Kanbiọ lẹ sọn Wehiatọ lẹ Dè

Etẹwẹ zọ́n bọ ‘onú tindo ojlona akọta lẹpo tọn’ do to wiwá “ohọ̀” sinsẹ̀n-bibasi nugbo tọn mẹ?—Hagai 2:7.

Jehovah dọ dọdai gbọn yẹwhegán Hagai gblamẹ dọmọ: ‘Yẹn na whàn akọta lẹ, podọ onú tindo ojlona akọta lẹpo tọn nasọ wá, yẹn bo nasọ yí gigo do gọ́ ohọ̀ he.’ (Hagai 2:7) Be whinwhàn ‘akọta lẹpo tọn’ wẹ zọ́n bọ ‘onú tindo ojlona’ akọta lẹ tọn—yèdọ gbẹtọ ahunjijlọnọ lẹ—to alọkẹyi sinsẹ̀n-bibasi nugbo ya? Lala wẹ yin gblọndo lọ.

Lẹnnupọndo nuhe to akọta lẹ whàn po nuhe mẹ whinwhàn ehe nọ dekọtọn do po ji. Biblu dọ dọ “kosi lẹ [kavi akọta lẹ] to adanjẹ, bọ gbẹtọ lẹ . . . to ayihamẹlẹnpọn na onú ovọ́.” (Psalm 2:1) “Onú ovọ́” he ji yé “to ayihamẹlẹnpọn” do lọ wẹ lehe yé na wagbọn bọ aṣẹpipa yetọn na zindonukọn. Nudepope ma nọ whàn yé sọ nuhe sọgan ze gandudu yetọn do owù mẹ lẹ.

Yẹwhehodidọ Kunnudetọ Jehovah tọn lẹ tọn lẹdo aihọn pé gando Ahọluduta Jiwheyẹwhe tọn he ko yin didoai lọ go ko lẹzun budonamẹnu de he ze gandudu akọta lẹ tọn do owù mẹ. Na nugbo tọn, Ahọluduta Mẹssia Jiwheyẹwhe tọn he tin to anademẹ Jesu Klisti tọn glọ na “gbà ahọludu do flinflin bo sú ahọludu [gbẹtọvi tọn] lẹpo do.” (Daniẹli 2:44) Owẹ̀n whẹdida tọn he azọ́n yẹwhehodidọ tọn mítọn bẹhẹn to whinwhàn akọta lẹ. (Isaia 61:2) Podọ whinwhàn lọ nọ sinyẹn deji dile azọ́n yẹwhehodidọ tọn lọ to adàgblo bo to jijideji dogọ. Ohia etẹ tọn wẹ whinwhàn he yin didọdai to Hagai 2:7 mẹ lọ yin?

To Hagai 2:6 mẹ, mí hia dọmọ: “Le wẹ OKLUNỌ awhànpa lẹ tọn dọ: Ganṣo whladopo, whenu vude e yin, yẹn bo na whàn olọn lẹ, po aigba lọ po, po ohù po, po aigba kló po.” Apọsteli Paulu yihodọ sọn wefọ ehe mẹ bo wlan dọmọ: “E ko dopagbe dọmọ, Whladopo dogọ yẹn ma to aigba kẹdẹ na whàn ba, ṣigba olọn ga. Ohó he lọ, Whladopo dogọ, [zẹẹmẹdo] bibẹsẹ̀ nuhe yè ko whàn lẹ tọn . . . di nuhe yè dá tọn lẹ mẹ, dọ nuhe yè ma whàn nẹlẹ [Ahọluduta lọ] nido nọ mọ.” (Heblu lẹ 12:26, 27) Mọwẹ, aihọn ylankan dintọn lọ pete na yin vivasudo na aihọn yọyọ he Jiwheyẹwhe wleawuna nido yitẹn.

Ṣigba e ma yin whinwhàn akọta lẹ tọn wẹ zọ́n bọ ahunjijlọnọ lẹ do nọ yin dindọ̀n wá sinsẹ̀n-bibasi nugbo mẹ gba. Nuhe to akọta lẹ whàn dopolọ wẹ sọ to yelọsu dọ̀n wá Jehovah po sinsẹ̀n-bibasi etọn po kọ̀n, enẹ wẹ yẹwhehodidọ lẹdo aihọn pé gando Ahọluduta Jiwheyẹwhe tọn he ko yin didoai lọ go. “Wẹndagbe madopodo” lọ lilá nọ dọ̀n mẹhe tindo ahunjijlọ lẹ wá sinsẹ̀n-bibasi Jiwheyẹwhe nugbo lọ tọn mẹ.—Osọhia 14:6, 7.

Owẹ̀n Ahọluduta tọn lọ yin owẹ̀n whẹdida po whlẹngán po tọn de. (Isaia 61:1, 2) Yẹwheho etọn didọ lẹdo aihọn pé nọ dekọtọn do onú voovo awe mẹ: whinwhàn akọta lẹ tọn podọ wiwá onú tindo ojlona lẹ tọn na gigo Jehovah tọn.