Angẹli lẹ—Mẹhe Yé Yin

AHỌLUIGBAGÁN ahọluigba huhlọnnọ de tọn ma sọgan yí nuhe mọ e te lẹ sè. Sunnu atọ̀n he ko yin whẹdana nado yin hùhù to zòhọ miyọ́n jiji de tọn mẹ yin whinwhlẹngán sọn alọ okú tọn mẹ! Mẹnu wẹ whlẹn yé gán? Ahọlu lọ lọsu yí onù etọn do dọna sunnu atọ̀n he yin whinwhlẹngán to aliho ehe mẹ lẹ dọmọ: “Donanọ Jiwheyẹwhe [mìtọn ni] yin, mẹhe ko do angẹli etọn lẹ hlan, bo whlẹn devi etọn he dotu to ewọ mẹ lẹ gán.” (Daniẹli 3:28) Ahọlu Babilọni tọn ehe, he nọgbẹ̀ to nuhe hugan owhe fọtọ́n donu awe lẹ die wayi yí nukun etọn lẹ do mọ lehe angẹli lẹ nọ whlẹnmẹ gbọn. Livi susu gbẹtọ lẹ tọn to hohowhenu yise to angẹli lẹ mẹ. To egbehe, gbọnvona dọ mẹsusu yise dọ angẹli lẹ tin, yé sọ tindo numọtolanmẹ lọ dọ angẹli lẹ nọ yinuwado gbẹzan yetọn ji to aliho delẹ mẹ. Mẹnu wẹ angẹli lẹ yin, podọ etẹwẹ yin bẹjẹeji yetọn?

Sọgbe hẹ nuhe Biblu dọ, gbigbọ wẹ angẹli lẹ, kẹdẹdile Jiwheyẹwhe lọsu yin Gbigbọ do. (Psalm 104:4; Johanu 4:24) Angẹli lẹ sù taun, sọha yetọn biọ livi susu mẹ. (Osọhia 5:11) Podọ yemẹpo wẹ yin “hlọnhlọnnọ to huhlọn mẹ.” (Psalm 103:20) Dile etlẹ yindọ angẹli lẹ tin taidi gbẹtọvi lẹ to linlẹn lọ mẹ dọ yé tindo gbẹtọ-yinyin yetọn bosọ yin nina mẹdekannujẹ nudide bibasi tọn, yé ma bẹ gbẹzan yetọn jẹeji taidi gbẹtọvi lẹ gba. Na nugbo tọn, Jiwheyẹwhe ko dá angẹli lẹ hoho whẹpo gbẹtọvi lẹ wá yin didá—yèdọ whẹpo Aigba mítọn tlẹ do yin didá lọsu. Biblu dọ dọ to whenuena Jiwheyẹwhe “do odòdo aigba tọn lẹ ai . . . sunwhlẹvu afọnnu tọn lẹ [angẹli lẹ] to hànji dopọ, bọ visunnu Jiwheyẹwhe tọn lẹpo to abobo dó na homẹhun.” (Job 38:4, 7) Angẹli lẹ yin yiylọdọ visunnu Jiwheyẹwhe tọn lẹ na Ewọ wẹ dá yé wutu.

Lẹndai tẹ wutu wẹ Jiwheyẹwhe dá angẹli lẹ? Azọngban tẹwẹ angẹli lẹ ko yiwà to whenuho gbẹtọvi lẹ tọn mẹ? Be yé nọ yinuwado gbẹzan mítọn ji to egbehe ya? To whenuena e yindọ yé yin nudida he tindo mẹdekannujẹ nudide bibasi tọn lẹ, be depope to angẹli lẹ mẹ ko hodo aliho nuyiwa Satani Lẹgba tọn bo hẹn yede zun kẹntọ Jiwheyẹwhe tọn ya? Biblu na gblọndo he sọgbe na kanbiọ ehelẹ.