Ohẹ́n—Ninọmẹ lọ to Egbehe

VICENTEa nọ saba yin mimọ to tòhomẹ-liho São Paulo tọn lẹ ji, to Brésil, bọ e nọ to kẹkẹvi he agbàn gọ́ e mẹ de dọ̀n pé. E nọ ṣinyan pali, ogàn gbigble, po lọba lẹ po. Eyin ozán jẹ kúkú ji, e nọ tẹ́ pali do kẹkẹvi etọn glọ bo nọ mlọnai. E taidi dọ awhágbe mọto po ahihun lẹ tọn po he nọ yin sisè to aliho he ji e nọ dọ́ lọ ma tlẹ nọ dotukla ẹ nkọtọn. To ojlẹ de mẹ wayi, e tindo agbasazọ́n, owhé po whẹndo po—ṣigba ehe lẹpo wẹ e hẹnbu. Todin huhlọn mẹ wẹ e nọ mọ núdù te to tòhomẹ-liho ji.

E blawu dọ, lẹdo aihọn pé, livi susu gbẹtọ lẹ tọn wẹ tin to ohẹ́n klókló mẹ taidi Vicente. To otò wamọnọ lẹ mẹ, mẹsusu tin to dandannu glọ nado nọ dọ́ alitó kavi nado gbọṣi gohọ̀ kija lẹ mẹ. Nubiọdutọ lẹ—yèdọ sẹkunọ lẹ, nukuntọ́nnọ lẹ po yọnnu he to anọ́ na ovi yetọn lẹ po—nọ saba yin mimọ to filẹpo. To miyọ́n avase aliji tọn lẹ kọ̀n, yọpọvu lẹ nọ họ̀nwezun gbọ̀n mọto lẹ ṣẹnṣẹn nado sọgan sà bọnbọn lẹ bo mọ akuẹ vude do apòmẹ.

E vẹawu nado dọ nuhewutu ohẹ́n mọnkọtọn do tin. Linlinwe Grande-Bretagne tọn The Economist basi zẹẹmẹ dọmọ: “Hugan gbede pọ́n, akọ̀ gbẹtọvi tọn tindo adọkun, oyọnẹn amasinzọnwiwa tọn, nugopipe azọ́n nuyọnẹn wintinwintin tọn, po nuyọnẹn he nuhudo etọn tin lọ po nado sọgan duto ohẹ́n ji.” Na nugbo tọn, mẹsusu ko mọaleyi sọn nugopipe gbẹtọvi lẹ tọn ehe mẹ. To otò wamọnọ tọn susu mẹ, ali tòdaho lẹ tọn nọ gọ́ na mọto yọyọ he to sisẹ́ lẹ. Nusatẹn lẹ nọ gọ́ na núzinzan yọyọ he to zoji lẹ, podọ mẹhe na họ̀ yé lẹ ma hán. Nusatẹn daho Brésil tọn awe basi tito ajọ́jijla vonọtaun de tọn wayi. Yé jo ohọ̀n yetọn lẹ do hùnhùn sọn ozán 23 jẹ 24 décembre 2004 tọn mẹ. Dopo to nusatẹn lọ lẹ mẹ dà wedutọ lẹ nado dó vivi lanmẹ na ahisinọ lẹ. Nuhọtọ diblayi 500 000 wẹ wá nujijọ lọ tẹnmẹ!

Etomọṣo, susu gbẹtọ lẹ tọn ma nọ mọaleyi sọn adọkun he mẹdevo lẹ to vivi etọn dù mẹ gba. Vogbingbọn daho he tin to adọkunnọ lẹ po wamọnọ lẹ po ṣẹnṣẹn ko hẹn mẹsusu nado wá tadona lọ kọ̀n dọ nude dona yin wiwà to niyaniya mẹ nado sọgan duto ohẹ́n ji. Linlinwe Brésil tọn Veja dọmọ: “To owhe ehe [2005] mẹ, avùnhiho sọta ohẹ́n wẹ dona yin whẹho titengbe he ji nukọntọ aihọn tọn lẹ na dọhodo.” Veja sọ na linlin gando nuzedonukọnnamẹ tito Plan Marshall tọn yọyọ de go he yin awuwlena nado gọalọna otò he jẹhẹ́n hugan lẹ, titengbe to Aflika.b Nalete, dile etlẹ yindọ nuzedonukọnnamẹ mọnkọtọn lẹ jlo na de linlẹn lọ tọ́n dọ nukọnyiyi tin, linlinwe dopolọ yidogọ dọmọ: “Whẹwhinwhẹ́n susu sọ tin nado tindo ayihaawe gando kọdetọn lọ lẹ go. Nuhe zọ́n bọ suhugan otò lẹ tọn nọ whleawu nado na akuẹ do tito ehe tamẹ wẹ yindọ akuẹ he yin bibẹpli lọ lẹ ma nọ saba jẹ mẹhe wutu yé do yin nina lẹ dè gba.” E blawu dọ, na mẹhodu po tito anadenanu tọn gigẹdẹ lẹ po wutu, adà daho akuẹ he gandudu lẹ, titobasinanu akọjọpli tọn lẹ po mẹdopodopo lẹ po na lẹ tọn ma nọ jẹ mẹhe tindo nuhudo yetọn nugbonugbo lẹ dè gbede.

Jesu yọnẹn dọ nuhahun ohẹ́n tọn na zindonukọn. E dọmọ: “Mìwlẹ tindo wamọnọ lẹ to mì dè to whepoponu.” (Matiu 26:11) Be ehe zẹẹmẹdo dọ ohẹ́n na tin to aigba ji kakadoi wẹ ya? Be nudepope sọgan yin wiwà nado hẹn ninọmẹ lọ pọnte ya? Etẹwẹ Klistiani lẹ sọgan wà nado gọalọna wamọnọ lẹ?

[Nudọnamẹ Odò Tọn]