Be Lẹgba Tin Nugbo Ya?

ETẸWẸ yin linlẹn towe gando Lẹgba go? Be a lẹndọ omẹ nujọnu tọn de wẹ ewọ yin he nọ klọ gbẹtọ lẹ nado wà onú ylankan lẹ, kavi be linlẹn ylankan de wẹ e yin poun he tin to gbẹtọvi lẹ mẹ ya? Be mẹhe dona yin budisi de wẹ Lẹgba yin, kavi be e dona yin pinpọnhlan taidi linlẹn otangblo tọn de kavi mẹhe nọ yin alọdlẹndo to otàn aihundida tọn lẹ mẹ de poun wẹ ya? Be hogbe lọ “lẹgba” dlẹnalọdo huhlọn nuvasudo tọn he dáblu de to wẹkẹ lọ mẹ wẹ ya? Be hogbe lọ sọgan yin ohia jijọ ylankan he tin to gbẹtọvi lẹ mẹ tọn, dile sinsẹ̀n-nuplọnmẹtọ egbezangbe tọn susu sọalọakọ́n do wẹ ya?

E ma yin nupaṣamẹ dọ gbẹtọvi lẹ tindo pọndohlan voovo lẹ gando mẹhe Lẹgba yin go gba. Yí nukun homẹ tọn do pọ́n lehe e na vẹawu do sọ nado yọ́n nukunmẹ nugbo mẹhe bikan taun to ede zizewhla mẹ de tọn! E na tlẹ sọ vẹawu dogọ titengbe eyin mẹlọ magbe nado whlá mẹhe ewọ yin nugbo. Biblu dọ dọ omẹ mọnkọtọn de wẹ Lẹgba yin. E ylọ ẹ dọ Satani bo dọ gandego dọmọ: “Satani lọsu nọ diọada zun angẹli hinhọ́n tọn.” (2 Kọlintinu lẹ 11:14) Dile etlẹ yindọ mẹylankan de wẹ Lẹgba yin, e nọ do ede hia taidi mẹdagbe nado sọgan klọ mẹdevo lẹ. Podọ eyin e hẹn gbẹtọ lẹ nado yise dọ ewọ ma tin paali, enẹ sọ nọ gọalọna ẹn nado yawu jẹ yanwle etọn kọ̀n.

Eyin mọ wẹ, mẹnu wẹ Lẹgba yin na taun tọn lo? Whetẹnu podọ nawẹ e wá aimẹ gbọn? Nawẹ e nọ yinuwado gbẹtọ lẹ ji to egbehe gbọn? Be nudepope tin he mí sọgan wà nado nọavunte sọta nuyiwadomẹji enẹ ya? Biblu dọ nugbo na mí gando whenuho Lẹgba tọn go sọn bẹjẹeji etọn podọ e sọ na gblọndo pekọhẹnwanamẹ tọn hlan kanbiọ ehelẹ.

[Yẹdide to weda 3]

Lehe e na vẹawu do sọ nado yọ́n nukunmẹ mẹhe magbe nado ze ede whlá de tọn!