, 16.

[Apotin to weda 28-30]

Aliho He mẹ Mẹdelẹ De Nado Nanú te Lẹ

NUNINA LẸ NA AZỌ́N LẸDO AIHỌN PÉ TỌN

Mẹsusu nọ de, kavi klan akuẹ sọha de dovo he yé nọ yí do apotin nunina tọn he go yè kàn “Nunina lẹ Na Azọ́n Lẹdo Aihọn Pé Tọn—Matiu 24:14” do lẹ mẹ.

To osun dopodopo mẹ, agun lẹ nọ do akuẹ ehelẹ hlan wekantẹn Kunnudetọ Jehovah tọn lẹ tọn he nọ penukundo otò yetọn go. Akuẹ he yin nina sọn ojlo mẹ wá lẹ sọgan sọ yin didohlan Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483 tlọlọ, kavi hlan wekantẹn alahọ Kunnudetọ Jehovah tọn lẹ tọn he nọ penukundo otò mìtọn go. Akuẹyiwema he yin didohlan gbọn adlẹsi he tin to aga lọ gblamẹ lẹ dona yin awuwlena do “Watch Tower” tamẹ. Aṣọ́donu akuẹgegenu tọn lẹ kavi nuhọakuẹ devo lẹ sọgan sọ yin nina ga. Wekanhlanmẹ kleun de dona hodo nunina ehelẹ bo dohia dọ nunina tlọlọ lẹ wẹ yé yin.

TITO NUNINA HE SINAI DO NINỌMẸ JI TỌN

Akuẹ sọgan yin nina Watch Tower to tito vonọtaun de glọ nado yin yiyizan lẹdo aihọn pé. Ṣigba eyin nunamẹtọ lọ gọ̀ nunina lọ biọ, e na yin gigọjo hlan ẹn. Na nudọnamẹ dogọ, jaale kanwe hlan Wekantẹn Akuẹbẹhẹntọ tọn gbọn adlẹsi he tin to aga lọ yiyizan dali.

TITO NUNAMẸ HOMẸDAGBE TỌN

Gbọnvona nunina akuẹ tọn tlọlọ lẹ, nunina wunmẹ devo lẹ tin ga na alemọyi sinsẹ̀nzọn lẹdo aihọn pé Ahọluduta lọ tọn. Ehelẹ wẹ:

Alọgọ Owù-Nujijọ Tọn: Watch Tower sọgan yin nina alemọyi nunina alọgọ owù-nujijọ gbẹzan tọn kavi tito gbọjẹ gaa/agbasazọ́n jijodo tọn de.

Akuẹ He Tin to Akuẹsẹdotẹn Lẹ: Akuẹ he tin to akuẹsẹdotẹn lẹ, kandai akuẹsẹdo tọn lẹ, kavi akuẹ gbọjẹ gaa mẹdopodopo tọn lẹ sọgan yin zizedo kandai ogú mimá tọn mẹ kavi sọgan yin súsú lẹkọ to okú godo hlan Watch Tower, to kọndopọmẹ hẹ nubiọtomẹsi akuẹsẹdotẹn lẹdo lọ tọn lẹ.

Kandai Akuẹ Ajọ́ Tọn lẹ po Ale Ajọ́ Tọn lẹ Po: Kandai akuẹ ajọ́ tọn lẹ po ale ajọ́ tọn lẹ po sọgan yin nina Watch Tower taidi nunina tlọlọ de.

Ohọ̀ po Aigba Po: Ohọ̀ po aigba po he sọgan yin sisà sọgan yin nina vlavo gbọn nunina tlọlọ de bibasi dali kavi, na nuhe dù aigba fininọ lẹ, gbọn hinhẹn ohọ̀ po aigba de po dote na nunamẹtọ lọ na gbẹwhenu etọn dali. Dọna alahọ otò towe tọn whẹpo do basi nunina ohọ̀ po aigba po tọn depope.

Nunina Whemẹwhemẹ Tọn: Nunina whemẹwhemẹ tọn yin tito de to ehe mẹ mẹde nọ na akuẹ azọ́nwatẹn tangan he Kunnudetọ Jehovah tọn lẹ nọ yizan de. To ehe mẹ, nunamẹtọ lọ kavi mẹhe yin dide gbọn nunamẹtọ lọ dali, nọ yí akuẹ tangan de to owhe dopodopo mẹ na pipotọ gbẹzan etọn tọn. Nunamẹtọ lọ nọ mọ ale takuẹ didepo tọn de yí to owhe he mẹ nunina whemẹwhemẹ tọn lọ yin didoai te.

Kandai Gúmima po Nunina lẹ Tọn Po: Nutindo kavi akuẹ sọgan yin nina taidi ogú hlan Watch Tower gbọn kandai sọgbe hẹ osẹ́n de bibasi dali, kavi yinkọ Watch Tower tọn sọgan yin kinkàndai taidi mẹhe na dugu nunina lẹ tọn. Nunina he yin bibasi do titobasinanu sinsẹ̀n tọn de tamẹ sọgan de takuẹ he nọ yin bibiọ delẹ pò.

Dile hogbe lọ “tito nunamẹ homẹdagbe tọn” dohia do, nunina wunmẹ ehelẹ nọ biọ tito bibasi delẹ to adà nunamẹtọ lọ tọn mẹ. Nado gọalọna mẹhe to jijlo nado hẹn azọ́n lẹdo aihọn pé Kunnudetọ Jehovah tọn lẹ tọn mọaleyi sọn wunmẹ tito nunamẹ homẹdagbe tọn delẹ mẹ, alọnuwe de ko yin awuwlena to Espagne-gbè po Glẹnsigbe po mẹ he hosọ etọn yin Charitable Planning to Benefit Kingdom Service Worldwide [Tito Nunamẹ Homẹdagbe Tọn Na Alemọyi Sinsẹ̀nzọn Ahọluduta Tọn Lẹdo Aihọn Pé]. Alọnuwe lọ yin kinkàn nado na nudọnamẹ lẹ dogbọn aliho voovo he mẹ nunina lẹ sọgan yin bibasi te vlavo todin kavi gbọn ogú jijodai to okú godo dali. To alọnuwe lọ hihia po hodọdopọ hẹ ayinamẹtọ osẹ́n po takuẹ po tọn yetọn titi po godo, mẹsusu ko penugo nado nọgodona nuwiwa sinsẹ̀n tọn po kọgbọ hẹnwanamẹ tọn Kunnudetọ Jehovah tọn lẹ tọn po lẹdo aihọn pé bo de takuẹ he nọ yin bibiọ lẹ pò taun to mọwiwà mẹ. Alọnuwe ehe sọgan yin mimọyi gbọn vọkan dopo bibiọ sọn Wekantẹn Tito Nunamẹ Homẹdagbe tọn dè tlọlọ dali.

Na nudọnamẹ dogọ, hiẹ sọgan dọnsẹpọ Wekantẹn Tito Nunamẹ Homẹdagbe tọn, vlavo gbọn wekanhlanmẹ kavi alokan dali, to adlẹsi he yin sislẹ to odò yiyizan mẹ kavi hiẹ sọgan dọnsẹpọ wekantẹn alahọ Kunnudetọ Jehovah tọn lẹ tọn he nọ penukundo otò mìtọn go.

Wekantẹn Tito Nunamẹ Homẹdagbe Tọn

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Alokan: (845) 306-0707

[Asisa Yẹdide tọn to weda 27]

Faithful video: Stalin: U.S. Army photo