Be Wiwá Klisti Tọn Dona Dobuna Mí Wẹ Ya?

LINLẸN tẹlẹ wẹ wiwá Jesu Klisti tọn nọ hẹnwa ayiha towe mẹ? Be hiẹ nọ pọ́n ẹn hlan taidi nujijọ he na hẹn dindọn, nugbajẹmẹji, po yasanamẹ po wá gbẹtọvi lẹ ji wẹ ya? Kavi hiẹ to nukundo dọ e na hẹn nuhahun mítọn lẹpo wá vivọnu? Be wiwá Klisti tọn dona dobuna mí wẹ ya? Kavi mí dona donukun in?

Biblu dọ gando wiwá Klisti tọn go dọmọ: “Doayi e go, e ja po aslọ po; nukun lẹpo wẹ na mọ ẹn, . . . hẹnnu aigba tọn lẹpo wẹ na blawu” na etọn wutu. (Osọhia 1:7) Wiwá ehe dlẹnalọdo awusọhia Jesu tọn to sọgodo nado suahọ dodonọ lẹ bo sayana mẹylankan lẹ.

Apọsteli Johanu donukun wiwá Klisti tọn kakati nado dibuna ẹn. To whenuena e ko mọ numimọ gando wiwá ehe po nuhe e na zẹẹmẹdo na aigba po go godo, Johanu hodẹ̀ vivẹvivẹ dọmọ: “Wá, Jesu Oklunọ.” (Osọhia 22:20) Ṣigba naegbọn “hẹnnu aigba tọn lẹpo . . . na blawu” na etọn wutu? Aliho tẹ mẹ wẹ “nukun lẹpo” na mọ ẹn te? Etẹwẹ wiwá Klisti tọn na wadotana? Nawẹ yise didohia to e mẹ na hẹn ale wá na mí to egbehe gbọn? Hosọ he bọdego na na gblọndo kanbiọ ehelẹ tọn.