Kanbiọ lẹ sọn Wehiatọ lẹ Dè

Be Klistiani de sọgan gbẹ́ tindo ayihadawhẹnamẹnu dagbe eyin e kẹalọyi agbasazọ́n de he biọ dọ e ni nọ hẹn adanwànu lẹ ya?

Kunnudetọ Jehovah tọn lẹ lẹdo aihọn pé nọ yí nukun nujọnu tọn do pọ́n azọngban he Jiwheyẹwhe zedo alọmẹ na yé he yin nado penukundo whẹndo yetọn go to agbasa-liho. (1 Timoti 5:8) Etomọṣo, agbasazọ́n delẹ tùnafọ nunọwhinnusẹ́n Biblu tọn lẹ ji tlọlọ bo dona yin didapana. Ehelẹ bẹ agbasazọ́n he tindo kanṣiṣa hẹ akọhiho, ohùn ṣiṣizan, po tulinina yizan taba tọn po hẹn. (Isaia 65:11; Owalọ lẹ 15:29; 2 Kọlintinu lẹ 7:1; Kọlọsinu lẹ 3:5) Agbasazọ́n wunmẹ devo lẹ tin he Biblu ma jẹagọdo tlọlọ, ṣigba yé sọgan hẹn ayihadawhẹnamẹnu mítọn kavi mẹdevo tọn hoapa.

Nudide mẹdetiti tọn wẹ e yin nado kẹalọyi agbasazọ́n he nọ biọ dọ yè ni hẹn osò kavi adanwànu devo de. Etomọṣo, agbasazọ́n he nọ biọ adanwànu hinhẹn sọgan zọ́n bọ mẹde na duhùnhọ eyin ninọmẹ lẹ wá biọ dọ e ni yí adanwànu etọn zan. Enẹwutu, Klistiani de dona hodẹ̀ gando whẹho lọ go eyin ewọ jlo nado kẹalọyi azọngban pligidi lọ he yin nado basi nudide to niyaniya mẹ nado yí osò etọn zan kavi lala to fie ehe gando ogbẹ̀ gbẹtọvi tọn go te. Adanwànu de hinhẹn sọ nọ ze mẹde do owù mẹ bo sọgan zọ́n bọ e na yin awugblena kavi hùhù to awhàn-tọ́nmẹ kavi hlọnvivi de whenu.

Podọ ga, nudide mítọn sọgan yinuwado mẹdevo lẹ ji. Di dohia, azọngban tintan Klistiani de tọn wẹ nado lá wẹndagbe Ahọluduta Jiwheyẹwhe tọn. (Matiu 24:14) Be e na yọnbasi nado plọn mẹdevo lẹ nado “nọ̀ jijọho [mẹ] hẹ omẹ popo,” to whenuena hiẹ lọsu nọ penukundo nuhudo towe lẹ go gbọn adanwànu de hinhẹn dali ya? (Lomunu lẹ 12:18) Etẹwẹ dogbọn ovi lẹ kavi hagbẹ whẹndo towe tọn he pò lẹ dali? Be apòmẹsò de tintindo to whégbè na ze ogbẹ̀ yetọn do owù mẹ wẹ ya? Humọ, be teninọ towe to whẹho ehe mẹ sọgan hẹn mẹdevo lẹ dahli wẹ ya?—Lomunu lẹ 14:21.

To ‘azán godo tọn’ ehelẹ mẹ, mẹsusu dogọ wẹ to lilẹzun ‘kanylantọ bo ma nọ yiwanna dagbewà.’ (2 Timoti 3:1, 3) To whenuena mẹde ko yọ́n ehe, be ewọ sọgan tin “matin whẹgbledo” eyin ewọ lọsu kẹalọyi agbasazọ́n he nọ biọ adanwànu hinhẹn bo sọgan hẹn ẹn nado hoavùn sọta omẹ mọnkọtọn lẹ ya? (1 Timoti 3:10) Paali. Enẹwutu, omẹ mọnkọtọn ma na yin pinpọn taidi mẹhe tin “matin ovlẹ” to agun mẹ eyin ewọ zindonukọn nado to adanwànu hẹn to whenuena ayinamẹ Biblu tọn ko yin nina ẹn po homẹdagbe po godo. (1 Timoti 3:2; Titu 1:5, 6) Gbọnmọ dali, sunnu kavi yọnnu mọnkọtọn ma na pegan na lẹblanulọkẹyi vonọtaun depope to agun mẹ.

Jesu na jide devi etọn lẹ dọ eyin yé ze Ahọluduta lọ do otẹn tintan mẹ to gbẹzan yetọn mẹ, dandannu gbẹ̀mẹ tọn lẹ mimọ ma dona nọ duahunmẹna yé zẹjlẹgo gba. (Matiu 6:25, 33) Na nugbo tọn, eyin mí dejido Jehovah go mlẹnmlẹn, “ewọ na . . . hẹn [mí] dote; ewọ ma na dike dodonọ ni yin sisẹtẹnna.”—Psalm 55:22.