“Ṣie Wẹ Fataka, Podọ Ṣie Wẹ Sika” — WESẸDOTẸN INTẸNẸT JI TỌN Watchtower Tọn

“Ṣie Wẹ Fataka, Podọ Ṣie Wẹ Sika”

TO OWHE kanweko ṣidopotọ J.W.M., Ahọlu Kilusi Pẹlsia tọn tún omẹ Jiwheyẹwhe tọn lẹ dote sọn kanlinmọgbenu Babilọni tọn. Fọtọ́n susu yetọn lẹkọyi Jelusalẹm nado vọ́ tẹmpli Jehovah tọn he ko yin gbigbakija lọ gbá. Ninọmẹ mẹhe lẹkọ enẹlẹ tọn sinyẹn to akuẹzinzan-liho, podọ akọta kẹntọ he lẹdo yé lẹ jẹagọdo họgbigbá lọ. Enẹwutu, delẹ to họgbátọ lọ lẹ mẹ tindo ayihaawe eyin yé na penugo nado dotana azọ́n pligidi enẹ.

Gbọn yẹwhegán etọn Hagai gblamẹ, Jehovah vọ́ jide na họgbátọ lọ lẹ dọ Ewọ tin po yé po. “Yẹn nasọ whàn akọta lẹ, podọ ojlo akọta lẹpo tọn nasọ wá, yẹn bo nasọ yí gigo do gọ́ ohọ̀ he,” wẹ Jiwheyẹwhe dọ. Gando ahunmẹdunamẹnu họgbátọ lọ lẹ tọn go to akuẹzinzan-liho, Hagai dọmọ: “Ṣie wẹ fataka, podọ ṣie wẹ sika, wẹ OKLUNỌ awhànpa lẹ tọn dọ.” (Hagai 2:7-9) Owhe atọ́n to whenuena Hagai dọ hogbe tulinamẹ tọn enẹlẹ godo, azọ́n lọ yin tadona.—Ẹzla 6:13-15.

Hogbe Hagai tọn lẹ ko sọ whàn devizọnwatọ Jiwheyẹwhe tọn egbezangbe tọn lẹ to azọ́n dahodaho he gando sinsẹ̀n-bibasi Jehovah tọn go lẹ wiwà whenu. To 1879, whenuena pipli afanumẹ nugbonọ nuyọnẹntọ lọ tọn jẹ linlinnamẹwe ehe zinjẹgbonu ji, ehe nọ yin yiylọ to whenẹnu dọ Phare de la Tour de Sion et Messager de la Présence de Christ, linlinnamẹwe lọ bẹ hodidọ he bọdego ehe hẹn dọmọ: “Mí yise dọ ‘Phare de la Tour de Sion’ tindo JEHOVAH taidi godonọnamẹtọ etọn, podọ na whẹho lọ yinmọ wutu, e ma na vẹvẹ kavi biọ to gbẹtọ lẹ si gbede nado nọgodona ẹn. Whenuena Mẹlọ he dọmọ: ‘Ṣie wẹ sika lẹpo gọna fataka osó ji tọn lẹpo,’ gboawupo nado wleawuna akuẹ he jẹ lọ, mí na mọnukunnujẹemẹ dọ ojlẹ lọ ko wá nado do linlinnamẹwe lọ te.”

Linlinnamẹwe lọ ma ko doalọte pọ́n gbede. Zinjẹgbonu etọn tintan bẹ vọkan 6 000 hẹn, to Glẹnsigbe kẹdẹ mẹ. To egbehe, madozẹnzẹn zinjẹgbonu dopodopo tọn wẹ vọkan 28 578 000 to ogbè 161 mẹ.a Na nuhe dù Réveillez-vous!, yèdọ linlinnamẹwe he nọ zọnpọ hẹ Atọ̀họ̀-Nuhihọ́ Lọ Tọn, vọkan 34 267 000 wẹ nọ yin zinzinjẹgbonu to ogbè 80 mẹ.

Kunnudetọ Jehovah tọn lẹ nọ wazọ́n susu he tindo yanwle dopolọ hẹ Atọ̀họ̀-Nuhihọ́ Lọ Tọn—enẹ wẹ nado ze Jehovah daga taidi Oklunọ Nupojipetọ wẹkẹ lọ tọn bo lá wẹndagbe Ahọluduta etọn tọn. (Matiu 24:14; Osọhia 4:11) Nujikudo dopolọ he linlinnamẹwe ehe dohia to 1879 wẹ Kunnudetọ lẹ gbẹsọ tindo to egbehe. Yé yise dọ Jiwheyẹwhe nọ nọgodona azọ́n yetọn podọ akuẹ na tin-to-aimẹ na azọ́n he ewọ kẹalọyi lẹ. Ṣigba, nado dọ hójọhó, nawẹ azọ́n Kunnudetọ Jehovah tọn lẹ tọn nọ yin godonọna to akuẹzinzan-liho gbọn? Podọ azọ́n wunmẹ tẹlẹ wà wẹ yé te nado sọgan dọyẹwheho wẹndagbe lọ tọn lẹdo aihọn pé?

Nawẹ Azọ́n lọ Nọ Yin Godonọna to Akuẹzinzan-Liho Gbọn?

Eyin Kunnudetọ Jehovah tọn lẹ to yẹwhehodọ to gbangba, gbẹtọ lẹ nọ saba kanse yé dọ: “Nẹmu yé ka nọ sú mì na azọ́n lọ taun?” Gblọndo lọ wẹ yindọ yé ma nọ mọ akuẹ depope yí. Yé nọ yí whenu yetọn zan vọnu. Pinpẹn-nutọn-yinyọnẹn wẹ nọ whàn wẹndagbe-jlatọ ehelẹ nado yí whenu susu zan nado dọhona mẹdevo lẹ dogbọn Jehovah po opagbe Biblu tọn gando sọgodo dagbe de go po dali. Yé yọ́n pinpẹn nuhe Jiwheyẹwhe ko wà na yé lẹ gọna obá he mẹ wẹndagbe lọ ko hẹn gbẹzan po pọndohlan yetọn po pọnte jẹ tọn. Enẹwutu, yé nọ jlo nado má nudagbe ehelẹ hẹ mẹdevo lẹ. To mọwiwà mẹ, yé nọ hodo nunọwhinnusẹ́n he go Jesu donù dọmọ: “Vọnu wẹ mì mọyi, vọnu wẹ mì ni namẹ.” (Matiu 10:8) Na nugbo tọn, ojlo yetọn nado yin kunnudetọ Jehovah po Jesu po tọn nọ whàn yé nado yí akuẹ yetọn titi zan nado sọgan má nuyise yetọn lẹ hẹ gbẹtọ lẹ, etlẹ yin mẹhe nọ nọ̀ fihe dẹn do yé tlala lẹ.—Isaia 43:10; Owalọ lẹ 1:8.

Obá he mẹ azọ́n yẹwhehodidọ tọn ehe gbloada jẹ po nuhe nọ yin yiyizan nado wà ẹ dotana lẹ po—yèdọ wezintẹn, wekantẹn, Plitẹnhọ Plidopọ tọn, owhé mẹdehlan tọn lẹ po mọmọ po—nọ biọ akuẹzinzan susu. Fie wẹ akuẹ lọ nọ wá sọn? Akuẹ he nọ yin yiyizan nado penukundo azọ́n ehe lẹpo go nọ wá sọn nunina sọn ojlo mẹ wá lẹ mẹ. Kunnudetọ Jehovah tọn lẹ ma nọ biọ to hagbẹ agun tọn lẹ si nado na akuẹ na nuwiwa titobasinanu lọ tọn lẹ, mọjanwẹ yé masọ nọ biọ akuẹ na owe he yé nọ má lẹ do niyẹn. Eyin mẹdepope jlo na basi nunina nado nọgodona azọ́n mẹpinplọn tọn yetọn, homẹ Kunnudetọ lẹ tọn nọ hùn nado kẹalọyi nunina mọnkọtọn. Mì gbọ mí ni lẹnnupọndo dopo tata to nuhe e nọ biọ nado dọyẹwheho wẹndagbe lọ tọn lẹdo aihọn pé lẹ mẹ ji—yèdọ azọ́n lẹdogbedevomẹ tọn.

Owe lẹ to Ogbè 437 Mẹ

Sọn owhe susu die, owe Kunnudetọ Jehovah tọn lẹ tọn tin to dehe nọ yin lilẹdogbedevomẹ hugan lẹdo aihọn pé lẹ mẹ. Alọnuwe pẹvi po daho po, linlinnamẹwe po owe lẹ po ko yin lilẹdo ogbè 437 mẹ. Na nugbo tọn, taidi azọ́n devo he yẹwhehodidọ wẹndagbe lọ tọn bẹhẹn lẹ, lẹdogbedevomẹ bibasi nọ biọ akuẹzinzan susu. Etẹwẹ azọ́n lẹdogbedevomẹ tọn bẹhẹn na taun tọn?

Eyin wekantọ Kunnudetọ Jehovah tọn lẹ fó azọ́n do hosọ de ji to Glẹnsigbe mẹ, e nọ yin didohlan pipli lẹdogbedevomẹ-basitọ he mọ azọ́nplọnmẹ yí lẹ tọn lẹdo aihọn pé gbọn ọdinatẹẹ gblamẹ. Pipli dopodopo nọ penukundo dopo to ogbè he mẹ owe mítọn lẹ nọ yin zinzinjẹgbonu te lẹ mẹ go. Sọgbe hẹ sọha azọ́n he tin to alọnu lẹ tọn po lehe ogbè he mẹ yé dona lilẹ́ owe lẹ do gẹdẹ sọ po, pipli ehelẹ sọgan bẹ nudi gbẹtọ 5 yì 25 hẹn.

Eyin hosọ lọ ko yin lilẹdogbedevomẹ fó, e nọ yin gbigbejepọn po Glẹnsigbe po bo nọ yin vivọ́ hia nado hẹn ẹn dídí. Yanwle lọ wẹ nado de linlẹn he hosọ lọ bẹhẹn lẹ tọ́n to ogbè yetọn mẹ to aliho he sọgbe bosọ họnwun mẹ dile e sọgan yọnbasi do. Ehe nọ bẹ avùnnukundiọsọmẹnu susu hẹn. To azọ́nwiwa do hosọ he yí hogbe gigẹdẹ lẹ zan de ji whenu, e sọgan biọ dọ lẹdogbedevomẹ-basitọ lẹ po wehiatọ vọjlado basitọ lẹ po ni basi dodinnanu yinukọn to ogbè he mẹ hosọ lọ yin winwlan te (Glẹnsigbe kavi ogbè devo taidi Espagne-gbè, Flansegbe, kavi Russie-gbè) podọ to ogbè he mẹ e dona yin lilẹdo mẹ nado hẹn ẹn diun dọ lẹdogbedevomẹ lọ sọgbe. Di apajlẹ, whenuena hosọ Réveillez-vous! tọn de dọhodo azọ́n nuyọnẹn wintinwintin tọn kavi whenuho ji, dandannu wẹ e yin nado basi dodinnanu susu.

Susu lẹdogbedevomẹ-basitọ lẹ tọn nọ wazọ́n to wekantẹn alahọ Kunnudetọ Jehovah tọn lẹ tọn, vlavo na whenu-gigọ́ kavi na whenu-gli. Mẹdevo lẹ nọ wazọ́n to fie ogbè he mẹ yé nọ lilẹ́ owe lẹ do lọ nọ yin dido te. Lẹdogbedevomẹ-basitọ lẹ ma nọ mọ akuẹ yí na azọ́n he wà yé te. Ohọ̀ po núdùdù po nọ yin awuwlena na lẹdogbedevomẹ-basitọ whenu-gigọ́ tọn lẹ gọna apòmẹkuẹ kleun de na akuẹzinzan mẹdetiti tọn lẹ. Lẹdo aihọn pé, nudi Kunnudetọ 2 800 wẹ to devizọnwa taidi lẹdogbedevomẹ-basitọ. To alọnu din, wekantẹn alahọ Kunnudetọ Jehovah tọn lẹ tọn 98 wẹ tindo pipli lẹdogbedevomẹ-basitọ lẹ tọn kavi nọ penukundo pipli mọnkọtọn he tin to fidevo lẹ go. Di apajlẹ, alahọ Russie tọn nọ penukundo lẹdogbedevomẹ-basitọ whenu-gigọ́ kavi whenu-gli tọn hugan 230 go he nọ lilẹ́ owe mítọn lẹ do ogbè he lán to 30 ji mẹ, ehe delẹ to yé mẹ taidi ossète, ouïgour, po tchouvache po ma tlẹ yin yinyọnẹn sọmọ to fidevo lẹ.

Lẹdogbedevomẹ lọ lẹ Yin Hinhẹn Pọnte Dogọ

Dile mẹdepope he ko tẹnpọn nado plọn ogbè devo sọgan yọnẹn do, e ma nọ bọawu nado lilẹ́ linlẹn gigẹdẹ lẹ do ogbè devo mẹ to aliho he sọgbe mẹ. Yanwle lọ wẹ nado de nudọnamẹ po linlẹn he tin to hosọ lọ mẹ lẹ po tọ́n to aliho he sọgbe mẹ podọ to ojlẹ dopolọ mẹ nado hẹn lẹdogbedevomẹ lọ dídí, taidi dọ ogbè lọ mẹ wẹ hosọ lọ yin kinkàn do tlọlọ. Anazọ́n de wẹ ehe yin. E nọ yí owhe susu to lẹdogbedevomẹ-basitọ yọyọ lẹ si nado yọ́n azọ́n lọ ganji, podọ Kunnudetọ Jehovah tọn lẹ nọ basi tito azọ́nplọnmẹ he to nukọnzindo de tọn na yé. To whedelẹnu, mẹplọntọ lẹ nọ dla pipli lẹdogbedevomẹ-basitọ lẹ tọn pọ́n bo nọ gọalọna yé nado hẹn azọ́nyinyọnẹn yetọn pọnte dogọ to lẹdogbedevomẹ bibasi po ọdinatẹẹ yiyizan po mẹ.

Tito azọ́nplọnmẹ tọn ehe to sinsẹ́n dagbe detọ́n. Di dohia, alahọ Kunnudetọ Jehovah tọn lẹ tọn to Nicaragua na linlin dọmọ: “Tintan die bọ lẹdogbedevomẹ-basitọ mítọn ogbè miskito tọn lẹ mọ azọ́nplọnmẹ yí gando afọdide debọdo-dego po aliho nuyiwa lẹdogbedevomẹ bibasi tọn lẹ po go sọn mẹplọntọ he wá sọn alahọ Mexique tọn mẹ de si. Ehe ko hẹn diọdo dagbe lẹ wá to aliho he mẹ lẹdogbedevomẹ-basitọ mítọn lẹ nọ penukundo azọ́ndenamẹ yetọn lẹ go te mẹ. Lẹdogbedevomẹ yetọn dintọn lẹ ko pọnte deji tlala.”

Hogbe He Nọ Yinuwado Ahun Mẹtọn Ji Lẹ

Yanwle he wutu vivẹnu to yinyin dido nado wleawuna Biblu po owe sinai do Biblu ji lẹ po do ogbè gbẹtọ lẹ tọn mẹ wẹ nado jẹ ahun yetọn mẹ, podọ nuhe to jijọ lọ pẹpẹ niyẹn. To 2006, Kunnudetọ Jehovah tọn Bulgarie tọn lẹ gọ́ na ayajẹ to whenuena Biblu Les Écritures grecques chrétiennes—Traduction du monde nouveau yin didetọn to ogbè Bulgarie tọn mẹ. Alahọ Bulgarie tọn na linlin dọ hogbe pinpẹn-nutọn-yinyọnẹn tọn susu wẹ yé ko mọyi gando Biblu ehe go. Hagbẹ agun tọn lẹ dọ dọ “Biblu nọ yinuwado ahun yetọn ji taun todin, e ma yin ayiha yetọn kẹdẹ gba.” Dawe mẹhomẹ de sọn Sofia dọmọ: “N’ko to Biblu hia na owhe susu, ṣigba n’ma ko hia lẹdogbedevomẹ he bọawu nado mọnukunnujẹemẹ sọmọ bosọ nọ biọ ahun mẹ tlọlọ de pọ́n gbede.” Mọdopolọ to Albanie, to vọkan Biblu Traduction du monde nouveau blebu tọn mimọyi to Albanie-gbè mẹ godo, Kunnudetọ otò lọ tọn de dọmọ: “Lehe Ohó Jiwheyẹwhe tọn yọ́nsè to Albanie-gbè mẹ do sọ! Lẹblanulọkẹyi nankọ die nado sè bọ Jehovah to hodọna mí do ogbè mítọn titi mẹ!”

E sọgan yí owhe susu to pipli lẹdogbedevomẹ-basitọ lẹ tọn si nado lilẹ́ Biblu blebu do ogbè de mẹ. Ṣigba, eyin enẹ gọalọna livi susu gbẹtọ lẹ tọn nado wá mọnukunnujẹ Ohó Jiwheyẹwhe tọn mẹ nugbonugbo, be hiẹ ma na yigbe dọ e jẹ nado dovivẹnu ehe lẹpo ya?

“Azọ́nyiwahẹmẹtọ Dopọ hẹ Jiwheyẹwhe Wẹ Míwlẹ”

Na nugbo tọn, dopo to azọ́n susu he e nọ biọ nado dọyẹwheho wẹndagbe lọ tọn po kọdetọn dagbe po lẹ mẹ wẹ lẹdogbedevomẹ yin. E nọ biọ vivẹnudido po akuẹzinzan susu po nado kàn owe sinai do Biblu ji lẹ bo zín yé jẹgbonu bosọ do yé hlan podọ nado wà azọ́n susu devo he gando ehe go lẹ to alahọ, lẹdo po agun Kunnudetọ Jehovah tọn lẹ po mẹ. Ṣogan, omẹ Jiwheyẹwhe tọn lẹ nọ “yin ojlonọ” kavi nọ ze yede jo sọn ojlo mẹ wá nado wà azọ́n ehe. (Psalm 110:3) To nukun yetọn mẹ, lẹblanulọkẹyi de wẹ e yin nado penugo bo basi nunina yetọn titi, podọ yé nọ mọ ẹn taidi gbégbò de dọ Jehovah nọ pọ́n yé hlan taidi “azọ́nyiwahẹmẹtọ” etọn lẹ.—1 Kọlintinu lẹ 3:5-9.

Nugbo wẹ dọ mẹlọ he dọ dọ “ṣie wẹ fataka, podọ ṣie wẹ sika” ma nọ donukun alọgọ mítọn to akuẹzinzan-liho nado wà azọ́n etọn dotana gba. Etomọṣo, Jehovah ko doyẹyigona devizọnwatọ etọn lẹ po lẹblanulọkẹyi lọ po nado tindo mahẹ to oyín etọn kinklandowiwe mẹ; yé nọ wà ehe gbọn nunina bibasi do azọ́n nugbo gbẹwhlẹngán tọn lẹ lilá na “akọta lẹpo” tọn lọ tamẹ. (Matiu 24:14; 28:19, 20) Be hiẹ ma yin whinwhàn nado wà nuhe go a pé lẹpo nado nọgodona azọ́n he ma nasọ yin wiwà gbede ba ehe ya?

[Nudọnamẹ Odò Tọn]

a Na todohukanji ogbè lọ lẹ tọn, pọ́n weda 2 linlinnamẹwe ehe tọn.

[Apotin to weda 18]

“YÉ NỌ HẸN MÍ LẸNNUPỌN SISOSISO”

Viyọnnu owhe 14 mẹvi de kanwehlan alahọ Kunnudetọ Jehovah tọn lẹ tọn to Cameroun dọmọ: “To whenuena n’họ̀ núzinzan wehọmẹ tọn ṣie lẹ na owhe ehe, n’penugo nado sà awe to nuplọnmẹwe owhe he wayi tọn lẹ mẹ yin 2 500F CFA. N’to akuẹ ehe gọna 910F CFA he n’jọ dohlan mì taidi nunina de. N’jlo na na tuli mì nado zindonukọn to azọ́n dagbe he wà mì te mẹ. Mì wanu na linlinnamẹwe Atọ̀họ̀-Nuhihọ́ Lọ Tọn po Réveillez-vous! po. Yé nọ hẹn mí lẹnnupọn sisosiso.”

[Apotin/Yẹdide to weda 18]

NUNINA VONỌTAUN DE

Alahọ Kunnudetọ Jehovah tọn lẹ tọn to Mexique mọ wekanhlanmẹ he bọdego ehe yí sọn visunnu pinpẹn-nutọn-yọnẹntọ owhe ṣidopo mẹvi de si, he nọ yin Manuel bo nọ nọ̀ Ayimatẹn Chiapas tọn mẹ. Na e ma ko yọ́n wekan wutu, họntọn etọn dopo wẹ wlanwe lọ na ẹn. Manuel dọmọ: “Onọ̀-daho ṣie na mi ohàn-asi de. Whenuena e jivi, n’de dehe yọnwhanpẹ hugan lọ dovo bọ mẹmẹsunnu lẹ gọalọna mi nado yìn in. Homẹ ṣie hùn tlala nado do akuẹ he n’sà ohàn lọ yin hlan mì taidi nunina de. Zínpinpẹn etọn yì kilo 100, bọ n’sà ẹ yin 1 250 pesos [nudi 54 000F CFA]. Mì jaale bo yí akuẹ lọ zan na azọ́n Jehovah tọn.”

[Apotin to weda 19]

‘MÌ YÍ EHE ZAN DO BASI LẸDOGBEDEVOMẸ BIBLU TỌN’

To plidopọ agbegbe 2005 tọn Kunnudetọ Jehovah tọn lẹ tọn whenu to Ukraine, Biblu Les Écritures grecques chrétiennes—Traduction du monde nouveau yin didetọn to Ukraine-gbè mẹ. To wunkẹngbe, wekanhlanmẹ ehe yin mimọ to apotin nunina plidopọ lọ tọn de mẹ he dọmọ: “Owhe ṣinẹnẹ mẹvi wẹ n’yin. Mì wanu taun na Biblu Les Écritures grecques chrétiennes lọ. Onọ̀ mítọn na akuẹ ehe yẹn po nọvisunnu ṣie po nado nọ dohún yì wehọmẹ. Ṣigba, eyin jikun ma ja, mí nọ zọ̀nafọ yì wehọmẹ bo penugo nado jọ akuẹ 50 hryvnia ehe [nudi 4 500F CFA]. Yẹn po nọvi ṣie po na jlo dọ mì ni yí ehe zan nado lilẹ́ Biblu blebu do Ukraine-gbè mẹ.”

[Apotin to weda 20, 21]

ALIHO HE MẸ MẸDELẸ DE NADO NANÚ TE LẸ

NUNINA LẸ NA AZỌ́N LẸDO AIHỌN PÉ TỌN

Mẹsusu nọ de, kavi klan akuẹ sọha de dovo he yé nọ yí do apotin nunina tọn he go yè kàn “Nunina lẹ Na Azọ́n Lẹdo Aihọn Pé Tọn—Matiu 24:14” do lẹ mẹ.

To osun dopodopo mẹ, agun lẹ nọ do akuẹ ehelẹ hlan wekantẹn Kunnudetọ Jehovah tọn lẹ tọn he nọ penukundo otò yetọn go. Akuẹ he yin nina sọn ojlo mẹ wá lẹ sọgan sọ yin didohlan Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483 tlọlọ, kavi hlan wekantẹn alahọ Kunnudetọ Jehovah tọn lẹ tọn he nọ penukundo otò mìtọn go. Akuẹyiwema he yin didohlan gbọn adlẹsi he tin to aga lọ gblamẹ lẹ dona yin awuwlena do “Watch Tower” tamẹ. Aṣọ́donu akuẹgegenu tọn lẹ kavi nuhọakuẹ devo lẹ sọgan sọ yin nina ga. Wekanhlanmẹ kleun de dona hodo nunina ehelẹ bo dohia dọ nunina tlọlọ lẹ wẹ yé yin.

TITO NUNINA HE SINAI DO NINỌMẸ JI TỌN

Akuẹ sọgan yin nina Watch Tower to tito vonọtaun de glọ nado yin yiyizan lẹdo aihọn pé. Ṣigba eyin nunamẹtọ lọ gọ̀ nunina lọ biọ, e na yin gigọjo hlan ẹn. Na nudọnamẹ dogọ, jaale kanwe hlan Wekantẹn Akuẹbẹhẹntọ tọn gbọn adlẹsi he tin to aga lọ yiyizan dali.

TITO NUNAMẸ HOMẸDAGBE TỌN

Gbọnvona nunina akuẹ tọn tlọlọ lẹ, nunina wunmẹ devo lẹ tin ga na alemọyi sinsẹ̀nzọn lẹdo aihọn pé Ahọluduta lọ tọn. Ehelẹ wẹ:

Alọgọ Owù-Nujijọ Tọn: Watch Tower Bible and Tract Society of Pennsylvania sọgan yin nina alemọyi nunina alọgọ owù-nujijọ gbẹzan tọn kavi tito gbọjẹ gaa/agbasazọ́n jijodo tọn de.

Akuẹ He Tin to Akuẹsẹdotẹn Lẹ: Akuẹ he tin to akuẹsẹdotẹn lẹ, kandai akuẹsẹdo tọn lẹ, kavi akuẹ gbọjẹ gaa mẹdopodopo tọn lẹ sọgan yin zizedo kandai ogú mimá tọn mẹ kavi sọgan yin súsú lẹkọ to okú godo hlan Watch Tower Bible and Tract Society of Pennsylvania, to kọndopọ mẹ hẹ nubiọtomẹsi akuẹsẹdotẹn lẹdo lọ tọn lẹ.

Kandai Akuẹ Ajọ́ Tọn lẹ po Ale Ajọ́ Tọn lẹ Po: Kandai akuẹ ajọ́ tọn lẹ po ale ajọ́ tọn lẹ po sọgan yin nina Watch Tower Bible and Tract Society of Pennsylvania taidi nunina tlọlọ de.

Ohọ̀ po Aigba Po: Ohọ̀ po aigba po he sọgan yin sisà sọgan yin nina vlavo gbọn nunina tlọlọ de bibasi dali kavi, na nuhe dù aigba fininọ lẹ, gbọn hinhẹn ohọ̀ po aigba de po dote na nunamẹtọ lọ na gbẹwhenu etọn dali. Dọna alahọ otò towe tọn whẹpo do basi nunina ohọ̀ po aigba po tọn depope.

Nunina Whemẹwhemẹ Tọn: Nunina whemẹwhemẹ tọn yin tito de to ehe mẹ mẹde nọ na akuẹ azọ́nwatẹn tangan he Kunnudetọ Jehovah tọn lẹ nọ yizan de. To ehe mẹ, nunamẹtọ lọ kavi mẹhe yin dide gbọn nunamẹtọ lọ dali, nọ yí akuẹ tangan de to owhe dopodopo mẹ na pipotọ gbẹzan etọn tọn. Nunamẹtọ lọ nọ mọ ale takuẹ didepo tọn de yí to owhe he mẹ nunina whemẹwhemẹ tọn lọ yin didoai te.

Kandai Gúmima po Nunina lẹ Tọn Po: Nutindo kavi akuẹ sọgan yin nina taidi ogú hlan Watch Tower Bible and Tract Society of Pennsylvania gbọn kandai sọgbe hẹ osẹ́n de bibasi dali, kavi yinkọ Watch Tower Bible and Tract Society of Pennsylvania tọn sọgan yin kinkàndai taidi mẹhe na dugu nunina lẹ tọn. Nunina he yin bibasi do titobasinanu sinsẹ̀n tọn de tamẹ sọgan de takuẹ he nọ yin bibiọ delẹ pò.

Dile hogbe lọ “tito nunamẹ homẹdagbe tọn” dohia do, nunina wunmẹ ehelẹ nọ biọ tito bibasi delẹ to adà nunamẹtọ lọ tọn mẹ. Nado gọalọna mẹhe to jijlo nado hẹn azọ́n lẹdo aihọn pé Kunnudetọ Jehovah tọn lẹ tọn mọaleyi sọn wunmẹ tito nunamẹ homẹdagbe tọn delẹ mẹ, alọnuwe de ko yin awuwlena to Espagne-gbè po Glẹnsigbe po mẹ he hosọ etọn yin Charitable Planning to Benefit Kingdom Service Worldwide [Tito Nunamẹ Homẹdagbe Tọn Na Alemọyi Sinsẹ̀nzọn Ahọluduta Tọn Lẹdo Aihọn Pé]. Alọnuwe lọ yin kinkàn nado na nudọnamẹ lẹ dogbọn aliho voovo he mẹ nunina lẹ sọgan yin bibasi te vlavo todin kavi gbọn ogú jijodai to okú godo dali. To alọnuwe lọ hihia po hodọdopọ hẹ ayinamẹtọ osẹ́n po takuẹ po tọn yetọn titi po godo, mẹsusu ko penugo nado nọgodona nuwiwa sinsẹ̀n tọn po kọgbọ hẹnwanamẹ tọn Kunnudetọ Jehovah tọn lẹ tọn po lẹdo aihọn pé bo de takuẹ he nọ yin bibiọ lẹ pò taun to mọwiwà mẹ. Alọnuwe ehe sọgan yin mimọyi gbọn vọkan dopo bibiọ sọn Wekantẹn Tito Nunamẹ Homẹdagbe tọn dè tlọlọ dali.

Na nudọnamẹ dogọ, hiẹ sọgan dọnsẹpọ Wekantẹn Tito Nunamẹ Homẹdagbe tọn, vlavo gbọn wekanhlanmẹ kavi alokan dali, to adlẹsi he yin sislẹ to odò yiyizan mẹ kavi hiẹ sọgan dọnsẹpọ wekantẹn alahọ Kunnudetọ Jehovah tọn lẹ tọn he nọ penukundo otò mìtọn go.

Wekantẹn Tito Nunamẹ Homẹdagbe Tọn

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Alokan: (845) 306-0707

[Yẹdide to weda 19]

Lẹdogbedevomẹ-basitọ miskito tọn lẹ, to alahọ Nicaragua tọn mẹ