Todidoai po Owanyi po Yin Anazọ́n De

“A BASI na todidoai na mi.” Be mẹde ko yí hogbe mẹpipa tọn enẹ zan na we to agọe ya? Diblayin mẹlẹpo pete wẹ nọ yiwanna mẹhe nọ dotoai namẹ ganji. Gbọn todidoai ganji dali, mí sọgan miọnhomẹna mẹhe to yaji kavi he to nuhahun sinsinyẹn mẹ lẹ. Podọ be todidoai dagbe ma nọ gọalọna mí nado duvivi mẹdevo lẹ tọn ya? To agun Klistiani tọn mẹ, todidoai po owanyi po yin adà titengbe de to ‘mínọzo tọn linlẹnpọn nado nọ jlahomẹdona to owanyi po azọ́n dagbe lẹ po mẹ.’—Heblu lẹ 10:24.

Ṣigba, mẹsusu ma yin todoaitọ dagbe. Yé nọ yiwanna nado namẹ ayinamẹ, dọ numimọ yetọn titi lẹ, kavi dọ pọndohlan yetọn titi kakati nado nọ dotoaina nuhe mẹdevo lẹ tindo nado dọ. Na taun tọn, anazọ́n de wẹ todidoai yin. Nawẹ mí sọgan plọn nado nọ dotoai po owanyi po gbọn?

Aliho Titengbe De

Jehovah wẹ ‘Nuplọnmẹtọ Daho’ mítọn. (Isaia 30:20) E sọgan plọn mí nususu dogbọn todidoai dali. Lẹnnupọndo lehe Jehovah gọalọna yẹwhegán Elija do ji. Na budonamẹ Ahọsi Jẹzebẹli tọn wutu, Elija họ̀njẹgbé yì zungbo mẹ bo tlẹ jlo dọ emi ni gbọ bo kú. Finẹ wẹ angẹli Jiwheyẹwhe tọn de dọhona ẹn te. Dile yẹwhegán lọ basi zẹẹmẹ nuhe to budona ẹn tọn, Jehovah dotoai bosọ do huhlọn daho Etọn hia. Etẹwẹ yin kọdetọn lọ? Elija masọ dibu ba, bo lẹkọyi azọ́ndenamẹ etọn mẹ. (1 Ahọlu lẹ 19:2-15) Naegbọn Jehovah nọ dotoai po sọwhiwhe po na ahunmẹdunamẹnu devizọnwatọ etọn lẹ tọn? Na e nọ hò yetọn pọ́n wutu. (1 Pita 5:7) Onú titengbe he na gọalọna we nado lẹzun todoaitọ dagbe de wẹ yindọ: Nọ hò mẹdevo lẹ tọn pọ́n, bo dike onú yetọn ni nọ duahunmẹna we.

To whenuena dawe de to Bolivie waylando sinsinyẹn de, e yọ́n pinpẹn mẹtọnhopọn mọnkọtọn he e mọyi sọn yisenọ hatọ de dè tọn. Dawe lọ basi zẹẹmẹ dọmọ: “Ojlẹ enẹ yin dopo to dehe blawu hugan to gbẹzan ṣie mẹ lẹ mẹ. Eyin e ma yin mẹmẹsunnu de he dotoaina mi po sọwhiwhe po tọn wẹ, yẹn sọgan ko gbọjọ to vivẹnudido nado sẹ̀n Jehovah mẹ. Ewọ ma lẹhogle, ṣigba yinyọnẹn poun dọ ewọ hò ṣie pọ́n sọmọ nado dotoaina mi hẹn mi lodo taun. E ma yin ayinamẹ dín wẹ n’te to whenẹnu gba; n’yọ́n nuhe n’dona wà. Nuhe sin nuhudo n’tindo poun wẹ nado yọnẹn dọ mẹde mọnukunnujẹ numọtolanmẹ ṣie mẹ. Todidoai etọn zọ́n bọ flumẹjijẹ ma hẹn mi gbọjọ.”

Jesu Klisti yin Apajlẹnọ daho de to anazọ́n todidoai po owanyi po tọn mẹ. Ojlẹ vude to okú Jesu tọn godo, awe to devi etọn lẹ mẹ to gbejizọnlinzin sọn Jelusalẹm jei gbétatò he dẹn sọ nudi kilomẹtlu 11 de mẹ. Matin ayihaawe, yé ko jẹflumẹ. Enẹwutu Jesu Klisti he ko yin finfọnsọnku lọ jẹ zọnlinzin hẹ yé ji to aliho ji. E kàn kanbiọ he yin awuwlena po sọwhiwhe po lẹ biọ yé nado yọ́n ahunmẹdunamẹnu yetọn lẹ, podọ devi lẹ na gblọndo. Yé dọ todido he yé tindo dai podọ flumẹjijẹ po bẹwlu he mẹ yé tin te todin po na ẹn. Jesu hò yetọn pọ́n, podọ todidoai po owanyi po etọn hẹn devi awe lọ lẹ nado dotoaina ẹn. To whenẹnu, Jesu “detana nuhe yè dọ gbọn ewọ lọsu tọn dali lẹ hlan yé to Owe-wiwe lẹpo mẹ.”—Luku 24:13-27.

Todidoai na mẹdevo lẹ yin aliho owanyi tọn de nado hẹn yé dotoaina mí. “Mẹjitọ ṣie lẹ po mẹjitọ asu ṣie tọn lẹ po jẹ agọjẹdo aliho he mẹ n’to ovi ṣie lẹ plọn te ji,” wẹ yọnnu Bolivie-nu de dọ. “N’gbẹ́ ayinamẹ yetọn lẹ dai, ṣigba yẹnlọsu nọ mọ to dee mẹ dọ n’ma pegan taidi mẹjitọ de. To madẹnmẹ, dopo to Kunnudetọ Jehovah tọn lẹ mẹ wá ohọ̀n ṣie ji. E dọhona mi dogbọn opagbe Jiwheyẹwhe tọn lẹ dali. Ṣigba, aliho he mẹ e kàn pọndohlan ṣie biọ te wẹ dohia mi dọ yọnnu ehe jlo nado dotoaina mi. N’basi oylọna ẹn biọ họmẹ, bọ to madẹnmẹ n’jẹ nuhahun ṣie lẹ dọna ẹn ji. E dotoai po sọwhiwhe po. E kàn sọgodo he n’jlo na ovi ṣie lẹ biọ podọ nuhe asu ṣie lẹn gandego. Tintin hẹ mẹde he to jijlo nado mọnukunnujẹ numọtolanmẹ ṣie mẹ hẹn kọgbọ wá na mi. To whenuena ewọ jẹ nuhe Biblu dọ gando gbẹzan whẹndo tọn go dohia mi ji, ayiha ṣie jai na n’mọdọ mẹhe to ṣie hòpọn de dọho hẹ wẹ n’te.”

“Owanyi . . . ma nọ dín onú etọn titi,” wẹ Biblu dọ. (1 Kọlintinu lẹ 13:4, 5) Enẹwutu, todidoai po owanyi po nọ biọ dọ mí ni wọnji ojlo mítọn titi go whẹ́. Ehe sọgan biọ dọ mí ni ṣí televiziọn, ze linlinwe do apadopo, kavi ṣí alokan apòmẹ tọn mítọn to whenuena mẹdevo lẹ to hodọna mí gando whẹho nujọnu tọn de go. Todidoai po owanyi po zẹẹmẹdo ojlo sisosiso tintindo to linlẹn mẹdevo tọn mẹ. E nọ biọ dọ mí ni dapana hodidọ gando mídetiti go gbọn hogbe mọnkọtọn lẹ yiyizan dali dọ, “Enẹ hẹn mi flin nuhe jọ do go e to ojlẹ de mẹ wayi.” Dile etlẹ yindọ nude ma ylan to hogbe mọnkọtọn lẹ yiyizan to hodidọ hẹ họntọn de whenu mẹ, mí dona wọnji ojlo mítọn lẹ go to whenue mẹde to hodọdo nuhahun sinsinyẹn de ji hẹ mí. Ojlo nujọnu tọn to mẹdevo lẹ mẹ sọgan sọ yin didohia to aliho devo mẹ.

Dotoai Nado Mọnukunnujẹ Numọtolanmẹ lẹ Mẹ

E whè gbau họntọn Job tọn lẹ sè ao to hodidọ gaa etọn lẹ mẹ. Ṣogan, Job dọ po awubla po dọmọ: “Ṣo, dọ yẹn do tindo mẹde nado sè mi!” (Job 31:35) Etẹwutu ewọ do dọ mọ? Na todidoai yetọn ma hẹn homẹmiọnnamẹ depope wá na ẹn wutu. Yé ma hò Job tọn pọ́n kavi ma tlẹ jlo nado mọnukunnujẹ numọtolanmẹ etọn lẹ mẹ. Na nugbo tọn, yé ma tindo mẹtọnhopọn taidi todoaitọ awuvẹmẹtọ lẹ gba. Ṣigba apọsteli Pita na ayinamẹ dọmọ: “Mìmẹpo ni yin homẹdoponọ, na mì ni nọ kọ̀nhomẹdai na mìnọzo, mì yiwanna omẹ di mẹmẹsunnu, mì yin awuvẹmẹtọ, bosọ yin dagbewatọ.” (1 Pita 3:8) Nawẹ mí sọgan kọ̀nhomẹdai kavi do mẹtọnhopọn hia gbọn? Aliho dopo wẹ nado hò numọtolanmẹ mẹdevo tọn pọ́n bo tẹnpọn nado mọnukunnujẹ numọtolanmẹ etọn lẹ mẹ. Aliho devo wẹ nado nọ yí hogbe awuvẹmẹ tọn lẹ zan taidi “onú mọnkọtọn nọ gblehomẹnamẹ taun” kavi “e na ko vẹna we dọ numọtolanmẹ towe lẹ ma yin nukunnumọjẹemẹ.” Podọ aliho devo wẹ nado vọ́ nuhe dọ mẹlọ te lẹ dọ to hogbe mítọn titi mẹ, bo gbọnmọ dali dohia dọ mí mọnukunnujẹ nuhe dọ e te mẹ. Todidoai po owanyi po ma zẹẹmẹdo ayidido hogbe lẹ go poun gba ṣigba numọtolanmẹ he dohia mẹlọ te lẹ go ga.

Roberta yin lizọnyizọnwatọ whenu-gigọ́ Kunnudetọ Jehovah tọn lẹ tọn numimọnọ de. E basi zẹẹmẹ dọmọ: “Yẹn gbọjọ to lizọnyizọn ṣie mẹ to ojlẹ de mẹ. Enẹwutu n’biọ nado dọho hẹ nugopọntọ tomẹyitọ lọ. E dotoai ganji bo tẹnpọn nado mọnukunnujẹ numọtolanmẹ ṣie lẹ mẹ. E tlẹ taidi dọ e mọnukunnujẹ obu he di n’te dọ e na mọhodọ do walọ ṣie go mẹ. Mẹmẹsunnu lọ hẹn mi deji dọ e ma yin yẹn dopo wẹ nọ tindo numọtolanmẹ mọnkọtọn gba, na ewọ lọsu ko tindo numọtolanmẹ dopolọ pọ́n. Ehe gọalọna mi taun nado zindonukọn.”

Be mí sọgan dotoai ṣogan bo ma kọngbedopọ hẹ nuhe yin didọ lẹ ya? Be mí sọgan dọna mẹde dọ mí yọ́n pinpẹn etọn dọ e dọ numọtolanmẹ etọn lẹ na mí ya? Mọwẹ. Eyin visunnu mítọn pẹvi hoavùn to wehọmẹ kavi eyin viyọnnu aflanmẹ mítọn wá whégbè bo dọna mí dọ emi to wanyina mẹde lo? Be e ma na yọ́n hugan dọ mẹjitọ lọ ni dotoai whẹ́ bo tẹnpọn nado mọnukunnujẹ nuhe to ayiha jọja lọ tọn mẹ whẹpo do basi zẹẹmẹ nuhe sọgbe po nuhe ma sọgbe po tọn na ẹn ya?

“Yinyọnẹn [kavi ayinamẹ] to ayiha gbẹtọ tọn mẹ taidi osin he siso,” wẹ Howhinwhẹn lẹ 20:5 dọ, “ṣigba omẹ zinzin wẹ na dọ̀n ẹn jẹgbonu.” Eyin mẹhe yin nuyọnẹntọ podọ numimọnọ de ma jlo sọn ahun mẹ wá nado na ayinamẹ, e sọgan biọ dọ mí ni dọ̀n ayinamẹ lọ tọ́n sọn ohò etọn mẹ. Ninọmẹ mọnkọtọn mẹ wẹ mí nọ tin te to whenue mí to todoai po owanyi po. E nọ biọ zinzin nado dọ̀n nuhe tin to ahun mẹde tọn mẹ tọ́n. Kanbiọ lẹ kinkanse nọ gọalọ, ṣigba mí dona to aṣeji bọ kanbiọ mítọn lẹ ma na lẹzun tlintlindo-dindin biọ whẹho mẹdetiti tọn lẹ mẹ. E sọgan yin alọgọnu de nado biọ to mẹhe to hodọ lọ si nado bẹsọn whẹho he e na voawu nado dọ lẹ ji. Di apajlẹ, asi de he jlo na dọho dogbọn nuhahun he tin to alọwle etọn mẹ lẹ dali sọgan mọdọ e bọawu na ẹn hugan nado bẹ hodidọ jẹeji sọn lehe ewọ po asu etọn po mọ yedelẹ bo wlealọ gbọn ji. Mẹhe ko gbọjọ to lizọnyizọn Klistiani tọn mẹ sọgan mọdọ e bọawu na ẹn hugan nado bẹ hodidọ jẹeji sọn lehe ewọ plọn nugbo lọ gbọn ji.

Todidoai po Owanyi Po—Avùnnukundiọsọmẹnu De

Todidoai to whenuena mẹde gblehomẹ do mí go sọgan yin avùnnukundiọsọmẹnu de, na ayilinlẹn jọwamọ tọn lọ wẹ nado yiavunlọ na míde. Nawẹ mí sọgan pehẹ avùnnukundiọsọmẹ lọ gbọn? Howhinwhẹn lẹ 15:1 dọmọ: “Hogbe dẹẹdẹ nọ lẹ́ homẹgble sẹ̀.” Oylọ-bibasina mẹlọ po homẹdagbe po nado dọho podọ todidoai po sọwhiwhe po dile e to nuhe doadi na ẹn dọ yin aliho de nado yí hogbe dẹẹdẹ do gblọn.

Nudindọn sinsinyẹn lẹ nọ saba bẹ omẹ awe hẹn he nọ to nuhe yé ko dọ lẹ vọ́ dọ mapote. Dopodopo yetọn nọ lẹndọ omẹ awetọ ma to todoai. Lehe e na ko pọnte do sọ eyin dopo to yé mẹ nabọẹ bo dotoai ganji! Na nugbo tọn, onú titengbe wẹ e yin nado nọ dava míde bo nọ dọho to aliho zinzin po owanyi tọn po mẹ. Biblu dọna mí dọmọ: “Ewọ he hẹn nùflo etọn dote wẹ yọnnuin.”—Howhinwhẹn lẹ 10:19.

Nugopipe lọ nado dotoai po owanyi po ma nọ wá to jọwamọ-liho gba. Ṣigba, anazọ́n de wẹ he sọgan yin pinplọn gbọn vivẹnudido po duduto mẹdetiti ji po dali. Anazọ́n de wẹ e yin he jẹna pinplọn. Na nugbo tọn, todidoai to whenuena mẹdevo lẹ to hodọ yin dohia owanyi mítọn tọn. E sọ nọ hẹn ayajẹ wá na mí. Enẹwutu, lehe e yin nuyọnẹnnu nado wleawuna anazọ́n todidoai po owanyi po tọn do sọ!

[Nudọnamẹ odò tọn]

[Yẹdide to weda 11]

To whenuena mí to todoai, mí dona wọnji ojlo mítọn titi go whẹ́

[Yẹdide to weda 12]

Todidoai to whenuena mẹde gblehomẹ sọgan yin avùnnukundiọsọmẹnu de