Be Hiẹ Flin Ya?

Be a duvivi zinjẹgbonu Atọ̀họ̀-Nuhihọ́ Lọ Tọn agọe tọn lẹ hihia tọn ya?

Pọ́n eyin a sọgan na gblọndo na kanbiọ he bọdego helẹ:

• Naegbọn ylando tintan lọ—yèdọ tolivivẹ Adam tọn—sọgan yin yiyijlẹdo azọ̀n he yè dugu etọn de go?

E tin taidi azọ̀n de na Adam bẹ ylando plá kúnkan etọn wutu. Gbọnmọ dali mí ko dugu oblọ ylando tọn, kẹdẹdile ovi delẹ nọ dugu azọ̀n de tọn sọn mẹjitọ yetọn lẹ dè do.—15/8, weda 5.

• Whẹwhinwhẹ́n tangan tẹlẹ wutu wẹ danuwiwa to susudeji to egbehe?

Satani to tintẹnpọn nado klan gbẹtọ lẹ sọn Jehovah go gbọn gbigbọ danuwiwa tọn didó do ahun yetọn mẹ dali, vlavo gbọn sinimoto, húnhiho, po aihundida ọdinatẹẹ ji tọn lẹ po gblamẹ. Podọ onú ehelẹ nọ whàn aihundatọ lọ lẹ nado vọ́ ninọmẹ ylankan danuwiwa po mẹhuhu po tọn he yé mọ lẹ basi. Danuwiwa he linlinnamẹnu lẹ nọ dohia ko yidogọna nuyiwa danuwiwa tọn susu.—1/9, weda 29.

• Omẹ nankọ wẹ Pọntiu Pilati?

Lomunu he ma diyin sọmọ de wẹ ewọ yin bo sọgan ko yin awhànfuntọ de. Ahọluigbagán Lomu tọn Tibeliu de Pilati taidi togán ayimatẹn Jude tọn to owhe 26 W.M. To whẹdidana Jesu whenu, Pilati wẹ sè whẹsadokọnamẹ nukọntọ Ju lẹ tọn lẹ. Nado hẹn homẹhun gbẹtọgun lọ, e kẹalọyi dọ Jesu ni yin hùhù.—15/9, weda 10-12.

• “Ohia” tẹwẹ yin nùdego to Matiu 24:3 mẹ?

Ohia ehe bẹ adà voovo lẹ hẹn he nọpọ́ bo dohiagona ojlẹ dopolọ. Ohia lọ bẹ awhàn, huvẹ, azọ̀nylankan, po aigba sisọsisọ lẹ po hẹn, podọ e na hẹn hodotọ Jesu tọn lẹ penugo nado tunwun ‘tintin tofi’ etọn po “opodo aihọn tọn” po go.—1/10, weda 4-5.

• To owhe kanweko tintan whenu, lẹdo tẹlẹ mẹ wẹ Ju he tin to gbéji lẹ nọ nọ̀?

Fihe yé sù te hugan lẹ wẹ Silia, Asia Pẹvi, Babilọni, po Egipti po, podọ vude yetọn tin to otò Europe tọn he yin apadewhe Ahọluigba Lomu tọn lẹ mẹ.—15/10, weda 12.

• Be Klistiani de sọgan gbẹ́ tindo ayihadawhẹnamẹnu dagbe eyin e kẹalọyi agbasazọ́n he biọ dọ e ni nọ hẹn adanwànu lẹ ya?

Nudide mẹdetiti tọn wẹ e yin nado kẹalọyi agbasazọ́n he nọ biọ dọ yè ni hẹn osò kavi adanwànu devo de. Ṣigba, agbasazọ́n he nọ biọ adanwànu hinhẹn sọgan zọ́n bọ mẹde na duhùnhọ eyin e yí adanwànu etọn zan podọ owù sọ tin dọ mẹlọ ni yin awugblena kavi yin hùhù to avùntọ́nmẹ kavi hlọnvivi de whenu. Klistiani he nọ hẹn adanwànu mọnkọtọn de ma na pegan na lẹblanulọkẹyi vonọtaun depope to agun mẹ gba. (1 Timoti 3:3, 10)—1/11, weda 31.

• To whenuena e yindọ hogbe lọ “Amagẹdọni” wá sọn hodidọ lọ “Osó Mẹgido tọn” mẹ, be awhàn Amagẹdọni tọn na yin fùnfùn to osó de kọ̀n to Ṣẹnṣẹn Whèzẹtẹn tọn wẹ ya?

Lala. Osó Mẹgido tọn de ma tin, kakatimọ pópló de poun wẹ tin to agbàdo he sẹpọ finẹ lọ mẹ to Islaeli. Lẹdo enẹ ma sọgan hẹn “ahọlu aigba tọn lẹ, po awhànpa yetọn lẹ po” pete gba. Awhàn daho Jiwheyẹwhe tọn na yin fùnfùn lẹdo aigba pé, podọ e na hẹn awhàn lẹpo wá vivọnu. (Osọhia 16:14, 16; 19:19; Psalm 46:8, 9)—1/12, weda 4-7.