Klandowiwe po Mẹdekannujẹ Nudide Tọn Po
“Klisti hẹn mí vọnu jẹ mẹdekannu.”—GALATIANU LẸ 5:1.
1. Etẹwẹ hogbe Heblu po Glẹki tọn po heyin lilẹdogbedevomẹ do “klandowiwe,” “zedai,” kavi “hẹnzun wiwe” nọ yin yiyizan na na taun tọn?
BIBLU kantọ lẹ yí hogbe Heblu po Glẹki po tọn voovo lẹ zan nado deanana linlẹn yinyin kinklandovo, kavi de dovo tọn, nado yí lẹndai wiwe de basi. To Biblu Glẹnsigbe tọn lẹ mẹ hogbe ehelẹ yin lilẹdogbedevomẹ po hogbe taidi “klandowiwe,” “zedai,” kavi “hẹnzun wiwe” po. To whedelẹnu hogbe ehelẹ nọ yin yiyizan to kọndopọmẹ hẹ dodonu lẹ—yèdọ to paa mẹ na tẹmpli Jiwheyẹwhe tọn to Jelusalẹm hohowhenu tọn po sinsẹ̀n-bibasi he nọ yin bibasi to finẹ po. Vlavo wẹ hogbe ehelẹ nọ yin yiyizan to alọdlẹndonu hlan whẹho lẹdo tọn lẹ mẹ.
Klandowiwe Hlan “Jiwheyẹwhe Islaeli Tọn”
2. Naegbọn Jehovah sọgan gbọn jlọjẹ dali yin yiylọdọ “Jiwheyẹwhe Islaeli tọn”?
2 To owhe 1513 J.W.M., Jiwheyẹwhe whlẹn Islaelivi lẹ sọn kanlinmọgbenu Egiptinu lẹ tọn mẹ. Ojlẹ vude to enẹgodo, e de yé dovo taidi gbẹtọ vonọtaun etọn lẹ, bo hẹn yé biọ haṣinṣan alẹnu tọn de mẹ hẹ ede. Yé yin didọna dọmọ: “Dinvie, eyin mìwlẹ na yí ogbè ṣie se nugbonugbo, bo yìn alẹnu ṣie, whenẹnu wẹ mìwlẹ na yin adọkunnu vivẹ de hlan mi sọn ṣẹnṣẹn gbẹtọ lẹpo tọn: na aigba lẹpo wẹ ṣie.” (Eksọdusi 19:5; Psalm 135:4) To whenuena e ko hẹn Islaelivi lẹ lẹzun nutindo vonọtaun etọn lẹ, Jehovah sọgan gbọn jlọjẹ dali yin yiylọ dọ “Jiwheyẹwhe Islaeli tọn.”—Jọṣua 24:23.
3. Naegbọn Jehovah ma do to mẹnukuntahihopọn dohia gbọn dide Islaeli taidi omẹ etọn lẹ dali?
3 To hinhẹn Islaelivi lẹ yin gbẹtọ klandowiwe etọn lẹ, Jehovah mayin mẹnukuntahopọntọ gba, na ewọ nọ tin to lẹnpọn mẹ na mẹhe mayin Islaelivi lẹ ga. E degbena omẹ etọn lẹ dọmọ: “Eyin jonọ de wáwáṣi to dè we to aigba mìtọn ji, mìwlẹ ma na wà agọ̀ do e gba. Jonọ he wáwáṣi to mì dè lọ na tin hlan mì di owhévi lọ to mì ṣẹnṣẹn, hiẹ nasọ yiwanna ẹn di dewe; na mìwlẹ ko yin jonọ to aigba Egipti tọn lọ mẹ: yẹn wẹ OKLUNỌ lọ Jiwheyẹwhe mìtọn.” (Levitiku 19:33, 34) Owhe kanweko lẹ godo, nujinọtedo Jiwheyẹwhe tọn yinuwado apọsteli Pita ji po huhlọn po, mẹhe yigbe dọmọ: “Nugbo, yẹn pọ́n dọ Jiwheyẹwhe ma yin mẹnukuntahopọntọ gba: ṣigba to akọta lẹpo mẹ, mẹhe dibusi i, bo wazọ́n dodo, wẹ yè kẹalọyi to e dè.”—Owalọ lẹ 10:34, 35.
4. Etẹwẹ yin ninọmẹ lẹ gando haṣinṣan to Jiwheyẹwhe po Islaeli po ṣẹnṣẹn, podọ be Islaelivi lẹ nọgbẹ̀ sọgbe hẹ yé ya?
4 Doayi e go, ga, dọ omẹ klandowiwe Jiwheyẹwhe tọn yinyin sinai do ninọmẹ de ji. Eyin yé setonu mlẹnmlẹn hlan ogbè Jiwheyẹwhe tọn bo yìn alẹnu etọn kẹdẹ wẹ yé na yin “adọkunnu vivẹ” etọn. E blawu dọ, Islaelivi lẹ gboawupo nado jẹ nubiọtomẹsi ehelẹ kọ̀n. To whenuena yé gbẹ́ Mẹssia heyin didohlan gbọn Jiwheyẹwhe dali to owhe kanweko tintan W.M. lọ dai godo, yé hẹn otẹn lẹblanulọkẹyi tọn yetọn bú. Jehovah masọ yin “Jiwheyẹwhe Islaeli tọn” bà. Podọ Islaelivi agbasalan tọn lẹ masọ yin omẹ klandowiwe Jiwheyẹwhe tọn lẹ bà.—Yijlẹdo Matiu 23:23 go.
Klandowiwe “Islaeli Jiwheyẹwhe Tọn” Tọn
5, 6. (a) Etẹ dọ wẹ Jesu te gbọn hogbe dọdai tọn etọn heyin kinkandai to Matiu 21:42, 43 mẹ lẹ dali? (b) Whetẹnu podọ nawẹ “Islaeli Jiwheyẹwhe tọn” wá tintin mẹ gbọn?
5 Be ehe zẹẹmẹdo dọ Jehovah todin na tin matin omẹ klandowiwe de wẹ ya? Lala. To hoyidọ sọn psalmkantọ lọ dè, Jesu Klisti dọ dọdai dọmọ: “Be mìwlẹ ma ko hia to Owe wiwe lẹ mẹ gbede, dọ, zannu he didotọ lẹ gbẹ́ dai, doponẹ wẹ yè hẹn yin gangansu họ̀lọnglọnẹn tọn, ehe wẹ sọn OKLUNỌ dè, e sọ jawu to nukun mítọn mẹ. Enẹwutu wẹ yẹn dọ hlan mì, dọ, yè na yí ahọludu Jiwheyẹwhe tọn sọn mì dè, yè nasọ yí na akọta de he na dè sinsẹ́n etọn jẹgbonu.”—Matiu 21:42, 43.
6 “Akọta de he na dè sinsẹ́n etọn jẹgbonu” sọawuhia nado yin agun Klistiani tọn lọ. To gbẹzan gli aigba ji tọn etọn whenu, Jesu dè hagbẹ tintan sọgodo tọn etọn lẹ. Ṣigba to azán Pẹntikọsti owhe 33 W.M. tọn gbè, Jehovah Jiwheyẹwhe lọsu wẹ ze agun Klistiani tọn lọ dai gbọn kinkọn gbigbọ wiwe etọn jẹgbonu do hagbẹ tintan etọn lẹ ji dali, he sọha yetọn yì nudi gbẹtọ 120. (Owalọ lẹ 1:15; 2:1-4) Dile apọsteli Pita wlan to nukọnmẹ do, agun yọyọ heyin zizedai ehe lẹzun “whẹndo he yè dè, mẹhe yin tado yẹwhenọduta tọn, akọta wiwe, gbẹtọ na nudido Jiwheyẹwhe tọn titi.” Yé yin dide na whẹwhinwhẹ́n tẹ́ wutu? Na yé nido “jla pipà ewọ he ylọ [yé] sọn zinvlu mẹ do hinhọ́n ablanọ etọn tọn mẹ.” (1 Pita 2:9) Hodotọ Klisti tọn lẹ, heyin amisisadode po gbigbọ Jiwheyẹwhe tọn po, todin yin akọta klandowiwe de, yèdọ “Islaeli Jiwheyẹwhe tọn.”—Galatianu lẹ 6:16.
7. Etẹwẹ hagbẹ Islaeli Jiwheyẹwhe tọn lẹ na duvivi etọn, podọ enẹwutu etẹwẹ yé yin didọna nado dapana?
7 Dile etlẹ yindọ hagbẹ akọta wiwe lọ tọn lẹ yin “gbẹtọ na nudido Jiwheyẹwhe tọn titi,” yé ma yin kanlinmọ lẹ gba. To vogbingbọn mẹ, yé na duvivi mẹdekannujẹ daho hugan dehe yin tintindo gbọn akọta klandowiwe Islaeli jọwamọ tọn lọ dali. Jesu dopagbe na hagbẹ sọgodo akọta yọyọ ehe tọn lẹ dọmọ: “Mìwlẹ nasọ yọ́n nugbo, nugbo lọ nasọ hẹn mì jẹ mẹdekannu.” (Johanu 8:32) Apọsteli Paulu zinnudeji dọ Klistiani lẹ yin hinhẹn jẹ mẹdekannu sọn nubiọtomẹsi alẹnu Osẹ́n tọn lẹ mẹ. Gando ehe go e dotuhomẹna yisenọ hatọ lẹ to Galatia dọmọ: “Enẹwutu mì nọte gligli to mẹdekannujẹ lọ mẹ, gbọn ehe mẹ Klisti hẹn mí vọnu jẹ mẹdekannu, na mì sọ yí okọ̀ do zẹ̀gẹ̀ kanlinmọgbenu tọn mẹ bà blo.”—Galatianu lẹ 5:1.
8. To aliho tẹmẹ wẹ tito Klistiani tọn lọ na mẹdekannujẹ daho mẹdopodopo lẹ hugan ehe yin numimọ etọn tindo to alẹnu Osẹ́n tọn glọ gbọn?
8 Ma taidi Islaeli jọwamọ hoho tọn, kakajẹ egbehe Islaeli Jiwheyẹwhe tọn nọ setonuna nubiọtomẹsi klandowiwe tọn etọn lẹ pẹkipẹki. Ehe ma dona yin nupaṣamẹ gba na hagbẹ etọn lẹ basi nudide po ojlo po nado setonu. To whenuena e yindọ hagbẹ Islaeli jọwamọ tọn lẹzun klandowiwe gbọn whẹwhinwhẹ́n jìjì tọn dali, hagbẹ Islaeli Jiwheyẹwhe tọn lẹzun mọ gbọn nudide bibasi dali. Gbọnmọ dali tito Klistiani tọn lọ tin to vogbingbọn mẹ hẹ alẹnu Osẹ́n Ju lẹ tọn, ehe ze klandowiwe do mẹdopodopo ji matin dotẹnmẹ mẹdekannujẹ nudide tọn nina yé.
9, 10. (a) Nawẹ Jẹlemia dohia gbọn dọ diọdo na tin na nuhe dù klandowiwe? (b) Naegbọn hiẹ nado dọ dọ e mayin Klistiani klandowiwe lẹpo to egbehe wẹ yin hagbẹ Islaeli Jiwheyẹwhe tọn gba?
9 Yẹwhegan Jẹlemia dọ dọdai diọdo tọn to lẹnpọn mẹ na klandowiwe to whenuena e wlan dọmọ: “Doayi e go, azán lẹ wá, wẹ OKLUNỌ dọ, bọ yẹn na basi alẹnu yọyọ de hẹ owhé Islaeli tọn, podọ hẹ owhé Juda tọn: Kẹdẹdi alẹnu he yẹn basi hẹ otọ́ yetọn lẹ to azán he mẹ yẹn yí alọ do hẹn yé nado hẹn yé tọ́n sọn aigba Egipti tọn ji ma wẹ gba; alẹnu ṣie he yé gbà, le yẹn tlẹ yin OKLUNỌ to yé ji do, wẹ OKLUNỌ dọ. Ṣigba ehe wẹ alẹnu he yẹn na basi hẹ owhé Islaeli tọn to azán nẹlẹ godo, wẹ OKLUNỌ dọ; yẹn na yí osẹ́n ṣie do ohò yetọn mẹ dọ́n, podọ ayiha yetọn mẹ wẹ yẹn na wlan ẹn do; yẹn nasọ yin Jiwheyẹwhe yetọn, yewlẹ nasọ yin omẹ ṣie.”—Jẹlemia 31:31-33.
10 Osẹ́n Jiwheyẹwhe tọn tintindo to “ohò yetọn” mẹ, yin kinkan, dile e te do, ‘to ayiha yetọn mẹ,’ hagbẹ Islaeli Jiwheyẹwhe tọn lọ lẹ yin whinwhan nado nọgbẹ̀ sọgbe hẹ klandowiwe yetọn. Mẹwhinwhan yetọn tindo huhlọn hugan enẹ heyin Islaelivi jọwamọ lẹ tọn, mẹhe yin kinklandowiwe gbọn jìjì dali, e mayin gbọn nudide bibasi dali gba. To egbehe, mẹwhinwhan huhlọnnọ lọ nado wà ojlo Jiwheyẹwhe tọn, dile e yin didohia gbọn Islaeli Jiwheyẹwhe tọn dali do, yin mimá gbọn hugan livi atọ́n sinsẹ̀n-basitọ hatọ lẹ dali lẹdo aihọn pé. Mọdopolọ yé ko klan ogbẹ̀ yetọn lẹ do wiwe hlan Jehovah Jiwheyẹwhe nado wà ojlo etọn. Dile etlẹ yindọ omẹ ehelẹ ma tindo todido ogbẹ̀ olọn mẹ tọn dile mẹhe Islaeli Jiwheyẹwhe tọn bẹhẹn lẹ wà do, yé jaya to nukundido nado nọgbẹ̀ kakadoi to gandudu Ahọluduta olọn mẹ tọn Jiwheyẹwhe tọn mẹ. Yé do pinpẹn-nutọn-yinyọnẹn hia na Islaeli gbigbọmẹ tọn gbọn zohunhun yíyí do nọgodona pipotọ hagbẹ kleun etọn lẹ to azọ́ndenamẹ yetọn nado “jla pipà ewọ he ylọ [yé] sọn zinvlu mẹ do hinhọ́n ablanọ etọn tọn mẹ” hinhẹndi dali.
Yíyí Mẹdekannujẹ He Jiwheyẹwhe Namẹ Zan po Nuyọnẹn Po
11. Po nugopipe tẹ́ po wẹ gbẹtọ yin didá, podọ nawẹ e dona yin yiyizan gbọn?
11 Jiwheyẹwhe dá gbẹtọvi lẹ nado wlebòna mẹdekannujẹ. E na yé nugopipe ojlo mẹdekannujẹ tọn. Asu po asi po tintan lọ yí mẹdekannujẹ nudide tọn yetọn zan. Ṣigba, yé gbọn nuyọnẹn ma tindo po owanyi ma tindo po dali basi nudide he planmẹ jẹ nugbajẹmẹji kọ̀n na yedelẹ podọ na ovivi yetọn lẹ. Ṣogan, ehe dohia hezeheze dọ Jehovah ma nọ hẹn nudida he tindo nuyọnẹn lẹ po huhlọn po nado dè aliho de he na jẹagọdo mẹwhinwhan kavi ojlo homẹ tọn yetọn lẹ pọ́n gbede gba. Podọ to whenuena “Jiwheyẹwhe yiwanna nunamẹtọ homẹhunhunnọ,” klandowiwe dopo heyin alọkẹyi hlan ẹn wẹ dehe sinai do owanyi ji, ehe yin bibasi sọn ojlo mẹ wá po homẹhunhun po, ehe sinai do mẹdekannujẹ nudide tọn ji. (2 Kọlintinu lẹ 9:7) Wunmẹ devo depope mayin alọkẹyi gba.
12, 13. Nawẹ Timoti yinuwa taidi apajlẹ de na ovi pinplọn he sọgbe gbọn, podọ hlan etẹ kọ̀n wẹ apajlẹ etọn plan jọja susu lẹ jẹ?
12 To yinyọ́n nubiọtomẹsi ehe to gigọ́mẹ, Kunnudetọ Jehovah tọn lẹ nọgodona klandowiwe mẹdetiti tọn hlan Jiwheyẹwhe, ṣigba yé ma nọ hẹn mẹdepope po huhlọn po biọ klandowiwe mọnkọtọn bibasi mẹ gbede gba, e ma tlẹ yin ovi yetọn titi lẹ gba. To vogbingbọn mẹ na ṣọṣi susu, Kunnudetọ lẹ ma nọ baptizi ovivu yetọn lẹ gba, taidi dọ e na yọnbasi nado hẹn yé po huhlọn po biọ klandowiwe mẹ matin alemọyi nudide mẹdetiti tọn. Apajlẹ Owe wiwe tọn he dona yin hihodo wẹ dehe yin hihodo gbọn sunnu jọja lọ Timoti dali. Taidi mẹhe whẹ́n de, ewọ yin didọna gbọn apọsteli Paulu dali dọmọ: “[To nukọnyi, NW ] to onú he hiẹ plọn lẹ mẹ, ehe hiẹ ko yí nukun towe hùn do e go hezeheze, le hiẹ yọ́n mẹhe dè hiẹ plọ́n yé te; podọ sọn ovu gbọ́n wẹ hiẹ ko yọ́n Owe wiwe, he sọgan hẹn we zùn nuyọnẹntọ hlan whlẹngán gbọn yise he tin to Klisti Jesu mẹ.”—2 Timoti 3:14, 15.
13 E jẹ na ayidego dọ Timoti ko yọ́n owe wiwe lẹ na e ko yin pinplọn sọn ovuwhenu wutu. Ewọ ko yin dududeji—e mayin hinhẹn gánnugánnu—nado yí nuplọnmẹ Klistiani tọn sè gbọn onọ̀ po onọdahó etọn po dali gba. (2 Timoti 1:5) Taidi kọdetọn de, Timoti mọ nuyọnẹn lilẹzun hodotọ Klisti tọn de bo gbọnmọ dali basi nudide mẹdetiti klandowiwe Klistiani tọn. To ojlẹ egbezangbe tọn lẹ mẹ, fọtọ́n ao ao sunnu po yọnnu jọja lẹ po he mẹjitọ yetọn lẹ yin Kunnudetọ Jehovah tọn lẹ ko hodo apajlẹ ehe. (Psalm 110:3) Mẹdevo lẹ ma ko wàmọ gba. Whẹho nudide mẹdetiti tọn de wẹ e yin.
Dide Nado Yin Afanumẹ Mẹnu Tọn?
14. Etẹwẹ Lomunu lẹ 6:16 dọ na mí dogbọn mẹdekannujẹ mlẹnmlẹn dali?
14 Gbẹtọvi depope ma tindo mẹdekannujẹ mlẹnmlẹn gba. Mẹlẹpo wẹ tindo dogbo to mẹdekannujẹ etọn mẹ gbọn osẹ́n agbasa tọn lẹ, taidi osẹ́n nudọ̀nwado tọn dali, ehe ma sọgan yin gbigbẹkọ e go po awuvivo po. Mọdopolọ to pọndohlan gbigbọ tọn de mẹ, mẹdepope ma tindo mẹdekannujẹ mlẹnmlẹn gba. Paulu yihojlẹdohogo dọmọ: “Mìwlẹ ma yọnẹn dọ, hlan mẹhe mì yí mìde na di afanumẹ hlan tonuse, afanumẹ etọn wẹ mì yin mẹhe mì to tonusena: yin e yin ylando tọn hlan okú, kavi tonusise tọn hlan dodo?”—Lomunu lẹ 6:16.
15. (a) Numọtolanmẹ tẹwẹ gbẹtọ lẹ nọ tindo dogbọn afanumẹ yinyin dali, ṣigba etẹwẹ suhugan gbẹ́ sọ nọ to wiwà? (b) Kanbiọ he sọgbe tẹwẹ mí dona kanse mídelẹ?
15 Linlẹn afanumẹ mẹde tọn yinyin ma nọ hẹn homẹ suhugan gbẹtọ lẹ tọn hùn gba. Ṣogan, to aihọn egbehe tọn mẹ nugbo lọ wẹ yindọ gbẹtọ lẹ nọ saba dike nado yin anadena bo yin nuyiwadeji to aliho oklọ tọn susu lẹ mẹ sọmọ bọ yé nọ jogbe he mayin sọn ojlo mẹ nado wà onú he mẹdevo lẹ jlo dọ yé ni wà. Di dohia, azọ́nwhé ajọ́jijla tọn po ayidedai aihọn tọn po dovivẹnu nado hẹn gbẹtọ lẹ yin onú dopolọ to lẹnpọn po nuyiwa po mẹ, bo nọ ze nujinọtedo lẹ dai na yé nado hodo. Tito tonudidọ po sinsẹ̀nnọ lẹ tọn po nọ dín gbẹtọ lẹ nado nọgodona linlẹn po yanwle yetọn lẹ po, e ma nọ saba yin gbọn hodọdopọ he dutomẹji lẹ dali gba, ṣigba whlasusu gbọn mẹdindọn hlan linlẹn yanwle gbenọpọ kavi nugbonọ-yinyin tọn dali. To whenuena Paulu doayi e go dọ ‘mí yin afanumẹ mẹhe mí to tonusena tọn,’ dopodopo mítọn na wà dagbe nado kanse ede dọ, ‘Afanumẹ mẹnu tọn yin wẹ yẹn te? Mẹnu wẹ nọ yinuwa titengbe do nudide po aliho gbẹzan tọn ṣie po ji? Be sinsẹ̀ngan lẹ, nukọntọ tonudidọ tọn lẹ, adọkunnọ gboogbo lẹ, kavi mẹhe nọ na tuli ayidedai lẹ wẹ ya? Mẹnu wẹ yẹn to tonusena—Jiwheyẹwhe kavi gbẹtọ lẹ?’
16. To linlẹn tẹmẹ wẹ Klistiani lẹ yin afanumẹ Jiwheyẹwhe tọn lẹ te, podọ etẹwẹ yin pọndohlan he sọgbe afanumẹ yinyin mọnkọtọn tọn?
16 Klistiani lẹ ma nọ pọ́n tonusise na Jiwheyẹwhe hlan taidi sẹ́nhẹngba he ma tindo lẹnpọn dagbe do mẹdekannujẹ mẹdetiti tọn ji gba. Po ojlo po yé yí mẹdekannujẹ yetọn zan to aliho Apajlẹnọ yetọn tọn mẹ, yèdọ Jesu Klisti, bo nọ hẹn ojlo po onú he tin to otẹn tintan mẹ mẹdetiti tọn lẹ po wá hukanji hẹ ojlo Jiwheyẹwhe tọn. (Johanu 5:30; 6:38) Yé wleawuna “ayiha Klisti tọn,” bo ze yedelẹ jo na ẹn taidi Ota agun lọ tọn. (1 Kọlintinu lẹ 2:14-16; Kọlọsinu lẹ 1:15-18) Ehe taidi yọnnu de he wlealọ bo yí ojlo do kọngbedopọ hẹ sunnu he ewọ yiwanna lọ. Na nugbo tọn, agbasa Klistiani yiamisisadode lẹ tọn yin hodọdego taidi awhli alọji heyin opagbe etọn do na Klisti nado wlealọ hẹ.—2 Kọlintinu lẹ 11:2; Efesunu lẹ 5:23, 24; Osọhia 19:7, 8.
17. Etẹwẹ Kunnudetọ Jehovah tọn lẹpo ko dè nado lẹzun?
17 Kunnudetọ Jehovah tọn dopodopo, vlavo e tindo todido olọn mẹ tọn kavi aigba ji tọn, ko basi klandowiwe mẹdetiti tọn de hlan Jiwheyẹwhe nado wà ojlo etọn podọ nado setonuna ẹn taidi Gandutọ. Na Kunnudetọ dopodopo, klandowiwe ko yin nudide mẹdetiti tọn de nado lẹzun afanumẹ Jiwheyẹwhe tọn hugan gbigbọṣi afanumẹ gbẹtọ tọn yinyin mẹ. Ehe tin to kọndopọmẹ hẹ ayinamẹ apọsteli Paulu tọn dọmọ: “Yè ko yí akuẹ sọha de do họ̀ mì; mì sọ yin mẹmẹglọ gbẹtọ tọn blo.”—1 Kọlintinu lẹ 7:23.
Pinplọn Nado Hẹn Alemọyi Wá Na Mídelẹ
18. Whetẹnu wẹ Kunnudetọ sọgodo tọn de nọ pegan na baptẹm?
18 Whẹpo mẹde sọgan pegan nado lẹzun dopo to Kunnudetọ Jehovah tọn lẹ mẹ, ewọ dona jẹ jẹhẹnu Owe wiwe tọn lẹ kọ̀n. Mẹho lẹ nọ yí sọwhiwhe zan nado magbe eyin mẹhe jlo na yin Kunnudetọ de mọnukunnujẹ nugandomẹgo klandowiwe Klistiani tọn mẹ nugbonugbo. Be na taun tọn ewọ jlo nado yin dopo to Kunnudetọ Jehovah tọn lẹ mẹ ya? Be e to jijlo nado nọgbẹ̀ sọgbe hẹ nuhe ehe bẹhẹn ya? Eyin e mayin mọ, ewọ ma pegan na baptẹm gba.
19. Naegbọn whẹwhinwhẹ́n depope matin nado mọhodọdo mẹdepope he basi nudide nado lẹzun devizọnwatọ klandowiwe Jiwheyẹwhe tọn de go?
19 Ṣigba, eyin mẹdopodopo jẹ nubiọtomẹsi lọ lẹpo kọ̀n, naegbọn ewọ dona yin homọdọdego na nudide heyin sọn ojlo mẹ wá mẹdetiti tọn de bibasi nado na dotẹnmẹ ede nado yin nuyiwadeji gbọn Jiwheyẹwhe podọ gbọn Ohó gbọdo Etọn dali? Be e ma jẹ nado dike bo yin nuyiwadeji gbọn Jiwheyẹwhe dali hugan gbọn gbẹtọ lẹ dali ya? Kavi be ehe ma tindo alemọyi depope wẹ ya? Kunnudetọ Jehovah tọn lẹ ma nọ lẹn mọ gba. Yé kọngbedopọ po ahun lẹpo po hẹ ohó Jiwheyẹwhe tọn heyin kinkandai gbọn Isaia dali dọmọ: “Yẹn wẹ OKLUNỌ Jiwheyẹwhe towe, he plọn we na ale, he plan we gbọn aliho he ji hiẹ na gbọn.”—Isaia 48:17.
20. To aliho tẹlẹ mẹ wẹ gbẹtọ lẹ nọ yin hinhẹn jẹ mẹdekannu gbọn nugbo Biblu tọn dali te?
20 Nugbo Biblu tọn nọ hẹn gbẹtọ lẹ vò sọn yíyí sinsẹ̀n-nuplọnmẹ lalo sinsẹ̀nnọ lẹ tọn sè, taidi yasanamẹ mavọmavọ to olọnzo miyọ́n tọn de mẹ. (Yẹwhehodọtọ 9:5, 10) Kakatimọ, e hẹn ahun yetọn lẹ gọ́ po pinpẹn-nutọn-yinyọnẹn po na todido nugbo na oṣiọ lẹ—yèdọ fọnsọnku heyin hinhẹn yọnbasi to dodonu avọ́sinsan ofligọ Jesu Klisti tọn ji. (Matiu 20:28; Owalọ lẹ 24:15; Lomunu lẹ 6:23) Nugbo Biblu tọn nọ hẹn gbẹtọ lẹ vò sọn flumẹjijẹ ginganjẹ opagbe tonudidọ tọn lẹ he nọ gboawupo pludopludo lẹ mẹ go. Kakatimọ, e nọ hẹn ahun yetọn lẹ nado gọfla po ayajẹ po to yinyọnẹn mẹ dọ Ahọluduta Jehovah tọn ko to gandu to olọn mẹ podọ to madẹnmẹ na dugán do aigba lọ blebu ji. Dile etlẹ nọ hẹn awuvivi wá na agbasa mape, nugbo Biblu tọn nọ hẹn gbẹtọ lẹ vò sọn nuwiwa lẹ, he ma gbògbéna Jiwheyẹwhe bo nọ hẹn agbanpinpẹn wá mẹji to wunmẹ awugbopo haṣinṣan lẹ tọn, azọ̀n, po okú madonukun lẹ tọn po mẹ. Do glido, afanumẹ Jiwheyẹwhe tọn yinyin tindo alemọyi tlala hugan afanumẹ gbẹtọ lẹ tọn yinyin. Na nugbo tọn, klandowiwe hlan opagbe Jiwheyẹwhe tọn lẹ tindo alemọyi “to ojlẹ he mẹ . . . podọ to aihọn he ja mẹ ogbẹ̀ madopodo.”—Malku 10:29, 30.
21. Nawẹ Kunnudetọ Jehovah tọn lẹ nọ pọ́n klandowiwe dohlan Jiwheyẹwhe hlan gbọn, podọ etẹwẹ yin ojlo yetọn?
21 Kunnudetọ Jehovah tọn lẹ to egbehe ma lẹzun apadewhe akọta klandowiwe gbọn jìjì dali dile e yin na Islaelivi hohowhenu tọn lẹ do gba. Kunnudetọ lẹ yin apadewhe agun Klistiani klandowiwe tọn lẹ. Kunnudetọ heyin bibaptizi dopodopo ko lẹzun mọ gbọn mẹdekannujẹ nudide tọn yiyizan mẹdopodopo tọn dali to klandowiwe bibasi mẹ. Na nugbo tọn, na Kunnudetọ Jehovah tọn lẹ, klandowiwe nọ dekọtọn do haṣinṣan zohunhun mẹdetiti tọn hẹ Jiwheyẹwhe mẹ heyin hiadogona gbọn devizọnwiwa hlan ẹn po ojlo po dali. Yé jlo nado hẹn haṣinṣan ayajẹnọ ehe go po ahun lẹpo po, yèdọ hinhẹn mẹdekannujẹ ehe Jesu Klisti na yé lọ go gligli kakadoi.
Nawẹ Hiẹ Na Na Gblọndo Gbọn?
● Naegbọn Jiwheyẹwhe mayin mẹnukuntahopọntọ to dide Islaeli nado lẹzun “adọkunnu vivẹ” etọn mẹ?
● Naegbọn hiẹ na dọ dọ klandowiwe Klistiani tọn ma bẹ mẹdekannujẹ hinhẹnbú hẹn gba?
● Etẹwẹ yin alemọyi klandowiwe hlan Jehovah Jiwheyẹwhe tọn lẹ?
● Naegbọn e do pọnte nado yin devizọnwatọ Jehovah tọn de hugan afanumẹ gbẹtọ lẹ tọn?
[Yẹdide to weda 15]
To Islaeli hohowhenu tọn mẹ, klandowiwe hlan Jiwheyẹwhe yin whẹho jìjì tọn
[Yẹdide to weda 16]
Klandowiwe Klistiani tọn yin whẹho nudide tọn de