Naegbọn Hiẹ Dona Yọ́n Agọjẹdoklistigotọ Lọ?
“Mì ko sè dọ agọjẹdoklistigotọ ja,” wẹ apọsteli he yin gbigbọdo lọ wlan sọn ojlẹ dindẹn die gbọ́n. (1 Johanu 2:18) Lehe hogbe enẹlẹ fọnjlodotenamẹ do sọ! Na owhe kanweko susu, gbẹtọ lẹ ko lẹnnupọndo zẹẹmẹ yetọn ji. Mẹnu wẹ yin agọjẹdoklistigotọ lọ? Whetẹnu wẹ e na wá? Etẹwẹ e na wà to whenue e na wá?
TO OWHE lẹ gblamẹ, mẹsusu wẹ ko yin alọdlẹndo taidi agọjẹdoklistigotọ lọ. To hohowhenu, delẹ to mẹhe yin yiylọdọ “agọjẹdoklistigotọ” lẹ mẹ wẹ Ju lẹ, papa Katoliki tọn lẹ, gọna ahọluigbagán Lomu tọn lẹ. Di apajlẹ, to whenuena Ahọluigbagán Frederick II (1194-1250) gbẹ́ ma nado fùn Awhàn Sinsẹ̀n tọn do ṣọṣi tamẹ, Papa Grégoire IX ylọ ẹ dọ agọjẹdoklistigotọ bo de e sẹ̀ sọn hukan ṣọṣi tọn mẹ. Innocent IV, he wá jẹ otẹn Grégoire tọn mẹ sọ de e sẹ̀ sọn hukan ji whladopo dogọ. Taidi kọdetọn de, Frederick lá dọ Innocent wẹ yin agọjẹdoklistigotọ lọ.
Apọsteli Johanu kẹdẹ wẹ yí hogbe lọ “agọjẹdoklistigotọ” zan to wekantọ Biblu tọn lẹpo mẹ. To awe to wekanhlanmẹ he yinkọ etọn yin didona lẹ mẹ, hogbe lọ sọawuhia whla atọ́n. Wefọ he mẹ hogbe lọ sọawuhia te lẹ yin titodohukanji to apotin he tin to weda he bọdego ji. To wefọ ehelẹ mẹ, mí sọgan mọ dọ agọjẹdoklistigotọ lọ yin lalonọ podọ mẹklọtọ de, he ko magbe nado hẹn haṣinṣan he mẹde sọgan tindo hẹ Klisti podọ hẹ Jiwheyẹwhe gble. Abajọ, apọsteli lọ dotuhomẹna Klistiani hatọ etọn lẹ dọmọ: “Mẹyiwanna emi, mì yí [ohó gbọdo, NW ] popo sè blo, ṣigba mì nọ tẹ́n [ohó gbọdo] lẹ pọ́n eyin yé jọ sọn Jiwheyẹwhe dè: na yẹwhegán lalonọ susu ko tọ́nyi aihọn mẹ.”—1 Johanu 4:1.
Jesu lọsu na avase gando mẹklọtọ kavi yẹwhegán lalonọ lẹ go, dọmọ: “[Yé] to mì dè wá . . . to avọ̀ lẹngbọ lẹ tọn mẹ, ṣigba ohla nuwletọ lẹ wẹ yé to homẹ. Mì na yọ́n yé gbọn sinsẹ́n [kavi azọ́n] yetọn mẹ.” (Matiu 7:15, 16) Be Jesu lọsu to avase na hodotọ etọn lẹ gando agọjẹdoklistigotọ yẹhiadonu tọn lọ go wẹ ya? Mì gbọ mí ni pọ́n lehe mí sọgan yọ́n mẹklọtọ kanylantọ ehe gbọn.