Be Amagẹdọni Na Và Aihọn Sudo Wẹ Ya?

AMAGẸDỌNI! Be hogbe ehe nọ dohia to linlẹn towe mẹ dọ aihọn lọ na yin vivasudo kavi yin fifiọ wẹ ya? To fisusu to aihọn mẹ, hogbe Biblu tọn vude wẹ nọ yin yiyizan to hodidọ egbesọ tọn mẹ dile “Amagẹdọni” nọ yin yiyizan do. Hogbe lọ ko yin yiyizan gbayipe nado basi zẹẹmẹ sọgodo dózin he to nukọn na gbẹtọvi lẹ tọn. Azọ́nwhé ayidedai tọn lẹ ko dó yẹdide dobu “Amagẹdọni” tọn do ayiha gbẹtọ lẹ tọn mẹ. Nukunnumamọjẹnumẹ po linlẹn agọ̀ lẹ po ko doadọ̀do to aihọn lọ mẹ. Dile etlẹ yindọ linlẹn susu wẹ tin dogbọn nuhe “Amagẹdọni” zẹẹmẹdo dali, suhugan yetọn ma sọgbe hẹ nuhe Biblu—yèdọ fie hogbe lọ yin mimọ te—plọnmẹ gando Amagẹdọni go gba.

To whenuena e yindọ Biblu dohia dọ kanṣiṣa de tin to Amagẹdọni po “opodo aihọn tọn” po ṣẹnṣẹn, be hiẹ ma mọ dọ nukunnumimọjẹ nuhe hogbe lọ zẹẹmẹdo mẹ hezeheze yin nujọnu ya? (Matiu 24:3) Podọ be e ma na yin lẹnpọn dagbenu nado lẹhlan asisa yiaga hugan nugbo tọn, yèdọ Ohó Jiwheyẹwhe tọn, nado yọ́n nuhe Amagẹdọni yin po nuhe e na zẹẹmẹdo na hiẹ po whẹndo towe po ya?

Dogbapọnnanu mọnkọtọn na dohia dọ kakati Amagẹdọni ni và aihọn sudo, e na hẹn bẹjẹeji ayajẹnọ de wá na mẹhe jlo na nọgbẹ̀ bo tindo kọdetọn dagbe to aihọn yọyọ dodo tọn de mẹ lẹ. Hiẹ na tindo nukunnumọjẹnumẹ he họnwun gando nugbo titengbe Owe-wiwe tọn ehe go eyin hiẹ gbadopọnna hosọ he bọdego he basi zẹẹmẹ nuhe Amagẹdọni yin na nugbo tọn.

[Apotin to weda 3]

ETẸWẸ HIẸ LẸNDỌ AMAGẸDỌNI YIN?

• Nuvasudo pligidi bọmbu nuzanusẹvaun tọn de

• Nugbajẹmẹji lẹdo tọn de

• Nugonu olọn tọn de he gbà do aigba go

• Vasudo mẹylankan lẹ tọn gbọn Jiwheyẹwhe dali