Nukunnumimọjẹ Biblu mẹ—Etẹwẹ Na Gọalọna We?

“HIẸ ko yí onú helẹ whlá sọn nuyọnẹntọ lẹ, po zinzintọ lẹ po dè, bosọ do yé hia hlan ovivu lẹ.” (Luku 10:21) Ohó he Jesu dọna Otọ́ etọn olọn mẹ tọn ehelẹ dohia dọ mí dona tindo gbigbọ dagbe nado sọgan mọnukunnujẹ Biblu mẹ. Nuyọnẹn Jehovah tọn yin didehia to enẹ mẹ dọ e wleawuna owe de he mẹhe yin whiwhẹnọ bo nọ kẹalọyi oplọn lẹ kẹdẹ wẹ sọgan mọnukunnujẹemẹ nugbonugbo.

E ma nọ bọawu na suhugan mítọn nado do whiwhẹ hia gba. Mímẹpo wẹ dugu ayilinlẹn goyiyi tọn. Humọ, mí to gbẹnọ to ‘azán godo tọn lẹ’ mẹ, to gbẹtọ he yin “owanyina yede tọ́, . . .tasinyẹntọ, goyitọ” lẹ ṣẹnṣẹn. (2 Timoti 3:1-4) Jijọ ehelẹ nọ glọnalina mí nado mọnukunnujẹ Ohó Jiwheyẹwhe tọn mẹ. E blawu dọ, mímẹpo wẹ nọ yin nuyiwadeji gbọn mẹhe lẹdo mí lẹ dali jẹ obá de mẹ. To whelọnu lo, nawẹ hiẹ sọgan wleawuna gbigbọ he sọgbe nado sọgan mọnukunnujẹ Biblu mẹ gbọn?

Awuwiwlena Ahun po Ayiha Po

Ẹzla, he yin nukọntọ omẹ Jiwheyẹwhe tọn lẹ tọn to hohowhenu “ze ayiha etọn do [kavi wleawuna ahun etọn] nado to osẹ́n OKLUNỌ tọn dín.” (Ẹzla 7:10) Be aliho de tin he mẹ mí sọgan wleawuna ahun mítọn te ya? Mọwẹ. Mí sọgan bẹjẹeji gbọn pọndohlan he sọgbe tintindo gando Owe-wiwe go dali. Apọsteli Paulu kanwehlan Klistiani hatọ etọn lẹ dọmọ: “Whenuena mì yí ohó Jiwheyẹwhe tọn, ehe mì sè sọn mí dè, mì ma yí ì di ohó gbẹtọ tọn gba, ṣigba le e te to nugbo mẹ, [di] ohó Jiwheyẹwhe tọn.” (1 Tẹsalonikanu lẹ 2:13) Dile etlẹ yindọ gbẹtọ lẹ wẹ yin yiyizan nado kàn Owe-wiwe, Jehovah dè wẹ nuhe yé kàn lẹ wá sọn. Nugbo tangan enẹ yinyọnẹn na hẹn mí tindo ojlo dogọ to nuhe hia mí te mẹ.—2 Timoti 3:16.

Aliho devo nado wleawuna ahun mítọn wẹ dẹ̀hiho. Na Biblu yin gbigbọdo gbọn gbigbọ wiwe dali wutu, owẹ̀n he e bẹhẹn na họnwun na mí eyin mí mọ alọgọ gbigbọ enẹ tọn yí. Mí dona biọ alọgọ mọnkọtọn to odẹ̀ mẹ. Pọ́n lehe enẹ duahunmẹna psalm-kàntọ lọ do he wlan dọmọ: “Na nuyọnẹn mi, yẹn na yìn osẹ́n towe; nugbo yẹn na yí ayiha ṣie lẹpo pete do payi e go.” (Psalm 119:34) E ma yin nugopipe nulẹnpọn tọn nado mọnukunnujẹ nuhe yin kinkàn lọ mẹ kẹdẹ wẹ mí dona biọ to odẹ̀ mẹ gba ṣigba mí sọ dona biọ ninọmẹ ahun mẹ tọn he na whàn mí nado kẹalọyi nuhe Biblu dọ. Nado mọnukunnujẹ Biblu mẹ, mí dona tindo ojlo to nuhe yin nugbo mẹ.

Dile hiẹ to ayihamẹlẹnpọn nado wleawuna gbigbọ he sọgbe lọ, lẹnnupọndo dagbe he Biblu pinplọn sọgan wà na we lẹ ji. Mí tindo whẹwhinwhẹ́n dagbe susu nado gbadopọnna Ohó Jiwheyẹwhe tọn, ṣigba dehe yin titengbe hugan lọ wẹ yindọ e nọ gọalọna mí nado dọnsẹpọ Jiwheyẹwhe. (Jakobu 4:8) To whenuena mí hia dogbọn lehe Jehovah nọ yinuwa to ninọmẹ voovo lẹ mẹ do, lehe e nọ wlebòna mẹhe yiwanna ẹn lẹ do, podọ lehe e nọ yinuwa hẹ mẹhe gbẹ́ ẹ dai lẹ do dali, mí nọ yọ́n omẹ he nkọtọn ewọ yin. Onú tintan he dona nọ whàn mí to whepoponu nado hia Biblu wẹ nado jẹakọ hẹ Jiwheyẹwhe dogọ bo gbọnmọ dali hẹn haṣinṣan mítọn lodo hẹ ẹ.

Nuhe Nọ Glọnalina Gbigbọ Dagbe Tintindo Lẹ

Etẹlẹ wẹ sọgan glọnalina mí nado mọnukunnujẹ Ohó Jiwheyẹwhe tọn mẹ? Aliglọnnamẹnu dopo wẹ numọtolanmẹ agọ̀ nugbonọ-yinyin tọn. Di apajlẹ, hiẹ sọgan tindo sisi vonọtaun na nuyise po pọndohlan mẹdelẹ tọn po. Nalete, etẹwẹ lo eyin omẹ ehelẹ ma nọ nọgodona nugbo Ohó Jiwheyẹwhe tọn kavi ma nọ yí nukun nujọnu tọn do pọ́n ẹn? To ninọmẹ mọnkọtọn lẹ mẹ, e sọgan vẹawu nado mọnukunnujẹ nuhe Biblu plọn mí taun mẹ. Enẹwutu, Biblu dotuhomẹna mí nado nọ yí sọwhiwhe do dindona nuhe ko yin pinplọn mí lẹ.—1 Tẹsalonikanu lẹ 5:21.

Onọ̀ Jesu tọn, Malia, pehẹ avùnnukundiọsọmẹ mọnkọtọn. Ewọ yin pinplọn whẹ́n sọgbe hẹ aṣa Ju lẹ tọn. E nọ yìn Osẹ́n Mose tọn po ahundopo po podọ ayihaawe ma tin dọ e nọ yì sinagọgu mẹ. To nukọn mẹ to gbẹzan etọn mẹ, e wá mọ dọ aliho sinsẹ̀n-bibasi tọn he mẹjitọ etọn lẹ ko plọn ẹn masọ yin alọkẹyi to Jiwheyẹwhe dè ba. Enẹwutu, Malia kẹalọyi nuplọnmẹ Jesu tọn bo yin dopo to hagbẹ tintan agun Klistiani tọn lẹ mẹ. (Owalọ lẹ 1:13, 14) Ehe ma yin nuyiwa mẹmasi tọn hlan mẹjitọ etọn lẹ po aṣa yetọn lẹ po gba; kakatimọ, dohia owanyi he e tindo na Jiwheyẹwhe tọn wẹ e yin. Taidi Malia, eyin mí jlo na mọaleyi sọn Biblu mẹ, mí dona ze nugbonọ-yinyin na Jiwheyẹwhe donukọnna nugbonọ-yinyin na mẹdevo depope.

E blawu dọ, mẹsusu ma nọ yí nukun nujọnu tọn do pọ́n nugbo Biblu tọn. Mẹdelẹ nọ tindo pekọ to aṣa sinsẹ̀n tọn he sinai do lalo ji lẹ hihodo mẹ. Mẹdevo lẹ nọ do sisi matindo hia na nugbo lọ to hodidọ po aliho gbẹzan yetọn tọn po mẹ. Enẹwutu, alọkikẹyi nugbo Biblu tọn nọ biọ avọ́sinsan: E sọgan zọ́n bọ họntọn lẹ, kọmẹnu lẹ, azọ́nwatọgbẹ́ lẹ, podọ etlẹ yin whẹndo towe na jẹagọdo we. (Johanu 17:14) Etomọṣo, dawe nuyọnẹntọ lọ wlan dọmọ: “Họ̀ nugbo, a sà ẹ blo.” (Howhinwhẹn lẹ 23:23) Eyin a tindo sisi sisosiso na nugbo lọ, Jehovah na gọalọna we nado mọnukunnujẹ Biblu mẹ.

Onú devo he nọ glọnalinamẹ nado mọnukunnujẹ owẹ̀n Biblu tọn mẹ wẹ ojlo matindo nado yí nuhe e dọ lẹ do yizan mẹ. Jesu dọna devi etọn lẹ dọmọ: “Na mìwlẹ wẹ yè na nado yọ́n onú jiawu ahọludu olọn tọn, ṣigba yè ma na yewlẹ gba. Na ayiha omẹ ehelẹ tọn pẹ̀n, otó yetọn sọ tli na sisè.” (Matiu 13:11, 15) Suhugan mẹhe Jesu dọyẹwheho na lẹ tọn whèkọdakun, bo ma jlo na diọ. Lehe yé gbọnvo mlẹnmlẹn na ajọwatọ tomẹyitọ he Jesu donù e go to oló de mẹ do sọ! To whenuena ajọwatọ lọ mọ pali akuẹ gege tọn de, e yawu sà nuhe e tindo lẹpo nado họ̀ ẹ. Lehe nukunnumimọjẹ nugbo Biblu tọn mẹ dona họakuẹ na mí do niyẹn.—Matiu 13:45, 46.

Avùnnukundiọsọmẹ Alọkikẹyi Oplọn Tọn

Avùnnukundiọsọmẹ titengbe dopo to nukunnumimọjẹ Biblu mẹ wẹ ojlo tintindo nado kẹalọyi oplọn. E sọgan vẹawu na mẹde nado kẹalọyi linlẹn yọyọ lẹ sọn mẹhe sọawuhia taidi omẹ tata de dè. Ṣogan, apọsteli Jesu Klisti tọn lẹ “gbọagba nupinplọn tọn, bosọ yin gbẹtọ wunvinọ” lẹ. (Owalọ lẹ 4:13) Paulu do nuhewutu e do yinmọ hia to whenuena e wlan dọmọ: “Mì mọ oylọ mìtọn, mẹmẹsunnu emi, dọ e ma yin nuyọnẹntọ susu gbọn agbasalan tọn mẹ, e ma yin hlọnhlọnnọ susu, e ma yin mẹgboogbo susu, wẹ yè ylọ gba; ṣigba Jiwheyẹwhe ko de onú aihọn tọn lẹ he lunú nado dowinyan nuyọnẹntọ lẹ.” (1 Kọlintinu lẹ 1:26, 27) Eyin e vẹawu na we nado whiwhẹ dewe bo kẹalọyi nuplọnmẹ sọn omẹ tata de dè, flin dọ nuyizan de poun wẹ omẹ enẹ yin he Jiwheyẹwhe to yiyizan nado plọn we. Lẹblanulọkẹyi devo tẹwẹ sọ sọgan klohu yinyin pinplọn gbọn Jehovah, ‘Nuplọnmẹtọ Daho’ mítọn dali?—Isaia 30:20; 54:13.

Awhàngán Silia tọn Naamani yin mẹde he e vẹawu na nado kẹalọyi anademẹ he wá sọn omẹ tata de dè. E yì yẹwhegán Jehovah tọn Eliṣa dè nado sọgan mọ pọngbọ na pozọ̀n etọn. Ṣigba anademẹ Jiwheyẹwhe tọn lẹ na azọ̀nhẹngbọ yin didọna Naamani gbọn devizọnwatọ de gblamẹ. Owẹ̀n lọ po aliho he mẹ e yin didó te po ze whiwhẹ Naamani tọn do whlepọn mẹ sọmọ bọ to tintan whenu e gbẹ́ nado setonuna ohó he yẹwhegán Jiwheyẹwhe tọn dọ. To godo mẹ, Naamani diọ pọndohlan etọn bo yin azọ̀nhẹngbọna. (2 Ahọlu lẹ 5:9-14) Avùnnukundiọsọmẹ mọnkọtọn wẹ mí nọ pehẹ to whenuena mí to Biblu hia. Mí sọgan plọn dọ mí dona hodo aliho gbẹzan tọn yọyọ de nado sọgan yin azọ̀nhẹngbọna to gbigbọ-liho podọ to walọyizan-liho. Be mí na whiwhẹ míde bo dike mẹdevo ni plọn mí nuhe mí dona wà ya? Mẹhe nọ kẹalọyi oplọn lẹ kẹdẹ wẹ sọgan mọnukunnujẹ Biblu mẹ.

Dawe de he tindo aṣẹpipa daho to Kandakẹ, ahọsi Etiopiatọ lẹ tọn glọ do gbigbọ dagbe de hia. Dile e lẹkọ jei Aflika to kẹkẹ etọn mẹ, devi Filipi dowezun yì e dè bo dọnsẹpọ ẹ. Filipi kanse dawe lọ eyin e mọnukunnujẹ nuhe hia e te mẹ. Ahọluzọnwatọ lọ whiwhẹ ede sọmọ bo gblọn dọmọ: “Nawẹ yẹn sọgan do, adavo mẹde deana mi?” To nukunnumimọjẹ Ohó Jiwheyẹwhe tọn mẹ godo, dawe enẹ yin bibaptizi. To enẹgodo, e “to yìyì to aliho etọn ji, bo to ayajẹ.”—Owalọ lẹ 8:27-39.

Na taun tọn, Kunnudetọ Jehovah tọn lẹ yin omẹ paa lẹ. To osẹ dopodopo mẹ yé nọ deanana plọnmẹ Biblu lẹ to owhé gbẹtọ hugan livi ṣidopo lẹ tọn gbè. To whenuena e yindọ Biblu plọnmẹ aliho dagbe hugan gbẹninọ tọn, basi zẹẹmẹ todido dejidego dopo akàn gbẹtọvi tọn, bosọ do lehe mí sọgan jẹakọ hẹ Jiwheyẹwhe do hia, livi susu gbẹtọ lẹ tọn ko mọ dọ awuvivinu daho wẹ e yin nado plọn bo mọnukunnujẹ Biblu mẹ. Awuvivinu de wẹ e yin he hùndonuvo hlan we.

[Yẹdide to weda 7]

E vẹawu na Naamani nado kẹalọyi anademẹ lẹ sọn devizọnwatọ tata de dè

[Yẹdide to weda 7]

Nukunnumimọjẹ Biblu mẹ nọ hẹn ahun mítọn jaya