Wẹndagbe de Na Wamọnọ Lẹ
OHÓ JIWHEYẸWHE tọn na mí jide dọ: “Yè ma na wọnji [wamọnọ] lẹ go gbidigbidi.” (Psalm 9:18) Biblu sọ dọ gando Mẹdatọ mítọn go dọmọ: “Hiẹ kẹ̀ alọ towe, bosọ hẹnnupekọna ojlo nutogbẹ̀ lẹpo tọn.” (Psalm 145:16) Todido he go Ohó Jiwheyẹwhe tọn donù ehe ma yin odlọ de poun gba. Jiwheyẹwhe Ganhunupotọ lọ penugo nado de ohẹ́n sẹ̀. Nuhudo etẹ tọn wẹ wamọnọ lẹ tindo?
Nawe Aflikanu de he nọ kanwe gando lehe yè sọgan zan akuẹ do go basi zẹẹmẹ dọ nuhe otò he mẹ ohẹ́n to núgbà te lẹ tindo nuhudo etọn hugan wẹ “gandutọ awuvẹmẹtọ de.” Nuhe dọ e te wẹ yindọ eyin gandutọ de na de ohẹ́n sẹ̀, be e dona yin awuvẹmẹtọ he tindo aṣẹ nado didẹ nuhahun ehe. Mí sọ sọgan dọ dọ, gandutọ he sọgan de ohẹ́n sẹ̀ na mẹlẹpo dona dugán do aihọn lọ blebu ji na zẹ́nmasọ he tin lẹdo aihọn pé wẹ nọ saba dekọtọn do ohẹ́n klókló mẹ. Humọ, eyin gandutọ de na de ohẹ́n sẹ̀, e dona penugo nado họ̀nadọna nuhe nọ hẹn ohẹ́n wá—enẹ wẹ ayilinlẹn ṣejannabi tọn mítọn. Fie wẹ mí sọgan mọ gandutọ dagbe mọnkọtọn te?
Jiwheyẹwhe do Jesu hlan nado lá wẹndagbe de na wamọnọ lẹ. To whenue Jesu ṣite nado hia azọ́ndenamẹ he e mọyi sọn Jiwheyẹwhe dè, e dọmọ: “Gbigbọ Jehovah tọn tin to oji e, na e ko yiamisisadode mi nado lá wẹndagbe na wamọnọ lẹ.”—Luku 4:16-18.
Etẹwẹ Yin Wẹndagbe Lọ?
Jiwheyẹwhe ko de Jesu taidi Ahọlu. Na taun tọn, wẹndagbe de wẹ ehe yin. Ewọ wẹ Gandutọ dagbe he sọgan de ohẹ́n sẹ̀ na (1) e na dugán do gbẹtọvi lẹpo ji bosọ tindo huhlọn nado yinuwa; (2) e vẹawu wamọnọ lẹ bosọ plọn hodotọ etọn lẹ nado nọ hò yetọn pọ́n; podọ (3) e sọgan họ̀nadọna nuhe nọ hẹn ohẹ́n wá, enẹ wẹ ayilinlẹn ṣejannabi tọn he mí dugu etọn. Mì gbọ mí ni gbadopọnna adà atọ̀n wẹndagbe lọ tọn ehelẹ.
1. Aṣẹpipa Jesu tọn do akọta lẹpo ji Ohó Jiwheyẹwhe tọn dọ gando Jesu go dọmọ: “Yè sọ yí ahọluigba na ẹn finẹ . . . na gbẹtọ lẹpo, po akọta lẹ po, po ogbè lẹ po nido nọ sẹ̀n ẹn.” (Daniẹli 7:14) Eyin mẹdopo gee dugán do gbẹtọvi lẹpo ji, ale susu wẹ enẹ na hẹnwa. Gbẹtọ lẹ ma nasọ nọ hoavùn kavi dọnnu do adọkunnu aigba tọn lẹ ji ba. Mẹlẹpo wẹ na duvivi etọn zẹnzẹn. Jesu lọsu namẹ jide dọ emi na dugán do aihọn lọ ji podọ emi sọ tindo aṣẹ nado yinuwa. E dọmọ: “Aṣẹ lẹpo ko yin nina mi to olọn mẹ podọ to aigba ji.”—Matiu 28:18.
2. Jesu vẹawu wamọnọ lẹ To lizọnyizọn aigba ji tọn Jesu tọn blebu whenu, e vẹawu wamọnọ lẹ. Di apajlẹ, nawe he zan nutindo etọn lẹpo na nukunpedomẹgo dotowhé tọn de doalọ awugbó Jesu tọn go nado mọ pọngbọ. E dihùn na owhe 12, podọ ayihaawe ma tin dọ ohùn na ko whèdo e taun. Sọgbe hẹ Osẹ́n Mose tọn, eyin e doalọ mẹdepope go, mẹlọ na lẹzun mawé. Ṣigba, Jesu do homẹdagbe hia ẹ. E dọmọ: “Viyọnnu ṣie, yise towe ko hẹn we jẹgangan. Yì to jijọho mẹ, bo tindo agbasalilo sọn azọ̀n sinsinyẹn towe mẹ.”—Malku 5:25-34.
Nuplọnmẹ Jesu tọn lẹ yinuwado pọndohlan gbẹtọ lẹ tọn ji sọmọ bọ yelọsu penugo nado nọ vẹawumẹ. Di apajlẹ, lẹnnupọndo gblọndo he Jesu na dawe de he jlo na yọ́n lehe e sọgan hẹn homẹhun Jiwheyẹwhe do ji. Dawe lọ ko yọnẹn dọ Jiwheyẹwhe jlo dọ mí ni yiwanna kọmẹnu mítọn, ṣigba e kanse Jesu dọmọ: “Mẹnu wẹ kọmẹnu ṣie taun?”
To gblọndo he Jesu na ẹn mẹ, e na apajlẹ diyin etọn gando dawe de he to gbejizọnlinzin sọn Jelusalẹm jei Jẹliko bọ jaguda lẹ fìn onú etọn lẹ, hò e bosọ jo e do “kúdaa-gbẹ̀daa” go. Yẹwhenọ de gbọn finẹ wá jei bo jugbọn awà awetọ ji yì. Nudopolọ wẹ Levinu de wà. “Ṣigba, Samalianu de he to gbejizọnlinzin gbọn aliho lọ dọnsẹpọ ẹ podọ, to whenue e mọ ẹn, lẹblanu whàn ẹn.” E klọ́ apà na dawe lọ bo ze e yì hotẹli pẹvi de bosọ suahọ nukunpedonugotọ hotẹli pẹvi lọ tọn nado penukundo dawe he gbleawu lọ go. ‘Mẹnu wẹ do ede hia di kọmẹnu na dawe lọ he jẹ alọ jaguda lẹ tọn mẹ?’ wẹ Jesu kanse. Dawe lọ gblọn dọ “Mẹhe do lẹblanu hia hlan ẹn.” Enẹgodo Jesu dọmọ: “Nọ wà onú dopolọ.”—Luku 10:25-37.
Mẹhe lẹzun Kunnudetọ Jehovah tọn lẹ nọ plọn nuhe Jesu plọnmẹ lẹ bo nọ diọ pọndohlan yetọn gando lehe yé na gọalọna mẹhe to nuhudo mẹ lẹ do go. Di apajlẹ, nawe wekantọ Lettonie tọn de wlan to owe etọn Les femmes dans les prisons soviétiques (Glẹnsigbe) mẹ gando azọ̀n he e jẹ to whenue e to azọ́nwa to gànpamẹ to Potma to gblagbla owhe 1960 tọn lẹ mẹ go. E wlan dọmọ: “To whenue n’to azọ̀njẹ, [Kunnudetọ lẹ] wẹ doto mẹgopọntọ he penukundo go e hugan. Mẹde masọ sọgan penukundomẹgo hugan mọ.” E yidogọ dọmọ: “Kunnudetọ Jehovah tọn lẹ nọ mọ ẹn taidi azọngban yetọn nado gọalọna mẹlẹpo, mahopọnna sinsẹ̀n mẹlọ tọn kavi otò he mẹ e wá sọn.”
To whenue Kunnudetọ Jehovah tọn he tin to Ancón, Équateur lẹ to pipehẹ nuhahun akuẹzinzan tọn na yé ma mọ azọ́n kavi tindo akuẹ wutu, Kunnudetọ hatọ yetọn lẹ basi dide nado dín aliho de nado jọ akuẹ na yé; yé nọ dà núdùdù sà na whèhutọ he lẹkọ sọn tọji to zánmẹ lẹ (pọ́n yẹdide lọ to adusiwhé). Mẹlẹpo wẹ kọngbedopọ to agun lọ mẹ, kakajẹ yọpọvu lẹ ji. Yé nọ jẹ nudà ji sọn ogàn dopo mẹ zánmẹ na núdùdù lọ nido sọgbe whẹpo whèhutọ lẹ nido lẹkọ sọn tọji to ogàn ẹnẹ mẹ afọnnu. Akuẹ he Kunnudetọ lọ lẹ mọ nọ yin mimá na yisenọ hatọ lẹ sọgbe hẹ nuhudo mẹdopodopo tọn.
Numimọ ehelẹ dohia dọ apajlẹ po nuplọnmẹ Jesu tọn lẹ po tindo huhlọn nado diọ pọndohlan gbẹtọ lẹ tọn nado nọ gọalọna mẹhe to nuhudo mẹ lẹ.
3. Huhlọn he Jesu tindo nado diọ ayilinlẹn ṣejannabi tọn he mí dugu etọn Ayilinlẹn gbẹtọvi lẹ tọn nado nọ yinuwa po ṣejannabi po yin nude he mẹlẹpo yọnẹn. Biblu ylọ ẹ dọ ylando. Apọsteli Paulu tlẹ wlan gandego dọmọ: “To whenẹnu, yẹn mọ osẹ́n ehe to ninọmẹ ṣie mẹ: dọ to whenue yẹn jlo nado wà nuhe sọgbe, nuhe ylan wẹ nọ tin to dè e.” Enẹgodo e yidogọ dọmọ: “Mẹnu wẹ na whlẹn mi sọn agbasa he to okú ehe hẹnwa to yẹn mẹ lọ si? Opẹ́ wẹ na Jiwheyẹwhe gbọn Jesu Klisti . . . gblamẹ!” (Lomunu lẹ 7:21-25) To wefọ ehelẹ mẹ, Paulu to hodọ gando Jiwheyẹwhe go dọ gbọn Jesu gblamẹ, e na whlẹn sinsẹ̀n-basitọ nugbo lẹ sọn ayilinlẹn ylando tọn he mí dugu etọn lẹ si, ehe ṣejannabi he yin adọ̀ ohẹ́n tọn yin dopo to e mẹ. Nawẹ e na wà ehe gbọn?
Ojlẹ de to baptẹm Jesu tọn godo, Johanu Baptizitọ lọ do Jesu hia dọmọ: “[Mì] pọ́n, Lẹngbọvu Jiwheyẹwhe tọn lọ he ze ylando aihọn tọn yì!” (Johanu 1:29) To madẹnmẹ, aigba na gọ́ na gbẹtọ he yin tuntundote sọn ylando he mí dugu etọn si lẹ, gọna ayilinlẹn ṣejannabi tọn mítọn. (Isaia 11:9) Mọwẹ, Jesu na họ̀nadọna ohẹ́n.
Lehe e yin ayajẹnu nado to nukọnpọnhlan ojlẹ lọ whenue mẹlẹpo na tindo nuhe yé tindo nuhudo etọn lẹ do sọ! Ohó Jiwheyẹwhe tọn dọmọ: “Yé na sinai mẹdopodopo to vẹntin etọn glọ podọ to ovòtin etọn glọ; podọ mẹde ma nasọ hẹn yé savò gba.” (Mika 4:4) Wefọ enẹ yí hogbe milomilo lẹ zan nado basi zẹẹmẹ whenue mẹlẹpo na tindo azọ́n pekọhẹnwanamẹ tọn, hihọ́, po dotẹnmẹ hundote lọ nado duvivi aihọn he mẹ ohẹ́n ma na tin te ba de tọn po, ehe lẹpo na gigo Jehovah tọn.