Jehovah Nọ Whlẹn Ayimajainọ Gán
“Susu wẹ nukunbibia dodonọ tọn; ṣigba OKLUNỌ de e sọn popo mẹ.”—PSALM 34:19.
1, 2. Nuhahun tẹwẹ Klistiani nugbonọ de pehẹ, podọ naegbọn mí sọgan jiya numọtolanmẹ mọnkọtọn lẹ tọn?
AWHLI de he nọ yin Keikoa ko yin dopo to Kunnudetọ Jehovah tọn lẹ mẹ sọn owhe 20 linlán die gbọ́n. E wadevizọn na ojlẹ de taidi gbehosọnalitọ whepoponu tọn, kavi lilatọ Ahọluduta tọn whenu-gigọ́ tọn de. E yiwanna lẹblanulọkẹyi enẹ taun. Ṣigba, to agọe, numọtolanmẹ todido matindo po ṣokẹdẹninọ po tọn lẹ sayana Keiko. “N’nọ to avivi mapote,” wẹ e dọ. Nado duto linlẹn agọ̀ etọn lẹ ji, Keiko yí whenu susu dogọ zan na oplọn mẹdetiti tọn. “Ṣogan, n’ma penugo nado diọ ninọmẹ ṣie,” wẹ e dọ. “E wá jẹ obá de mẹ bọ yẹn jlo nado gbọ bo kú.”
2 Be hiẹ ko diahi hẹ numọtolanmẹ todido matindo tọn mọnkọtọn lẹ pọ́n ya? Taidi dopo to Kunnudetọ Jehovah tọn lẹ mẹ, hiẹ tindo whẹwhinwhẹ́n susu nado jaya na mẹdezejo jijọ-di-Jiwheyẹwhe tọn “tindo opagbe aihọn he tin to dinvie tọn, po aihọn he ja tọn po.” (1 Timoti 4:8) Hiẹ tin to paladisi gbigbọmẹ tọn de mẹ to alọnu din! Etomọṣo, be enẹ zẹẹmẹdo dọ hiẹ vò sọn ayimajai lẹpo si wẹ ya? Paali! Biblu dọmọ: “Susu wẹ nukunbibia dodonọ tọn; ṣigba OKLUNỌ de e sọn popo mẹ.” (Psalm 34:19) Ehe ma paṣa mí, na “aihọn lẹpo [wẹ] mlọnai to mẹylankan lọ,” Satani Lẹgba mẹ. (1 Johanu 5:19) Mímẹpo wẹ nọ jiya nugandomẹgo aṣẹpipa Lẹgba tọn lẹ tọn jẹ obá de kavi devo mẹ.—Efesunu lẹ 6:12.
Kọdetọn Ayimajai Tọn Lẹ
3. Na apajlẹ Biblu tọn lẹ gando devizọnwatọ Jiwheyẹwhe tọn he jiya ayimajai sinsinyẹn tọn lẹ go.
3 Ayimajai he zindonukọn sọgan hẹn pọndohlan mítọn lẹpo dózin. (Howhinwhẹn lẹ 15:15) Lẹnnupọndo dawe dodonọ lọ Job ji. To adángbomẹ sinsinyẹn mẹ, Job dọmọ: “Gbẹtọ he yè ji sọn yọnnu de mẹ yin azán lẹ vude tọn, bosọ gọ́ na tukla.” (Job 14:1) Job ko hẹn ayajẹ etọn bu pete. Na ojlẹ de, e tlẹ lẹndọ Jehovah ko gbẹ́ emi dai. (Job 29:1-5) E ma yin Job kẹdẹ wẹ yin devizọnwatọ Jiwheyẹwhe tọn he jugbọn awufiẹsa sinsinyẹn mẹ gba. Biblu dọna mí dọ Hanna tin to “vivẹ́ ayiha tọn” mẹ na wẹnsinọ-yinyin etọn wutu. (1 Samuẹli 1:9-11) To ojlẹ he mẹ ninọmẹ whẹndo tọn de to tuklado Lebeka, e dọmọ: “Onú ogbẹ̀ ṣie tọn dikọna mi.” (Gẹnẹsisi 27:46) To nulinlẹnpọndo nuṣiwa etọn lẹ ji mẹ, Davidi dọmọ: “Yẹn to yìyì to awubla mẹ to azán popo gbè.” (Psalm 38:6) Apajlẹ kleun ehelẹ dohia hezeheze dọ sunnu po yọnnu budisi Jiwheyẹwhe tọ́ hohowhenu tọn lẹ po jugbọn ojlẹ ayimajai sinsinyẹn tọn lẹ mẹ.
4. Naegbọn e ma paṣa mí dọ “ayi mawhiwhẹnọ lẹ” tin to Klistiani lẹ ṣẹnṣẹn to egbehe?
4 Etẹwẹ dogbọn Klistiani lẹ dali? Apọsteli Paulu mọ dọ nuhudo tin nado dọna Tẹsalonikanu lẹ nado nọ “miọnhomẹna ayi mawhiwhẹnọ lẹ.” (1 Tẹsalonikanu lẹ 5:14) Owe alọdlẹndonu tọn de dọ dọ hogbe Glẹki tọn he yin lilẹdo “ayi mawhiwhẹnọ lẹ” sọgan dlẹnalọdo mẹhe “magbọjẹ gbẹ̀mẹ tọn to yasana na ojlẹ gli” lẹ. Nuhe Paulu dọ lẹ dohia dọ mẹyiamisisadode delẹ to apọ̀ mọ to agun Tẹsalonika tọn enẹ mẹ. Ayi mawhiwhẹnọ lẹ tin to Klistiani lẹ ṣẹnṣẹn to egbehe ga. Ṣigba naegbọn apọ̀ nọ ṣì yé? Mì gbọ mí ni gbadopọnna onú atọ̀n he nọ saba hẹn ehe wá.
Mapenọ-Yinyin Mítọn Sọgan Hẹn Apọṣi Mí
5, 6. Homẹmiọnnamẹ tẹwẹ mí sọgan mọyi sọn Lomunu lẹ 7:22-25 mẹ?
5 To vogbingbọn mẹ na gbẹtọ gblewanọ he “ayiha yetọn jẹgló” lẹ, mapenọ-yinyin Klistiani nugbo lẹ tọn nọ vẹna yé. (Efesunu lẹ 4:19) Yé sọgan tindo numọtolanmẹ dopolọ hẹ Paulu, he wlan dọmọ: “Yẹn hùnhomẹ to osẹ́n Jiwheyẹwhe tọn mẹ dile gbẹtọ homẹ tọn te: ṣigba yẹn sọ mọ osẹ́n devo de to awutugonu ṣie lẹ mẹ he to awhànfun hẹ osẹ́n ohò ṣie mẹ tọn, bosọ to hinhẹn mi wá mẹglọnọ hlan osẹ́n ylando tọn he tin to awutugonu ṣie lẹ mẹ.” Enẹgodo Paulu vó dọmọ: “Ṣo! Tapònọ he yẹn yin!”—Lomunu lẹ 7:22-24.
6 Be hiẹ ko tindo numọtolanmẹ mọnkọtọn pọ́n ya? Nude ma ylan to e mẹ dọ mapenọ-yinyin towe ni nọ duahunmẹna we, na ehe sọgan zin yinylan-yinyin ylando tọn do ahun towe mẹ bo hẹn gbemima towe lodo nado dapana ylanwiwa. Ṣigba hiẹ ma dona gbọṣi awubla mẹ to whepoponu na awugbopo towe lẹ wutu gba. To hogbe ayimajai tọn he yin nùdego jẹnukọn lẹ didọ godo tlolo, Paulu yidogọ dọmọ: “Yẹn dopẹna Jiwheyẹwhe gbọn Jesu Klisti Oklunọ mítọn dali.” (Lomunu lẹ 7:25) Mọwẹ, Paulu deji dọ hùnsọndai Jesu tọn sọgan fli ewọ gọ̀ sọn ylando he e dugu etọn si.—Lomunu lẹ 5:18.
7. Etẹwẹ sọgan gọalọna mẹde ma nado jẹflumẹ na ayilinlẹn ylando tọn etọn lẹ wutu?
7 Eyin mapenọ-yinyin towe nọ hẹn we gbọjọ, dike hogbe apọsteli Johanu tọn lẹ ni na tuli we. E wlan dọmọ: “Eyin mẹdepope waylan, mí tindo whẹ̀yidọtọ de to Otọ́ dè, Jesu Klisti dodonọ lọ: ewọ sọ wẹ oyẹsu na ylando mítọn: e ma yin mítọn kẹdẹ, ṣigba na ylando aihọn lẹpo tọn ga.” (1 Johanu 2:1, 2) Eyin ayilinlẹn ylando tọn towe lẹ hẹn we jẹflumẹ, nọ flin to whepoponu dọ ylandonọ lẹ wẹ Jesu kú na, e ma yin na mẹpipe lẹ gba. Na nugbo tọn, ‘omẹ pó wẹ waylan, bosọ whete do gigo Jiwheyẹwhe tọn go.’—Lomunu lẹ 3:23.
8, 9. Naegbọn mí dona gbẹ́ linlẹn whẹgbledo-mẹdetiti tọn lẹ dai?
8 Todin, mí ni dọ dọ hiẹ waylando sinsinyẹn de to ojlẹ de mẹ wayi. Matin ayihaawe, hiẹ ko hodẹ̀ hlan Jehovah do whẹho lọ ji, vlavo whlasusu. Hiẹ ko mọ alọgọ gbigbọmẹ tọn yí sọn Klistiani mẹho agun tọn lẹ dè. (Jakobu 5:14, 15) Na lẹnvọjọ nujọnu tọn he hiẹ dohia wutu, a gbẹsọ yin apadewhe agun lọ tọn. Kavi vlavo hiẹ jo titobasinanu Jiwheyẹwhe tọn do na ojlẹ de, ṣigba hiẹ wá lẹnvọjọ to godo mẹ bo gọ̀ biọ teninọ wiwe de mẹ. Depope he ninọmẹ lọ yin, ylando towe hoho lọ sọgan gọwá ayiha towe mẹ bo hẹn we jẹflumẹ. Eyin enẹ jọ janwẹ, flindọ Jehovah nọ jona mẹhe lẹnvọjọ nugbonugbo lẹ “susugege.” (Isaia 55:7) Humọ, e ma jlo dọ hiẹ ni mọ dewe taidi whẹhutọ he ma tindo todido depope gba. Lẹndai Satani tọn wẹ enẹ na hẹndi. (2 Kọlintinu lẹ 2:7, 10, 11) Lẹgba na yin vivasudo na nuhe e jẹna lọ niyẹn, ṣigba e na jlo nado hẹn we lẹndọ whẹdida dopolọ wẹ hiẹ lọsu jẹna. (Osọhia 20:10) A dike Satani tindo kọdetọn dagbe to ayiha gigẹdẹ enẹ yiyizan nado hù yise towe sudo mẹ blo. (Efesunu lẹ 6:11) Kakatimọ, ‘diọnukunsọ ẹ gligli’ to whẹho ehe mẹ, kẹdẹdile hiẹ nọ wà do to aliho devo lẹ mẹ.—1 Pita 5:9.
9 To Osọhia 12:10 mẹ, Satani yin yiylọdọ “mẹslẹtọ mẹmẹsunnu mítọn,” Klistiani yiamisisadode lẹ tọn. E “nọ to owhẹ̀ yetọn jẹ to Jiwheyẹwhe . . . nukọn to okle po ozán po.” Nulinlẹnpọndo wefọ enẹ ji sọgan gọalọna we nado mọ dọ homẹ na hùn Satani, whẹ̀sadokọnamẹtọ lalonọ lọ, eyin hiẹ sawhẹdokọna dewe bo gblewhẹdo dewe, dile etlẹ yindọ Jehovah ma wàmọ. (1 Johanu 3:19-22) Naegbọn hiẹ na zindonukọn nado to nuhà gando nuṣiwa towe lẹ go jẹ obá lọ mẹ bọ e na taidi dọ hiẹ to gbejo? A dike Satani hẹn haṣinṣan towe hẹ Jiwheyẹwhe gble blo. A dike Lẹgba hẹn we wọnji nugbo lọ go gbede blo dọ Jehovah “gọ́ na akọ́ndonanu [bosọ yin] dagbewanyinọ, awuwhletọ nado sadi, podọ susunọ to lẹblanu . . . mẹ.”—Eksọdusi 34:6.
Dogbó Mítọn lẹ Sọgan Hẹn Mí Gbọjọ
10. Aliho tẹlẹ mẹ wẹ dogbó mítọn lẹ sọgan hẹn mí gbọjọ te?
10 Klistiani delẹ nọ gbọjọ na aliho he mẹ dogbó yetọn lẹ nọ yinuwado sinsẹ̀nzọn yetọn hlan Jiwheyẹwhe ji te wutu. Be enẹ nọ jọ do hiẹ go wẹ ya? E sọgan yindọ azọ̀n sinsinyẹn de, yọnhowhe, kavi ninọmẹ devo lẹ glọnalina we nado yí whenu susu zan to lizọnyizọn lọ mẹ dile hiẹ nọ wà do dai. Nugbo wẹ dọ, Klistiani lẹ yin tulina nado nọ fli ojlẹ na sinsẹ̀nzọn Jiwheyẹwhe tọn. (Efesunu lẹ 5:15, 16) Ṣigba etẹwẹ lo eyin dogbó nujọnu tọn lẹ glọnalina we nado wà susu dogọ to lizọnyizọn lọ mẹ bọ ehe nọ hẹn we gbọjọ?
11. Nawẹ mí sọgan mọaleyi sọn ayinamẹ Paulu tọn he yin kinkàndai to Galatianu lẹ 6:4 mẹ gbọn?
11 Biblu dotuhomẹna mí ma nado wàdidọ ṣigba nado yin “mẹhodotọ yé he gbọn yise po homẹfa po dali dugu opagbe lẹ tọn lẹ.” (Heblu lẹ 6:12) Mí na penugo nado wà ehe kiki eyin mí lẹnnupọndo apajlẹ dagbe yetọn ji bo dovivẹnu nado hodo apajlẹ yise yetọn tọn. Ṣigba, mí ma na mọ ale depope yí eyin mí nọ yí míde jlẹdo mẹdevo lẹ go to aliho agọ̀ mẹ bo nọ wá tadona kọ̀n dọ nuhe wà mí te lẹpo wẹ ma yọ́n. Enẹwutu, mí na wà dagbe nado hodo ayinamẹ he Paulu na dọmọ: “Gbọ omẹ dopodopo . . . ni mọdona azọ́n ede tọn whẹ́, whenẹnu wẹ e na tindo ayajẹ to ede homẹ kẹdẹ, e ma na yin mẹdevo tọn gba.”—Galatianu lẹ 6:4.
12. Naegbọn mí sọgan jẹaglin to sinsẹ̀nzọn mítọn hlan Jehovah mẹ?
12 Klistiani lẹ tindo whẹwhinwhẹ́n dagbe nado jẹaglin, etlẹ yin to whenuena nuhahun sinsinyẹn agbasalilo tọn lẹ glọnalina nuwiwa yetọn lẹ. Biblu na mí jide dọ: “Jiwheyẹwhe ma yin mawadodonọ nado wọ̀n azọ́n mìtọn po tukla owanyi mìtọn tọn po, he mì ko sọhia gbọn oyín etọn dali.” (Heblu lẹ 6:10) E sọgan yindọ ninọmẹ he hiẹ ma sọgan deanana lẹ ko hẹn ẹn vẹawu na we nado wà susu dile hiẹ ko nọ wà do dai. Ṣigba, po alọgọ Jehovah tọn po, hiẹ sọgan penugo nado tindo mahẹ gigọ́ to adà lizọnyizọn Klistiani tọn delẹ mẹ, taidi yẹwhehodidọ gbọn alokan ji podọ gbọn wekanhlanmẹ dali. Hiẹ sọgan deji dọ Jehovah Jiwheyẹwhe na dona we na sinsẹ̀nzọn alindọn lẹpo tọn towe gọna owanyi he a dohia hlan ewọ po gbẹtọvi hatọ towe lẹ po.—Matiu 22:36-40.
“Ojlẹ Awusinyẹn Tọn lẹ” Sọgan Hẹn Nuṣikọna Mí
13, 14. (a) Aliho tẹlẹ mẹ wẹ “ojlẹ awusinyẹn tọn” ehelẹ sọgan hẹn ayimajai wá na mí te? (b) Kunnudenu tẹlẹ wẹ dohia dọ gbẹtọ lẹ ma tindo owanyi hẹnnumẹ tọn to egbehe?
13 Dile etlẹ yindọ mí to nukọnpọnhlan gbẹninọ to aihọn yọyọ dodowiwa Jiwheyẹwhe tọn mẹ, todin whẹ́ mí to gbẹnọ to “ojlẹ awusinyẹn tọn lẹ” mẹ. (2 Timoti 3:1) Mí sọgan yin homẹmiọnna gbọn yinyọnẹn dali dọ nujijọ mẹhẹngbọjọ tọn lẹ dohia dọ whlẹngán mítọn ko sẹpọ. Ṣogan, ninọmẹ he lẹdo mí pé lẹ nọ yinuwado mí ji. Di apajlẹ, eyin hiẹ ma tindo agbasazọ́n de lo? Agbasazọ́n mimọ sọgan vẹawu, podọ dile osun lẹ to yìyì, hiẹ sọgan kanse dewe eyin Jehovah nọ mọ yajiji towe kavi eyin e nọ sè odẹ̀ towe lẹ. Kavi e sọgan yindọ hiẹ ko jiya nuvẹun kavi whẹdida mawadodo wunmẹ devo lẹ tọn. Hosọ linlinwe lẹ tọn hihia tata tlẹ sọgan hẹn we tindo numọtolanmẹ dopolọ hẹ dawe dodonọ lọ Lọti, he “homẹ etọn gble” (kavi “nuṣikọna ẹn,” Young’s Literal Translation of the Holy Bible) na wantuntun mẹhe lẹdo e lẹ tọn wutu.—2 Pita 2:7.
14 Adà tangan azán godo tọn lẹ tọn de tin he mí ma sọgan yí nukunpẹvi do pọ́n. Biblu dọ dọdai dọ mẹsusu ma na tindo “owanyi hẹnnumẹ tọn.” (2 Timoti 3:3) To whédo susu mẹ, hagbẹ whẹndo tọn lẹ ma yiwanna yedelẹ. Na nugbo tọn, “kunnudenu dohia dọ e yọnbasi hugan dọ gbẹtọ lẹ ni yin hùhù, kavi yin yasana to agbasa-liho, kavi to numọtolanmẹ-liho, kavi yin zinzanhẹ gánnugánnu gbọn hagbẹ whẹndo tọn devo lẹ dali kakati nido yin gbọn mẹdevo dali,” wẹ owe lọ Family Violence dọ. “Fie gbẹtọ lẹ dona duvivi owanyi po hihọ́ po tọn te hugan wẹ lẹzun nọtẹn he tindo owù hugan na mẹhomẹ po ovi delẹ po.” Mẹhe whẹ́n to lẹdo ylankan de mẹ lẹ sọgan wá jiya magbọjẹ po todido matindo po tọn to owhe lẹ godo. Etẹwẹ lo eyin ehe gando hiẹ go?
15. Nawẹ owanyi Jehovah tọn yiaga hugan gbẹtọvi depope tọn gbọn?
15 Psalm-kàntọ Davidi jihàn dọmọ: “Whenuena otọ́ ṣie po onọ̀ ṣie po gbẹ́ mi dai, whenẹnu wẹ OKLUNỌ na dealọyí mi.” (Psalm 27:10) Lehe e yin homẹmiọnnamẹnu do sọ nado yọnẹn dọ owanyi Jehovah tọn gbloada zẹ̀ mẹjitọ gbẹtọvi depope tọn go! Dile etlẹ yindọ mẹgbẹdai, nuyiwahẹmẹ agọ̀, kavi kọgbẹmẹgo mẹjitọ de tọn sọgan hẹn awufiẹsa wá, ehe ma nọ yinuwado obá he mẹ Jehovah nọ hò towe pọ́n jẹ ji to aliho depope mẹ gba. (Lomunu lẹ 8:38, 39) Flindọ Jiwheyẹwhe nọ dọ̀n mẹhe e yiwanna lẹ wá ede dè. (Johanu 3:16; 6:44) Mahopọnna lehe gbẹtọ lẹ ko yinuwa hẹ we do, Otọ́ olọn mẹ tọn towe yiwanna we!
Afọdide Yọn-Na-Yizan lẹ Nado De Flumẹjijẹ Pò
16, 17. Etẹwẹ mẹde sọgan wà nado hẹn dolilo gbigbọmẹ tọn etọn go to ojlẹ flumẹjijẹ tọn lẹ mẹ?
16 Hiẹ sọgan ze afọdide yọn-na-yizan lẹ nado duto flumẹjijẹ ji. Di dohia, nọ hodo tito-to-whinnu nuwiwa Klistiani tọn mẹjlọdote tọn de. Nọ lẹnayihamẹpọn do Ohó Jiwheyẹwhe tọn ji, titengbe to whenuena e taidi dọ hiẹ to apọ̀ mọ zẹjlẹgo. Psalm-kàntọ jihàn dọmọ: “Whenuena yẹn dọmọ, afọ ṣie didi, OKLUNỌ E, dagbewanyi towe hẹn mi dote. To gege tùmajai ṣie lẹ tọn mẹ to yẹn homẹ homẹmiọn towe lẹ hẹn homẹ ṣie hùn.” (Psalm 94:18, 19) Biblu hihia to gbesisọ mẹ na gọalọna we nado hẹn ohó homẹmiọnnamẹ tọn lẹ po linlẹn mẹjlọdote tọn lẹ po gọ́ ayiha towe mẹ.
17 Odẹ̀ lọsu yin dandannu. Eyin hiẹ ma tlẹ sọgan dọ numọtolanmẹ sisosiso towe lẹpo tọ́n to gigọ́ mẹ, Jehovah yọ́n nuhe a to tintẹnpọn nado dọ lẹ. (Lomunu lẹ 8:26, 27) Psalm-kàntọ na jide ehe dọmọ: “Ze agbàn towe dlan OKLUNỌ ji, ewọ nasọ hẹn we dote; ewọ ma na dike dodonọ ni yin sisẹtẹnna.”—Psalm 55:22.
18. Afọdide yọn-na-yizan tẹlẹ wẹ mẹhe to oyà apọṣimẹ tọn ji de sọgan ze?
18 Mẹdelẹ nọ tindo numọtolanmẹ todido matindo tọn na azọ̀n apọṣimẹ sinsinyẹn tọn wutu.b Eyin hiẹ tin to ninọmẹ mọnkọtọn mẹ, tẹnpọn bo ze ayidonugo towe vude do aihọn yọyọ Jiwheyẹwhe tọn ji gọna ojlẹ lọ whenue “finẹnu lẹ ma to na dọmọ, yẹn to azọ̀njẹ.” (Isaia 33:24) Eyin e taidi dọ numọtolanmẹ agọ̀ towe lẹ ma yin awubla ojlẹ gli tọn de poun, e sọgan yin nuyọnẹnnu nado dín alọgọ dotozọ́nwatọ de tọn. (Matiu 9:12) E sọ yin nujọnu ga dọ hiẹ ni nọ penukundo dewe go to agbasa-liho. Núdùdù hunsindagbe tọn po aihundida lanmẹyiya tọn vude po sọgan gọalọ. Hẹn ẹn diun dọ hiẹ nọ gbọjẹ ganji. Ma nọ gbọṣi televiziọn kọ̀n to zánmẹ na ojlẹ dindẹn blo, podọ dapana ayidedai he na hẹn nuṣikọna we pete to agbasa-liho podọ to numọtolanmẹ-liho lẹ. Hú popolẹpo, zindonukọn nado nọ tindo mahẹ to azọ́n he nọ hẹn Jiwheyẹwhe hùnhomẹ lẹ mẹ! Dile etlẹ yindọ ojlẹ lọ ma ko sọ̀ na Jehovah nado “súnsún dasin lẹpo sẹ̀,” e na gọalọna we nado doakọnna.—Osọhia 21:4; 1 Kọlintinu lẹ 10:13.
Gbẹninọ “to Alọ Gángán Jiwheyẹwhe Tọn Glọ”
19. Opagbe tẹwẹ Jehovah do na ayimajainọ lẹ?
19 Biblu hẹn mí deji dọ dile etlẹ yindọ nukunbibia dodonọ tọn lẹ sù, “OKLUNỌ [nọ] de e sọn popo mẹ.” (Psalm 34:19) Nawẹ Jiwheyẹwhe nọ wà ehe gbọn? To whenuena apọsteli Paulu hodẹ̀ pludopludo nado mọ gbọjẹ sọn “owùn . . . to agbasalan mẹ” etọn si, Jehovah dọna ẹn dọmọ: “Madogán mẹ wẹ yè hẹn huhlọn ṣie sọgbe te.” (2 Kọlintinu lẹ 12:7-9) Opagbe etẹ tọn wẹ Jehovah do na Paulu, podọ detẹ wẹ e do na hiẹ? E ma yin azọ̀nhẹngbọ afọdopolọji tọn de gba, adavo huhlọn nado doakọnna.
20. Mahopọnna whlepọn mítọn lẹ, jide tẹwẹ yin nina mí to 1 Pita 5:6, 7 mẹ?
20 Apọsteli Pita wlan dọmọ: “Mì whiwhẹ mìde to alọ gángán Jiwheyẹwhe tọn glọ, na ewọ nido ze mì daga to ojlẹ etọn mẹ: mì bẹ magbọjẹ mìtọn lẹpo do alọ etọn mẹ; na ewọ to tukla mìtọn jẹ wutu.” (1 Pita 5:6, 7) Na Jehovah to tukla towe jẹ wutu, e ma na jo we do gba. E na nọgodona we mahopọnna whlepọn he hiẹ pehẹ lẹ. Hẹn ẹn do ayiha mẹ dọ Klistiani nugbonọ lẹ tin “to alọ gángán Jiwheyẹwhe tọn glọ.” Dile mí to Jehovah sẹ̀n, e nọ na mí huhlọn nado doakọnnanu. Eyin mí yin nugbonọ na ẹn, nudepope ma sọgan hẹn awugble tẹgbẹ tọn wá mí ji. Enẹwutu, mì gbọ mí ni hẹn tenọgligo hlan Jehovah nado sọgan duvivi ogbẹ̀ mavọmavọ tọn to aihọn yọyọ he e dopagbe etọn lọ mẹ bo mọ azán he gbè ewọ na whlẹn ayimajainọ gán kakadoi te lọ!
[Nudọnamẹ Odò Tọn]
a Yinkọ ko yin didiọ.
b To vogbingbọn mẹ na flumẹjijẹ poun, azọ̀n apọṣimẹ sinsinyẹn tọn yin ninọmẹ he mẹ awubla nọ sinyẹn bo nọ zindonukọn te de, ehe nọ yin yinyọnẹn gbọn dotozọ́nwatọ lẹ dali. Na nudọnamẹ dogọ, pọ́n Atọ̀họ̀-Nuhihọ́ Lọ Tọn [Flansegbe] 15 octobre 1988, weda 25-9; 15 novembre 1988; weda 21-4; po 1er septembre 1996, weda 30-1 po.
Be Hiẹ Flin Ya?
• Naegbọn mẹhe tlẹ yin devizọnwatọ Jehovah tọn lẹ nọ jiya ayimajai tọn?
• Etẹwẹ yin delẹ to nuhe sọgan hẹn apọṣi omẹ Jiwheyẹwhe tọn lẹ mẹ?
• Nawẹ Jehovah nọ gọalọna mí nado duto magbọjẹ mítọn lẹ ji gbọn?
• Aliho tẹ mẹ wẹ mí tin “to alọ gángán Jiwheyẹwhe tọn glọ” te?
[Yẹdide to weda 25]
Mahopọnna whlepọn lẹ, omẹ Jehovah tọn lẹ tindo whẹwhinwhẹ́n nado jaya
[Yẹdide to weda 28]
Yẹwhehodidọ gbọn alokan ji yin aliho dopo nado na nuhe go hiẹ pé lẹpo Jehovah