Wehọmẹ de He Nọ Hẹn Ale Wá Na Gbẹtọ lẹ Lẹdo Aihọn Pé — WESẸDOTẸN INTẸNẸT JI TỌN Watchtower Tọn

Wehọmẹ de He Nọ Hẹn Ale Wá Na Gbẹtọ lẹ Lẹdo Aihọn Pé

GBẸTỌ wunmẹ lẹpo to aigba he lán to 200 ji to yinyin pinplọn gbọn Jiwheyẹwhe dali to agun Kunnudetọ Jehovah tọn lẹ tọn he hugan 98 000 mẹ. Nuplọnmẹwe tangan he nọ yin yiyizan wẹ Biblu, podọ yanwle nuplọnmẹ ehe tọn wẹ nado gọalọna gbẹtọ lẹ nado whẹ́n to gbigbọ-liho gbọn pinplọn nuhe ojlo Jiwheyẹwhe tọn yin podọ lehe yé na nọgbẹ̀ sọgbe hẹ ẹ do dali. Mẹhe kẹalọyi nuplọnmẹ ehe lẹ nọ mọ ale susu yí. Yé sọ nọ má nuhe yé plọn hẹ mẹdevo lẹ, to kọndopọ mẹ hẹ anademẹ Jesu Klisti tọn nado hẹn gbẹtọ lẹ zun devi.—Matiu 28:19, 20.

Gbọnvona tito-to-whinnu nupinplọn tọn he yé nọ mọyi to agun yetọn lẹ mẹ, Kunnudetọ Jehovah tọn lẹ sọ ze wehọmẹ vonọtaun delẹ dai. Dopo to ehelẹ mẹ wẹ Wehọmẹ Azọ́nplọnmẹ Devizọnwiwa tọn. E bẹjẹeji to octobre 1987 to Pittsburgh, Pennsylvanie, États-Unis tọn. Klasi tintan bẹ nuplọntọ 24 he nọ dó Glẹnsigbe hẹn. Todin wehọmẹ lọ nọ yin bibasi to ogbè 21 mẹ to aigba 43 ji. Kakajẹ din, mẹho agun tọn po devizọnwatọ lizọnyizọnwiwa tọn tlẹnnọ lẹ po sọn otò hugan 90 mẹ wẹ ko yì wehọmẹ ehe. Tlolo he azọ́nplọnmẹ osẹ ṣinatọ̀n tọn lọ wá vivọnu, gbedewema-yitọ lẹ nọ yin azọ́ndena nado yì sẹ̀n to fie nuhudo tin te, vlavo to otò yetọn titi mẹ kavi to otò devo mẹ. To vivọnu owhe 2005 tọn, Klistiani lizọnyizọnwatọ he hugan 22 000 ko dotana wehọmẹ lọ. Vivẹnudido yetọn po whiwhẹ po nado nọgodona Ahọluduta lọ bo hẹn ale wá na mẹdevo lẹ ko yin didona susugege.—Howhinwhẹn lẹ 10:22; 1 Pita 5:5.

Tito-Bibasi Nado Yì

Nado sọgan yì Wehọmẹ Azọ́nplọnmẹ Devizọnwiwa tọn, mẹmẹsunnu susu he to azọ́n whenu-gigọ́ kavi whenu-gli tọn wà dona biọgbè. Ehe ma nọ bọawu to whepoponu gba. To Hawaii, Klistiani mẹplọntọ wehọmẹ tọn awe he yin oylọ basina nado yì wehọmẹ lọ dona biọgbè sọn agbasazọ́n yetọn mẹ. Po yise po, yé ze wekanhlanmẹ gbebibiọ tọn yetọn jo, bo basi zẹẹmẹ nuhewutu yé jei wehọmẹ lọ po lehe yé na mọaleyi sọn e mẹ do po tọn. Ogbè yin nina yé omẹ awe lẹ.

To whẹho delẹ mẹ, azọ́nmẹyimẹdotọ lẹ nọ dọna Kunnudetọ he biọgbè to azọ́nmẹ lẹ dọ yé na hẹn agbasazọ́n yetọn bu eyin yé lẹkọ. Mahopọnna ehe, yé nọ basi dide nado yin pinplọn gbọn titobasinanu Jehovah tọn dali. Delẹ to omẹ ehelẹ mẹ nọ yin oylọ-basina to godo mẹ gbọn azọ́nmẹyimẹdotọ yetọn lẹ dali nado gọ̀ azọ́n yetọn bẹ to wehọmẹ lọ fifo godo. Gbemima mọnkọtọn nado yì wehọmẹ lọ sọgan yin bibladopọ dole: Ze wekanhlanmẹ gbebibiọ tọn towe jo, biọ alọgọ sọn Jehovah dè to odẹ̀ mẹ, bo jo whẹho lọ do alọ etọn mẹ.—Psalm 37:5.

Yinyin “Pinplọn sọn OKLUNỌ Dè”

Nupinplọn wehọmẹ lọ tọn he nọ dẹn-to-aimẹ na osẹ ṣinatọ̀n nọ bẹ oplọn Biblu tọn he siso hẹn. Wehọmẹvi lẹ nọ plọn lehe omẹ Jehovah tọn lẹ yin tito-basina nado wà ojlo Jiwheyẹwhe tọn do podọ lehe dopodopo yetọn sọgan yí Biblu zan ganji dogọ do to lizọnyizọn kunnudegbe tọn mẹ, to opli agun tọn lẹ ji, podọ to plidopọ lẹ ji.

Gbedewema-yitọ pinpẹn-nutọn-yọnẹntọ de wlanwe hlan mẹhe to awuwle nado yì wehọmẹ lọ de dọmọ: “Na nugbo tọn, nuplọnmẹ he wehọmẹ devo depope ma ko na pọ́n wẹ hiẹ na mọyi. Zẹẹmẹ wefọ he dọ dọ mí na yin ‘pinplọn sọn Jehovah dè’ lọ tọn sọ nọ gbloada dogọ. Sọn bẹjẹeji jẹ vivọnu, hiẹ na mọ dọ ahun po gbẹtọ-yinyin towe po yin awuwlena, yin jijlado bo yin hinhẹn pọnte dogọ nado tin to kọndopọ pẹkipẹki mẹ hẹ apajlẹ Klisti Jesu tọn. Numimọ dagbe hugan gbẹzan towe tọn wẹ to tepọn we.”—Isaia 54:13.

Wẹndagbe-Jlatọ, Lẹngbọhọtọ, po Mẹplọntọ lẹ Po

Gbedewema-yitọ Wehọmẹ Azọ́nplọnmẹ Devizọnwiwa tọn lẹ to devizọnwa to otò 117 mẹ todin. Ehelẹ bẹ lopo lẹ hẹn to lẹdo Atlantique, Caraïbes, po Pacifique tọn lẹ po mẹ gọna suhugan otò lẹ tọn fie wekantẹn alahọ Kunnudetọ Jehovah tọn lẹ tọn tin te. Alahọ lẹ na linlin dọ azọ́nplọnmẹ dagbe he wehọmẹvi lẹ nọ mọyi nọ sọawuhia to nuwiwa wẹndagbe-jijlá, lẹngbọhọtọ, po mẹpinplọn tọn yetọn lẹ po mẹ. Nuplọnmẹ yetọn nọ wleawuna yé nado yí Biblu zan ganji dogọ to lizọnyizọn kunnudegbe tọn mẹ. (2 Timoti 2:15) Yé nọ saba dlẹnalọdo owe Comment raisonner à partir des Écrituresa to whenuena yé to gblọndo na hlan kanbiọ whétọ lẹ tọn, podọ yé nọ plọn wẹnlatọ Ahọluduta tọn devo lẹ nado wà nudopolọ. Zohunhun gbedewema-yitọ lọ lẹ tọn nọ yinuwado mẹdevo lẹ ji, podọ nuwiwa yetọn lẹ nọ hẹn agun lẹ lodo.

Mẹho agun tọn lẹ tindo lẹblanulọkẹyi lọ nado “yìn lẹngbọpa” lọ, bo penukundo nuhudo gbigbọmẹ tọn mẹdevo lẹ tọn go. (1 Pita 5:2, 3) Mẹho de dọ gando tito lọ go dọmọ: “Mí dopẹ́ dọ wekantẹn alahọ tọn nọ do mẹmẹsunnu he yin azọ́nplọn ganji lẹ hlan nado gọalọna mí to azọ́n lẹngbọpa Jiwheyẹwhe tọn yìnyìn mẹ.” Mọdopolọ, alahọ de to otò Whèzẹtẹn Asie tọn de mẹ doayi e go dọmọ: “Gbedewema-yitọ lọ lẹ jọmẹ taun. Yé nọ wazọ́n sinsinyẹn bosọ nọ yin sisi na to agun lọ mẹ. Mẹlẹpo wẹ yọ́n whiwhẹ, awuvẹmẹ, po zohunhun yetọn po bosọ yọ́n pinpẹn jẹhẹnu ehelẹ tọn. Yé nọ yí yedelẹ do sanvọ́ sọn ojlo mẹ wá bo nọ yí homẹhunhun do sẹtẹn yì agun he tindo nuhudo lẹngbọhọtọ tọn lẹ mẹ.” (Filippinu lẹ 2:4) Mẹmẹsunnu mọnkọtọn lẹ nọ hẹn yisenọ hatọ yetọn lẹ lodo bosọ jẹna pipà.—1 Kọlintinu lẹ 16:18.

To yidogọ mẹ, mẹplọntọ Wehọmẹ Azọ́nplọnmẹ Devizọnwiwa tọn lẹ nọ gọalọna wehọmẹvi lẹ nado hẹn nugopipe yetọn taidi hodọtọ gbangba tọn pọnte dogọ. Gbọn ayinamẹ he yin nina yé lẹ hihodo dali, susu to gbedewema-yitọ lọ lẹ mẹ sọgan yin yiyizan to ojlẹ vude godo to tito-to-whinnu plidopọ lẹdo po agbegbe tọn lẹ po mẹ. Nugopọntọ lẹdo tọn de doayi e go dọ gbedewema-yitọ lọ lẹ nọ na “hodidọ dagbe lẹ bo nọ do yọn-na-yizan nudọnamẹ lọ tọn hia gbọn hoyijlẹdohogo dagbe yiyizan dali.”—1 Timoti 4:13.

To otò Aflika tọn de mẹ, aliho he mẹ mẹmẹsunnu lẹ nọ plọnmẹ te to opli agun tọn lẹ ji pọnte dogọ to whenuena Wehọmẹ Azọ́nplọnmẹ Devizọnwiwa tọn yin bibasi to finẹ bọ gbedewema-yitọ lẹ yin didohlan ogle lọ ji. Mẹho agun tọn he yin didohlan sọn wehọ lọ mẹ lẹ gọalọ taun to azọ́n wẹndagbe-jijlá, lẹngbọhọtọ, po mẹpinplọn tọn po mẹ, bo gbọnmọ dali hẹn agun lẹ lodo to gbigbọ-liho.—Efesunu lẹ 4:8, 11, 12.

Agun lẹ Nọ Yin Nukunpedego Ganji Dogọ

Nuhudo mẹho po devizọnwatọ lizọnyizọnwiwa tọn lẹ po tọn tin to fisusu. Mẹho dopo tata ma na tin to agun delẹ mẹ eyin gbedewema-yitọ Wehọmẹ Azọ́nplọnmẹ Devizọnwiwa tọn de ma yin didohlan yé. Enẹwutu gbedewema-yitọ susu nọ yin didohlan nado sẹ̀n to fie nuhudo mọnkọtọn lẹ tin te.

Alahọ susu na linlin dọ mẹmẹsunnu ehelẹ “mọnukunnujẹ tito yẹwhehọluduta tọn lẹ mẹ ganji,” “nọ ylọ azọngban yetọn lẹ dọ nujọnu,” “nọ gọalọna mẹdevo lẹ nado mọnukunnujẹ titobasinanu Jehovah tọn mẹ bo na sisi i,” podọ yé “nọ yidogọna zohunhun po gbigbọnọ-yinyin agun yetọn lẹ po tọn.” Ehe yinmọ na gbedewema-yitọ wehọ lọ tọn lẹ nọ hodo nuhe yin kinkàn to Ohó Jiwheyẹwhe tọn mẹ lẹ bo ma nọ ganjẹ yedelẹ go kavi yin nuyọnẹntọ to nukun yede tọn mẹ wutu. (Howhinwhẹn lẹ 3:5-7) Omẹ mọnkọtọn lẹ nọ lẹzun dona gbigbọmẹ tọn to agun he mẹ yé yin didohlan lẹ.

Devizọnwiwa to Aigba-Denamẹ He Tin to Olá lẹ Ji

Gbedewema-yitọ delẹ he yin pipà taidi gbehosọnalitọ titengbe lẹ nọ gọalọna kándo lẹ nado lẹzun agun. Mẹho agun tọn de to Guatemala do pinpẹn-nutọn hia na alọgọ yetọn dọmọ: “Na owhe 20, lehe aigba-denamẹ daho ehe na yin nukunpedego do nọ duahunmẹna mi. Yẹn nọ hodẹ̀ whẹwhẹ do whẹho lọ ji. Gbedewema-yitọ Wehọmẹ Azọ́nplọnmẹ Devizọnwiwa tọn lẹ yin azọ́nplọn ganji na nuhe dù hodidọ po tito yẹwhehọluduta tọn lẹ po, podọ homẹ ṣie hùn nado mọ dọ lẹdo lọ to ayidonugo owanyi tọn de mọyi todin.”

Gbedewema-yitọ lẹ ko plọn nado yin kọdetọn dagbenọ to aigba-denamẹ he ji yé dona zingbejizọnlin gaa gbọ̀n lẹdo osó tọn lẹ mẹ nado jẹ gbétatò he to katokato lẹ mẹ. To ofi mọnkọtọn lẹ, yé nọ yawu ze kándo lẹ dai, eyin wẹnlatọ devo lẹ ma tlẹ penugo nado wàmọ to ojlẹ he wayi lẹ mẹ. Di apajlẹ, mẹho de to Niger biọ alọgọ gbedewema-yitọ lẹ tọn na e mọdọ yé sọgan wà azọ́n dagbe to lẹdo etọn mẹ. Titengbe to lẹdo he tin to olá lẹ mẹ, e sọgan bọawuna sunnu tlẹnnọ lẹ nado sẹ̀n taidi gbehosọnalitọ titengbe kavi nugopọntọ lẹdo tọn lẹ. Taidi apọsteli Paulu, yé dona doakọnna ‘owù otọ̀ po ajotọ lẹ po tọn, owù lẹ to zungbo mẹ,’ awusinyẹnnamẹnu mẹdetiti tọn lẹ gọna magbọjẹ he agun he mẹ yé to devizọnwa te lẹ nọ hẹnwa.—2 Kọlintinu lẹ 11:26-28.

E Hẹn Ale Wá Na Jọja Lẹ

Owe-wiwe dotuhomẹna jọja lẹ nado flin Mẹdatọ yetọn. (Yẹwhehodọtọ 12:1) Gbedewema-yitọ zohunhunnọ Wehọmẹ Azọ́nplọnmẹ Devizọnwiwa tọn lẹ yin apajlẹ dagbe na Klistiani jọja lẹ. To whenuena gbedewema-yitọ awe wá agun de mẹ to États-Unis, ganmẹ he mẹmẹsunnu lẹ nọ yizan to lizọnyizọn lọ mẹ jideji do donù awe ji. Humọ, sọha gbehosọnalitọ whepoponu tọn, kavi wẹndagbe-jlatọ whenu-gigọ́ tọn lẹ tọn, jideji sọn 2 jẹ 11. Ehe yin apajlẹ jọnun nuhe ko jọ to agun susu mẹ tọn.

Gbedewema-yitọ lẹ sọ nọ dotuhomẹna sunnu jọja lẹ nado lẹnnupọndo wehọmẹ lọ yìyì ji. Ehe ko whàn jọja he ma ko lẹzun devizọnwatọ lizọnyizọnwiwa tọn delẹ nado dovivẹnu bo jẹ yanwle enẹ kọ̀n. Alahọ Pays-Bas tọn dlẹnalọdo gbedewema-yitọ Wehọmẹ Azọ́nplọnmẹ Devizọnwiwa tọn lẹ taidi “apajlẹ dagbe hugan na jọja he to nulẹnpọndo nuhe yé na yì ogbẹ̀ yetọn do wà lẹ ji.”

Devizọnwiwa to Agun He Nọ Dó Jonọgbè lẹ Mẹ

To otò susu mẹ, mẹsusu to vivẹnudo nado lá wẹndagbe lọ na gbẹtọ lẹ to akọgbè yetọn mẹ. Gbedewema-yitọ Wehọmẹ Azọ́nplọnmẹ Devizọnwiwa tọn lẹ nọ saba plọn ogbè devo lẹ bosọ nọ wadevizọn to aigba-denamẹ he ji jonọgbè-dotọ susu tin te. Di apajlẹ, to Belgique, nuhudo wẹnlatọ Ahọluduta lọ tọn he sọgan dekunnuna mẹhe nọ dó ogbè Albanie, Perse, po Russie po tọn lẹ tin.

Agun po kándo he nọ dó jonọgbè lẹ po to Allemagne, États-Unis, Grande-Bretagne, Italie, Mexique, po otò devo lẹ po mẹ ko mọ ale susu yí sọn nugopọntọ tomẹyitọ, mẹho, po devizọnwatọ lizọnyizọnwiwa tọn lẹ po he ko yì Wehọmẹ Azọ́nplọnmẹ Devizọnwiwa tọn dè. Alahọ Corée tọn na linlin dọ “gbedewema-yitọ hugan 200 wẹ yin tọ́ntlọ́ngbọ́n to alọgigọna agun po kándo he nọ dó jonọgbè lẹ po mẹ.”

Devizọnwiwa po Whiwhẹ po to Otẹn Azọngban Tọn Devo lẹ Mẹ

Gbọnvona dọ gbedewema-yitọ Wehọmẹ Azọ́nplọnmẹ Devizọnwiwa tọn lẹ nọ wadevizọn to agun po kándo he nọ dó jonọgbè lẹ po mẹ, yé sọ nọ wadevizọn taidi mẹho agun tọn, devizọnwatọ lizọnyizọnwiwa tọn po nugopọntọ tomẹyitọ lẹ po. Mẹdelẹ nọ kẹalọyi azọ́ndenamẹ to otò devo lẹ mẹ, vlavo nado wà azọ́n he biọ ayidonugo niyaniya tọn lẹ to Azọ́nwatẹn Sinsẹ̀nzọn tọn mẹ to alahọ de mẹ. Mẹhe tindo numimọ họgbigbá tọn lẹ sọgan tindo mahẹ to tito Plitẹnhọ Ahọluduta tọn gbigbá tọn mẹ.

Sọha agun po lẹdo tọn lẹ po he to jijideji lẹdo aihọn pé dohia dọ mí tindo nuhudo nugopọntọ tomẹyitọ tọn susu dogọ. Nado sú odò ehe, gbedewema-yitọ Wehọmẹ Azọ́nplọnmẹ Devizọnwiwa tọn delẹ mọ azọ́nplọnmẹ osẹ ao tọn yí to azọ́n tomẹyiyi tọn mẹ bo lẹzun nugopọntọ lẹdo tọn kavi tẹnmẹpọnnamẹtọ lẹ. Nudi gbedewema-yitọ 1 300 wẹ to devizọnwa todin taidi nugopọntọ tomẹyitọ lẹ to otò 97 mẹ. To otò Aflika tọn de mẹ, hugan 55 to kanweko ji nugopọntọ tomẹyitọ lẹ tọn wẹ ko yì Wehọmẹ Azọ́nplọnmẹ Devizọnwiwa tọn. To otò Aflika tọn devo mẹ, sọha lọ yin 70 to kanweko ji.

To Australie, Canada, États-Unis, Europe, po Whèzẹtẹn Asie tọn po, gbedewema-yitọ kanweko susu lẹ ko yin didohlan otò devo lẹ mẹ nado penukundo nuhudo vonọtaun lẹ go. Gbọnmọ dali, wehọmẹ lọ ko hẹn ale wá lẹdo aihọn pé.

Gbọn Ovi etọn, Jesu Klisti gblamẹ, Jehovah ko wleawuna wẹndagbe-jlatọ, lẹngbọhọtọ, mẹplọntọ, po mẹdevo lẹ po he to godonọna Ahọluduta lọ to azán godo tọn ehelẹ mẹ. Be todido tin dọ jideji na tin to sọha omẹ Jiwheyẹwhe tọn lẹ tọn mẹ ya? Mọwẹ! Enẹwutu nuhudo lọ fọ́n bo to jijideji nado mọ sunnu he klan yede do wiwe bo to vivẹnudo nado jẹ otẹn azọngban tọn daho lẹ mẹ. (Isaia 60:22; 1 Timoti 3:1, 13) Wehọmẹ Azọ́nplọnmẹ Devizọnwiwa tọn nọ hùn dotẹnmẹ dote na mẹho po devizọnwatọ lizọnyizọnwiwa tọn lẹ po nado lẹzun mẹhe pegan nado hẹn lizọnyizọn yetọn gbloada dogọ, bosọ hẹn ale susu wá na yedelẹ podọ na mẹdevo lẹ lẹdo aihọn pé.

[Nudọnamẹ Odò Tọn]

a He Kunnudetọ Jehovah tọn lẹ zinjẹgbonu.

[Yẹdide to weda 10]

Wehọmẹ Azọ́nplọnmẹ Devizọnwiwa tọn nọ nọgodona Ahọluduta lọ lẹdo aihọn pé

[Yẹdide to weda 13]

Be hiẹ sọgan ze yinkọ dai na Wehọmẹ Azọ́nplọnmẹ Devizọnwiwa tọn bo hẹn ale wá na mẹdevo lẹ ya?