Kanbiọ lẹ sọn Wehiatọ lẹ Dè
Etẹwẹ yin “awhàn . . . Jiwheyẹwhe Ganhunupo tọn lọ” to Amagẹdọni, podọ etẹwẹ na yin kọdetọn etọn?—Osọhia 16:14, 16.
Do glido, awhàn Amagẹdọni tọn wẹ awhàn sọgodo tọn lọ he na yin fùnfùn lẹdo aihọn pé ehe mẹ Ahọlu dide Jehovah tọn, Jesu Klisti na và kẹntọ Jiwheyẹwhe tọn lẹ sudo te. Biblu basi zẹẹmẹ dọ kẹntọ ehelẹ, yèdọ “ahọlu aigba po aihọn lẹpo po tọn lẹ” yin hihopli gbọn “gbigbọ aovi lẹ tọn” dali bosọ yin bibẹpli “hlan awhàn azán daho Jiwheyẹwhe Ganhunupo tọn lọ gbè . . . do ofi yè nọ ylọ Amagẹdọni to ogbè Heblu tọn mẹ.”—Osọhia 16:14, 16.
Fihe awhànfuntọ ehelẹ yin bibẹpli do ma yin nọtẹn paa de gba. Yinkọ lọ Amagẹdọni zẹẹmẹdo “Osó Mẹgido tọn.” (Osọhia 16:16) Osó de ma ko tin pọ́n gbede bo nọ yinmọ. Humọ, “ahọlu aigba tọn lẹ, po awhànpa yetọn lẹ po” ma sọgan pli do nọtẹn dopolọ mẹ to paa mẹ gba. (Osọhia 19:19) Kakatimọ, “ofi” lọ dlẹnalọdo ninọmẹ he mẹ gandutọ tonudọtọ aigba tọn lẹ po godonọnamẹtọ yetọn lẹ po yin hinhẹnwa—enẹ wẹ ninọmẹ agọjẹdomẹ tọn sọta Jehovah po “awhànpa he tin to olọn mẹ lẹ” po he to anademẹ awhàngán he yin “Ahọlu ahọlu lẹ tọn, Oklunọ oklunọ lẹ tọn,” Jesu Klisti tọn glọ.—Osọhia 19:14, 16.
E jẹna ayidego dọ hogbe lọ “Amagẹdọni” gando tòdaho Islaeli hohowhenu tọn he yin Mẹgido go. Mẹgido tin to nọtẹn dagbe de mẹ to whèzẹtẹn-waji Osó Kalmẹli tọn, bo tin to ali ajọwiwa po awhànfunfun po tọn tangan ojlẹ enẹ mẹ tọn ji. Podọ e sọ yin fide he awhàn sinsinyẹn susu nọ fó do. Di apajlẹ, “osin Mẹgido tọn lẹ” tó wẹ Whẹdatọ Islaeli tọn Balaki gbawhàn awhànpa huhlọnnọ Kenaninu lẹ tọn he tin to anademẹ Awhàngán Sisela tọn glọ te. (Whẹdatọ 4:12-24; 5:19, 20) Lẹdo enẹ dopolọ mẹ wẹ Whẹdatọ Gideoni sukúndona Midianinu lẹ te. (Whẹdatọ 7:1-22) Gbọn Mẹgido kinkọndopọ hẹ awhàn he to nukọn ja lọ dali, Biblu na mí jide dọ Jiwheyẹwhe na gbawhàn awhànpa kẹntọ lẹpo tọn mlẹnmlẹn gbọn Ovi etọn gblamẹ.
Etẹwẹ na yin kọdetọn lọ? Awhàn Amagẹdọni tọn na de walọ gblezọn po kanyinylan lẹpo po sẹ̀ sọn aigba ji. E na hùn ali dote na ojlẹ gigonọ hugan lọ to whenuho gbẹtọvi tọn mẹ. (Osọhia 21:1-4) To nukunpedomẹgo owanyinọ Ahọluduta Jiwheyẹwhe tọn glọ, aigba na yin didiọzun paladisi de he mẹ dodonọ lẹ na nọ̀ kakadoi.—Psalm 37:29.