Awuvẹmẹ to Aihọn Kanyinylan Tọn de Mẹ

DAWE de to ovà-zọ̀n sinsinyẹn jẹ to Burundi. E dona yin zize sọyi dotowhé to niyaniya mẹ. Gbọnna? Mọto depope ma tin-to-aimẹ nado ze e sọyi. Awe to họntọn etọn lẹ mẹ wá nado gọalọna ẹn. Yé ze e do kẹkẹ tata ji bo sisẹ́ ẹ na ganhiho atọ́n po nuṣikọ po gbọ̀n lẹdo osónọ lẹ mẹ. Yé mọ ahihun de bo ze e do e mẹ yì dotowhé he to yakẹ de. Azán vude godo, e mọ ede mẹ taun.

To awà aihọn lọ tọn devo ji, to whenuena jẹhọn ahizi Katrina ko gídí lẹdo États-Unis tọn he to tọ̀tó de to août 2005 godo, pipli mẹdezejotọ lẹ tọn de mọ ohọ̀ he ji atin lẹ họ́ jẹ de. Dile etlẹ yindọ mẹdezejotọ lọ lẹ ma yọ́n mẹhe tindo ohọ̀ lọ sọn fide, yé yí azán lọ blebu zan nado sán atin lọ lẹ po maṣinu he nọ sán atin po bosọ bẹ ogbó lẹ sẹ̀. ‘Hogbe lẹ whè do mi nado dopẹna omẹ ehelẹ,’ wẹ mẹhe tindo ohọ̀ lọ dọ.

Linlin mẹhẹnjọsi tọn lẹ nọ saba zinnudo nujijọ kanyinylan tọn po danuwiwa tọn lẹ po ji. Linlin ehelẹ nọ saba ṣinyọnyẹ nuyiwa awuvẹmẹ po homẹdagbe po tọn lẹ ji. Nalete, ehe ma diọ nugbo lọ dọ gbẹtọ lẹ to filẹpo tindo nuhudo owanyi po awuvẹmẹ po tọn badabada. Mí tindo ojlo vẹkuvẹku na awuvẹmẹ! Numọtolanmẹ mọnkọtọn lẹ nọ saba yin mimọ to ojlẹ hùnwhẹ Noẹli tọn whenu, whenuena mẹsusu nọ dọho kavi jihàn gando ‘jijọho po dagbewiwa na gbẹtọ lẹ po’ go.—Luku 2:14, Bible du roi Jacques (Glẹnsigbe).

Awuvẹmẹ didohia sọgan nọma bọawu to aihọn he mẹ kanyinylan po fifiẹ po gbayipe te ehe. Pọndohlan he gbẹtọ lẹ tindo to paa mẹ wẹ yindọ kanyinylan po mẹtọnmahopọn po nọ gọalọnamẹ nado gbawhàn bo tindo kọdetọn dagbe. E taidi dọ mẹsusu nọ hodo linlẹn lọ dọ nuyọnẹnnu wẹ e yin nado ylanhùn kakati nado yin awuvẹmẹtọ. Nukunkẹn po goyiyi po nọ glọnalina awuvẹmẹ didohia po awubibọ po.

Taidi kọdetọn de, mẹsusu nọ yin ṣejannabinọ bo nọ miyọnnukundo numọtolanmẹ kavi dagbe mẹdevo lẹ tọn. Aihundatọ nukundeji lẹ nọ saba yin yiylọdọ “sunnu glegbenu” he ma nọ do awuvẹmẹ depope hia lẹ. Aṣẹpatọ tonudọtọ delẹ nọ yinuwa to aliho mọnkọtọn mẹ ga.

Enẹwutu, mí dona kanse míde dọ: Naegbọn mí dona yin awuvẹmẹtọ? Be awuvẹmẹ nọ yinuwadomẹji na dagbe ya? Podọ etẹwẹ sọgan gọalọna mí nado nọ do awuvẹmẹ hia? Hosọ he bọdego na dọhodo kanbiọ ehelẹ ji.

[Apotin to weda 3]

•Be madogán wẹ awuvẹmẹ didohia yin ya?

•Be awuvẹmẹ didohia tindo ale ya?

•Aliho yọ́n-na-yizan tẹlẹ mẹ wẹ hiẹ sọgan do awuvẹmẹ hia te?