Be Hiẹ Na ‘to Zọnlinzin to Gbigbọ mẹ Zọnmii’ Ya?
“Mì nọ zinzọnlin to [gbigbọ] mẹ, mì masọ to na hẹn wantuntun agbasalan tọn di gba.”—GALATIANU LẸ 5:16.
1. Nawẹ mí na duto obu lọ ji dọ mí sọgan waylando do gbigbọ wiwe gbọn?
MÍ SỌGAN duto obu lọ ji dọ mí na waylando do gbigbọ wiwe Jehovah tọn. Gbọnna? Gbọn nuhe apọsteli Paulu dọ wiwà dali dọmọ: “Mì nọ zinzọnlin to [gbigbọ] mẹ, mì masọ to na hẹn wantuntun agbasalan tọn di gba.” (Galatianu lẹ 5:16) Eyin mí na dotẹnmẹ gbigbọ Jiwheyẹwhe tọn nado deanana mí, wantuntun agbasalan tọn lẹ ma na tindo huhlọn do mí ji.—Lomunu lẹ 8:2-10.
2, 3. Nawẹ zọnlinzinzin to gbigbọ mẹ na yinuwado mí ji gbọn?
2 Dile mí zindonukọn nado ‘to zọnlinzin to gbigbọ mẹ,’ huhlọn-yido-wazọ́n Jiwheyẹwhe tọn na whàn mí nado nọ setonuna Jehovah. Mí na nọ do jẹhẹnu Etọn lẹ hia to lizọnyizọn mítọn mẹ, to agun mẹ, to whégbè, podọ to fidevo lẹ. Sinsẹ́n gbigbọ lọ tọn na sọawuhia to nuyiwa mítọn hẹ alọwlemẹ, ovi, yisenọ hatọ, po mẹdevo lẹ po mẹ.
3 Gbẹninọ “hlan Jiwheyẹwhe to gbigbọ mẹ” nọ hẹn mí penugo nado dapana ylando. (1 Pita 4:1-6) Eyin mí tin to anademẹ gbigbọ lọ tọn glọ, mí ma na waylando he ma nọ yin jijona. Ṣigba aliho dagbe devo tẹlẹ mẹ wẹ zọnlinzinzin to gbigbọ mẹ na yinuwado mí ji te?
Hẹn Haṣinṣan Pẹkipẹki Go hẹ Jiwheyẹwhe po Klisti Po
4, 5. Nawẹ zọnlinzinzin to gbigbọ mẹ nọ yinuwado pọndohlan he mí tindo gando Jesu go ji gbọn?
4 Na mí nọ zinzọnlin to anademẹ gbigbọ wiwe tọn mẹ wutu, mí nọ penugo nado hẹn haṣinṣan pẹkipẹki de go hẹ Jiwheyẹwhe po Ovi etọn po. Paulu kanwe gando nunina gbigbọ tọn lẹ go bo dọna yisenọ hatọ lẹ to Kọlinti dọmọ: ‘Yẹn na mì [ayọdetọ dai tọn lẹ] nado tunwun, dọ mẹdepope he to hodọ to gbigbọ Jiwheyẹwhe tọn mẹ de ma dọ, dẹ̀hodo wẹ Jesu gba: podọ mẹdepope ma sọgan dọ dọ Jesu wẹ Oklunọ, adavo to gbigbọ wiwe mẹ.’ (1 Kọlintinu lẹ 12:1-3) Gbigbọ depope he whàn gbẹtọ lẹ nado hodẹ̀do Jesu dona ko wá sọn Satani Lẹgba dè. Ṣigba, taidi Klistiani he to zọnlinzin to anademẹ gbigbọ wiwe tọn mẹ lẹ, mí kudeji dọ Jehovah fọ́n Jesu sọn oṣiọ lẹ mẹ bo hẹn ẹn nado yiaga hugan nudida devo lẹpo. (Filippinu lẹ 2:5-11) Mí tindo yise to avọ́sinsan ofligọ Klisti tọn mẹ bo kẹalọyi Jesu taidi Oklunọ he Jiwheyẹwhe de do mí ji.
5 Mẹhe ylọ yede dọ Klistiani to owhe kanweko tintan W.M. mẹ delẹ ma yigbe dọ Jesu wá to agbasalan mẹ. (2 Johanu 7-11) Alọkikẹyi pọndohlan agọ̀ enẹ hẹn mẹdelẹ nado gbẹ́ nuplọnmẹ nugbo lẹ dai gando Jesu he yin Mẹssia lọ go. (Malku 1:9-11; Johanu 1:1, 14) Zọnlinzinzin to anademẹ gbigbọ wiwe tọn mẹ nọ gọalọna mí ma nado jai jẹ atẹṣiṣi mọnkọtọn mẹ. Ṣigba mí na to vivi nukundagbe majẹhẹ Jehovah tọn dù bo na to “zọnlinzin to nugbo lọ mẹ” zọnmii kiki eyin mí gbọṣi nukle to gbigbọ-liho. (3 Johanu 3, 4) Enẹwutu, mì gbọ mí ni magbe nado gbẹ́ atẹṣiṣi lẹpo dai na mí nido sọgan hẹn haṣinṣan he lodo de go hẹ Otọ́ olọnmẹ tọn mítọn.
6. Jẹhẹnu tẹlẹ wẹ gbigbọ Jiwheyẹwhe tọn nọ wleawuna to mẹhe to zọnlinzin to gbigbọ mẹ lẹ mẹ?
6 Paulu slẹ kọlilẹ yì boṣiọ-sinsẹ̀n mẹ po plọngiglọ po to “azọ́n agbasalan tọn” mọnkọtọn lẹ taidi galilọ po mawé po mẹ. Ṣigba e basi zẹẹmẹ dọmọ: “Yé he yin Klisti tọn lẹ ko whè agbasalan do [yatin] go po ojlo ayiha tọn po, po wantuntun agbasalan tọn lẹ po. Eyin míwlẹ tin to ogbẹ̀ to [gbigbọ] mẹ, mì bo gbọ mí ni to zọnlinzin to [gbigbọ] mẹ ga.” (Galatianu lẹ 5:19-21, 24, 25) Jẹhẹnu tẹlẹ wẹ huhlọn-yido-wazọ́n Jiwheyẹwhe tọn nọ wleawuna to mẹhe nọ nọgbẹ̀ bo nọ zinzọnlin to gbigbọ mẹ lẹ mẹ? Paulu wlan dọmọ: ‘Sinsẹ́n gbigbọ tọn wẹ, owanyi, ayajẹ, jijọho, linsinyẹn, homẹdagbe, dagbewà, yise, walọmimiọn, mawazẹjlẹgo.’ (Galatianu lẹ 5:22, 23) Mì gbọ mí ni gbadopọnna adà sinsẹ́n gbigbọ tọn ehelẹ.
Mì “Yiwanna Mìnọzo”
7. Etẹwẹ owanyi, podọ etẹwẹ yin ohia etọn delẹ?
7 Owanyi—yèdọ adà sinsẹ́n gbigbọ tọn dopo—nọ saba bẹ numọtolanmẹ sinsinyẹn po mẹtọnhopọn ahundopo tọn didohia mẹdevo lẹ po gọna haṣinṣan pẹkipẹki tintindo hẹ yé hẹn. Owe-wiwe dọ dọ “Jiwheyẹwhe wẹ owanyi” na ewọ wẹ apajlẹ pipé jẹhẹnu enẹ tọn. Owanyi daho Jiwheyẹwhe po Ovi etọn po tọn na gbẹtọvi lẹ yin didohia to avọ́sinsan ofligọ Jesu Klisti tọn mẹ. (1 Johanu 4:8; Johanu 3:16; 15:13; Lomunu lẹ 5:8) Owanyi he mí tindo na mínọzo nọ do mí hia taidi hodotọ Jesu tọn lẹ. (Johanu 13:34, 35) Na nugbo tọn, mí yin gbedena nado ‘yiwanna mínọzo.’ (1 Johanu 3:23) Podọ Paulu dọ dọ owanyi nọ jiya dẹn bosọ jọmẹ. Onú ma nọ vẹunna ẹn, e ma nọ yigo, e ma nọ hẹn ede wà onú jẹagọ kavi dín onú edetiti tọn. Owanyi ma nọ gblehomẹ aplà kavi lẹn ylankan. E nọ jaya to nugbo mẹ, e ma yin to ylando mẹ. Owanyi nọ doakọnna onú lẹpo, yí onú lẹpo sè, doto onú lẹpo bosọ nọ sinyẹnlin na onú lẹpo. Humọ, e ma nọ gbọ̀vọ́ gbede.—1 Kọlintinu lẹ 13:4-8.
8. Naegbọn mí dona yiwanna Jehovah sẹ̀ntọ hatọ lẹ?
8 Eyin mí na dotẹnmẹ gbigbọ Jiwheyẹwhe tọn nado wleawuna owanyi to mí mẹ, jẹhẹnu enẹ na sọawuhia to haṣinṣan mítọn hẹ Jiwheyẹwhe po kọmẹnu mítọn lẹ po mẹ. (Matiu 22:37-39) “Mẹdepope he ma yiwanna mẹmẹsunnu etọn, e tin to okú mẹ,” wẹ apọsteli Johanu wlan. “Mẹdepope he gbẹwanna mẹmẹsunnu etọn mẹhutọ de wẹ; mì sọ yọnẹn dọ ogbẹ̀ madopodo ma na nọhẹ mẹhutọ gba.” (1 Johanu 3:14, 15) Hlọnhutọ de sọgan mọ hihọ́ to tòdaho fibẹtado Islaeli tọn de mẹ kiki eyin e ma gbẹwanna mẹhe e hù lọ. (Deutelonomi 19:4, 11-13) Eyin gbigbọ wiwe nọ deanana mí, mí na yiwanna Jiwheyẹwhe, sinsẹ̀n-basitọ hatọ lẹ, po mẹdevo lẹ po.
“Ayajẹ OKLUNỌ Tọn Wẹ Huhlọn Mìtọn”
9, 10. Etẹwẹ ayajẹ yin, podọ whẹwhinwhẹ́n tẹlẹ wẹ mí tindo nado yin ayajẹnọ?
9 Jehovah yin ‘Jiwheyẹwhe ayajẹnọ.’ (1 Timoti 1:11; Psalm 104:31) Ovi etọn nọ hùnhomẹ nado wà ojlo Etọn. (Psalm 40:8; Heblu lẹ 10:7-9) Podọ “ayajẹ OKLUNỌ tọn wẹ huhlọn” mítọn.—Nẹhemia 8:10.
10 Ayajẹ he nọ wá sọn Jiwheyẹwhe dè nọ hẹn pekọ sisosiso wá na mí to whenuena mí wà ojlo Jiwheyẹwhe tọn etlẹ yin to ojlẹ awusinyẹn, awubla, kavi homẹkẹn tọn lẹ mẹ. Ayajẹ nankọtọn die “oyọnẹn Jiwheyẹwhe tọn” nọ hẹnwa na mí! (Howhinwhẹn lẹ 2:1-5) Haṣinṣan ayajẹnọ mítọn hẹ Jiwheyẹwhe sinai do oyọnẹn he pegan gọna yise tintindo to ewọ po avọ́sinsan ofligọ Jesu tọn mẹ po ji. (1 Johanu 2:1, 2) Yinyin apadewhe whẹndo akọjọpli mẹmẹsunnu lẹ tọn yin asisa ayajẹ tọn devo. (Zẹfania 3:9; Hagai 2:7) Todido Ahọluduta tọn mítọn po lẹblanulọkẹyi daho he mí tindo nado lá wẹndagbe lọ po nọ hẹn ayajẹ wá na mí. (Matiu 6:9, 10; 24:14) Onú dopolọ wẹ todido ogbẹ̀ madopodo tọn nọ wà na mí. (Johanu 17:3) Po todido jiawu mọnkọtọn po, mí tindo whẹwhinwhẹ́n nado yin ‘ayajẹnọ mlẹnmlẹn.’—Deutelonomi 16:15.
Yin Jijọhonọ Bosọ Nọ Sinyẹnlin
11, 12. (a) Nawẹ hiẹ na basi zẹẹmẹ jijọho tọn gbọn? (b) Nuyiwadomẹji tẹwẹ jijọho Jiwheyẹwhe tọn nọ tindo do mí ji?
11 Jijọho—yèdọ adà sinsẹ́n gbigbọ tọn devo—yin vivomẹninọ ahun mẹ tọn he vò sọn magbọjẹ si. Otọ́ olọnmẹ tọn mítọn yin Jiwheyẹwhe jijọho tọn, podọ jide yin nina mí dọmọ: “OKLUNỌ nasọ yí jijọho do dona omẹ etọn lẹ.” (Psalm 29:11; 1 Kọlintinu lẹ 14:33) Jesu dọna devi etọn lẹ dọmọ: “Jijọho wẹ yẹn jodo mì dè, jijọho ṣie wẹ yẹn na hlan mì.” (Johanu 14:27) Nawẹ enẹ na gọalọna hodotọ etọn lẹ gbọn?
12 Jijọho he Jesu na devi etọn lẹ whiwhẹ ahun po ayiha yetọn po bo de obu yetọn pò. Na taun tọn, yé tindo jijọho to whenuena gbigbọ wiwe he yè dopagbe etọn wá yé ji. (Johanu 14:26) To nuyiwadomẹji gbigbọ lọ tọn glọ podọ taidi gblọndo odẹ̀ mítọn lẹ tọn to egbehe, mí nọ duvivi “jijọho Jiwheyẹwhe tọn” mayọnjlẹ he nọ hẹn ahun po ayiha mítọn po vò. (Filippinu lẹ 4:6, 7) Humọ, gbigbọ Jehovah tọn nọ gọalọna mí nado vò sọn ayiha mẹ bo tin to jijọho mẹ hẹ yisenọ hatọ lẹ po mẹdevo lẹ po.—Lomunu lẹ 12:18; 1 Tẹsalonikanu lẹ 5:13.
13, 14. Etẹwẹ linsinsinyẹn yin, podọ naegbọn mí dona nọ do e hia?
13 Linsinsinyẹn tindo kanṣiṣa hẹ jijọho, na e zẹẹmẹdo dọ mí yí homẹfa do doakọnnanu to ninọmẹ sinsinyẹn glọ kavi to whenuena mí yin homẹhẹngblena po todido lọ po dọ ninọmẹ lọ na wá pọnte to nukọn mẹ. Jiwheyẹwhe nọ miọnhomẹ kavi sinyẹnlin. (Lomunu lẹ 9:22-24) Jesu lọsu do jẹhẹnu ehe hia. Mí sọgan mọaleyi sọn e mẹ, na Paulu wlan dọmọ: “Na ehe lọ tọn wutu wẹ yẹn mọ lẹblanu yí dọ to yẹn mẹ di [omẹ tintan] na Jesu Klisti nido yí linsinsinyẹn popo hia jẹgbonu, na ohia yé he na yí ì sè to godo mẹ na ogbẹ̀ madopodo lẹ tọn de.”—1 Timoti 1:16.
14 Linsinsinyẹn nọ gọalọna mí nado doakọnnanu to whenuena mẹdevo lẹ dọ kavi wà nuhe ma yọ́n kavi he ma do lẹnpọn dagbe hia. Paulu dotuhomẹna Klistiani hatọ lẹ dọmọ: “Mì . . . nọ sinyẹnlin hẹ gbẹtọ lẹpo.” (1 Tẹsalonikanu lẹ 5:14) To whenuena e yindọ mímẹpo wẹ yin mapenọ bo nọ ṣinuwa, mí nọ jlo dọ gbẹtọ lẹ ni sinyẹnlin hẹ mí to whenuena mí ṣinuwa do yé. Enẹwutu, mì gbọ mí ni dovivẹnu nado nọ ‘sinyẹnlin po ayajijẹ po.’—Kọlọsinu lẹ 1:9-12.
Nọ Do Homẹdagbe po Dagbewà po Hia
15. Dọ nuhe homẹdagbe yin bo na apajlẹ etọn delẹ.
15 Homẹdagbe nọ yin didohia to whenuena mí do ojlo hia to mẹdevo lẹ mẹ gbọn hogbe kavi nuyiwa họntọnjihẹmẹ po alọgọnamẹ tọn lẹ po gblamẹ. Jehovah po Ovi etọn po nọ do homẹdagbe hia. (Matiu 5:45; Luku 9:11) E yin bibiọ to devizọnwatọ Jiwheyẹwhe po Klisti po tọn lẹ si nado nọ do lẹblanu kavi homẹdagbe hia. (Mika 6:8) Mẹhe ma tlẹ tindo haṣinṣan depope hẹ Jiwheyẹwhe delẹ ko do ‘homẹdagbe susu’ hia. (Owalọ lẹ 27:3; 28:2) Enẹwutu, e họnwun dọ mí sọgan do homẹdagbe hia eyin mí “nọ zinzọnlin to gbigbọ mẹ.”
16. Ninọmẹ tẹlẹ wẹ dona whàn mí nado do homẹdagbe hia?
16 Homẹdagbe sọgan yin didohia eyin mí tlẹ gblehomẹ po whẹjijọ po na ohó awugblenamẹ tọn kavi nuyiwa lẹnpọn matindo tọn mẹde tọn wutu. Paulu dọmọ: “Eyin mì gblehomẹ, mì waylando blo; mì sọ dike owhè biọ do homẹgble mìtọn ji blo: mì na otẹn Lẹgba blo. . . . Mì nọ wadagbe hlan mìnọzo, mì do homẹmimiọn, mì nọ jo ylando mìnọzo tọn, yèdọ dile Jiwheyẹwhe to Klisti mẹ ko jona mì do.” (Efesunu lẹ 4:26, 27, 32) Nuhe sọgbe taun wẹ e yin nado nọ do homẹdagbe hia mẹhe to whlepọn mẹ lẹ. Na nugbo tọn, e ma na yin dohia homẹdagbe tọn to adà mẹho Klistiani de tọn mẹ eyin e gboawupo nado na ayinamẹ sinai do Owe-wiwe ji kiki na e ma jlo na gbleawuna numọtolanmẹ mẹhe kunnudenu dohia hezeheze dọ e to afọdona nuyiwa he na hẹn ẹn nado gbẹkọ “dagbewà, dodo, po nugbo” po go de tọn wutu.—Efesunu lẹ 5:9.
17, 18. Etẹwẹ dagbewà yin, podọ adà tẹwẹ jẹhẹnu ehe dona yiwà to gbẹzan mítọn mẹ?
17 Dagbewà yin jijọ dagbe, walọ he sọgbe, kavi jijọ lọ nado nọ wadagbe. Jiwheyẹwhe yin omẹ dagbe to linlẹn he yiaga hugan mẹ. (Psalm 25:8; Zekalia 9:17) Jesu yin jijọ dagbenọ bo tindo jẹhẹnu walọ he sọgbe tọn. Ṣogan, e gbẹ́ nado yin yiylọdọ “Mẹplọntọ dagbe.” (Malku 10:17, 18) E gbẹ́ tẹnmẹ-yinkọ ehe na e yọnẹn dọ Jiwheyẹwhe wẹ yin apajlẹ pipé dagbewà tọn.
18 Ylando he mí dugu etọn nọ glọnalina mí nado wà dagbe. (Lomunu lẹ 5:12) Etomọṣo, mí sọgan do jẹhẹnu ehe hia eyin mí hodẹ̀ dọ Jiwheyẹwhe ni plọn mí dagbewà. Paulu dọna yisenọ hatọ lẹ to Lomu dọmọ: “Mẹmẹsunnu ṣie emi, yẹnlọsu yọnẹn ga gbọn mìtọn dali, dọ mì gọ́ na dagbewà, yè sọ hẹn mì gọ́ na nuyọnẹn lẹpo.” (Lomunu lẹ 15:14) Nugopọntọ Klistiani de dona yin “wanyitọ dagbe tọn.” (Titu 1:7, 8) Eyin gbigbọ Jiwheyẹwhe tọn nọ deanana mí, mí na yin yinyọnẹn taidi mẹhe nọ wà dagbe, podọ Jehovah na ‘flin mí na dagbe he mí wà.’—Nẹhemia 5:19; 13:31.
“Yise He Ma Do Oklọ”
19. Basi zẹẹmẹ yise tọn, to kọndopọ mẹ hẹ Heblu lẹ 11:1.
19 Yise—he sọ yin adà sinsẹ́n gbigbọ tọn devo—yin “dòdó onú yè to todo tọn, okunnu onú he mí ma mọ tọn.” (Heblu lẹ 11:1) Eyin mí tindo yise, mí na kudeji dọ nuhe Jehovah dopagbe etọn lẹpo na mọ hẹndi dandan. Kunnudenu dutomẹji nuhe ma yin mimọ lẹ tọn tindo huhlọn sọmọ bọ yise yin alọdlẹndo nado yin nudopolọ po kunnudenu enẹ po. Di dohia, nudida he mí nọ mọ lẹ nọ hẹn mí tindo nujikudo mlẹnmlẹn dọ Mẹdatọ de tin. Yise mọnkọtọn wẹ mí na dohia eyin mí nọ zinzọnlin to gbigbọ mẹ.
20. Etẹwẹ yin “ylando he ma sinyẹnawu nado tẹdo omẹ go,” podọ nawẹ mí sọgan dapana ylando enẹ po azọ́n agbasalan tọn lẹ po gbọn?
20 Yise matindo yin “ylando he ma sinyẹnawu nado tẹdo omẹ go.” (Heblu lẹ 12:1) Mí dona ganjẹ gbigbọ Jiwheyẹwhe tọn go nado sọgan dapana azọ́n agbasalan tọn lẹ, ojlo agbasanu lẹ tọn, po nuplọnmẹ lalo he nọ hù yise sudo lẹ po. (Kọlọsinu lẹ 2:8; 1 Timoti 6:9, 10; 2 Timoti 4:3-5) Gbigbọ Jiwheyẹwhe tọn nọ hẹn devizọnwatọ Jehovah tọn egbezangbe tọn lẹ penugo nado tindo yise he taidi kunnudetọ hohowhenu tọn lẹ po mẹhe yin nùdego to kandai Biblu tọn mẹ devo lẹ po tọn nkọtọn. (Heblu lẹ 11:2-40) Podọ “yise he ma do oklọ” mítọn sọgan hẹn yise mẹdevo lẹ tọn lodo.—1 Timoti 1:5; Heblu lẹ 13:7.
Nọ Do Walọmimiọn po Mawazẹjlẹgo po Hia
21, 22. Etẹwẹ walọmimiọn yin, podọ naegbọn mí dona nọ do e hia?
21 Walọmimiọn yin jijọ po walọ fifá po. Walọmimiọn yin dopo to jẹhẹnu Jiwheyẹwhe tọn lẹ mẹ. Mí yọ́n ehe na Jesu, he yin homẹmimiọnnọ, do jẹhẹnu Jehovah tọn lẹ hia to pipé mẹ wutu. (Matiu 11:28-30; Johanu 1:18; 5:19) To whelọnu lo, etẹwẹ yin bibiọ to mí si taidi devizọnwatọ Jiwheyẹwhe tọn lẹ?
22 Taidi Klistiani lẹ, mí yin nukundo nado “nọ do walọmimiọn hia omẹ popo.” (Titu 3:2) Mí nọ do walọmimiọn hia to lizọnyizọn mítọn mẹ. Mẹhe tindo jẹhẹnu gbigbọmẹ tọn lẹ yin ayinamẹ na nado nọ gọ̀ Klistiani he ṣinuwa de do otẹn etọn mẹ “to gbigbọ walọmimiọn tọn mẹ.” (Galatianu lẹ 6:1) Mímẹpo sọgan yidogọna pọninọ po jijọho Klistiani tọn po gbọn ‘ayiha whiwhẹ po walọmimiọn po’ didohia dali. (Efesunu lẹ 4:1-3) Mí sọgan do walọmimiọn hia eyin mí nọ zinzọnlin to gbigbọ mẹ bo nọ do mawazẹjlẹgo hia to whepoponu.
23, 24. Etẹwẹ mawazẹjlẹgo yin, podọ nawẹ e nọ gọalọna mí gbọn?
23 Mawazẹjlẹgo nọ hẹn mí penugo nado nọ payi linlẹn, hodidọ, po nuyiwa mítọn lẹ po go. Jehovah do mawazẹjlẹgo hia whlasusu to nuyiwa hẹ Babilọninu he hẹn Jelusalẹm jẹvọ́ lẹ mẹ. (Isaia 42:14) Ovi etọn ‘ze apajlẹ dai na mí’ gbọn mawazẹjlẹgo didohia to whlepọn glọ dali. Podọ apọsteli Pita na ayinamẹ Klistiani hatọ lẹ nado ‘yí owùnza kavi mawazẹjlẹgo dogọ oyọnẹn yetọn.’—1 Pita 2:21-23; 2 Pita 1:5-8..
24 E yin bibiọ to mẹho Klistiani lẹ si nado yin mawazẹjlẹgonọ. (Titu 1:7, 8) Na nugbo tọn, mẹhe nọ yin anadena gbọn gbigbọ wiwe dali lẹpo sọgan do mawazẹjlẹgo hia bo gbọnmọ dali dapana fẹnnuwiwa, ohó agbàagba didọ, kavi nudepope he sọgan dekọtọn do nukundagbe Jehovah tọn hinhẹnbu mẹ. Eyin mí na dotẹnmẹ gbigbọ Jiwheyẹwhe tọn nado wleawuna mawazẹjlẹgo to mí mẹ, ehe na họnwun na mẹdevo lẹ na hodidọ po walọ dagbe mítọn po wutu.
To Zọnlinzin to Gbigbọ mẹ Zọnmii
25, 26. Nawẹ zọnlinzinzin to gbigbọ mẹ na yinuwado haṣinṣan he mí tindo hẹ gbẹtọ lẹ todin po todido sọgodo tọn mítọn po ji gbọn?
25 Eyin mí nọ zinzọnlin to gbigbọ mẹ, mí na yin wẹnlatọ zohunhunnọ Ahọluduta tọn lẹ. (Owalọ lẹ 18:24-26) Mí na yin gbẹdohẹmẹtọ dagbe, podọ mẹhe tindo mẹdezejo jijọ-di-Jiwheyẹwhe tọn lẹ na yiwanna gbẹdido mítọn. Taidi mẹhe nọ yin anadena gbọn gbigbọ wiwe dali lẹ, mí nasọ yin asisa tulinamẹ tọn na Jehovah sẹ̀ntọ hatọ lẹ. (Filippinu lẹ 2:1-4) Be e ma yin nuhe Klistiani lẹpo jlo nado yin niyẹn ya?
26 To aihọn he tin to anademẹ Satani tọn glọ ehe mẹ, e ma nọ bọawu nado zinzọnlin to gbigbọ mẹ. (1 Johanu 5:19) Etomọṣo, gbẹtọ livi susu lẹ to mọwà to egbehe. Eyin mí dejido Jehovah go po ahun mítọn lẹpo po mí na duvivi ogbẹ̀ tọn todin bo nasọ penugo nado to zọnlinzin zọnmii kakadoi to aliho dodo Jiwheyẹwhe he gbọn owanyi dali na mí gbigbọ wiwe tọn ji.—Psalm 128:1; Howhinwhẹn lẹ 3:5, 6.
Etẹwẹ Yin Gblọndo Towe?
• Nawẹ ‘zọnlinzinzin to gbigbọ mẹ’ nọ yinuwado haṣinṣan mítọn hẹ Jiwheyẹwhe po Ovi etọn po ji gbọn?
• Jẹhẹnu tẹlẹ wẹ sinsẹ́n gbigbọ wiwe tọn bẹhẹn?
• Aliho tẹlẹ mẹ wẹ mí sọgan do sinsẹ́n gbigbọ wiwe Jiwheyẹwhe tọn hia te?
• Nawẹ zọnlinzinzin to gbigbọ mẹ nọ yinuwado gbẹzan mítọn dintọn po todido sọgodo tọn mítọn po ji gbọn?
[Yẹdide to weda 23]
Gbigbọ wiwe Jehovah tọn nọ whàn mí nado yiwanna yisenọ hatọ mítọn lẹ
[Yẹdide to weda 24]
Nọ do homẹdagbe hia gbọn hogbe po nuyiwa alọgọnamẹ tọn lẹ po gblamẹ