Etẹwẹ Yin Nuhọakuẹ Na We to Gbẹ̀mẹ?
KENNY nọ wazọ́n to azọ́nwhé daho de mẹ, bo tindo gbẹduhun vẹnpẹn akuẹgegenu de, bosọ nọ nọ̀ ohọ̀ whanpẹnọ he tin to petlezìn he yiaga taun de mẹ to lẹdo adọkunnọ tòdaho lọ tọn mẹ. Taidi aihundatọ lanmẹyiya tọn numimọnọ de, homẹ etọn nọ hùn nado lọ́n sọn agahun he dẹn na mẹtlu kanweko susu lẹ do aigba. Be ehe lẹpo hẹn ẹn tindo pekọ to gbẹzan mẹ ya? Sọgbe hẹ linlinwe de, e dọmọ: “Owhe 45 wẹ n’tindo todin, podọ sọgodo ṣie ma họnwun . . . Gbẹzan ṣie ma tindo zẹẹmẹ.”—The Wall Street Journal.
Elyn wazọ́n sinsinyẹn nado lẹzun aihundatọ lanmẹyiya tọn he diyin de. To godo mẹ, e jẹ yanwle etọn kọ̀n bo wá lẹzun aihundatọ nukundeji de. “Ṣigba fie wẹ ayajẹ he n’lẹndọ n’na tindo lọ lẹpo te?” wẹ Elyn wule dọ. “N’nọ tindo numọtolanmẹ ṣokẹdẹninọ tọn taun. Yọnho na blá mi pete to madẹnmẹ podọ dile etlẹ yindọ n’do akuẹ taun, ogbẹ̀ ma na tindo zẹẹmẹ depope eyin ehe wẹ yanwle he n’tindo to gbẹ̀mẹ lẹpo.”
Hideo diyin taidi anazọ́nwatọ azọ́nyọnẹntọ de bo nọ yí whenu etọn lẹpo zan na azọ́n lọ. E ma sà anazọ́n etọn lẹ na e lẹndọ mọwiwà na dekanpona nujọnu-yinyin azọ́n etọn tọn wutu. Sẹpọ vivọnu gbẹzan etọn tọn to owhe 98 mẹvi yinyin mẹ, e na suhugan anazọ́n etọn tọn onú hoho-sẹdotẹn de. E yí gbẹzan etọn lẹpo do doafọna anazọ́n. Ṣogan, e ma tindo pekọ, na e lẹndọ emi ma na penugo gbede nado hẹn azọ́n emitọn pegan mlẹnmlẹn.
Mẹdelẹ nọ dovivẹnu bo nọ yí nutindo susu do sanvọ́ nado gọalọna mẹdevo lẹ. Di apajlẹ, lẹnnupọndo mẹhe tindo aṣẹ to azọ́nwhé he nọ basi sinemọto to Hollywood de ji. Taidi mẹhe bọdo ogán daho azọ́nwhé sinemọto tọn de go to États-Unis, e nọ dogbẹ́ hẹ gbẹtọ nukundeji lẹ bo nọ nọ̀ lẹdo akuẹnọ lẹ tọn de mẹ. To whenuena e dla Cambodge pọ́n to gbọjẹ de whenu, viyọnnu de dọnsẹpọ ẹ dile e to núdù to núdùtẹn de mẹ to Phnom Penh he yin tatọ́-tònọ otò lọ tọn bo to akuẹ biọ ẹ. E na ẹn dọla Amelika tọn dopo po ahàn-vivi ogo dopo po. Homẹ viyọnnu lọ tọn hùn. Ṣigba, to ozán he bọdego mẹ, viyọnnu lọ sọ gọwá bo gbẹ́ to nubiọ. Dawe lọ mọdọ viyọnnu lọ tindo nuhudo susu hugan alọgọ tejiteji tọn de poun.
To owhe dopo godo, dawe ehe basi dide nado diọ yanwle gbẹzan tọn etọn bo jo azọ́n he e nọ wà dai do nado sọgan gọalọna wamọnọ lẹ to Cambodge. E do wehọmẹ de ai he bẹ awuwledainanu lẹ hẹn taidi adọtẹn, núdùdù po wepinplọn po. Etomọṣo, e nọ to ahidi hẹ numọtolanmẹ voovo lẹ to whepoponu—yèdọ ayajẹ po pekọ po na nuhe e to wiwadotana lẹ podọ todido matindo po flumẹjijẹ po na nuhahun madodògbo he e dona pehẹ lẹ.
Omẹ ẹnẹ he ṣẹṣẹ yin nùdego lẹpo lẹndọ yé yọ́n nuhe yé jlo na wadotana to gbẹ̀mẹ. Ṣogan, yé ma tindo pekọ to whenuena yé ko dovivẹnu vẹkuvẹku nado jẹ yanwle lọ kọ̀n godo. Etẹwẹ yin yanwle towe to gbẹ̀mẹ? Etẹwẹ tin to otẹn tintan mẹ na we to gbẹzan towe mẹ? Be hiẹ deji dọ aliho he mẹ hiẹ to gbẹzan towe zan te ma na vẹna we to godo mẹ ya?