Ogán Jọja de Basi Nudide Nulú Tọn

OGÁN jọja adọkunnọ lọ yin ahunjijlọnọ bo nọ yìn osẹ́n bosọ tindo ojlo to sinsẹ̀n mẹ. E wá Jesu dè bo jẹklo na ẹn bosọ kanbiọ ẹ dọ: “Mẹplọntọ dagbe, onú dagbe tẹwẹ yẹn na basi, na yẹn nido tindo ogbẹ̀ madopodo?”

Jesu na gblọndo dọ nado sọgan mọ ogbẹ̀ madopodo yí, dawe lọ dona setonuna gbedide Jiwheyẹwhe tọn lẹ. To whenuena dawe lọ biọ to Jesu si nado yì ohó lọ ji tlọlọ, Jesu dọmọ: “Hiẹ ma na hùmẹ, Hiẹ ma na deayọ, Hiẹ ma na fìnnú yí, Hiẹ ma de lalo kunnu. Gbògbéna otọ́ towe po onọ̀ towe po: podọ, Hiẹ na yiwanna kọmẹnu towe di dewe.” Gbedide dodonu tọn he tin to Osẹ́n he yin nina Mose mẹ wẹ ehelẹ yin. Enẹgodo, dawe lọ dọmọ: “Onú he lẹpo wẹ yẹn ko payi e go: etẹwẹ sọ whè do mi?”—Matiu 19:16-20.

Jesu pọ́n dawe lọ bo “yiwanna ẹn” bosọ dọmọ: “Onú dopo wẹ pò na we; yì, bo sà nudepope he hiẹ tindo, bo yí na wamọnọ lẹ, hiẹ nasọ tindo adọkunnu to olọn mẹ: bo wá, . . . bo hodo mi.”—Malku 10:17-21.

To afọdopolọji, ogán jọja lọ mọ ede to nudide sinsinyẹn de nukọn. Etẹwẹ e na wà? Be e na yigbe bo gbẹkọ adọkunnu etọn lẹ go bo lẹzun hodotọ Jesu tọn ya, kavi e na tẹdo nutindo etọn lẹ go? Be e na doafọna adọkunnu aigba ji tọn lẹ wẹ ya, kavi e na bẹ adọkunnu pli do olọn mẹ? Nudide enẹ na ko vẹawu na ẹn. E họnwun dọ e tindo ojlo na gbigbọnu lẹ, na e nọ yìn Osẹ́n Mose tọn bosọ jlo na yọ́n nuhe pò bọ e na wà nado sọgan mọ nukundagbe Jiwheyẹwhe tọn. Nudide tẹwẹ e basi? E “tọnjẹgbonu to awubla mẹ; na ewọ yin mẹde he tindo adọkun susu wutu.”—Malku 10:22.

Nudide ogán jọja lọ tọn ma do nuyọnẹn hia. Eyin e ko lẹzun hodotọ nugbonọ Jesu tọn de wẹ, e sọgan ko mọ nuhe dín e te lọ yí—enẹ wẹ ogbẹ̀ madopodo. Kandai lọ ma dọ nuhe jọ do dawe enẹ go na mí gba. Ṣigba, nuhe mí yọnẹn wẹ yindọ, to nudi owhe 40 godo, awhànpa Lomu tọn lẹ gbà Jelusalẹm po adà daho hugan Jude tọn po kija. Susu Ju lẹ tọn wẹ hẹn adọkunnu po ogbẹ̀ yetọn po bu.

To vogbingbọn mẹ na ogán jọja lọ, apọsteli Pita po devi devo lẹ po basi nudide dagbe. Yé “jo nulẹpo dai” bo hodo Jesu. Lehe nudide enẹ hẹn ale wá na yé do sọ! Jesu dọna yé dọ yé na gọ̀ nuhe yé ko jodo godo lẹ mọyi do ogbẹ́ susu ji. Humọ, yé na dugu ogbẹ̀ madopodo tọn. Yé ko basi nudide he ma na wá vẹna yé to godo mẹ.—Matiu 19:27-29.

Mímẹpo wẹ nọ pannukọn nudide lẹ to gbẹ̀mẹ—pẹvi po daho po. Ayinamẹ tẹwẹ Jesu na gando nudide mọnkọtọn lẹ go? Be hiẹ na kẹalọyi ayinamẹ etọn ya? Eyin hiẹ de nado wàmọ, dona susugege wẹ a na mọyi. Todin, mì gbọ mí ni lẹnnupọndo lehe mí sọgan hodo Jesu bo mọaleyi sọn nuhe e dọ lẹ mẹ do ji.