Kanbiọ lẹ sọn Wehiatọ lẹ Dè

Be jẹhẹnu he yin sislẹ to Galatianu lẹ 5:22, 23 mẹ lẹ kẹdẹ wẹ yin adà he “sinsẹ́n gbigbọ tọn” bẹhẹn lẹ ya?

Wefọ ehelẹ slẹ jẹhẹnu Klistiani tọn ṣinẹnẹ: “Sinsẹ́n gbigbọ tọn wẹ owanyi, ayajẹ, jijọho, homẹfa, homẹdagbe, dagbewà, yise, walọmimiọn, mawazẹjlẹgo.” Etomọṣo, mí ma dona nọ lẹndọ jẹhẹnu dagbedagbe ehelẹ kẹdẹ wẹ gbigbọ Jiwheyẹwhe tọn sọgan gọalọna mí nado wleawuna.

Doayi nuhe apọsteli Paulu wlan to wefọ he jẹnukọn lẹ mẹ go, dọmọ: “Azọ́n agbasalan tọn lẹ . . . wẹ fẹnnuwiwa zanhẹmẹ tọn, mawé, walọ gblezọn tasinsinyẹn tọn, boṣiọ-sinsẹ̀n, afinyọnnuwiwa, wangbẹnamẹ, avùn, awuwhàn, adánjijẹ whẹwhẹ, wiwọ́, kinklan, plọngiglọ, nuvẹun, ahànnu-zẹjlẹgo, agọ́-gànyìn po onú mọnkọ lẹ po.” (Gal. 5:19-21) Enẹwutu, Paulu sọgan ko slẹ nudevo lẹ dogọ “azọ́n agbasalan tọn lẹ,” taidi nuhe yin nùdego to Kolosinu lẹ 3:5 mẹ lẹ. Mọdopolọ, to whenue e ko donù jẹhẹnu dagbe ṣinẹnẹ lọ lẹ go godo, e dọmọ: “Osẹ́n depope ma tin he jẹagọdo onú mọnkọtọn lẹ.” Ehe dohia dọ Paulu ma to tintẹnpọn nado slẹ jẹhẹnu dagbedagbe he gbigbọ wiwe sọgan gọalọna mí nado wleawuna lẹpo.

Mí mọnukunnujẹ ehe mẹ dogọ to whenue mí yí jẹhẹnu he Paulu slẹ lẹ jlẹdo nuhe e wlan hlan agun he to Efesu go, dọmọ: “Sinsẹ́n hinhọ́n tọn nọ bẹ dagbewà wunmẹ lẹpo, dodowiwa po nugbo po hẹn.” (Efe. 5:8, 9) Mọwẹ, “dagbewà,” to pọmẹ hẹ dodowiwa po nugbo po yin adà “sinsẹ́n hinhọ́n tọn”, amọ́ e sọ yin adà “sinsẹ́n gbigbọ tọn” de ga.

Humọ, Paulu dotuhomẹna Timoti nado nọ “doafọna dodowiwa, mẹdezejo na Jiwheyẹwhe, yise, owanyi, akọndonanu po walọmimiọn po”—yèdọ jẹhẹnu dagbedagbe ṣidopo delẹ. (1 Tim. 6:11) Atọ̀n poun to jẹhẹnu ehelẹ mẹ (enẹ wẹ yise, owanyi, po walọmimiọn po) wẹ yin nùdego taidi adà “sinsẹ́n gbigbọ tọn.” Ṣigba, Timoti na ko sọ jlo dọ gbigbọ lọ ni gọalọna emi nado wleawuna jẹhẹnu devo he pò lẹ, yèdọ dodowiwa, mẹdezejo na Jiwheyẹwhe po akọndonanu po.—Yijlẹdo Kolosinu lẹ 3:12; po 2 Pita 1:5-7 po go.

Enẹwutu, e ma yin jẹhẹnu Klistiani tọn lẹpo wẹ yin sislẹ to Galatianu lẹ 5:22, 23 mẹ. Gbigbọ Jiwheyẹwhe tọn gán gọalọna mí nado wleawuna adà ṣinẹnẹ “sinsẹ́n gbigbọ tọn” he yin sislẹ lẹ. Ṣigba, jẹhẹnu susu gbẹ́ pò he mí dona wleawuna nado lẹzun Klistiani he whèwhín to gbigbọ-liho, podọ nado “ze gbẹtọ-yinyin yọyọ lọ do, ehe yin didá sọgbe hẹ ojlo Jiwheyẹwhe tọn to dodowiwa nugbo po nugbonọ-yinyin po mẹ.”—Efe. 4:24.