Weta 96
Jesu po Jọja Aṣẹpatọ Adọkunnọ de Po
DILE Jesu gbọn agbegbe Pelea tọn mẹ jei Jelusalẹm, dawe jọja de họ̀nwezun wá bo jẹklo to nukọn na ẹn. Dawe lọ nọ yin yiylọdọ aṣẹpatọ de, vlavo enẹ zẹẹmẹdo dọ e tin to otẹn he diyin de mẹ to sinagọgu lẹdo lọ tọn mẹ kavi tlẹ sọgan yindọ hagbẹ Tòhódọtọ Ju lẹ tọn de wẹ ewọ yin. Humọ, ewọ yin adọkunnọ taun. E kanse dọmọ: “Mẹplọntọ dagbe, etẹwẹ yẹn na wà, bọ yẹn nado dugu ogbẹ̀ madopodo tọn?”
“Etẹwutu hiẹ ylọ mi mẹdagbe?” wẹ Jesu gblọn. “Mẹdagbe de ma tin, adavo omẹ dopo, enẹ wẹ Jiwheyẹwhe.” E sọgan yindọ dawe jọja lọ yí “mẹdagbe” zan taidi tẹnmẹ-yinkọ de, enẹwutu Jesu hẹn ẹn nado yọnẹn dọ tẹnmẹ-yinkọ mọnkọtọn tin na Jiwheyẹwhe kẹdẹ.
Jesu zindonukọn dọmọ: “Ṣigba eyin hiẹ jlo na biọ ogbẹ̀ mẹ, yìn osẹ́n lẹ.”
Dawe lọ kanse dọ, ‘detẹ lẹ wẹ?’
To sislẹ́ atọ́n to Gbedide Ao lẹ mẹ, Jesu gblọn dọmọ: “Hiẹ ma na hùmẹ, Hiẹ ma na deayọ, Hiẹ ma na fìnnuyi, Hiẹ ma na dè lalo kunnu. Gbògbéna otọ́ towe po onọ̀ towe po.” Podọ to gbedide he tlẹ sọ yin titengbe hugan de yiyidogọ mẹ, Jesu dọmọ: “Hiẹ na yiwanna kọmẹnu towe di dewe.”
“Onú he lẹpo go wẹ yẹn ko tunnukun sọn ovu ṣie,” wẹ dawe lọ gblọn po ahundopo po. “Etẹwẹ sọ whédo mi?”
To todidoai hlan obiọ vẹkuvẹku, zohunhunnọ dawe lọ tọn, Jesu tindo numọtolanmẹ owanyi tọn na ẹn. Ṣigba Jesu doayi owanyi dawe lọ tọn na nutindo agbasa tọn lẹ go bo gbọnmọ dali do nuhudo etọn hia dọmọ: “Onú dopo wẹ pò na we; yì, bo sà onú depope he hiẹ tindo, bo yí na wamọnọ lẹ, hiẹ nasọ tindo adọkunnu to olọn mẹ, bo wá, . . . bo hodo mi.”
Matin ayihaawe, Jesu to dawe lọ pọ́n po lẹblanu po, dile dawe lọ fọ́n bo lẹkọyi po awubla sisosiso po. Adọkun etọn ko tọ́nnukun na ẹn hlan nuhọakuẹ adọkun nugbo tọn. Jesu doavigbe dọmọ: “Nawẹ e na sinyẹnawu na mẹhe tindo adọkun lẹ do nado biọ ahọludu Jiwheyẹwhe tọn mẹ!”
Ohó Jesu tọn paṣa devi lẹ. Ṣigba yé sọ vọ́ yin pipaṣa hugan to whenuena e zindonukọn nado dọ nunọwhinnusẹ́n paa tọn de dọmọ: “E bọawu na kanklosọpò-awenọ de nado gbọn nùvo yẹ́nví tọn mẹ luntọ́n, hú na adọkunnọ nado biọ ahọludu Jiwheyẹwhe tọn mẹ.”
“Be mẹnu wẹ sọgan yin whinwhlẹngan?” wẹ devi lẹ jlo nado yọnẹn.
To pinpọn yé hlan tlọlọ, Jesu gblọn dọmọ: “Gbẹtọ dè wẹ ehe glo te, ṣigba e ma yin to Jiwheyẹwhe dè gba: na onú lẹpo wẹ wiwà na Jiwheyẹwhe.”
To yinyọnẹn mẹ dọ yewlẹ ko basi dide de he gbọnvo tlala na dehe jọja aṣẹpatọ adọkunnọ lọ basi, Pita dọmọ: “Pọ́n, míwlẹ ko jo onú lẹpo dai bosọ to hihodo we.” Enẹwutu e kanse dọmọ: “Be etẹwẹ mí na tindo?”
Jesu dopagbe dọmọ: “To vọji mẹ, whenuena Ovi gbẹtọ tọn na sinai to ofin gigo etọn tọn ji, mìwlẹ ga na sinai to ofin wiawe ji, bo to whẹdana whẹndo wiawe Islaeli tọn lẹ.” Mọwẹ, Jesu to didohia dọ vọji ninọmẹ lẹ tọn na tin to aigba ji na onú lẹ nido sọgan tin kẹdẹdile yé tin to jipa Edẹni tọn mẹ do. Podọ Pita po devi devo lẹ po na mọ ahọsumẹ yí nado dugán hẹ Klisti do Paladisi lẹdo aihọn pé tọn ehe ji. Na jide tọn, ahọsumẹ daho hugan mọnkọtọn jẹ na avọ́sinsan depope!
Etomọṣo, etlẹ yin todin ahọsumẹ lẹ tin, dile Jesu dọ po jide po dọmọ: “Mẹde ma tin ehe jo owhé kavi mẹmẹsunnu lẹ, kavi mẹmẹyọnnu lẹ, kavi otọ́, kavi onọ̀, kavi asi, kavi ovi lẹ, kavi aigba lẹ dai, na yẹn tọn wutu, podọ na wẹndagbe tọn wutu, ṣigba e na mọyi to dinvie to ojlẹ he mẹ, kanweko donu kanweko owhé lẹ, mẹmẹsunnu lẹ, mẹmẹyọnnu lẹ, onọ̀ lẹ, ovi lẹ, po aigba lẹ po po homẹkẹn lẹ po, podọ to aihọn he ja mẹ ogbẹ̀ madopodo.”
Dile Jesu dopagbe do, fidepope he devi etọn lẹ yì to aihọn lọ mẹ, yé nọ duvivi haṣinṣan pẹkipẹki he họakuẹ taun tọn hẹ Klistiani hatọ lẹ hugan enẹ he nọ yin vivi etọn dù hẹ hagbẹ jọwamọ whẹndo tọn lẹ. Jọja aṣẹpatọ adọkunnọ lọ dile e họnwun do hẹn ahọsumẹ awe ehelẹ bú podọ enẹ heyin ogbẹ̀ madopodo to Ahọluduta olọn mẹ tọn Jiwheyẹwhe tọn mẹ.
To enẹgodo Jesu yidogọ dọmọ: “Ṣigba omẹ susu he yin tintan na yin godotọ; podọ godotọ lẹ nasọ yin tintan.” Etẹ dọ wẹ e te?
Nuhe dọ e te wẹ yindọ mẹsusu he yin “tintan” nado duvivi lẹblanulọkẹyi sinsẹ̀n tọn lẹ, taidi jọja aṣẹpatọ adọkunnọ lọ, ma na biọ Ahọluduta lọ mẹ gba. Yé na yin “godotọ.” Ṣigba mẹsusu, gọna devi whiwhẹnọ Jesu tọn lẹ, he Falesi dodonọ mẹdetiti tọn jlatọ lẹ nọ yí nukun pẹvi do pọ́n taidi “godotọ”—he yin omẹ aigba ji tọn lẹ, kavi ‛am ha·’aʹrets—na lẹzun “tintan.” Lilẹzun “tintan” yetọn zẹẹmẹdo dọ yé na mọ lẹblanulọkẹyi lọ yí nado lẹzun ganduhẹmẹtọ lẹ hẹ Klisti to Ahọluduta lọ mẹ. Malku 10:17-31; Matiu 19:16-30; Luku 18:18-30.
▪ Dile kunnudenu dohia do, aṣẹpatọ nankọ wẹ dawe jọja adọkunnọ lọ yin?
▪ Naegbọn Jesu jẹagọdo yinyin yiylọdọ mẹdagbe?
▪ Nawẹ numimọ jọja aṣẹpatọ lọ tọn basi dohia owù he tin to adọkunnọ yinyin mẹ gbọn?
▪ Ahọsumẹ tẹlẹ wẹ Jesu dopagbe etọn na hodotọ etọn lẹ?
▪ Nawẹ omẹ tintan na lẹzun godotọ, bọ godotọ na lẹzun tintan gbọn?